محمد عبد الماجد
(الغاز) طلع في استاد المريخ ونحن بنفتش عنو في الحلة
“”””””””””””””””””””””””””””””””””””””
والله يا بكري المدينة الأيامات دي إنت قاعد تنفعنا في الهلال أكتر من مدثر كاريكا
“”””””””””””””””””””””””””””””””””””””
لو سمعتوا المباراة في الإذاعة ..ح يقولوا ليكم (الشرطة) هي العملت فوضى ..ولذلك تم إخلاء الملعب من (الشرطة)
“”””””””””””””””””””””””””””””””
المباراة دي لو كان طرفها الهلال كانوا قالوا الثورة والتكسير كان من جمهور الهلال
“”””””””””””””””””””””””””””””
• نحن قاعدين (مساكين) زي (كراسي) المناسبات من تشوف ليها (بوكسي) قلبها يفر.
• تمسكها (رجفة).
• ولا شغالين بالموضوع.
• قاعد يا سلك ..ورأسي ضارب.
• قلت الليلة لو احتجبت (سلك) ما بريحني.
• لو كتبت عن (عثمان حسين) سلك بيزعل…وما برضى.
• احسن الاحتجاب.
• بيقوم يقول السبب تعادل الهلال مع هلال التبلدي.
• يا ربي اكتب عن (الفلانتاين).
• فلانتاين شنو يا زول؟.
• دي سخانة يكتبوا فيها عن (الفلانتاين).
• الفلانتاين دا انتهى ليه اسبوع ما تبقى متأخر كدا.
• زي (عالم الرياضة) البيجي الساعة واحدة ونص – تحس بيه مشاتر – مشاتر.
• زي البطيخة البيجيبوها ليك قبل الغداء.
• فلانتاين شنو يا زول؟.
• طيب اتصرف كيف؟.
• اكتب عن (جقور المنشية)..والله الجقور دي ما خلينا ليها شيء.
• جقور (لوجستية).
• وجقور من غير (لوجستي).
• جقور فرنسية.
• وجقور تركية.
• ما خلينا لينا (جقر) حايم.
• الكوبري بتاع المنشية لو شاف الكتابات دي – هو ذاتو كان قال (الجقور) يا ريتها لو اكلتني.
• اقول ليكم حاجة.
• مشكلة كوبري المنشية في (التمساح) ما في (الجقور).
• عينكم في (التمساح) وتطعّنوا في (الجقور).
• الجقور ما عندها ضهر.
• لو عندها ضهر ..ما كان هاجمتوها كدا.
• بالله (كتاباتنا) بقت زي (الكدائس) – نهاجم في (الجقور) تقول (قطط).
• خلينا شغلتنا وقاصدنا ليك (جقور المنشية).
• وجقور المنشية ما عندها اي ذنب.
• ما عندها اي دخل.
• اوعك!!.
• اوعك شنو كمان؟.
• طيب يا جماعة نكتب عن شنو؟.
• قاعد بفكر كدا – قالوا لي (الغاز) قطع.
• قلت ليهم دا وقتو.
• عندنا انبوبة زي (الشافع) البيسأل اسئلة محرجة – بتقطع في وقت عجيب.
• في وقت محرج.
• بس من تشوف ليها ضيوف – تقوم تقطع.
• تصوروا (الفحم) ما بعمل الحركات دي.
• اصلو (الفحم) ولا (الحطب) ما قاعدين يتلوموا ليهم في زول.
• هسع دا زمن يمشوا يقيفوا فيه في (صف).
• يعني اكتب ..وإلّا امشي اقيف لي في صف.
• الغريبة (الانبوبة) بقت من تفك منها (المنظم) ..بتمشي براها تقيف في (الصف).
• صف العيش عرفناه.
• صف المرتبات عرفناه.
• صف التسجيل للجامعة عرفناه.
• صف الترخيص.
• كلو – كلو عرفناه ..صف (الانبايب) دي شنو كمان؟.
• شلت ليك (انبوبة) وقلت احسن بدل الكتابة البعمل فيها دي ..امشي اشوف لي (غاز).
• وبكرة ناس احمد الحاج يكتبوا يحتجب لوقوفه في صف الغاز.
• انتوا ما تقولوا الحقيقة.
• يعني مع ازمة الغاز دي نكتب ليكم كيف؟.
• شلت الانبوبة ..ودورت ليك من محل لي محل.
• اي محل امشي عليه بقول لي انت عندك شنو؟.
• اقول ليه عندي (ابرسي) . يقول لي والله عندنا (النيل).
• امشي ابدل (ابرسي) واجيب النيل.
• اخشى لي على محل.
• بتاع المحل يقول لي انت عندك شنو؟.
• اقول ليه عندي النيل ..يقول لي والله انا عندي (اجب).
• اقول ليه – اجب بلا او نعم.
• امشي البيت (اجيب) انبوبة (اجب).
• اخش لي محل غاز تاني ..يقول لي انت عندك شنو؟.
• اقول ليه (اجب).
• يقول لي معليش في (توتال).
• امشي البيت ..اشيل انبوبة الجيران بتاعة (توتال)…وامشي لي محل تاني.
• بتاع المحل يقول لي انت عندك شنو؟.
• اقول ليه (توتال).
• يقول لي معليش…نحن عندنا (سوداغاز).
• اها انا شغال بالطريقة دي.
• من محل لي محل.
• اي محل غويص كدا ..مشيت ليه.
• العجيبة الناس ما بتوصفك ليك إلّا المحلات (الغويصة).
• والعجيبة برضو المحلات الغويصة دي برضو ما فيها (غاز).
• انا شغال كدا.
• وجاري بالصورة دي ..في واحد ضرب لي قال انت عاوز شنو؟.
• قلت ليه عاوز (غاز).
• قال لي (الغاز) جابوه في استاد المريخ.
• ألحق اجري سريع.
• انا حسب حاجتي للغاز ..قلت احتمال يكون فعلا جابوه في استاد المريخ.
• اصلا الجماعة ديل قالوا (الغاز) بقوا يوزعوه في الميادين.
• وعلى كدا الظاهر عليهم الليلة مع مباراة المريخ ومريخ الفاشر ..حبوا يخففوا الاعباء شوية على المواطنين ..قاموا عملوا شنو؟.
• قاموا وزعوا (الغاز) في المباراة.
• شلت ليكم انبوبة (ايران) وبي كل حسن نية ..مشيت استاد المريخ.
• عاوز شنو؟.
• عاوز (غاز).
• واول زول لاقاني ليك (جاري) من الاستاد – طالع من المقصورة.
• قلت ليه اسمع الجماعة ديل عندهم (غاز) شنو؟.
• انا قاصد ليه غاز اجب وإلّا غاز توتال وإلّا غاز ابرسي وإلّا غاز ايران وإلّا سودا غاز ..وإلّا ياتو غاز بس؟.
• قال لي الجماعة ديل عندهم الغاز (المسيل للدموع).
• اتمحنت ليك في الدنيا دي جنس محنة…وقلت في نفسي ..كمان دي شركة جديدة.
• هسع نحن انبوبة الغاز المسيل للدموع دي نجيبها من وين؟.
• يا ربي لو دفعت فرق ..ما ببدلوا لي انبوبة ايران دي بي انبوبة الغاز المسيل للدموع.
• وانا ما فاهم اي حاجة.
• بكتب ليكم بي كل حسن نية.
• شوية كدا شعرت ليك بي (الغاز) في الهوا.
• قلت معقولة ..نحن الغاز بنفتش ليه تفتيش ..هنا يفكوها لينا في (الهوا) ساكت.
• دا شنو البذار دا؟.
• المهم بعد شوية الموضوع وقع لي.
• وعرفت ليك ان الغاز المسيل للدموع دا ما عندو اي علاقة بالغاز البفتش ليه.
• رغم اني حلفت لبتاع التذاكر وقلت ليه والله نحن (الغاز) بتاع البتوجاز دا برضو خلى دموعنا تسيل.
• بكينا عديل كدا.
• دموعنا سالت يا عالم.
• عشان كدا ما قدرت افرق بين الغاز بتاع الطعام والغاز المسيل للدموع لأنهم الاتنين بسيلوا للدموع.
• اغشكم يعني.
• اعملكم فيها (دموعي) ما بتنزل بي سهولة.
• يمين غاز (ايران) نحن بكينا فيه عديل كدا.
• بكا جدا.
• على كدا خشيت ليك لمباراة المريخ.
• جبت لي ورقة وقلم وقلت ليهم احكوا لي الحاصل.
• الجماعة ديل انا بفتش ليهم تفتيش.
• كايس ليهم كواسة.
• قالوا لي تصور (حكم) مباراة المريخ ومريخ الفاشر عمل اي حاجة عشان المريخ يفوز – المريخ تعادل ما اتعادل.
• الحكم في الدقيقة العاشرة احتسب ليهم ضربة جزاء.
• ضربة جزاء في الدقيقة العاشرة من بداية المباراة في كرم اكتر من كدا.
• تاني يعمل ليكم شنو؟.
• وضربة جزاء امام منو؟.
• امام مريخ الفاشر ..والمريخ بيلعب في استاد ووسط جمهورو.
• بكري المدينة (زولنا) قال عاوز ينفذ ضربة الجزاء.
• قلنا ليه بلاش يا بكري.
• يا بكري نحن عارفنك.
• يا بكري انت عندك ازمة اهداف.
• وكشافاتك بتقول يا غربتي.
• بكري المدينة قال عاوز يشوت.
• اصلا المباراة ساهلة ..لو ضاعت بنجيب خمسة ..والمباراة في الدقيقة العاشرة.
• بكري كالمعتاد ..طبيعي يعني ضيّع ليك ضربة الجزاء.
• اها نوع دا يقولوا عليه شنو؟.
• عليكم الله دا يستاهل يصلوا معاه (لوزان).
• الزول دا نفعنا نفع مبالغ فيه.
• بكري مين؟.
• والله يا بكري المدينة الايامات دي انت قاعد تنفعنا في الهلال اكتر من مدثر كاريكا.
• الدقيقة 38 من الشوط الاول مريخ الفاشر جاب قون.
• حسن كمال.
• حسن كمال..دا (مغصة) براها.
• قلنا ما مشكلة ..في شوط تاني.
• في الشوط التاني ..شافوا الـ (15) دقيقة ما بتفك المريخ.
• عاوزين زمن اضافي عشان يرتبوا اوضاعهم.
• الجمهور عمل فوضى.
• طبعا لو سمعتوا المباراة في الاذاعة ..ح يقولوا ليك (الشرطة) هي العملت فوضى ..ولذلك تم اخلاء الملعب من (الشرطة).
• تتخيلوا يا جماعة الفوضى من الشرطة.
• ومعلق المباراة والناس البيداخلوا ويحللوا بشكروا ليك في (جمهور) المريخ…وبقولوا يا سلام على جمهور المريخ ويا سلام على سلوكه الجميل.
• الجمهور رجع المدرجات.
• والغاز المسيل للدموع مدور.
• وكراسي استاد المريخ ..اتكسرت ..اتحطمت.
• المباراة دي لو كان طرفها الهلال كانوا قالوا الثورة والتكسير كان من جمهور الهلال.
• اها الكلام دا منكم وفيكم.
• مباراة كلها (مريخ).
• مباراة بين مريخ ام درمان ومريخ الفاشر ..يعني نحن ما عندنا اي دخل.
• وبرضو بتكسروا في استادكم.
• الغريبة المعلق في الاذاعة بتكلم عن سلوك جماهير المريخ جميلة.
• وينها السلوك دا.
• مفروض الشرطة تحاسب الاذاعة والتلفزيون ..حاولوا يقوموا الناس على الشرطة.
• صوروا الشرطة هي الغلطان.
• والجمهور هو التمام.
• بالله دا كلام.
• هي وصلت عندكم لدرجة دي.
• المهم ادوهم قريب للساعة ..عشان يلعبوا تاني.
• انتظرناهم.
• موش مفروض بعد ساعة ..المريخ يعود ويغلب في الشوط التاني.
• ابدا الكلام دا ما حصل.
• الحكم يشيل ويحسب في المخالفات لصالح المريخ العاصمي.
• اخر حاجة قال احسن اطرد لي لاعب من مريخ الفاشر.
• قام طرد كرنقو من الدقيقة 20.
• المريخ لاعب 25 دقيقة نافص + 5 دقائق زمن بدل ضائع.
• والمريخ برضو مغلوب.
• يعملوا ليكم شنو تاني؟.
• اديناكم غارزيتو.
• واديناكم بكري المدينة.
• وحكم بعد ضربة الجزاء طرد ليكم لاعب.
• فريق يخسر امام فريق لاعب ناقص وانتوا لاعبين معاكم طاقم التحكيم ..مفروض من هسع يطلعوكم من البطولة الافريقية.
• عزام ذاتو مفروض ما يجي.
• كمان عاوزين تعملوا لينا كوارث في مباراة عزام.
• عاوزين تعملوا لينا (بورسعيد) هنا.
• دفاع جوي.
• اذا كان امام مريخ الفاشر بتعملوا كدا وبتخسروا امامه وهو لاعب ناقص …وادوكم (ضربة جزاء).
• امام عزام بتعملوا شنو؟.
• اقول ليكم حاجة.
• احسن انسحبوا من مباراة عزام ..ما عاوزين (ضحايا).
• ما عاوزين كوارث جديدة.
• ديل (الشرطة) عندهم فوقها رأي.
• …..
• ملحوظة : لو غارزيتو استمر معاكم ..بتنزلوا من الممتاز.
هوامش
• التحية والتقدير للمدرب الكبير شرف الدين احمد موسي ..الذي ادار المباراة بصورة جعلته يتغلب على غارزيتو وعلى حكام المباراة.
• شرف أحمد موسي من المدربين الذين ظلموا ..لكنه عاد ببصمة واضحة مع مريخ الفاشر.
• الهلالاب زعلانين على تعادلات خارج ملعبهم..والمريخ خسر في ملعبه (5) نقاط.
• ولسه.
• المباراة القادمة في شندي.
• ناس الاهلي شندي اقعدوا ..اتماوتوا لينا ..واعملوا لينا المباراة (الصلات الطيبة).
• اصلو ناس الاهلي ما بعرفوا يلعبوا إلّا امام الهلال.
• بكري المدينة بكرة بنخصص ليه (العمود) كلو.
• الليلة ما فاضيين لضربة الجزاء التى اضاعها.
• زول دا لو الفيفا وقفتو بترتاحو منو؟.
• عليكم الله يا مريخاب ..انتوا ناقصين (عنكبة).
• اتوقع المريخاب ..يقولوا احداث مباراة امس سببها (اعلام الهلال).
• ممكن يقولوا كدا.
• ديل في (الشرطة) عندهم رأي.
• غايتو دي ما في زلو سبقكم عليها.
• الله يرحم الصحفي التنزاني الذي مات في استاد المريخ.
• والله يستر على عزام.
• ناس الشرطة ..رتبوا ترتيبات خاصة لهذه المباراة.
• غارزيتو قاد الهلال في ظروف اصعب من هذه الظروف ..وكانت هناك خسائر واعتصمات.
• لكن مع هذا ..لم يخرج جمهور الهلال من السلوك القويم.
• التحية لجمهور الهلال.
• ………….
• عاجل : الاطاحة بي باتريك ..طبعا قرار خاطيء…مهما كانت المبررات والمسببات.
[/JUSTIFY]
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة