منوعات
الغريبة هم مش حذروهم وقالوا ليهم ما تمشوا للشجرة ؟!
ـــ يا اخي نحنا شنو النزلنا؟! حسع لو ما نزلنا وكنا قاعدين فوق كان شفنا متل ده البرد؟!!
لاتفاجأ بــ(خالي شريف ودار وعباس الله جابو) مبرطما من تحت البطانية المكنكش تحتها:
ــــ هي يعني كان ضروري .. ضروري تاكل من الشجرة؟!!
والذي اذا قلت لكم انه اضاف بصوت مستغرب قائلا:
ــــ الغريبة هم مش حذروهم وقالوا ليهم ما تمشوا للشجرة .. ما تمشوا للشجرة!!
لادركتم انه طبعا لا يقصد شجرة المؤتمر الوطني! وبالتالي لتذكرتم جميعكم اي شجرة يعني .. او لسنا جميعا لـ .. حواء وآدم!
علما انني حال جلوسي داخل البيت وبعض من البرد عالقا بي بدأت افكر بصوت مسموع:
ـــ ترى اأمنا (حواء) حينما قطفت التفاحة من الشجرة رغم التحذير اكان دافعها في ذلك ان الممنوع مرغوب؟ غايتو انا البعرفه عن نفسي اني في طفولتي المبكرة من بعد قيام امي ـــ رحمة الله عليها ـــ هي وخالاتي بتحذيري تحذيرا مغلظا من قراءة روايات الراحل (احسان عبد القدوس) ومن لف لفه من الروائيين والادباء العالميين كنت اخذ الرواية لاحسان كانت او مترجمة واتسلل بها للمخزن خلسة لاقفل بابه على وفي تلك العتمة كنت اسوي كدي اضيق في عيوني .. اسوي كدي اضيق في عيوني متل الكديسة لاتستطيع قراءتها على ضوء شعاع الشمس ذاك المتسلل من الفد شق اللي كان بسقف المخزن!
لكنني ما ان احسست بالدفء بي من كل جانب محيطا حتى اخذني قلبي لمنحى آخر من التفكير لاتذكر صوت (ملكة) خالتي المشفق وهي تحكي لنا بألم عن طفلة الابتدائي تلك التي شاهدتها تسير بظهر منحني في زيفة برد الاسبوع الفات حيث لم يكن يستر جسدها الصغير الا ملابس المدرسة الخفيفة لابادركم على ضوء ذلك قرائي الكرام بالاقتراحات التالية:
مالو لو كلو واحد فينا قام باهداء ما فاض من حاجة بيته من اغطية وبطانيات لمن يحتاجها ممن يعرف او لا يعرف من اخوته من ابناء آدم وحواء.
مالو لو كل واحد فينا نظر في دولاب ملابس بيته وقام باخذ الملابس التي بات لا يرتديها هو او صغاره او اهله وقام باهدائها لمن يحتاجها ممن يعرف او لا يعرف من اخوته من ابناء آدم وحواء.
مالو لو كلو واحد فينا قام باهداء الاحذية القديمة بمنزله التي بات لا يستعملها هو او صغاره او اهل بيته لمن يحتاجها ممن يعرف او لا يعرف من اخوته من ابناء آدم وحواء.
و .. و .. والاقتراحات مفتوحة وعمل الخير رحب لمن من اراد منكم الاستزادة منه. الصحافة
رندا عطية
انتباهة قلم
[SIZE=7][FONT=System]والله يا هو ذاتو كلام الطير فى الباقير[/FONT][/SIZE]
والله زمان الناس كانت بتعمل كدا وتطلع القديم وتعطي الناس اما الان بعد ما الناس عرفت درب الفقراء والسحر والكلام الكتير وبتاع العدة مافي زول بقي بطلع قديمو لزول حتي لو حرقوا لو جديد وما اتهبش معليش ممكن تعطي الناس منو.
[SIZE=4]يا بت يا رندا كان مشيتي سويتي ليك حلة ملاح ما كان احسن من البرطمة دي؟ انت بتقولي في شنو؟[/SIZE]
كلام جميل بس يا استاذة لازم كمان نفعل دور المجتمع المدني في تعبئة المجتمع للبذل في اوجه الخير وتنظيم العملية وتوصيل التبرعات النوعية والمادية لمستحقيها وياريت لو تساهموا باقلامكم في اشاعة ثقافة العمل الطوعي عشان الناس تنخرط فيهو وتدعمو