مقالات متنوعة
شنباوي وزير مالية!! «1»
وصفق الجميع بحرارة ووقف الدكتور شنباوي ثم إعتلى المنصة وتكلم بتواضع شديد أهل حارتي الكرام أنا ما داير أكثر الكلام لكن بوعدكم بعيشة هنيئة وتخفيض كل الضرائب القديمة والجديدة وتوفير السلع بأرخص الأسعار ودعم الصحة والتعليم وكل طلباتكم أوامر، وصفق الجميع بحرارة وهتفوا لشنباوي يعيش يعيش تصير الغلابة والمساكين يعيش الوزير شنباوي الرجل المجاهد الرصين!!
وصعدت حاجة كلتوم المنبر وقالت وهي تميل بجسمها الضخم ناحية المايكرفون حتى أن المنبر بدأ يهتز ويكاد يسقط بها بالنيابة عن نسوان الحي أنا حاجة كلتوم زوجة ود العمدة الراجل صاحب الكلمة والعمل الصالح بمد يدي للدكتور شنباوي وبقول ليهو شد حيلك يا سيادة الوزير نحن ناس غلابة ومكسورين جناح والطف بينا يلطف بيك رب العالمين وأنا بحلم بأنو كل المواد الضرورية والسكر والعيش والفول يوفرها لينا الوزير ودقيق الكسرة عشان نرجع لزمانا النسيناهو والماعندو قديم ما عندو جديد !! وصفق الجميع!!
ونزلت حاجة كلتوم وصعد حاج محمود وقال بصراحة نحن سمعنا وعود كثيرة من الوزراء السابقين وقالوا حنعمل وحنسوي وفي النهاية لا عملوا ولا سوا بل بالعكس زادت أسعار السلع والمواد التموينية حتى قربنا نرجع لعهد البنزين ثلاثة جالون كل اسبوع وخمسة رغيفات للبيت الواحد.. والضرائب زادت أضعاف مضاعفة وإن شاء الله الوزير شنباوي يقدر بوقف الطوفان دا مع أني متأكد بكرة حيبقى ذي غيرو اجتماعات ولجان وزارية وعربات لاندكروزر وحرس وبعد يومين يطلع من أموال الشعب بعمارتين وعشر عربات وخمسين قطعة أرض وهنا صاح حاج خضر الوفاق الوفاق يا ساعي الشقاق .. أنزل يا عميل.. وأمسح دموع الحسرة بالمنديل..
ثم فجأة طارت عشرات الكراسي نحو حاج محمود الذي أخذ يصيح أنقذوني من الطفيليين واصحاب المطامع يا شرطة ويا بوليس وفجأة سمع الجميع صوت ود الفكي وهو يصيح يا ناس هوووي الوزير شنباوي يقول ليكم بردوا أنفسكم وشمو الهواء وينبح الكلب وسيد الجمل ماشي أدوني يومين وانتو تأكلوا جاتو بل رغيف وما تفرقوا بين الحضر والريف..
والسلام ختام
يوميات ساخرة – الوطن
[email]samird4d@hotmail.com[/email]
