كوش نيوز .. أخبار السودان بين يديك

شنباوي قاضي!!«1»


شارك الموضوع :

شنباوي قاضي!!«1»


عمل شنباوي في السلك القضائي لمدة عشرين عاماً واشتهر بالنزاهة والاستقامة في عمله.. وفي أحد الأيام خرج من داره وكان اليوم جمعة وكان الكل يعمل له ألف حساب فقابل حاجة كلتوم فنظرت إليه وقالت بارتباك: مولانا كيف أصبحت إن شاء اللَّه تكون بخير واللَّه أنا بقدرك وبحترمك اللَّه يحفظك لينا ياوش الخير!! ثم قالت بينها وبين نفسها: اللَّه ياخدك ويريحنا منك ياوش النحس إنت مخوِّفنا وراعبنا ومسبِّب لينا قلق!!
ووصل إلى جزارة حاج خضر فسلَّم على الموجودين وسأل حاج خضر: كيلو لحم العجالي الصافي بكم؟ فردَّ حاج خضر بنفاق واضح ادفع البتدفعو وكان ماعاوز تدفع كلو كلو مافي مشكلة يا مولانا إنت حامي القانون وحامينا في البلد دي !!
فردَّ شنباوي بحزم : شكراً بس بكرِّر سؤالي زي أي زبون عادي كيلو العجالي الصافي بكم؟!
فلم يجد حاج خضر أمامه حلاً سوى الجواب فقال: ثلاثين جنيه!!
فقال مولانا شنباوي : أديني اثنين كيلو وكيلو ضان!!
فأعطاه حاج خضر ما طلب فحمله وذهب وما إن ابتعد حتى قال لمن معه بغيظ: الراجل دا قدر ما حاولت معاهو ما قدرت عليهو إن شاء اللَّه يرفدوه ولا تجي مصيبة تاخدو وتريحنا منو قولوا آمين!!
فقال حاج محمود: مليون آمين ياحاج خضر السوق الأسود معطل معانا الأيام دي بسببو اللَّه لا كسبو ولا بارك فيهو!!
وهُنا ضحك حاج أحمد وقال: يا جماعة خليكم في السليم تسلمو مالكم ومال السكك الملوية الما بتجيب من وراها إلا الخراب وهنا قال عبد الكريم بسخرية الحرامي بخاف من ضلو والعلى راسو بطحة يحسِّس عليها وامشي عديل يحتار فيك عدوك!!
فاغتاظ حاج خضر منه وقال له: مافضل إلا إنت يا عديم الفائدة البالغلط سموك راجل وإنت منسي وغير مذكور وأولادك لو ما أهل الخير كان ماتوا من الجوع.. امشِ شوف ليك شغلة زي الرجال بدل ما إنت شايل ليك حبات ليمون تبيع فيها للنسوان!!
فغضب عبد الكريم غضباً شديداً وقال له: اسمع يا بياع بقايا الحيوانات المريضة والمسمومة ونفايات السلخانات لما الناس جاها سرطان من لحمتك لو كنت نضيف ما كنت بتخاف من القانون وبيع ليمون في السوق أحسن من قتل الأبرياء يا جزار دا إنت فاضل تضبح أولادك وتبيع لحمهم من السَّعر الجاك!!!
وهنا خرج حاج خضر من الجزارة وأمسك بسكين حاد وعندما أراد أن يطعن عبدالكريم انحرف يميناً فجاءت الطعنة في يده اليسرى ونزف الدم غزيراً وأخذ الرجال يجرون في محاولة لإيقاف هذا الموت القادم!!
وفجأة سمع أهل الحي صوت ود الفكي وهو يصيح: يأهل الحلة هووي حاج خضر طعن عبد الكريم بالسكين ويمكن يروح فيها ومولانا شنباوي يقول ليكم كل زول يفضل في مكانو والبخالف حيخضع للمساءلة وكلامي دا آخر الفلسفة العورا وشيل البطارية في القمرا!!

يوميات ساخرة – الوطن
[email]samird4d@hotmail.com[/email]

شارك الموضوع :

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.

سودافاكس