مقالات متنوعة
شنباوي «مبروك جالك ولد»«1»
فردَّت عليها هند بابتسامة: ووين خبث المرأة وذكائها.. المرأة بذكائها ممكن تخلِّي الراجل طوع أمرها.. الظاهر يافوزية إنت ما بتستخدمي عقلك!!
فقالت فوزية بضيق: ما قالوا الوصول لقلب الراجل بطنو وأنا ما مقصرة ما مخليا محاشي وعصائر وطبائخ أشكال وألوان!!
فضحكت هند وقالت لها: دا كان زمان حسع الوضع اتغير وبقى في حاجات تانية أهم وأخطر!!
فسألتها فوزية بحيرة: زي شنو يا هند؟؟
ردَّت هند بخبث: تقولي مثلاً إنَّك حامل فيشعر الراجل إنو في عز شبابو ويفرح، ويقوم اهتمامو بيك يزيد والمحبة تكتر!!
فقالت فوزية: لكن نحن عندنا ثلاثة أولاد!!
فردَّت هند: دا كوم ودا براهو كوم ديل يذكروهو بأنُّو عجَّز وبقى كركوبة والطفل الجديد يذكرو بأنُّو شباب وحيوية ودا البحبُّو كل راجل!!
فقالت فوزية بخجل: بعد العمر دا كلو دا أنا فُتَّا مرحلة الولادة!!
فردَّت هند بابتسامة: مُعجزة من اللَّه وفي زول ماشي يفتشك ولا ينكر قدرة اللَّه في نسوان ولدن بعد الستين والتاريخ شاهد!!
فقالت فوزية بحيرة: أها وبعد الشهور الأولى ويتكشف المستور الحل شنو؟؟
ردَّت هند بابتسامة: ساعتها يحلها الحلال!!
ثم قامت وذهبت.
ورجع شنباوي من عمله مرهقاً فوجد فوزية مستلقية على الفراش فسألها عمَّا بها.
فقالت له: لي كم يوم بطني غامة علي وبستفرغ وعندي دوخة وما عندي نفس للأكل، وكل ما أشم ريحة الأكل أشعر برغبة في الاستفراغ!!
فقال لها شنباوي بانزعاج: يمكن يكون عندك ملاريا لازم نوديك المستشفى!!
فردَّت عليه بخوف: لا.. لا.. ما دايرة أزعجك معاي.. هند قالت حتجيب العربية وتوديني المستشفى بكرة الصباح وامشِ إنت لشغلك!!
فقال شنباوي بقلق: لو تضايقتي؟؟
ردَّت فوزية بسرعة: ابقى وديني إنت!!
وفي اليوم التالي ذهب شنباوي لعمله وهو قلق على فوزية وعندما عاد وهو يحمل كيس فاكهة سألها: فوزية.. خير إن شاء اللَّه؟!
فردَّت بخجل: أصلو الموضوع مخجل!!
فقال شنباوي بضيق: المرض مخجل؟!
فردَّت فوزية: أصلو ما مرض عادي!!
شنباوي بتعجُّب: اللَّه!! في مرض عادي ومرض ما عادي؟؟
فوزية بخجل: أيوة وخاصة في عمرنا!!
شنباوي بضيق: قولي وريحيني يا شيخة!!
فوزية وهي تضحك: شنباوي مبروك جالك ولد!!
نُواصل…
يوميات ساخرة – الوطن
[email]samird4d@hotmail.com[/email]
