مقالات متنوعة
شنباوي في السجن!!«1»
فردَّ شنباوي بخوف: يا سيد تامر إنت عارف إني أخدتا منك القروش دي في ساعة زنقة عشان أعمل العملية بتاعت المرارة لفوزية وإنت عارف إنو الشيكات بدون رصيد وأنا أديتك ليها مجرد ضمان.. وكمان إنت عارف البير وغطاهو.. عليك اللَّه اصبر علي شوية!!
فقال تامر بغضب: مافي صبر ولا ساعة يا القروش يا الزنزانة اختار بسرعة!!
فردَّ شنباوي باستسلام: نحن ناس جيران وعشرة عمر وبعد دا كلو عاوز تدخِّلني السجن؟؟
فقال تامر بضيق: خلاص عشان العشرة والجيرة بديك شهر كامل وبعدو بيوم واحد لو ما دفعت مصيرك السجن!!
وذهب تامر ونزل على شنباوي هم ثقيل كالجبال ونادته فوزية من الداخل فذهب إليها فقالت له والدموع تنهمر من عينها: شنباوي يا اخوي أنا السبب في كل البحصل ليك دا ياريتني متا قبل ما أشوف اليوم دا.. وتامر شكيتو على اللَّه إن شاء اللَّه تدوسو عربية شاحنة تخلي لحمو هريسة!!
فنظر إليها شنباوي بعتاب وقال لها: الزول يا فوزية داير حقو ومافي زول بقدر يلومو.. المشكلة حسع في السجن الحادخلو دا.. حأقدر كيف أتعامل مع المجرمين واللصوص وأنا راجل طول عمري ماشي جنب الحيطة؟!
فقالت فوزية: سجمي وكر علي يا شنباوي إن شاء اللَّه أموت قبل ما أشوف اليوم دا!!
ثم قالت بينها وبين نفسها: أبرأ من الموت أنا لسه شابة صغيرة ما شفت حاجة في الحياة دي!!
فخرج شنباوي من المنزل وتفكيره كله محصور في السجن وما سيحدث له داخله فقابل حاج أحمد فسلَّم عليه وسأله: مالك يا شنباوي شايل هموم الدنيا فوق رأسك في شنو مالك؟؟
فردَّ شنباوي بحزن: إنت عارف موضوعي مع تامر إبراهيم وبعد شهر حيقدم الشيكات للنيابة والسجن أكيد!!
فسأله حاج أحمد: وحسع حتعمل شنو.. واللَّه كان بيدي كان ساعدتك لكن العين بصيرة واليد قصيرة!!
فردَّ شنباوي وهو يبتعد: خليها على اللَّه!!
وذهب شنباوي إلى الحي المجاور حيث يسكن رجل اسمه عباس مشهور بدخول السجن لأنَّه قضى نصف عمره به ليتعرَّف منه على ما يدور داخل السجن وكيف يستطيع حماية نفسه!!
فدقَّ باب عباس فخرج عليه بعيون محمرة ووجه قاسي وعضلات مفتولة وقبل أن يقول شيئاً قال له عباس بصوت مخيف: خير عاوزني في عملية نهب ولا قتل ولا الاثنين مع بعض.. كلو تبعنا ما عندك مشكلة!!
فقال شنباوي بينه وبين نفسه: حالتو دا بره السجن اللَّه يسترنا من الجواهو!!
يوميات ساخرة – الوطن
[email]samird4d@hotmail.com[/email]
