مقالات متنوعة
شنباوي في السجن!! «2»
فضحك عباس ضحكة عالية مجلجلة ومخيفة ثم قال لشنباوي بسخرية.. والله دي نكتة أنا راجل خريج سجون يعني بلطجي واول مرة في حياتي يجيني زول مسكين طول عمري ما يجيني غير بتاعين المخدرات والمجرمين ورجال الشرطة عشان يسوقوني للسجن بيتي الثاني لا مؤاخذة لكن انت يا مسكين داير مني شنو!!
فرد شنباوي بحزن: انا ادينت مبلغ خمسة مليون من راجل غني عشان أعمل عملية مرارة لزوجتي واديتو شيكات بدون رصيد وبعد شهر حيقدم الشيكات للنيابة وحا أدخل السجن وأنا جيتك عشان توريني البحصل في السجن وكيف احمي نفسي!.
فقال عباس بسخرية: بصراحة نحن الزول الزيك دا بنسمي عجينة السجن لاننا بنشكلوا زي ما عاوزين.. وانت لو دخلت السجن حتمسح الواطة وتنظف المراحيض وتنظف العنابر وتبقى تحت الخدمة لزعيم العنبر والليل كلو انت تدلك ليهو جسمو ورجليهو وتنفذ كلامو بالحرف الواحد يعني باختصار كدا تبقى عبد!!
فبلع شنباوي ريقه وقال : ولو ما عاوز ابقى عبد أعمل شنو..
فرد عباس بصوت اجش في الحالة دي لازم تكون اسد تفترس البقع في يدك كلو وتبقى انت الزعيم ..
فسأله شنباوي بلهفة ولكن دا كيف يحصل
فرد عباس: لازم تكون عنيف ومتوحش وحقار لا مؤاخذة وتغلط على المساجين قبل ما يغلطوا عليك وتخليهم عبيد ليك..
فقال له شنباوي وهو يمسك بيده عليك الله يا معلم عباس علمني كيف ابقى متوحش وعنيف.. انا في عرضك..
فنظر اليه عباس لفترة وكأنه يفكر ثم قال له: حالتك تشفق ولكن لو عاوزني احولك لاسد لازم تنفذ كلامي بالحرف الواحد..
فرد شنباوي حاضر يا معلم!
فقال عباس بحزم: انا بعون الله حا أخلي قلبك زي الأسد وتفترس كل البقيف قدامك يلا حنبدأ من الآن لانو المدة القدامك قصيرة وبدأ عباس يدرب شنباوي على كيفية الكلام والوقوف ثم كيف يضرب وكيف يحمي نفسه وقضى معه شنباوي ثلاث ساعات كأنها ثلاثة اعوام من تدريب قاسي للغاية!!
وعند الواحدة صباحاً رجع لمنزله فوجد لص على الحائط ودون كلام امسك به وضربه ضرباً مؤلماً واللص يصيح فحضرت فوزية وقالت بدهشة دا شنو يا شنباوي ودا منو..
فرد شنباوي ببرود دا حرامي لقيتو على الحيطة وعلمتو الأدب!!..
فسألته بدهشة وين تعلمت الحاجات دي ومتين
فرد ببرود عند المعلم عباس خريج السجون والليلة..
فقالت فوزية بخوف وبصوت خافت: دا حالتو ما دخل السجن ولما يدخل ويطلع حيضبحني زي الجدادة ولا شنو الله يستر!
نواصل
يوميات ساخرة – الوطن
[email]samird4d@hotmail.com[/email]
