مقالات متنوعة
شنباوي وصاحب العمارة !! (1)
فقال حاج خضر: يا أخي الزول جار وملياردير يعني شقة واحدة ما حتفرق معاهو حاجة وبعدين أنا حا أدفع ليهو الايجار البطلبو وأنا زول مقتدر والحمد لله!!
فرد حاج أحمد: وبيتك ملكك الساكن فيهو من طفولتك حتعمل فيهو شنو!!
فسكت حاج خضر وكأنه يفكر وهنا قال شنباوي: الزمن اتغير يا حاج أحمد وبيوتنا قديمة والله كلام حاج خضر خلاني أنا كمان أفكر أجر لي شقة والبيت أبيعو واخت قروشو في البنك وديعة أضيفا للمعاش وأعيش ملك مرتاح وعندي البكفيني!!.
فقال حاج أحمد وهو يضحك: أنا ذاتي بديت أقتنع بالفكرة .. لو تامر أداني شقة أنا ما حا أجازف زيكم .. أنا ح أجر بيتي وأدفع منو إيجار الشقة لكن انتو متأكدين انو تامر حيوافق على موضوع الإيجار دا!!
فرد حاج محمود بثقة: أنا ذاتي معاكم .. أها رأيكم شنو نمشي لتامر المساء في بيتو ونطرح ليهو الموضوع ونشوف رأيو شنو!!.. فقالت حاجة كلتوم: والله أنا بيت ود العمدة غالي على ولكن دايرة أشم الهوا ذي بقية الناس .. أنا حا أبيع بيت ود العمدة وأمشى معاكم لتامر ابراهيم وذي ما قال شنباوي أنا حا أبيع بيتي واخت قروشو وديعة في البنك وأعيش آخر حياتي مرتاحة!!
فضحك ود الفكي وقال: أنا الوقعت من قعر القفة لا بيت أبيعو ولا وديعة أصرف منها آخر حياتي الظاهر حا أبقى حارس للعمارة الحسكنو فيها!!
فقال لهم شنباوي بإبتسامة: خلاص نتلاقى الساعة ستة ونمشي كلنا لتامر ونشوف الموضوع دا!!
ورجع شنباوي إلى منزله فوجد فوزية في المطبخ فقال لها مداعباً: ما نفسك يا فوفو في شقة في عمارة فاخرة!!
فنظرت إليه في دهشة وقالت: شقة في عمارة هو نحن لاقين نأكل ونشرب ذي الناس عشان نمشي نسكن في العمارات..!!
فقال لها شنباوي: الحمد لله .. يا ولية ما تحمدي ربك مستورة والحمد لله .. اما موضوع الشقة فتامر ابراهيم عندو عمارة جديدة وناس الحلة كلهم قرروا يمشوت يستأجروا منو شقق ومنهم الحبيبع بيتو ويختو وديعة في البنك ومنهم الحيأجر .. المهم الكل عايزين الشقق الجديدة!
فردت فوزية: وانت مع منو مع الحياجرو ولا حيبيعوها المنهم خضر الجزار !!
فقال شنباوي ببراءة: حا أبيع البيت الفريم المسكون دا وأرحل للشقة الجميلة!!
فضاحت فوزية بفزع: سجمي الراجل .. جاري وراء خضر الجزار ذي الغنماية وداير يجازف بمستقبل أولادو!!
فرد شنباوي بغيظ: صدقت حاجة كلتوم انتي نحس وفقر!!
فقالت بسخرية: المع حاجة كلتوم ما ينوبو إلا الندم واللوم!!
يوميات ساخرة – الوطن
[email]samird4d@hotmail.com[/email]
