مقالات متنوعة
شنباوي وصاحب العمارة !! (4)
فاجتمعوا في منزل حاج أحمد ليروا ما يمكن عمله بعد هذه المرحلة!!
فقال شنباوي: أنا يا جماعة بصراحة لا بفهم في السباكة ولا الكهرباء إنتو رايكم شنو !!
فردَّ حاج أحمد: ولا أنا عمري ما اشتغلت شغل كهرباء ولا سباكة لكن الحل شنو مع تامر إبراهيم ممكن ياخدا حيلة ويحرمنا من الشقق!!
فقال حاج خضر بانفعال: نحن الشقق دي بنيناها بضراعنا ما بقدر يحرمنا منها دا تعب سنة كاملة خلينا فيها أشغالنا وأهملنا بيوتنا عشان الشقق دي!!
فردَّ شنباوي: واللَّه يا حاج خضر ما تستبعد في الزمن الأغبر دا أي شيء خصوصاً نحن ما عندنا معاهو عقود نقدر نلزمو بيها عشان كدا لازم نكون حذرين!!
فقال حاج محمود بحزم: نحن أول حاجة نعملا نطلب منو العقود البتثبت حقنا في الشقق دي وبعدين حكاية التشطيب دي .. دا موضوع تاني!!
فردَّ حاج خضر بحزم: أنا مستعد آخد الشقة بدون تشطيب وأتمها على مهلي!!
فقال حاج أحمد بسعادة : واللَّه فكرة نحن نطلب منو العقود ونشطب الشقق برانا على راحتنا .. أها رايكم شنو؟
فردَّ شنباوي: كلام معقول عشان نقطع عليهو الدرب وما يتراجع في كلامو .. بكرة الساعة ستة نمشي ليهو كلنا ونطلب منو العقود بدون تشطيب !!
فصاح الجميع بحماس: موافقين!!
وفي اليوم التالي وعند السادسة كان جميع أهل الحي بمن فيهم حاجة كلتوم أمام منزل تامر وضغط شنباوي على الجرس .. وبعد قليل استقبلهم تامر في صالونه الفخم وقال لهم بهدوء: خير يا جماعة العمارة لسه ما خلصت دايرين شنو !!
فقال له شنباوي بحماس: العمارة بقت على التشطيب ونحن للأسف ما بنعرف سباكة ولا كهرباء عشان كدا جيناك!!
فردَّ تامر ببرود: والمطلوب؟
ردَّ حاج أحمد: نحن دايرين نوقِّع معاك العقود وحنستلم الشقق بدون تشطيب ونتمها برانا !!
فضحك تامر وقال ببرود: شقق شنو الطالبينها .. إنتو دفعتو لي قروش!!
فردَّ شنباوي بغضب: بينا اتفاق ونحن نفَّذنا العلينا وبنينا الشقق وباقي تسلمنا ليها!!
فضحك تامروقال ببرود: الشقة تساوى الشيء الفلاني وإنتو طالبينها مجاني كدا وبدون خجل !!
فردَّ شنباوي والباقون بصوت واحد: قصدك شنو !!
فقال تامر: مش كتَّر خيري العلَّمتكم صنعة تكسبو منها دهب والشقق للبيع كاش والما عندو ما يلزمو !!
وكانت صدمة قاسية فقال له شنباوي: خاف اللَّه يا تامر وقال: كم مليون قول كام مليار يلا مع السلامة !!
فردَّت حاجة كلتوم بغضب: يا يابا مليار ملك من زبانية جهنم
الياخدوك ويرموك فيها يا حرامي يا ملعون اللَّه لا كسَّبك يا ماكل عرق المساكين !!
وفجأة سمع الجميع صوت ود الفكي وهو يصيح : يا ناس الحلة هوووي عمارة تامر إبراهيم الضحك بيها على المساكين وقعت على الأرض وبقت حجارة زي حجارة الدنيا .. وبقت حجارة جهنم يا تامر يا خبيث ومن يضحك أخيراً يضحك كثيراً!!
تمت..
يوميات ساخرة – الوطن
[email]samird4d@hotmail.com[/email]
