مقالات متنوعة
شنباوي والنظام العالمي الجديد!! «2»
فرد حاج خضر: بأربعين جنيه!!
فضحك شنباوي وقال: طبعاً يا حاج خضر تتاجر فينا زي ما عاوز .. ما انت من أذيال الامبريالية العالمية الظالمة الكافرة، ماشين وراء أمريكا خطوة بخطوة ولو قالت ليكم أقعوا البحر بتقعوا !!
فرد حاج خضر بسذاجة: معناه شنو الكلام القلتو دا يا شنباوي .. أنا كافر وبسمع كلام الأمريكان وكمان متفق معاهم على الاميرية العالمية دي .. دا كلام شنو يا زول وضح كلامك دا !!
فضحك حاج احمد وقال: شنباوي بالعربي
فضحك شنباوي وقال: جائز تكون فعلاً ما بتعرفهم ولكنك بتخدم فيهم وكمان انت واحد منهم يا حاج خضر يا مصاص دماء المساكين!!
فرد حاج خضر بخوف شديد: يا حاج احمد ويا حاج محمود ما تقولوا حاجة للزول دا .. دا حيلصق فينا تهم ما عارف جابا من وين!!
فقال حاج محمود بشماتة: شنباوي ما بتكلم ساي .. أكيد شاف عليك حاجات .. يا راجل دا انت بتكسب في كيلو اللحم أكتر من تمنو مرتين .. حرام يا أمبريالي يا استغلالي!!
فرد حاج خضر بغضب: ليك حق تقول الكلام دا ما انت راجل بخيل وكيلو اللحم بقعد عندك شهر !!
فقال حاج احمد وهو يضحك: يا حاج خضر ما يكون في بالك شنباوي بهزر معاك .. انت مجرد جزار ولكنك طماع شوية !!
وفجأة صاح ود الفكي بأعلى صوته: يا ناس الحلة هوووي حاج خضر بقى أمبريالي ومصاص دماء وضنب للامريكان وشنباوي قال هو كافر ومنافق فأعملوا حسابكم منو ما يعاديكم!!
فقال حاج خضر وهو يكاد يبكي: يا فضحتك يا حاج خضر آخر المتمة بقيت كافر ومنافق .. دا كلو عشان كيلو لحمة يا شنباوي كان أنا كافر انت ابولهب ذاتو!!
كدا بقول انك بتخدم من مصالح أمريكا وواقف معاهم ضد بلدك وأهلك!!
فقال حاج خضر بغضب: على الطلاق بالتلاتة اللحمة دي سودانية والعجل دا من أرض البطانة ومشتريهو بحر مالي .. دحين دخل أمريكا في اللحمة والعجل بتاعي دا شنو !!
فرد شنباوي بهدوء: انت بتشتري اللحم من السودان ما قلنا حاجة ولكن بتبيعو بالسوق الاسود وتودي قروشك البنوك وتتحول لدولارات عشان يجيبوا بيها سلع للمواطنين المساكين وبعدين يشتروها بالغالي لأنك شلت دولارات البلد يا مصاص دماء المساكين ومليت بيها بطون الأمريكان الظالمين الحاقدين الكفرة الملحدين أصحاب الامبريالية العالمية .. ما برضو تبقى زيهم!!
فنظر حاج خضر حوله بدهشة وقال بخوف: يا جماعة والله العظيم الجماعة البقول عليهم شنباوي ديل أنا ما عندي معاهم علاقة ولا شفتهم قبل كدا !!
يوميات ساخرة – الوطن
[email]samird4d@hotmail.com[/email]
