مقالات متنوعة
شنباوي والنظام العالمي الجديد!! «4»
فرد الكمساري بفظاظة: ما لي دعوة إن شاء الله تكوني ماشة متر أنا شاحن الاستاد ولازم تدفعي القيمة كاملة؟!
وهنا قال شنباوي بسخرية: طبعاً لازم تصر انها تدفع الستين قرش يا أمبريالي يا استغلالي يا ذيل الأمريكان!
فقال الكمساري بدهشة: يا زول قلت شنو وبعدين انت دخلك شنو؟!.
فرد شنباوي بسخرية: دخلي شنو يا جاهل .. الكلام دا هو الخلاكم مستعمرين لحدي الليلة للامبريالية العالمية الكافرة!
فقال الكمساري بحيرة: أمبرية كافرة يا أسطى الظاهر الزول دا بسب فينا .. قال نحنا كفار وضنب لأمريكا!
وهنا أوقف السائق الحافلة وقال لشنباوي بغضب: قلت شنو يا اخينا؟
فرد شنباوي ببرود: قلتا السمعتو .. أذيال الأمبريالية الكافرة!!.
فقال السائق بحيرة: دا كلام شنو يا زول أنا أول مرة أسمع الكلام دا في حياتي .. لكن إذا كان فيها كفر معناها شتيمة وأنا ما عارف الكلام القلتو دا لكن علىّ الطلاق بالتلاتة الكلام دا فيك انت يا أبو شنب العاقل ذي قش البحر!
فضجت الحافلة بالضحك فقال شنباوي بسخرية: الضحك عشانو شبهو برضو ذيل أمبريالي رخيص للامريكان .. قلتو شنو؟!
وسكت الجميع ونظروا إلى بعضهم في خوف فقال أحدهم للسائق: يا زول نحنا ورانا شغل الظاهر انت زول استغلالي زي ما قال السيد دا وعاوز تأكل حقنا عشان سكتنا ليك!
فقال آخر: ايوا الاخت دي ما تدفع غير ثلاثين قرش يعني نص المشوار وأي زول ما واصل الاستاد ما حيدفع ليك الأجرة كاملة .. أها رأيك شنو؟!
فرد السائق بغضب: الما بدفع ينزل على طول .. والما عاجبو يشرب من البحر !!
فضحك شنباوي وقال له: الظاهر انت الحتشرب من البحر لانو مافي زول حينزل وما في زول حيدفع أكثر من المعقول يا أمبريالي يا جشع .. قلتو شنو يا جماعة!
فصاح جميع الركاب .. نحنا معاك يا أستاذ الكلام كلامك والزول دا فعلاً أمبريالي جشع!
وهنا نظر السائق إلى الركاب بحيرة ثم جلس وراء عجلة القيادة وهو يقول باستسلام: على الطلاق بالتلاتة أنا زول في حالي .. وانتو الامبرياليين الجشعين زي ما قال الأستاذ وتستحقوا البيحصل ليكم من أمريكا، فقال شنباوي في نفسه والله انت طاعت مسكين وأنا الامبريالي الاستغلالي لأني استغليت جهلك الظاهر أنا مصاص الدماء والجماعة ديل كلهم استغلاليين!!
يوميات ساخرة – الوطن
[email]samird4d@hotmail.com[/email]
