مقالات متنوعة
شنباوي واللواء فوزية!! «1»
وفي ذات صباح استيقظ شنباوي والأولاد على صوت بوق عالٍ إخترق آذانهم وكان الساعة الخامسة صباحاً فجرى الأولاد مسرعين إلى طابور التمام ومعهم شنباوي الذي كان يتميز من الغيظ.. وقالت فوزية أنا ما عاوزة كسل عاوزة نشاط وحيوية يلا مارسوا التمارين اليومية وبعدين كل واحد يمشي لشغلو عاوزة الشاي والإفطار يكونوا جاهزين في ثلث ساعة ولا سأعاقبكم جميعاً بالحرمان من وجبة الفطور وتقيفوا لمدة ساعة تحت أشعة الشمس..!!
وبعدها لبست الزي الرسمي للشرطة وخرجت وأول شخص قابلته كان هي حاجة كلتوم التي أصابها خوف شديد عندما شاهدت فوزية وهي عدوتها اللدود فقالت لها اهلاً بجنابو اللواء فوزية الرافعة رأسنا ومخلية الناس كلهم يحترمونا ثم قالت بسرها: الله يخسف بيك الأرض يابت حاج صالح كان راعيانا ومنحساها علينا إن شاء يرفدوك عشان أشمت فيك!!
فنظرت إليها فوزية وقالت بحزم.. حاجة كلتوم إن شاء تكوني خليتي الكلام والقطيعة في الناس وشفتي شغلك!!
فردت حاجة كلتوم بإرتباك.. يقطعني ويشيلوني جنازة كانت اتكلمت تاني في زول ولا قطعت فيهو ثم قالت بصوت خافت أبرى أنا ويشيلوك من المشرحة إن شاء الله ومحل يدفنوك ما يلقوهو .. يا مفترية وظالمة!
ومرت بحاج خضر الجزار فسلمت عليه وسألته : إن شاء الله تكون لحمتك طازجة وضبايحك داخل السلخانة!!
فرد عليه بخوف : أيوه يا جنابو لحمتنا من السلخانة للجزارة طوالي ونحن تحت أمر الحكومة!!
ثم نظر إلى حاج أحمد وقال بصوت خافت وبسخرية لاذعة عشنا وشفنا النسوان بحكمونا جوه ولكن شنباوي محكوم عليه بالأشغال الشاقة المؤبدة ما تخجل حقو يحلق شنبو دا ويبقى العسكري التابع للواء فوزية هي البتحكم وهي البتنفذ..!!
يوميات ساخرة – الوطن
[email]samird4d@hotmail.com[/email]
