مقالات متنوعة
شنباوي واللواء فوزية!! «2»
وقال سعيد بضيق: يا أبوي شوف لينا حل نحنا ما بنقدر على الحال دا !
فنظر اليهم شنباوي وقال بحزم: خلاص ابقوا على موقفكم دا واوعو تتراجعو وانا حا احسم الموضوع الليلة !!
وعند الرابعة مساء وقفت عربة الشرطة ونزلت منها اللواء فوزية ودخلت البيت فوجدت شنباوي والاولاد جالسين في صمت ولم يقفوا لها كالمعتاد محيين فقالت بحزم: ليه ما وقفتوا زي كل يوم !!
فرد شنباوي ببرود: من اللحظة دي انت لما تدخلي البيت دا تنسى انك اللواء فوزية وتبقي زوجة شنباوي وتقومي بواجباتك كلها !!
فقال بغضب: دا تمرد وعصيان وعقابو .. !!
قاطعها شنباوي: دا انقلاب عسكري السلطة بيدي أنا وإنتي الزوجة فوزية بدون زيادة ولا نقصان !!
فردت بغضب: انا ما حا اسمح ليكم تتمردوا علي .. أنا اللواء فوزية على سن ورمح !!
فقال شنباوي بحزم: وأنا شنباوي البهز ويلز وكلمتي ما بتراجع فيها قلتى شنو !!
ردت بغضب: يا أولاد على المطبخ عشان تجهزوا الغداء البيت يلا اتحركوا بسرعة !
فلم يتحرك احد .. ونظرت فوزية غير مصدقة فقال لها شنباوي بصرامة: شوفي قدامك نص ساعة إذا ما لقيت الغداء جاهز إنتي طلقانه بالتلاتة !!
ووجدت فوزية نفسها في موقف صعب فدخلت المطبخ بملابسها الرسمية وبدأت تجهز الغداء وبعد نص ساعة كان الغداء جاهز ولكن فوزية رفضت الأكل والجلوس معهم !!
وأخذوا يأكلون بشراهة بعد نيلهم للحرية من سجن العسكر !!
وبعد الغداء وضعت فوزية الشاي وهي متذمرة فقال شنباوي: رايكم شنو يا أولاد في شاي اللواء فوزية !!
فردوا بسعادة: لذيذ جدا !!
فقالت فوزية بضيق: تشربوا السم الهاري إن شاء الله !
فسألها شنباوي بحزم: قلتي شنو !!
فردت بانكسار : ينفعكم إن شاء الله وطلباتكم اوامر يا ابوسعد !!..
يوميات ساخرة – الوطن
[email]samird4d@hotmail.com[/email]
