مقالات متنوعة
شنباوي عجلاتي!!«1»
فرد شنباوي: أبداً.. في شنو؟؟
فقال ود الفكي: ناس الحي المجاور قالوا عاوزين يعملوا سباق دراجات مع حيينا والمسئول عن الموضوع دا ابو علي العجلاتي ، وقالوا السباق للرجال الكبار بس يعني بالعربي كدا العجائز!!
فضحك شنباوي وقال: والله دي حاجة غريبة هم العجائز قادرين على المشي لمن يقدروا على سباق الدراجات!!
وبعد قليل حضر حاج احمد وحاج خضر ومحمود وقالوا لشنباوي: طبعاً سمعت بموضوع السباق ونحنا كنا مشتركين، فرد شنباوي بهدوء: يا جماعة سواقة العجلة ما ساهلة وانتو بصراحة ما بتقدروا عليها!!
فقال حاج أحمد بحماس: من الفريق الثاني حاج مصطفى وحمد النيل وعباس قالوا بتحدونا ولو تراجعنا حيضحكوا علينا ويقولوا الجماعة بقوا خرد ونحن ما بنرضى بالكلام دا.. عشان كدا لازم نشترك!!
فرد شنباوي: انتو حرين أنا قلت رأيي الشخصي!!
فقال حاج خضر بحماس شديد: دايرنك تجيب لينا عجلات من عجلات السباق الخفيفة والسريعة وما مهم الثمن!
فرد عليهم شنباوي: خلاص أدفعوا المقدم عشان أنا ما عندي امكانيات أجيب بيها العجلات دي!!
ثم قال في نفسه: دي فرصة عشان أصلح أوضاعي المالية رزق الهبل على المجانين!!
ورجع شنباوي إلى البيت فسألته فوزية عن موضوع السباق فقال لها: عجائز الحلة كلهم قالوا حيشاركوا في السباق جاهم مرض اسمو السباق!!
فضحكت فوزية وقالت: وانت يا الكلك عضيمات طبعاً ما حتشارك عشان ما تحصل ليك سكتة قلبية!!
فرد شنباوي: أنا أخف واحد في الجماعة ديل، فحاج خضر سمين من كترت أكل اللحمة وحاج احمد سنو كبيرة وحاج محمود لياقتو تعبانة لأنه بخيل في الأكل حتى مع نفسو!!
فقالت فوزية بسخرية: انت يا اخوي المبحبح في عيشتك وتلاجتك ملانة باللحم والفاكهة والمساكين أولادك كلهم عندهم انيميا حادة من الصيام!!
فرد بغيظ: أكل السوسة والعافية مدسوسة وانت مخلية ليهم حاجة ما بجيب الأكل بالأكياس وفي ساعتين القاها فاضية من رأسها للأساس.. يا فجعانة وما من الناس!!
يوميات ساخرة – الوطن
[email]samird4d@hotmail.com[/email]
