مقالات متنوعة
إنتقام 2
نادي عائلي لحفلات الزواج والتخريج ، من الأندية الجديدة التي صارت أكثر من محلات تحويل الرصيد … هل ترون ذلك الشاب غير المهندم الذي يحوم حول أبواب النادي ؟ هذا أنا أحمد وليس مجرد متسول يبحث عن إحسان .. في الواقع أنا م
تسول فعلا وأبحث عن إحسان لا أستحقه … خمسة أيام كاملة قضيتها خارج البيت … خمسة أيام أغلقت فيها هاتفي وسرحت هائما بين منازل أصدقائي والمساجد أحيانا .. اليوم هو يوم الزواج كما عرفت من جيرانهم … أقف أمام اللافتة المضيئة الكبيرة وأتذكر أيام بعيدة كنت أمر فيها مع سوسن جوار النادي ، وتسألني :
– رأيك شنو في النادي ده يا أحمد ؟
– جميل .. جميل
– قصدي كمكان لحفلة الزفاف وكده
أقول لها بطريقة قاطعة :
– ده إسمو حراء يا سوسن .. يعني لو عايز أتعبد ممكن أجي هنا ، وبعدين عرس ما فيهو غبار وناس عمي محمود يرفعو عصايتهم زي موقعة بدر ، ما بعتبرو عرس
فتقطب حاجبيها كعادتها امام ردودي … أين أنت يا سوسن ؟ أريد أن أراك ولو للحظة واحدة …حتى ولو كانت هذه اللحظة وأنت جوار رجل آخر في كوشة الزفاف … الساعة الآن التاسعة والنصف ، تصمت الموسيقى والأصوات عند دخول السيارة البيضاء الفارهة عبر بوابة النادي .. يتزاحم الناس حول السيارة وأنا عاجز عن الرؤية .. الزفة المصرية الثقيلة إياها تتردد عبر فضاء النادي وتتداعب أحلام كل فتاة لم يأتها فارس أحلامها بعد … أحاول أن أتراجع وأقول لنفسي أن الأمر قد قضى ، ولكن قدمىّ ترفضان التحرك ونظري قد تسمر تماما عند الكوشة البعيدة … حيث العروسين .. قضى الأمر فلتتقبل الأمر بروح رياضية .. نعم روح رياضية حتى ولو كانت روحك قد غادرت جسدك لتسكن جسدا آخر … روح رياضية حتى لو قضيت بقية عمرك بدون إبتسامة .. بدون روح .. بدون عمر … أستدير لأعود موليا ظهري لباب النادي الذي لم أدخله ولن أدخله … أستدير لأعود ولكن صوتا أتى من بعيد مخترقا الموسيقى وضجيج الناس .. صوت ينادي :
– أحمد
ألتفت بكل كياني نحوه ، لأرى هناك عند مدخل النادي ووسط خلفية صافية من الأضواء والظلام ، كانت تقف سوسن …سوسنتي.. لا تلبس ملابس العروس بل ترتدي زيا أبيض قريب الشبه بأزياء الأحباش ، جعلها في نظري أجمل من ألف ألف عروس … دنت مني لتقول :
– إنت وين يا أحمد ؟ سألت عليك ناس البيت وكلنا بنفتش ليك لينا خمسة أيام وتلفونك قافل.. وين مشيت ؟
عجزت عن الرد .. ثم جمعت شتات صوتي لأقول بصوت خافت وأنا أشير للنادي :
– العروس دي منو ؟
نظرت لي بتساؤل وهي ترد :
– دي ميادة بنت جيراننا والعريس حسام ود خالتي … أحمد في شنو ؟
– ناس جيرانكم قالو إنو العروس دي إنتي
إتسعت عيناه بدهشة وإستنكار وهي تقول :
– ده منو المخستك القال ليك الكلام ده ؟ حسام ده ود خالتي وامي ربتو بنفسها وحلفت تحننو في بيتنا وهو من صغير بحب ميادة
إذا فكل هذا الموضوع والمرارة صنعتها بنفسي وتجرعتها دون أن يدعوني أحد ؟ أنا الذي وضعت هذه الفرضية وعشت عذابها طيلة خمسة أيام ؟ هههههههههههههههههههههههههههههه إنطلقت أضحك بمرح وهي تنظر لي وتهز رأسها بطريقة فتاة تعرف جيدا أن خطيبها مجنون … قلت لها :
– سوسن .. ممكن نتمشى شوية جنب الكورنيش ؟ عايز أحكي ليك قصة
مشت جواري صامتة ، فحكيت لها ، وهي تغالب ضحكتها مرة وعبوسها مرة أخرى ، وفي النهاية قالت لي :
– عارف … أنا فعلا زعلت منك شديد ، لكن أنا عمري ما ممكن أعمل كده وفكرت فعلا أنتقم منك لكن أهو إنت براك إنتقمت من روحك … أحمد أوعك يوم تشك فيني تاني .. إنت عارف إنو أنا …
وسكتت ولم تكمل عبارتها … هناك أشياء لا أداعي لإكمالها .. دعها تكمل نفسها بنفسها .. وخفضت هي رأسها بحياء فقلت لها مغيرا الموضوع :
– رأيك شنو في النادي ده ؟
– جميل .. جميل
– لا أنا قاصد كمكان لحفل زفاف وكده
ضحكت قائلة :
– ده إسمو حراء يا أحمد ، يعني لو عايزة أتعبد ممكن أجي هنا ، وبعدين انا عرس ما فيهو ….
قاطعتها أنا ضاحكا :
– عارف … ما فيهو غبار وناس عمك محمود يرفعو عصاياتهم زي معركة بدر
– كنت عايزة أقول ناس عمتي كوثر
– بالله برضو بيرفعو عصاياتهم ؟
– طبعا
وضحكت أنا وضحكت هي ، وأضواء النادي تأتي من خلفنا لتجعلنا مجرد ظلين طويلين ، سرعان ما أبتلعهما الظلام
الكاتب الساخر : د.حامد موسى بشير
