نِفاق أجتماعي

نعل ما موجعك حسي؟…اها البارح انشاءالله نمت كويس؟( ثم بصوت زي الداير يبكي)…. الكسر حار.. اسعلني انا… ديك المرة كسرت كراعي جنب عضم الشيطان ،اسبوع بي حالو عيني ما لاقت….. مفنقل عيوني للصباح….من الوجع…. وبعدين يا شيخنا… البلد دي…. فيها مليون عربية… مافيهم ولا سواق واحد بيعرف يسوق….انا ما عارف بيدوهم رخص كيفن؟… الواحد يجيك طاير…. فوووووو.. ولا يعاين قدامو…. اها نعل الزول الدفشك قبضوهو؟… والله والله يا شيخنا ما بتستاهل الرقدة دي…..) يطلع (منافق افندي) من الرجل بعد ما يقشقش دميعاتو بطرف شالو… ويمشي يزور زول تاني في مستشفى حكومي، في المستشفى الحكومي يرقد راجل في عنبر فيهو سطاشر سرير …برضو في حادث … كسر كراعو وايدو ورقبتو مخنوقة بكوّلة..الكراع مشنوقه فووووق.. والايد مجبصة ومعلقة في الرقبة ومختوتة فوق السدر… مرتو قاعدة عند كرعيهو ولافة طرف توبا وتتهبب بيهو من شدةالحر، شافعو الصغير يقابضو فيهو يجارا في وسط العنبر وهو لابس نعلات ابوهو، بعد ما سكت من البكا لانو قال داير علا ينزلو ليهو المروحة الفي السقف يلعب بها…. يدخل منافق افندي… واول ما يدخل يعتر لو الشافع تحت كرعيهو ينهرو ويقول(يا ولد اقعد ساكت… يا مرا ما تمسكي ولدك دا عليكي من تحت كرعين الناس..شفتي جنس الشلاقة دي ياها زاااااتا الخلت ابوهو تطسو عربية وترضرضو ليكم كدي) ثم يدخل الي الرجل المرضرض( سلامتك….. اااااا الشليق….. نان انت ديمة تقطع في الشوارع غلط…. يا صابر انا كم مرة قلت لك وقت تجي تقطع الشارع اتلفت يا اخي… اتلفت ….الغنماية دي شفتها، يهيمة الله دي قاعدة تتلفت…. علا انت…. وبعدين مشيك.. الزي مشي الناقة دا..ما تمشيهو في شوارع الظلط…زول عليكم الله يمشي فجخ قجخ؟…وعارفك يكون سيد العربية قدر ما داير يزوغ منك انت جاري عليهو لحدي ما زنقتو وطساك..عارفك. أشتر…. نان الشتارة شاحدا… وارثا من ابوك الله يرحمو….)…ثم يقيف (منافق افندي) ويقبل علي الحيطة ويرفع جلابيتو..وينزل العراقي من تحت الجلابية ويدخل ايدو في جيب العراقي.. ويمرق لو لفة قريشات…. يشيل منها ورقة جنيه…ويديها مرت الراجل المرضرض في يدها.. ويقول لها(هاكي…هاكي….. سويهن ليهو في ترمس .. بينفعو)……

عادل الصادق المكي