اشتهينا الانتصارات وموية الزير الباردة وسا سا سا سادومبا



شارك الموضوع :

اشتهينا الانتصارات وموية الزير الباردة وسا سا سا سادومبا


البدلة والكرفتة والتصريحات لن تجعل محمد الطيب (مورينهو)

< كان عباس محمود العقاد عندما يصل الى درجة غليانه يقول : ( من اراد ان يقرأ عن الناس والعالم ما يسره فليخلق للكُتاب ناسا جددا في عالم جديد).< ان كنتم تريدون ما يسركم ..جيبوا ناس جديدة ..(طالعين من علبهم)..الشمس دي ما شافوها.< ما عندهم أي مشكلة في الدنيا دي غير انهم بنوموا من سبعة.< ما عندهم أي هم.< اعملوا عالم جديد ..لا فيه (وصل) مخالفة ..ولا فيه الكهرباء قطعت ..ولا اللحمة زادوها.< ولا المواصلات زحمة ..ولا الرغيف (امموه).< الواقع هنا اصبح اكثرا ايلاما.< هذه الاشياء لا يمكن تزيينها إلا بواسطة (نقاش) ماهر يخفى ما فيها من عيوب.< جيبوا ليكم (نجار)..عشان يحول ليكم اغنية سعاد حسني ( الدنيا لونها وردي) الي واقع.< اللون الاسود ..لا يمكن ان تحوله الي لون ابيض ..او حتى برتقالي.< إلا اذا كنت عاوز تغش ..وتنافق ...وتتغزل في بصات الولاية.< الجزار الذكي ..عندما يصل اليه زبونه الدائم ويطلب منه حصته من (اللحمة) ..يوهم زبونه بانه يخصه بما في (بيت الكلاوي).< وهو بعمل الحركة دي لي أي زول ...(أي شخص بحسسو انه بطلع ليه لحمة من بيت الكلاوي).< عادة يقول له مثل هذه الجملة : ( ح اديك حاجة من بيت الكلاوي).< خاصة يوم الجمعة.< يوم الجمعة ..قوم بدري ..وامشي لي أي جزار ..بقول ليك الكلام دا.< يا ربي الجزارين الفرنسيين بعملوا كدا.< وإلا دا عندنا نحن بس.< ولكي يثبت لك (الجزار) ذلك فانه ينزل (تحت التربيزة) في حركة درامية (تلقائية) ليقدم للزبون (لحمة) من التى يخصها لنفسه ولا يعرضها لكل الناس.< والتلقائية هنا ...لأنه اعتاد القيام بهذه الحركة متى ما وقف زبون امامه.< نزل تحت التربيزة ..وجاب ليه كراع من جوة.< يعني انا بطلعك في حاجات خاصة ..لحمة مدسوسة ..(من بيت الكلاوي).< انا ما عارف (غارزيتو) دا عاوز يثبت لينا شنو؟.< غارزيتو نزل تحت التربيزة.< غارزيتو جاب لينا لحمة من بيت الكلاوي.< اقصد جاب لينا خطة من بيت الكلاوي.< وبيت الكلاوي ما عندها أي ذنب.< اخشي ان يكون غارزيتو بقى يلعب من اجل التعادل ..اضحى يلعب بتشكيلة غريبة ..وخطة غريبة.< خطة من بيت الكلاوي.< بل انه اضحى يجري كل تبديلاته في بداية الشوط الثاني ..يدخل 3 لاعبين دفعة واحدة.< شغل بتاع زول نفسو مارقة.< وفي ذلك مخاطرة ..بالله نحن في مباراة الامل ..وقت خليفة اتعوق ..ختينا يدنا في رأسنا.< لو جمعة اتصاب ..البقيف حارس منو؟.< عبداللطيف بويا.< قد تكون هناك دواعي واسباب جعلت الهلال يظهر على هذا الشكل في المباريات الاخيرة.< الهلال خرج بالتعادل في اخر 3 مباريات في الدوري الممتاز ...وهذا امر غريب ومدهش ومخيفا.< ويجب ان تكون هناك محاسبة ..لنعرف اين يكمن القصور؟.< نتعادل في تلات مباريات ليه؟.< نحن في دورة تنشطية.< اقصد في دورة تعادلية.< نحن بنلعب مع ناس برشلونة واليوفي ويوناتيد في اسبوع واحد.< هل هي عدم مبالاة من الجهاز الفني للهلال ام استهتار من اللاعبين ..ام ان هناك قصورا اداريا؟.< فهمونا انتوا؟.< نحن غلبنا.< طبعا ممكن يطلع ليك محلل فطن كدا ..ويقول ليك السبب الاعلام.< اصلو الايامات دي لو انبوبة الغاز قطعت بشيلوها الاعلام.< الاعلام يعمل ليكم شنو؟.< يكتب ليكم عن زحل ..عن عطارد والمشترى.< وإلا يكتب ليكم الواقع البنشوف فيه كل يوم دا.< نبقى هنود يعني.< الهلال في خواتيم الموسم الرياضي ..واي غلطة غير مقبولة في هذا التوقيت.< لا يعقل ان يفقد الهلال في 3 مباريات 6 نقط ...هذا امر لم يحدث للهلال من قبل.< ونخشي ان يأتي الهلال ويفقد اكثر في المباريات القادمة ..ان لم يبحث مجلس ادارة نادي الهلال عن القصور ..ويعالج الاخطاء والتراخي الذي ظهر على لاعبي الهلال في المباريات الاخيرة.< على ما يبدو ان غارزيتو ..حصل ليه (خلط).< لخبط في الحتة دي.< حصل ليه (حول) بسيط كدا.< الزول دا يكون اتشابه عليه البقر.< يمكن غارزيتو دا لقى الناس فرحوا بالتعادل امام المريخ ...قام قال خلاص وقت الناس ديل بفرحوا بالتعادل كدا ..نحن أي كورة نطلعها ليهم تعادل.< غارزيتو ينتصر ..ما في زول بقول ليه شكرا.< يتعادل ..يفرحوا.< اها الفرنسي الرأسو قوي دا ..دور ليكم في التعادلات.< تاني التعادلات دي البفكنا منها شنو؟.< البطلعنا من الحتة دي شنو؟.< نحن ذاتو الدخلنا الحتة دي ليه؟.< جربنا كل التعادلات ..ما خلينا حاجة.< 1-1 ...اتعادلنا.< 2- 2 ..اتعادلنا.< 0-0 ..اتعادلنا.< نعمل شنو ..تاني.< والله ما فاضل لينا إلا نعمل لينا قفص تعادلات.< عاوزين نعمل لينا مزرعة تعادلات عديل كدا.< بالجد كدا ..تعادلاتنا دي كترت.< بقت شينة ..لما مسخت.< الفرنسي دور لينا تعادلات ..لما شهانا الانتصارات.< اشتهينا موية الزير.< اشتهينا ...سا سا سا سادومبا.< غارزيتو اتعادل مع الخرطوم والهلال يلعب في استاده.< ثم ذهب وتعادل مع الامل في عطبرة.< غارزيتو دا شكلو كدا بقى يلعب للتعادل.< خطتو كدا ..عاوز يطلع بي (نقطة).< النقطة دي يا جماعة ...لا عاوزة ليها مدرب اجنبي ..ولا عاوزة ليها محترفين.< النقطة دي الهلال قاعد في بيتو بجيبها.< كمان عاوزين تشرعوا لينا.< غارزيتو من الكنبة بقى ما بقوم ...(خلاص اتشبع من الانتصارات).< الاخطر من هذا ..هو التصريح الذي خرج من غارزيتو لمجلة فرنسية حسبما نشر في موقع (سودانا فوق) امس.< غارزيتو هاجم رئيس النادي وقال انه لا يوفي بوعوده ..وهاجم الاعلام ووصفه بالمتوحش ..ولم تسلم حتى جماهير الهلال التى وصفها بالتخلف.< وهذا كلام خطير.< يمكن ان نقبل كلامه عن رئيس النادي.< ويمكن قبول وصفه للاعلام الهلالي بانه اعلام متوحش.< لكن ما لا نقبله هو ان يصف جماهير الهلال بالتخلف.< قد يكون غارزيتو واجه الكثير من المشاكل والانتقادات من الاعلامالهلالي ودخل في الكثير من الخلافات مع الجماهير.< لكن كل هذه الاشياء السبب الاول فيها والرئيس هو (غارزيتو) نفسه..فقد تعنت غارزيتو وفقد الدعم الاعلامي والجماهيري بسبب تصرفاته الغريبة.< غارزيتو لا يعرف دبلوماسية المدرجات ..ولا الفة الجماهير ..وهذه اشياء يسأل منها.< المدرب الناجح ليس هو الذي يحقق الانتصارات ويضع الخطط الكاسحة.< المدرب الناجح مع شطارته يجب ان يعرف ان يخلق اجواء الالفة والمودة والتسامح.< المدرب الشاطر هو الذي يعرف كيف يكسب المدرجات.< من ثم فاننا نقول ان جماهير الهلال مازال الي وقتنا هذا يتحدث عنها مصطفى يونس بالخير والادهاش والحب ..رغم من ان مصطفى يونس جاء من القلعة الحمراء ومن اهلي القرن.< لكنه تفاجأ بجماهير الهلال وبعشقها السرمدي الغريب.< كذلك شهد كامبوس المدرب البرازيلي السابق للهلال وقال عن جماهير الهلال انها اعظم جماهير يشاهدها في حياته ..وكامبوس جاء من بلد السامبا.< كامبوس اندهش بجماهير الهلال ..التى استقبلته من مطار دبي ..وجاء الخرطوم ووجد ان الجموع كلها في انتظاره.< المتابع لمسيرة غارزيتو يجده دائما يتجنى هكذا على الاندية التى يدربها عندما يريد ان يرحل.< هذا اسلوب بالتأكيد مرفوض ..وغير مقبول ..وينقص كثيرا من قدر صاحبه.< غارزيتو دخل في خلافات كثيرة وهو في مازمبي ..وقلل من قدر هذا الفريق الكبير عندما رحل منه.< وفعل غارزيتو اسوأ من ذلك عندما اتهم ادارة الوداد بشراء المباريات بعد ان انهي مسيرته مع النادي المغربي بعد اقل من شهرين من التعاقد معهم.< وها هو غارزيتو يعود الان ..ويضرب بتصريحاته كل الاطراف ..وينال من الجميع.< وقد يذهب ابعد من ذلك ان انهي تعاقده مع الهلال.< ويمكن ان يشوه غارزيتو سمعة الهلال ..وقد خرج مصرحا في مجلة فرنسية ..ظنا منه اننا في العالم الثالث ..لا يمكن ان تصل لنا هذه المجلة.< مجلس الهلال مطلوب منه ان يجلس مع هذا المدرب ..ومازلنا نشدد على وجوب الابقاء على غارزيتو والحرص على استمراره رغم كل هذا (العداء) الذي يحمله غارزيتو.< نتمنى ان يحل مجلس ادارة نادي الهلال كل المشاكل التى يتعرض لها هذا المدرب وان يوفر له المجلس احتياجاته حتى نصل الي كل البطولات التى ينافس الهلال من اجلها هذا الموسم.< واظن انه ليس من المنطق ولا المعقول انهاء التعاقد مع المدرب الفرنسي في هذا التوقيت رغم تصريحاته الغريبة.< مازلنا نتعشم خيرا في غارزيتو ..ونعتقد ان الهلال بسماحته وجماله قادر ان يبدل طبع غارزيتو.< اسهل ان يحل المجلس مشاكل غارزيتو وان يوفر له طلباته ..ونتمنى ان يفي الامين البرير بالوعود التى قطعها مع هذا المدرب.< نحن ما ناقصين عدم وفاء.< من بعد فان الجماهير والاعلام يمكن ان تساند المدرب الفرنسي وتدعمه اذا حقق الانتصارات والبطولات المنتظرة.< اذا حقق غارزيتو بطولة الكونفدرالية باذن الله وتوفيقه فان التخلي عنه يبقى ضربا من الجنون.< احسب ان المجلس معنى اولا واخيرا ببطولة الممتاز وببطولة الكونفدرالية ..لذلك فهو مطلوب منه توفير كل احتياجات المدرب الفرنسي.< جماهير الهلال نقول لها ان الوقت القادم ..هو وقت لدعم الهلال ..وللمساندة فقط.< هو وقت للمزيد من الحب ..لا الكراهية.< هو وقت للعمل ..لا الكلام.< ادعموا الهلال الان ..يحتاجكم الان اكثر.< الاعلام الهلالي من اهم الادوار التى يقوم بها هو ان يقدم نقده ..واعتراضه على الخطوات التى يرى انها غير صائبة.< لكن الجماهير في كل الاحوال ..عليها ان تدعم الهلال وتسانده ..كما ان الجماهير الهلالية مهمتها الاساسية والاولى هى التشجيع والمساندة.< لا تتخلوا عن مهمتكم النبيلة والمتمثلة في دعم الهلال وتشجيعه ..واحسب ان ما تقوم به الجماهير هو اعظم من كل الذي تقوم به القطاعات الاخري.< ما تقوم به الجماهير اعظم من الذي يقوم به مجلس الادارة ..وهو اعظم من الذي يقوم به الجهاز الفني واعظم مما يقوم به اللاعبون ..واعظم مما يقوم به الاعلام.< دوركم الاول والاخير ..هو مساندة الهلال وتشجيعه ..ودعمه في كل الميادين التى يلعب فيها الهلال ويتواجد.< احيانا كثيرة ..اجد العذر لغارزيتو ..ولتصريحاته الغريبة والمستفزة ..وذلك لسبب بسيط وهو انه لم يجد الدعم الكافي من الاعلام والجماهير.< كما انه افتقد الحب ..والالفة.< اعرف ان هذه الاشياء يسأل منها غارزيتو فهو مدرب لا يحسن الكلام ولا التصرف ..وتبدر منه دائما تصرفات وتصريحات تجعله في خانة الضد دوما.< لكن مع هذا ..دعونا ..نكون نحن الافضل ..والاحسن ..اذا كان غارزيتو لا يمتلك للقابلية الكافية والكارزيما التى تجعله مدربا محبوبا ومقبولا في الهلال ..تعالوا نحن نغض الطرف من كل هذا ..ونتنازل قليلا من اجل الهلال.< تعالوا نمنح غارزيتو الحب والالفة التى يحتاجها ..حتى يحقق الهلال مراده ..ونفوز بكل الكاسات المطروحة في الساحة الان.< اشكر مجلس ادارة نادي الهلال رغم عدم الايفاء بالوعود ..انه مازال متمسكا بالمدرب حتى بعد التعادلات الثلاثة المتتالية.< ومازالت تصريحات الامين البرير في حق غارزيتو تصريحات متمسكة به.< وهذا شيء جميل من مجلس الادارة ..حتى ونحن ننتقده في الكثير من الاشياء.< بقى ان نسأل جماهير الهلال ان تدعم غارزيتو ..ليس من اجل غارزيتو ..وانما من اجل الهلال.< البطولات لا تأتي بالادارة القادرة ..ولا بالاموال الكثيرة.< والبطولات كذلك لا تأتي بالمدرب الشاطر..ولا باللاعبين القادرين.< البطولات تأتي بالسند الجماهيري والدعم والتشجيع المستمر.< وهذه اشياء نطلبها ونسألها من جماهير الهلال ..ويقيني ان جماهير الهلال لن تبخل بشيء على الهلال.< شيء اخير ..اريد ان اعلق عليه ..وهي تصريحات محمد الطيب مدرب فريق الامل ..الذي يصدق نفسه احيانا.< مرات بعمل فيها (مورينهو) عديل كدا.< مرات بصدق.< يا عزيزي محمد الطيب ..لا البدلة ولا الكرفتة ..ولا التصريحات يمكن ان تصنع منك (مورينهو).< لا البدلة ولا الكرفتة ولا التصريحات يمكن ان تصنع منك مدربا جيدا.< محمد الطيب ...يحب ان يخلق لنفسه رواجا في الصحف ...بعد ان فشل في ذلك في الملعب.< هو مدرب ملعبه في (الصحف).< ينتظر مباريات فريقه مع الهلال او المريخ فقط من اجل البدلة الجديدة ..والتصريح الغريب والكرفتة الملفتة.< تعادل الهلال والامل ..لم يكن ناتجا من خطة (عبقرينو) محمد الطيب ..ولا من (بدلتو) التى ظهر بها واقفا على الخط.< التعادل الذي خرج به الامل من الهلال ..ناتج من سوء اداء الهلال ومن تواضعه.< وصدقني الهلال في المباراة دي ما كان محتاج لي بدلة او كرفتة.< الموضوع اسهل من كدا.< نعم ان الهلال لعب مباراة في غاية السوء امام الامل ..وكان يمكن ان يتعادل الهلال مع فريق درجة ثالثة اذا لعب بهذا المستوى.< هذا التعادل كان نتيجة لاخطاء الهلال ..ولسوء عرضه.< لو ان محمد الطيب مدرب شاطر فعلا ..لحقق الانتصار على الهلال ..لأن الهلال امام الامل كان يستحق الخسارة.< محمد الطيب قال في تصريحات صحفية انه كان في هذه المباراة اشطر من المدرب الفرنسي غارزيتو.< يا زول ..دي ما كانت (نقطة).< اشطر من غارزيتو مرة واحدة كدا.< وقال محمد الطيب ان دولارات المدرب الاجنبي احق بها المدرب الوطني.< شفتوا المشكلة وين؟.< المشكلة كلها في (الدولارات).< يا محمد الطيب يا مورينهو يا عبقرينو الكورة السودانية يا كبير يا ابوكرفتة ..انت اشطر من غارزيتو في شنو؟.< والله إلا تكون اشطر منو في (الكرفتة).< نحن ما شايفين ليك أي حاجة اكتر من كدا.< من بعد اين تلك الشطارة التى يتحدث عنها محمد الطيب و 3 اندية من اندية الممتاز انهت في هذا الموسم التعاقد معه نسبة لسوء النتائج التى حققها محمد الطيب.< خلاص اتعادلت مع الهلال ..عاوز تعمل لينا فيها انك خطير.< وانك شاطر.< وعاوز تتحدث لينا كمان عن دولارات غارزيتو.< غارزيتو بدون كرفتة متصدر الممتاز ..وقريب من تصدر مجموعته في الكوفندرالية.< اين فريق الامل الان؟.< نقطة خلت محمد الطيب يصرح ويستعرض ..ويقول كل الكلام.< نقطة بس.< فريق الرابطة كوستي الذي وصل للنقطة 18 الان ..مع محمد الطيب لم يعرف ان يتجاوز النقطة الخامسة.< محمد الطيب قال فنيا انا افضل من غارزيتو لأنه وصل مرمي الهلال اكثر من خمس مرات.< هي الفنيات دي غيروها.< اعملوا ليها (تعريف) جديد ونحن ما عارفين.< الزول دا وصل خمس مرات قال الكلام دا.< طيب لو سجل هدف كان عمل شنو؟.< زولكم طلع بي نقطة من الهلال ..ما خلي ليه جريدة ما صرح فيها.< وقعد كمان يتحدث عن الفنيات.< والله يا حليل الفنيات ..وحليل ايامها.< محمود عزالدين طلع لوحده من المريخ بـ (5) نقاط..ما عمل البتعمل فيه دا يا محمد الطيب.< قال مورينهو قال.< هو قالوا ليك البلد ناقصة (مورينهو).< أي واحد عاوز (يتموهرن) فينا على مزاجه كدا.< نحن ما ناقصين للمورينهات البتعمل لينا فيها دي يا محمد الطيب.< ركز في كورتك ..وما تصرح كتير ..وخليك عارف ان (الكرفتة) لن تصنع مدربا جيدا.< ملحوظة : والله مورينهو الاصلي يشوفك يا محمد الطيب إلا يعمل ليه (حافلة) يشغلها في خط الكلاكلة ..ويكتب في ضهريتها (يا مدهشة).هوامش< سرنا من صحف الهلال ومن الاعلام الهلالي على وجه الخصوص ..انهم بعد مباراة الامل لم يكتبوا عن التحكيم.< رغم سوء التحكيم.< الحكم حسب 3 دقايق فقط كزمن بدل ضايع ..في الوقت الذي اضاع فيه لاعبو الامل اكثر من ربع ساعة.< الزمن الضايع نفسه 30 ثانية ..ما اتلعبت فيه.< طبعا التعادل دا لو حصل في المريخ ...كانوا الجماعة ديل سمعونا قصايد ..ومعلقات عن التحكيم.< كانوا 7 سنوات كانوا بتكلموا عن (الحكم).< الجماعة ديل الي الان بتحدثوا عن تعادلهم مع الاهلي مدنى في المطر.< قالوا السبب الفاضل ابوشنب.< وضربة الجزاء الوهمية التى لم تحتسب للمريخ سنة 1996.< و..و..وعيك.< فلقتونا فلق.< شكل الهلال الحالي غير جيد ..وهو اذا سار على هذا النحو ..سوف يفقد جميع البطولات.< سوف يخرج من المولد بدون حمص.< لا روح ..ولا مسؤولية ..ولا احساس بالمباراة.< الاصابات التى تعرض لها لاعبو الهلال مطلوب من مجلس الادارة ان يسرع في علاجها.< هذه المرحلة لا تستحمل أي اصابة.< سانيه في مباراة الامل كان الوحيد الذي لعب بجدية ومسؤولية ..ورغبة.< مدثر كاريكا ..بيلعب في حتة ذاتها ما مفهومة.< كاريكا في حتة ..وسانيه بنزل للنص ..وبكري المدينة في حتة.< طيب العاوز يجيب القون منو.< كاريكا بي شكلو دا ..إلا يحولوا ليه (العرضات) في الكورنر.< نفسي كدا كان اشوف كاريكا في خط 18.< ايكانغا ...الي متى يستمر على هذا النحو ..ضرب وشلاليت ..وحاجات ما مفهمومة وكرت اصفر.< بل ان ايكانغا في الكثير من مخالفاته يستحق الكرت الاحمر.< يا ايكانغا روق.< انت محترف وإلا محترق.< مجدي ام بدة الي الان فاكر نفسو بيلعب في المريخ.< الود عامل فيها كابتن كبير.< سلم على الميدان كلو وقت عاوز يطلع.< تقول عاوز يطلع القمر.< والحكم قاعد يعاين.< عموما فريق الامل قدم مباراة كبيرة ..وكان يستحق الانتصار ..والتعادلالذي خرج به الهلال قياسيا بمجريات المباراة ..هو مكسب للهلال.< لكن دا كلو لا يعني ان محمد الطيب فنيا افضل من غارزيتو.< محمد الطيب كمان حددها عديل كدا.< ولا كذب ..قال انا (فنيا) افضل من غارزيتو.< انت يا محمد الطيب عارف غارزيتو دا شال كأس افريقيا للاندية كم مرة.< عارفو عمل شنو مع مازمبي في كأس العالم للاندية.< انت يا دوب عاوز تثبت في الممتاز ..تجي وتقول انا افضل من غارزيتو (فنيا).< الهلال محتاج الي معسكر مقفول.< معسكر مقفول ..يبدا فيه من اول جديد.< الطبيعي ان يتصاعد اداء الفريق مع تقدم البطولات.< لكن في الهلال حدث العكس.< هناك تراجع عام.< صالح الامين عاد بقوة ..واضاف لدفاع الهلال الكثير.< كايا ...يلعب حسب متطلبات خانته ..وهو يحسن في ذلك.< فقط مطلوب من كايا ان يكون اسرع في الايقاع.< محمد احمد يحتاج ان يجلس في الكنبة شوية.< مستواه لا يمنحه حق المشاركة.< هيثم مصطفى كان بعيدا عن مستواه في الشوط الثاني الذي شارك فيه.< بكري المدينة كان الاسوأ على الاطلاق.< لو استمر الطاهر حماد كان افضل.< استبدال 3 لاعبين دفعة واحدة ومنذ بداية الشوط الثاني ..يجعل هناك تراخي واهمال من اللاعبين ..لانهم يلعبون وهم لا يخشون الاستبدال.< غير ذلك فان هذا الامر فيه مجازفة كبيرة من غارزيتو.< مباراة الهلال امام الاهلي شندي في الكونفدرالية ..ومن منطلق مستوى الهلال هذا تبقى اكثر من صعبة.< لا سيما وان الاهلي شندي عاد الي مستواه الاول ..وتقدم كثيرا في المباريات الاخيرة.< والكوكي مدرب شاطر ..وحافظ الهلال حفظ.< لذلك فان مباراة الهلال امام الاهلي يوم الجمعة القادمة تبقى مباراة خطيرة بالجد.< مستوى الهلال في المباريات الاخيرة مخيف.< عشمنا ان يعود الهلال الي سيرته المعروفة قريبا ...لأن الفقدان في المباريات القادمة غير قابل للتعويض.< تاني أي فقدان بطلعك من البطولة.< أي فقدان بفقدك بطولة كاملة.< لذلك يبقى مرفوض التراخي والاستهتار الذي ظهر على بعض لاعبي الهلال في المباريات الاخيرة.< مجلس ادارة نادي الهلال مطلوب منه يلم الدور.< يشوف الحاصل شنو؟.< علاءالدين يوسف بعيد عن (فييرا).< وفييرا ذاتو بعيد عن علاءالدين يوسف.< الهلال الايامات دي (جمعة) بس.< جمعة براهو ..تاني ما في أي زول.< لو كان بهاءالدين يحرس مرمي الهلال في عطبرة ..كان الامل سوف يخرج بالنقاط الثلاث.< جمعة دا يا جماعة ما بيلعب مهاجم.< ناس المريخ بعد ما فقدوا (الامل) في الممتاز..رجعوا تاني يتحدثوا عن الممتاز.< عاجل : ان شاءالله تجي مطرة في مدني الليلة الشوط التاني بالتحديد كدا.[/SIZE]وإن طال السفر - صحيفة قوون

شارك الموضوع :

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.