لو حكمها (صديق علي صالح) ما بعمل كدا..ضربتي جزاء من (الصراف الآلي)

لو حكمها (صديق علي صالح) ما بعمل كدا..ضربتي جزاء من (الصراف الآلي)!! اهداف الغزال في عصام الحضري هدف (محلي) وهدف (سفري) الحكم (باع) القضية
< في مباراة القمة الافريقية مباراة الذهاب ..توقفت المباراة ..وتحرشت جماهير المريخ بحكمالمباراة ..وكسرت (مقاعد) استاد الهلال لأن الحكم طرد اللاعب (بدرالدين قلق) الذي اعترف كل المريخاب بما في ذلك اعلام المريخ باستحقاقه للطرد. < لكن مع ذلك هناك من حمل (كراسي) استاد الهلال ..ذنب طرد بدرالدين الدود الشهير بـ (قلق). < واعتبر اعلام المريخ ان ما قامت به جماهير المريخ تدخل في باب (الامر بالمعروف). < وان تكسير كراسي الهلال وتحطيمها من (نوافل) الانتماء للمريخ. < ادارة نادي المريخ كانت قد ذهبت الي ما هو اكثر من ذلك وحققت مع اللاعب بدرالدين قلق بحجة انه (تعمد) الطرد ..وخرج من الملعب هو (قاصدا) ان يجعل المريخ يلعب بعشرة لاعبين..وفي ذلك كان اتهاما واضح لقلق الذي استبعد من المشاركة في عدد من المباريات بسبب تلك (الاتهامات). < مع هذا ..فان جماهير المريخ ..ثارت وحطمت كراسي استاد الهلال. < وقالوا (كراسي) استاد الهلال هي (الغلطانة)..على طريقة غلطان المرحوم. < وعلل اعلام المريخ ذلك بالظلم الي وقع على المريخ في مباراة الذهاب الافريقية ..واعتبروا ان تحطيم (كراسي) استاد الهلال حسب تعليلاتهم ..امر طبيعي في ظل الظلم الذي وقع على المريخ. < والظلم المقصود هنا ..والذي وقع على المريخ هو (الطرد) الذي تعرض له بدرالدين قلق ..وكان قلق مستحقا للكرت الاحمر بشهادة اهله كما ذكرنا سابقا. < في مباراة القمة الافريقية الاخيرة مباراة الاياب ..احتسب الحكم الزامبي ضربتي جزاء لصالح المريخ ..لا توجد حتى في (خيال) جمال الوالي. < ضربتي جزاء لو منحوا جمال الوالي (طباشير) وسبورة ..وقالوا ليه (ارسمهن)..ما برسمهن. < ولا بعرف. < بل ان ضربات الجزاء (الكوم) التى احتسبها حكم المباراة الزامبي لا يمكن ان يحتسبهم (مخرج) فيلم هندي يشطح في الخيال والكوميديا السوداء ، مع هذا (الصراف الآي).. صرف الحكم ضربة جزاء صحيحة للهلال ..لو كان (صديق علي صالح) حكما لهذه المباراة ..لما تردد في احتساب ضربة الجزاء لصالح الهلال. < لو سمحت صديق علي صالح ...طالعوا لينا بالذات من الحتة دي. < ان حكم المباراة الزامبي كان في احيانا كثيرة ..وهو يدير المباراة يعتقد انه (صديق على صالح) ..معليش ي الحقيقة...بل ان الحكم كان بدخل في الدور حسب مطلبات اللعبة ..احيانا بكون (عادل ابوجريشة)..واحيانا (صديق على صالح)..واحيانا (فيصل العجب). < وعندما يدخل الهلال منطقة جزاء المريخ ..ويرتكب دفاع المريخ ضربة جزاء لصالح الهلال كان الحكم الزامبي بدخل في جبة (ضفر) الذي حنث بالقسم. < ووقت الموضوع يسخن مع الحكم ..بعمل فيها (بلة جابر). < مع ذلك ..فان جمهور الهلال احتمل ذلك الظلم ..وكتم غيظه ...وخرج من الملعب ..رغم رائحة (الشواء) التى احس بها الجميع. < خرج جمهور الهلال دون ان يكسر (كرسي) واحد ...لكن جمهور الهلال قدم رسالة اقوى من كل الاشياء ولوح بالعملة الورقية واللبيب بالاشارة يفهم. < من اجل هذا اليوم وحتى تخرج تلك (الطبخة) في ار هادية على ذلك النحو الذي كان في مباراة القمة الاخيرة ...حاولوا ارهاب (الاعلام الهلالي) ...نعم الاعلام الهلالي ولا اقول الرياضي ..واشاعوا بين النا محاكمة بعض صحفي الهلال وايقاف صحف الهلال ...حتى يتمكنوا من اسكات اصوات الهلال ..من اجل اخراج مباراة القمة الاخيرة بذلك الشكل (السخيف). < هم يحاكموا ..ويقرروا ..ويوقفوا ..ويعملوا أي حاجة ..وما في زول يقول ليهم : لا. < لكن حتى اسكات اقلام الهلال ..فشلوا فيه ..وعادوا الي ادراجهم بتبريرات .لا تقنع احد ...ليظهر اخيرا ..ذلك (الفساد) الرياضي الشنيع ..وحكم المباراة (الزامبي) يحتسب ضربتي جزاء للمريخ ...اشطر مهندس مساحة ما بحسبهما. < ضربتي جزاء ...(صديق علي صالح) في احلامه ...ما بحلم بيها. < ضربتي جزاء في خريف البطانة الاخضر ...ما بحسبوها. < لقد قدم الحكم الزامبي اوضح صور (امساندة) للمريخ على عينك يا تاجر ..واظهر المريخ على حقيقته وهو يمنحهم عبر (الصراف الآلي) ضربتي جزاء ...ويحرم الهلال من ضربة جزاء حقيقية. < ضربة جزاء الهلال ..ما بشوفها. < كأنها ارتكبت في (اندونسيا). < لا حس ولا خبر. < على المريخ ان يصرف لاعبيه ...يفك (العجب) ...ويشطب (سكواها) ...وينهى عقد (كلاتشي)...ولعجوز (عصام الحضري) ...ليس هناك حاجة لاولئك اللاعبين في وجود (صديق علي صالح)...والحكم الزامبي الذي كان (صديقا) اكثر من (صديق) نفسه. < بل ان الحكم كان صديقا وعليا وصالحا في وقت واحد. < دا يا صديق ربيتو في (مدرجاتكم). < اكيد الحكم دا مواليد (نادي المريخ). < الحكم دا طلع مريخابي اكتر من (طابقكم). < مريخابي اكتر من طابق شاخور. < الحكم الزامبي كان أي لاعب يقع في منطقة جزاء الهلال بحسب ليه (ضربة جزاء). < بل ان الحكم الزامبي بلغ حدا انه كان مستعدا لان يحسب (ضربة جزاء) لصالح مشجع المريخ (ود الجنيد)، اذا وقعت (طبلة) ذلك المشجع في المدرجات. < اما منطقة جزاء المريخ ...لو حدث فيها (تفجير) قنبلة ..الحكم بقول مشي ..لو اتفجر (سادومبا) في خط 18 المريخ ..الحكم ما بحتسب حاجة للهلال..فهو في الوقت الذي كان شغال بيه في المريخ بفقه ( يا حنين) و(زيدني من دلك شوية).. و(الحنين يا فؤادي)..و (يا قسيم الريد تعال لي)...كان شغال في الهلال بفقه (اغالط نفسي بي اصرار واقول يمكن انا الما جيت) ..و(تسيبني في عز الجمر) ..و(تروح ان شاءالله في ستين). < ممكن (القاعدة) تدخل خط 18 المريخ ...وتنسف (ساني)..ويلتفت ذلك الحكم الزامبي لرجل الخط ..ويقول ليه (مشي). < هي المباراة دي كان فيها (حكم خط). < ممكن عادي ...الحكم دا كان وقت الكورة تدخل في منطقة جزاء المريخ بغمض ..وبشتغل بالاحساس..وكيلو الطماطم بقى 10 جنيه. < هسع كيلو الطماطم الدخلو هنا شنو؟. < اما مواطنه (سكواها) ... لو وقع بـ (النية)...ساكت فان ذلك الحكم مستعد يحسب تلك (الوقعة) التى حدثت في (النوايا) ضربة جزاء. < الحكم حسب ضربة جزاء لصالح (سكواها)..اظنها كانت مع اللاعب الزامبي سكواها عندما كان طفلا في حواري زامبيا. < الحكم مع المريخ كان صاحب حواس مرهفة ...ودواخل شفافة ..زول في منتهى الرقة من انتاج (جبنة لباشكري). < الحكم كان مع المريخ ..زي (مهند ونور)..منتهى الرومانسية. < حكم (رومانسي) جدا..بنوم من سبعة ...ولو جاءه (مسكول) بالغلط ...ما بنوم الليل. < بكتب الواجب ..وبحل الرياضيات ..وبسمع الكلام. < عشان كدا كان أي حاجة ..تحصل في (النوايا) في منطقة جزاء الهلال كان بحسبها (ضربة جزاء). < ان شاءالله حاجة حصلت قبل عشرين سنة ...الحكم دا ممكن يحسبها باثر رجعي. < ما في أي مشكلة < في زول وقع في موقف استاد الهلال ..ضربة جزاء. < أي حاجة بحسبها للمريخ ..فقد كان ذلك الحكم مع المريخ ...زي (امينة رزق) في افلامها القديمة ...لو جابو ليها سيرة (السفر) ساكت ..تنشرط (بكا). < هسع امينة رزق الدخلها هنا شنو؟. < امينةرزق ..رغم من انها لم تتزوج ولم تجرب اسحاس (الام) الحقيقي إلا انها كانت افضل ممثلة عربية تقوم بدور (الام) في السينما العربية والتلفزيون المصري. < والحكم الزامبي هذا ..قام بدور (الام) لي ناس المريخ ...كان في منتهى (الحنية) مع ناس ضفر ..وباسكال. < انتوا ما حضرتو الفيلم الهندي الشهير ( من اجل ابنائي). < الحكم الزامبي ..طبق الفيلم دا لي ناس المريخ. < الحكم الزامبي دا ما فاضل ليه إلا يغني لي ناس بلة جابر واحمد الباشا ..( يا سمسم القضارف). < ضفر ..الذي لا يفرق بين مرماه ..ومرمى الخصم ...في وجود هذا الحكم (العينة) جاب ليه قون في الهلال. < اكيد وجد الضمانات الكافية ..عشان يتقدم ..ويسجل قون. < قالوا بعد (القون)..ضفر كان مفتكر الهدف دا جاو (عكسي) في مرماه ...اول حاجة كان عاوز ينشرط (بكا) ..إلا رمضان عجب لحقو سريع قبل (الكاميرا)..قال ليه الهدف دا جبتوا انت في (الهلال). < ضفر 10 دقايق ..ما قادر يستوعب الحكاية دي..لما شرحها ليه (رجل الراية). الحضري وحراس التجارب < حارس المريخ المصري عصام الحضري ...جرّب فيه هجوم الهلال كل الاشياء. < سجلّوا فيه (اهدافا) بشتى الطرق. < كأن هجوم الهلال جعل عصام الحضري (حقل تجارب) ..فهم قد فعلوا فيه أي شيء. < ما فاضل بعد كدا ..إلا يجيبوا (الشطة والليمون). < سجلوا فيه بالطرق الحديثة ..والطرق التقليدية ...من برة الخط ..ومن جوة الخط ..وبالقدم وبالرأس. < بالشنقيطي وبالوداي وبي الاربعين وبالستين ...وعن طريق شارع الهوا. < من بعيد ..ومن قريب ...اي حاجة عملوها في الحضري دا ..زي (الكمونية) في بيت العزابة. < العزابة بتفننوا في (الكمونية) زي ما عاوزين..يوم يعملوها (دمعة)...ويوم (سليقة)..ويوم (يشوها) في النار. < يوم يقلبوا فيها خضار ..اسود ويوم ملوخية ...ويوم (يقرشموها) ليك بالزيت ...تأكل فيها الجنبك ما بتديه. < كل هذه (التفننات)..والتجليات الخطيرة ..في (الكمونية). < الحضري دا ..عند ناس الهلال بقى زي (الكمونية)...ممكن يعملوا فيه أي حاجة. < جربوا فيه أي شيء ..زي (العجلة) في البيت الفيه سبعة اخوان ...كل يوم بسوقها واحد فيهم. < العجلة دي اصلو ما بتلقاها ..واقفة ساكت في (الضل). < الحضري زي (العجلة) دي ...خلينا ..(الكمونية) عشان العزابة ما يزعلوا. < الحضري دا ...سادومبا جاب ليك فيه (هدف)..بعد ان (بدل) سادومبا في (الجو). < سادومبا عمل (كُرس)...ثم هدف باللفت..وسادومبا ..بيلعب بقدمه اليمني. < لكن في الحضري دا ..عشان يثبت ليكم (نظرية) الباسطة حلوة بايتة ..جاب ليكم فيه هدف بالقدم الشمال. < من برة الخط ..الحضري دا قدر ما قرأ للكورة حقت سادومبا ..ما قدر يحصلها. < انت يا الحضري ..قايل نفسك صغيّر ..شنو الحركات البتعمل فيها دي؟. < كورة سادومبا دي (كلب صيد) ما بجيبها ..عاوز تيجبها انت بعد ما وصلت الـ (44). < كورتك بقيت تتمها (نطيط) بعد المباراة ما تنتهي ..انت خامي ناس المريخ ديل ساكت. < خامي الجماعة في الفاضي. < حركاتك البتعمل فيها دي ما عاوزة ليه حارس مرمي محترف. < ما عاوزة ليها حارس مرمي (اجنبي). < ولا محتاجة حتى لي حارس عمرو (44) سنة. < حركاتك البتعمل فيها دي ..(يس) بعملها. < غايتو القون الجابو فيك (سادومبا) دا ..اي حارس عندو (كرامة) يسجلوه فيه ..ما بحوم تاني في خط 18. < قون سادومبا ..دي احكي ليكم عنو كيف؟. < افصلو ليكم على ياتو قناة. < شفتوا الزول وقت يكون قادم من برة. < الزول وقت يكون مسافر ..وراجع السودان من بلاد برة ..موش الزول دا شكلو بكون (جديد) كدا. < ومعنوياتو بتكون فوق. < الزول وقت يكون قادم من برة ..بدخل صالة المطار ..بنتظر (الشنطة). < الزول بقعد يعاين في (الشنط) وهي في (السير)..بعاين في شنطة ..شنطة. < طبعا أي زول بعرف (شنطتو). < انت من (شنطتك) تظهر في السير من بعيد ..بتقوم من قعدتك ..وبتقول للناس القاعدة معاكم ...انا شنطتي ظهرت. < تقوم تستقبل الشنطة...وتشيلها وتطلع. < اها يا جماعة هدف سادومبا دا ..جاء من بعيد ...عصام الحضري ..قام استقبلوا زي (الشنطة). < شفتوا كيف؟. < عشان تعرفوا ..نحن أي حاجة عندنا بي نظام. < نحن ما عندنا حاجة ساكت. < دا هدف سادومبا. < ادخل ليكم على هدف ساني الذي سجل في عصام الحضري ..في اخر 4 دقائق من عمر المباراة. < عصام الحضري ..قاعد يتجدع في المباراة كلها. < الحضري عامل فيها (محمد كمال)..قال كورة ما بتدخل فيه. < مهند الطاهر يجدع ليه في (الزوي)...والحضري يلقط في (الكور). < ساني شاف الشغل دا ...وجاب ليه (ورقة وقلم)..وكتب الملاحظات دي. < ساني (فقري)..ما خلي ليه (ملاحظة). < عرف ليك الحارس دا كبير في السن ..وبعاني من ضعف نظر في الكور الارضية. < قول واحد. < الحاجة التانية عمكم الحضري دا مهند الطاهر في تلك المباراة عمل ليه (قطائع). < والحاجات دي حارس تجاوز الاربعين ..ما بقدر عليها. < غارزيتو ..قوّم الطاهر حماد ..قال ليه قوم سخن. < الحضري قلبو اتقطع. < زولكم بقى زي صاحب التاكسي الوقف في الصف ..اي زول يجي فايت عمكم يعاين ليه. < والزمن ماشي ..والدقيقة 84 جاءت ..والمباراة قربت تنتهي. < وساني كان قبل عشرة يوم في سوق الجمعة بتاع السوق الشعبي الخرطوم ..قال جملة خطيرة. < ساني كان قال للناس الفي سوق الجمعة ..الحضري دا خلوه لي في الدقيقة 85. < اصلو الحضري ونتيجة لعامل السن ..بقطع في الدقيقة 85. < قالوا بعد الدقيقة 85 الحضري بشوف الكورة زي (الاسكراتش)..لو شتها فيه من (الواق الواق) بتدخل. < ساني انتظر الدقيقة 85 ..وقال لي الطاهر حماد ..ارفع. < الطاهر ما كذب ..رفع ليك (الكورة) ..زي ما بقول الكتاب. < ساني (قشط) ليك الكورة زي (الاسكراتش). < الكورة نزلت في (الشبكة) زي الموية الباردة ..وعصام الحضري واقف بتفرج ..زي (يوسف شعبان) في (الضو الشارد). < الحضري ما فهم أي حاجة ..الكورة فاتت بي جنبو زي (الكديسة). < انت يا الحضري ما كنت عامل فيها (شفت). < عليكم الله كورة ساني دي لو (محمد كمال) لقي ليه رصيد بي عشرة ساكت ما بقبضها. < لكن الحضري يقبضها كيف ..وهو فاكرها (كديسة). < الكديسة هسع ذنبها شنو؟. < هسع دا هدف بالقدم ..يمين الحضري ..وهدف ساني بالرأس شمال الحضري. < شفتوا النظام دا كيف؟. < شفتوا التنوع دا كيف؟. < نحن أي حاجة عندنا بي نظام. < أي حاجة. < نحن ما عندنا حاجة ساكت. < بمناسبة النظام دا ..ندخل ليكم على اهداف مهند الطاهر في مباراة امس الاول. < اول حاجة ..عشان الاولو شرط اخرو نور ..اهداف مهند الطاهر دي جات عديل كدا. < ما فيها أي (دفع مقدم). < اهداف حمرة عين ..وقوة ضراع ..ضربة جزاء ما فيها. < عشان ما تلخبطوا لينا اهداف مهند (الساخنة) مع اهداف سكواها (الهدايا). < مهند الطاهر ..طبعا شال ليك (البرمجة) من ساني وسادومبا ..عرف ليك الحضري دا ضعيف وين؟. < كشف ليك نظر عمك. < عشان كدا ..الهدف الاول ..ما كان فيه أي تعب. < هدف (جدعة) كدا في الحتة الفاضية. < الهدف دا اقول ليكم زي شنو؟. < انتوا موش مرات ..بتمشوا ليكم حتة بتاعة حلويات. < موش الواحد مرات بقطع ليه (نص كيلو) بساطة في المحل ..وبقول لصاحب المحل ..اعمل لي (كيلو) سفري. < يعني نص كيلو (محلي)..وكيلو (سفري). < شفتوا (المحلي) دا ..هو الشيء العملو مهند الطاهر ذاتو في الهدف الاول الذي سجل في الحضري. < الهدف الاول الذي سجله مهند الطاهر في عصام الحضري كان هدف (محلي). < النوع البتأكل ..وتغسل يدك قبلك ..وتقول لي صاحب المحل ..بس اعمل لي من دا. < الهدف الاول حق مهند الطاهر ...مهند (جدعو) قبلو ..عصام الحضري بقى يتلفت زي بتاع (المونتاج). < هدف بدون أي تعب ..هدف بالعقل ..الهدف دا بالامانة كدا ...(محمد كمال) ما بقدر يطلعو. < الحضري قاعد يتفرج في الهدف ...الظاهر عاوز ينط في الكورة بعد اربعة يوم. < غايتو الحضري دا لو عندو (جنسية سودانية)...قلنا (لو)..مفروض بعد هدف مهند الطاهر (المحلي) دا ..طوالي يسحبوا منو (الجنسية) السودانية. < دف مهند الطاهر ..الحضري ما قدر يطلعو ...الحكم الزامبي ..قدر ما حاول واتجدع وشاف ليه أي ثغرة في القانون الهندي عشان ينقض الهدف دا ..ما قدر. < لا الحضري ..لا الحكم ما قدرو يعملوا حاجة مع هدف مهند الطاهر الاول. < نخش في هدف مهند الطاهر التاني. < الهدف (السفري). < الهدف البتقول لي بتاع الحلويات ..اسمع (لفو) لي في ورقة ..وادينا ليه في كيس. < ورقة شنو؟. < هسع بقوا يلفوا في (صندوق). < احكي ليكم شوية عن هدف مهند الطاهر التاني ...الهدف (السفري)...الهدف البتشيلو معاك (البيت). < هدف مهند الطاهر التاني دا ..ما في زول شافو ..لا الحضري ..ولا الحكم ...ولا نحن ولا المخرج. < الكورة فجأة كدا لقيناها في (الشبكة). < عشان كدا هدف مهند الطاهر دا نظامو براهو. < افتح قوقل. < اكتب في البحث ..(جميلة ومستحيلة). < بتظهر ليك عشر خيارات. < خيار فيه محمد وردي. < وخيار فيه محجوب شريف. < وتسجيل قديم للاغنية ابيض واسود ...محمد وردي لابس فيه بدلة (سفاري) كاروهات. < ما تشتغل بالحاجات دي. < في خيار بتلقاه ضمن الخيارات دي اسمو مهند الطاهر سام 110. < دق علي سام 110...بتلقى هدف مهند الطاهر في الحضري. < بتلقى الحضري في الهدف دا زي الزول البسقي ليه في (شجر) برة البيت. < الموية قاطعة ...وشغال بالجردل. < او بتلقى الحضري زي الزول الراجي نتيجة الفحص. < الملاريا ظاهرة ليه في عيونو. < غايتو يا الحضري طلعت بتاع كلام ساكت. < طلعت بتاع تصريحات بس. < مهند الطاهر دا عمل فيك أي حاجة. < جرب في كل شيء. < هدف بالزلابية ..وهدف سادة ساكت. < هدف (عذبني وزيد عذابي)......وهدف (جميلة مستحيلة). < هدف (محلي) وهدف (سفري). < تاني يعمل ليك شنو اكتر من كدا ؟...اي حاجة ممكن تتعمل في حراس المرمي ..ناس الهلال عملوها. < والله يا الحضري لو ما الحكم دا ..كنت طلعت مغلوب 3-1...لكن الحكم شافك. < عشان كدا باقي عمرك دا احسن ..تلحق ترجع بيه. < ناس الهلال ديل لو لمّوا فيك بدون الحكم الزامبي دا ...تسعة ما بتفكهم منك. اكرم الهادي سليم.. (الكنبة) بتعمل اكتر من كدا < انحصر دور اكرم الهادي سليم في الفترة الاخيرة على (الرقيص) متى ما سجل فريق المريخ (هدفا). < واصبح كل دوره هو ان يقدم (قارورة) موية لي اديكو ..او قارورة موية الي (سكواها) مدفوعة الثمن طبعا. < ويشيل راتبو على كدا..وكمان مع حوافيز (رقيص). < ما دون ذلك فان اكرم الهادي سليم لم يعد له أي دور في المريخ ..وقد اوضت مشاركة اكرم الهادي سليم مع المنتخب ضد المنتخب الاثيوبي في مباراة الذهاب ...ان علاقة اكرم الهادي سليم بالكورة انحصرت في ان يحضر (قوارير) المياه للاعبين. < اكم دا ..(كتر خير الحضري) نسي الكورة نهائي ..واصبح حارس المريخ (السابق) حبيس (الكنبة) يظهر في صورة (الكادر) فقط لو سجل المريخ (هدفا). < اكرم زاد وزنه في الفترة الاخيرة بصورة واضحة ..وهذا انعكاس حقيقي للكنبة. < اكرم الهادي سليم بعد ان كان يحرس مرمي المريخ ..اصبح زميل في الكنبة لفيصل موسي ووارغو (مكانيب) المريخ. < او يمكن ان نقول (مشاطيب) المريخ في فترة التسجيلات القادمة. < المحيرني فيصل موسي دا ..الزول دا كان في الاهلي شندي زي (الحصان)..لو ما سجل قون ..كان بتكون عندو كورة او كورتين ..ضربن في (القائم). < هسع فيصل موسي بقى قاعد في الكنبة ..(صاري) 90 دقيقة. < المباراة كلها ..(صاري). < معقولة يا فيصل موسي ..انت بتدرب وتتمرن في المريخ وتدخل معسكرات ..وتصرف مرتبات ..وتشيل حوافز على (الصرة) دي. < والله (الصرة) دي نحن عندنا ما محتاجة ليها لي (فانلة)..ولا عاوزة ليها (كدارة) وشنكار. < الصرة دي بدون الحاجات دي ممكن تقوم بيها. < فيصل موسي ..كل ما تجيبوا (الكاميرا) بنلقاه ..صاري ..المريخ مهزوم (صاري) المريخ فائز (صاري)..متعادل (صاري) في كل الاحوال فيصل موسي (صاري). < زمان في اهلي شندي كنت بتضحك يا فيصل موسي زي (العجب)..ما كان عندك أي مشكلة. < لكن برضو تستاهل ...خليت الهلال ..ومشيت لموطن (الصرة) الرسمي. < براك سويتها في نفسك. < انت عارف يا فيصل موسي بي (صرتك) دي اهلي شندي ما بقبل بيك. < وناس شندي ذاتهم زول بالصرة دي ما بخلوه يقعد في (كنبتهم). < لذلك إلا ترجع (الميرغني) كسلا ..من اول وجديد وتبدأ من الصفر. < حاول ..تبدأ بداية صحيحة ..وما تهتم كتير بالمريخ دا ..اصلو ريكاردو بكتل المواهب. < ضفر بقى (نجم) في المريخ ..وبقى يجيب اقوان كمان في الهلال ..وانت قاعد في الكنبة بي (صرتك) دي. < تقول عاوز تطلع كرت الخدمة الالزمية. < يا ود الناس ..والله الحكاية ..ما بتستاهل ..ابتسم من فضلك. < فكها شوية ..وإلا اقول ليك حاجة ..اكتل قلبك زي (اكرم الهادي سليم)..وارقص معاه. < وبالمرة كدا ..جيب قوارير الموية لي ناس رمضان عجب. < من زملاء اكرم الهادي سليم وفيصل موسي ..اللاعب الكبير سفاري. < سفاري الذي كان يهش وينهش ..بقى (كنبة). < وقت يلعبوا سفاري بيلعبوه ضد جزيرة الفيل ..او النيل الحصاحيصا. < سفاري ما بيلعب إلا امام الاندية الصديقة. < انتوا في مباراة القمة الاخيرة دي ..كلتشي كان لاعب وإلا كان قاعد مع ناس اكرم الهادي سليم. < كلتشي دا ما في زول حاسي بيه. < يمكن يكون عاوز (مرتبو). < اصلو كلتشي من يكون عاوز ليه (قروش) ما بيلعب ..بعمل فيها ما عارف أي شيء. < اما سكواها فهو لولا مواطنه الحكم الزامبي ..ما كان في زول شعر بيه. < قالوا الحكم دا ..اخو سكواها في (الرضاعة). < اقصد اخوه في ضربة الجزاء ..وقد كان سكواها همزة الوصل. < والله يا سكواها ...اهدافك دي ..لو لقاها فيصل موسي في كنبتو مع حكمكم دا يسجلها. < فيصل موسي شنو؟. < اهدافك دي راجي عبدالعاطي في الامارات وهو بتعالج لو لقي ليه حكم زي الحكم الزامبي دا كان بسجلها. < عشان كدا ..ما تفرح كتير. < نحن عارفين الحافز شالو الحكم ...انتوا قالوا نزلوا (صورك) ساكت مع الاهداف دي ..وجابوك في الجرايد. < تاني ما عملت أي شيء. < في سؤال عاوزين نقفل بيه الحتة دي. < انتوا الحكم الزامبي دا اتمرن تمرين المباراة مع ناس المريخ ..وإلا دخل التشكيلة ساكت؟. < الزول دا فاهم (سكواها) شديد. < قلت ليكم الحكم دا ..اخو سكواها في الرضاعة. < ملحوظة : لو النيل الحصاحيصا لقى ليه حكم زي الحكم دا ..بجيب كأس العالم للاندية. هوامش < مجلس ادارة نادي الهلال تعامل مع مباراة القمة بسهولة ...لم يحفز اللاعبين ولم يصرف المرتبات. < كذلك كان مجلس الهلال (سلبيا) امام تحركات المريخ نحو حكم المباراة. < كلنا شفنا الضجة التى اصطنعها مجلس المريخ واعلام المريخ عندما وصل حكم مباراة الذهاب في عربة الهلال. < مجلس ادارة نادي الهلال ترك الحكم الزامبي في حضن المريخ ..منذ ان كان الحكم في زامبيا. < ما قدمه الحكم الزامبي للمريخ ...لا يقل باي حال من الاحوال عن ما قدمه فيصل العجب للمريخ. < الذي يجب ان يضع اسم هذا الحكم ضمن اسماء العظماء في المريخ. < سجل هذا الحكم سوف يظل خالدا في المريخ. < المريخ وقع في شر اعماله. < فريق المريخ سوف يواجه ليوبار الكنغولي الذي استطاع ان يفوز على دجوليبا المالي بثلاثة اهداف نظيفة. < غارزيتو طلع (مفتح). < غارزيتو ..عرفها ..وهو الخبير في شئون الكورة الافريقية. < راجي عبدالعاطي ...هل ما زال في الامارات. < انتوا راجي دا بقى (ممثل)..والا شنو؟. < الانتصار الذي حققه المريخ على الهلال اول امس افضل منه (الهزيمة). < اظن ان المريخاب الان نادمون على ذلك الانتصار الذي حققوه خارج الملعب. < مجلس ادارة نادي الهلال لا يعرف يحمي ظهر الهلال. < مجلس ادارة نادي الهلال لا يحمي الهلال خارج الملعب. < وهذا يثبت عجز المجلس. < المجلس يحتاج الي تقريع واضافات حقيقية ..وإلا حلوا المجلس. < هذا المجلس بشكله الحالي ..بقى لا بحفز ...ولا بحمي الهلال من مكر الحكام. < ردة فعل مجلس ادارة نادي الهلال حول الحكم الزامبي ضعيفة. < الشكوى للاتحاد الافريقي لا تكفى. < يجب ان يتكون هناك تحركات لكشف هذا الحكم ..وتقديم ادلة تثبت تورط هذا الحكم. < الهلال عليه الان ان يركز في مباراة النيل الحصاحيصا. < ما حدث في استاد المريخ يمكن ان يحدث في استاد الكاملين. < الهلال قد يتعرض لمذبحة تحكيمة اخرى في الكاملين. < ومجلس ادارة نادي الهلال بعيد عن الاحداث. < الحمدلله ان اعلام الهلال قويا ..قدر يثبت هذه الالاعيب ..وكشفها للراي العام. < ناس المريخ بقوا يخجلوا من انتصاراتهم. < غارزيتو مدرب يستحق التقدير. < لعب بالصف التاني ..وقدم فريقه مباراة غاية في الجودة. < ادعموا غارزيتو حتى يحقق الهلال المراد. < عاجل : جار التحميل.[/SIZE]وإن طال السفر - صحيفة قوون