مهند الطاهر ..(لحنّا)..وسمّعهم احلى نغمة

مهند الطاهر ..(لحنّا)..وسمّعهم احلى نغمة لجنة تحقيق مع الحضري برئاسة (قلق) وضفر (مقررا)
< في الهلال ...هناك خدمة (الديجتال) التى انتظمت في كل خطوط الهلال ..واصبح بذلك هنالك خدمة (رقمية) سائدة في الهلال. < وتبع ذلك خدمة (هاتفية) ، جعل الهلال يظهر في كثير من المناسبات الرسمية بصورة (تكنلوجية) حديثة. < عملا بمبدأ ( نحن أي حاجة عندنا بي نظام). < انا عارفكم هسع الكلام دا واقع ليكم كتر ..كتر. < كلامي دا بتعارض ليكم زي (القزاز). < انتوا عاوزني ادخل ليكم مباشرة في (ملصة) عصام الحضري للكورة امس امام ليوبار. < بتستعجلوا انتوا على الحاجات دي. < بضيقوا. < بس دا عيبكم الوحيد يا الهلالاب ..اي حاجة بتستعجلوا ليها. < (ملصة) الحضري دي عاوزة ليها شغل (مخصص)...شغل مفصل كدا. < عاوزة ليها (محو امية) عديل كدا. < شغل الاستعجال دا ما بنفع مع الحكاية دي. < والله الموضوع دا مفروض تكوّنوا ليه (لجنة) عديل. < وبعد (اللجنة) البتكونوها للموضوع دا ..مفروض تنبثق لجنة من اللجنة الام. < بس عشان الحضري يفهم حاجة. < غايتو انا اول مرة اشوف لي زول ...بتظهر ليه (سنون اللبن) بعد العمر دا. < زول عمرو 44 سنة ..بفك الكورة بالطريقة دي. < انت خليت شنو لي (يس) يا الحضري. < يا الحضري الموضوع دا ممكن نقبلوا منك في دور الـ (64). < في التهميدي يعني. < او حتى في دور الـ (32). < او في سيكافا ..التى شهدت ليك (موجة) من الاهداف العكسية. < لكن كونو يحصل منك دا في دور الاربعة ..يبقى الكلام دا منك عيب عديل كدا. < الظاهر الحضري ...اتذكر حكاية (البطيخ)...من اللوري للملجة...قام طبق الحكاية دي في مباراة الامس. < الحضري رجع لي قواعدو. < الكورة ما فاضل ليه إلا يقشرها. < انت يا الحضري ما شفت (جمعة) دا بقبض في الكور كيف؟. < جمعة دا ما شاءالله عليه شغال في الست اتجاهات. < الحضري الكورة بعد ما يمسكها ..يفكها. < انتوا عارفين الحضري عمل كدا ليه؟. < احكي ليكم القصة ..قبل ما ادخل ليكم للخدمة (الهاتفية) التى دخلت في الهلال في الفترة الاخيرة. < قالوا ليك الحضري ...بعد ما مسك الكورة ...قعد (ينقز) بيها. < في اثناء (التنقيزة) دي ...الحضري قال لي رئيس البعثة في الكنغو ..انا عاوز مرتب شهر (ديسمبر). < ضفر ..قال ليه ...لكن ديسمبر لسع ما جاء..ونحن يا دوب في بدايات نوفمبر. < الحضري ..الكلام دا ..ما عجبو. < قال ليهم ..لو ما جبتوا لي مرتب ديسمبر ..انا بفك الكورة. < رئيس البعثة افتكر الحضري بهظر...ما اشتغل بالموضوع. < الحضري طوالي فك ليك الكورة. < (باع) القضية. < الكورة جات قون. < المهم يا جماعة ...نحن موضوع (الحضري) دا هسع ما ح نشتغل بيه كتير. < نحن ذاتو ..ما فاضين للمواضيع دي. < طبعا ..مجلس المريخ ...ممكن يعتبر الكلام عن (ملصة) الحضري ..كلام غير وطنى. < وممكن يقولوا الكلام دا بمس آمن الوطن. < والشرعية ..و..و..ويقعدوا يشرعوا لينا ..لمن نقلع ضفورنا. < هسع (الضفور) الدخلها هنا شنو؟. < وممكن عادي جدا ..جمال الوالي وصديق علي صالح وهمد يمشوا مجلس الصحافة ..ويشتكوا في الموضوع دا. < وممكن كمان مجلس الصحافة ..يحول الموضوع للقضاء. < يعني (الفكة) دي ..ممكن تبقى زي (الكراسي). < الحاجات دي نحن حفظناها ..حفظ. < بقينا ناقشنها ..قبل 48 ساعة من حدوثها. < موش الزلازل بتتعرف قبل ما تحصل. < حافظنكم حفظ يا مريخاب. < بنرجع لي موضوع (الفكة) دي...موضوع زي دا ما بنفكو ..ولا بنجامل فيه. < الحضري دا مفروض مرتبها الشهر دا يأخذو بي (البر) الاثيوبي ....جنيه كتير عليه. < اما (الدولارات) دي مفروض عند ناس (ضفر) تاني ما يشوفها. < خلوني هسع مع (الخدمة) ...العاوز احدثكم عنها ..تطيروا الكلام من رأسالزول زي (الحمام). < بنرجع (لاحقا) لي موضوع الحضري. < قبل فترة (دشنا) خدمة الحساب بقى بي الـ (سانيه) التى طبقها على ارض الواقع المحترف السنغالي ابراهيما سانيه. < ناس زين ديل مفروض يدعموا الهلال ..عشان أي خدمة يعلنوا عنها ...لاعبو الهلال ديل بطبقوها بالورقة والقلم. < ولا بتلفتوا. < كلنا شاهد (سانيه) يوم ان قام زي البحر القائم ...وعمل ليه حركة (تمشيطية) كدا على رأس المنطقة المحرمة في المريخ ..وسجل في شباك عصام الحضري هدف (دائري) في اخر ثواني المباراة. < هدف (تشرب ما تروى). < الشيء دا يا جماعة هو تطبيق عملي للحساب بقى بي الـ (سانيه). < انتوا إلا يشرحوها ليكم كدا..إلا يطقطوها ليكم ..عشان تفهموها. < الشيء دي ما واضحة. < زول جاب ليه هدف في عصام الحضري في الدقيقة 85 ..وبعد ان اعلن المذيع الداخلي للمباراة فوز عصام الحضري بنجومية المباراة. < سانيه طوالي دور ليك بي هناك. < ناس اللجنة الفنية التى اختارت الحضري نجما للمباراة من جانب المريخ ..لو ما شافوها (شينة) كان سحبوا الجائزة من الحضري. < بس بقت تقيلة عليهم. < سانيه عمل ليك في ناس ضفر ونجم الدين حكاية (القمر بوبا). < سانيه طبق ليهم بشكل عملي ( ما بتشيل جردل على الزير وما بتحش قش التناقير). < حش التناقير دا ..عصام الحضري ..قدر ما (اتمطّى) في الدنيا دي و(اتمغّى) عشان يلحق الكورة دي ما قدر. < دي يا حضري عاوزة ليها (اجازة بدون مرتب) عشان تقدر تجيبها. < بي اخوي واخوك الكورة دي ما بتتمسك. < السنغالي سانيه ..جاب ليك الكورة من تحت ...خلي ليك عصام الحضري زي الزول الماشي الفتيحاب ..يقوم يركب بالغلط في حافلات المنشية. < فجأة كدا ..زولكم (يتخلع)...في الدقيقة 85 تحديدا ..ويلقى نفسو في (وزارة التربية). < عشان تتعلم بس. < طوالي يدق للكمساري ..ويقول ليه : (نزلنا هنا عليك الله) ..ينزل من الحافلة زي اخر (سمكة) في الصينية. < الايادي كلها تتقاطع عليها. < سانيه ..عمل الحكاية دي مع (الحضري)...في الدقيقة 85 من عمر المباراة تطبيقا لمبدأ الحساب بقى بي الـ (سانيه). < اول قالوا ليكم نحن بنتكلم ساكت. < نحن ما عندنا حاجة كدا ..بتجي عفوا ساكت.. نحن اي حاجة عندنا بي نظام. < زي حفلات الجعليين. < كراسي النسوان براها ..وكراسي الرجال براها ..وبيناتهم فاصل كمان. < وفاصل للولاد ..وفاصل للبنات. < اصلو ما في (لخبطة). سانيه ..ما فعله في عصام الحضرى عملا بالمبدأ السابق الذي حدثتكم عنه ..جاء وطبقه مرة اخرى في مباراة الهلال ودجوليبا..عندما سجل (سانيه) والمباراة تتجه نحو استراحة الشوط الاول. < في الدقيقة 44 من الشوط الاول ...(سانيه) سجل في الفريق المالي. < شفتوا شغل (الثواني) دا كيف؟. < هدف بالقلبة. < الحارس المالي الى وقتنا هذا ما فاهم حاجة. < عشان تاني تتقدم ساكت. < نقول ليكم الحساب بقى بي الـ (سانيه)...ما بتصدقونا ..تقعدوا تغالطوا فينا ..زي الزول وقت يصحىى الصباح وما يلقى (فرشة الاسنان). < يقوم يقلب البيت دا فوق وتحت. < سانيه دا في اخر الدقائق ..اقصد في اخر الثواني ..اعملوا حسابكم منو؟..ما بلعب ..ما بتلفت..ولا بيأس. < بظل بحاول لمن يسجل. < في مباراة الهلال ودجوليبا الاخيرة ..لو ما غارزيتو طلعو في الشوط التاني كان سانيه عمل نفس النظرية في اخر المباراة. < كان تاني سجل في الشباك المالية. < بس الله ساكت شاف الفريق المالي. < دي بالنسبة لخدمة الحساب بقى بي الـ (سانيه). < الليلة وعلى طريقة ناس زين برضو عندنا خدمة جديدة. < خدمة مطبقة ..ولا عاوزة ليها شرح كتير. < واضحة زي الشمس ..(عشان ما تقعدوا تتغالطوا فينا ساكت). < الخدمة دي هى خدمة مهند الطاهر ..والتى جأءت هذه المرة تحت عنوان (لحنّا). < لحنّا ..وسمّعهم احلى نغمة. < مهند الطاهر ..الكورة بقى (يلحنها) عديل كدا ..ثم يلعبها بعد كدا. < ناس زين بقولوا : (لحنــا هي الخدمة التي تقدمها زين لمشتركيها (( Ring Back Tone )) لاستبدال نغمة ورنة الاتصال العادية بنغمات صوتية مختلفة ومُختارة يسمعها المُتصل). < وبقولوا كمان : (ضربت لي زول... سمعت النغمة... وعجبتك؟ أضغط النجمة * على موبايلك ... وشيل النغمة أثناء إستماعك لها. وسيتم تخصيص النغمة للجميع). < نحن عشان نختصر ليكم الكلام الطويل دا ..لو عاوز خدمة (لحنّا) دي ..شوفمهند الطاهر بعمل في شنو؟. < الشيء البعمل فيه مهند الطاهر الايامات دي بتوافق تماما مع ما يفعله عوض احمودي واسامة بيكلو. < دا شغل (تلحين) عديل كدا يا مهند. < مهند الطاهر ضغط على (النجمة)..وجاب ليه هدفين في عصام الحضري البفك فى (الكور). < ومهند الطاهر (لحنها) ليكم في مباراة دجوليبا ..وقدم مقطوعات موسيقية رائعة ..ابرزها كان التمريرة التى قدمها لمدثر كاريكا ..وسجل منها الاخير هدف الهلال الثاني. < بالمناسبة دي تمريرة مهند الطاهر لي مدثر كاريكا كانت (غير متضمنة الضريبة). < شفتوا النظام دا كيف؟. < نحن أي حاجة عندنا بي نظام. < ونحن والله ما عندنا حاجة بنقطعها من رأسنا. < أي حاجة بنجيبها من بالثابتة. < هسع يا الحضري دي كورة بفكوها. < والله عمليتك دي لو عملها حارس صغير في السن ..كنا قبلناه منو. < لكن الحركة دي يعملها حارس عمرو 44 سنة ..يبقى الموضوع شين في حق ناس هشام السليني ...والهادي سليم. < يا الحضري ...(جمعة) قال ليك تاني ما اشوفك في مول الواحة. < بس دا كلو عشان ما نغلط معاك. < اصلو قالوا جمعة غضبان غضب شديد من (ملصة) الحضري. < ملحوظة : موضوع الحضري دا تاني بنرجع ليه. هوامش < يا مريخاب ..ما تقعدوا تدسدسوا في حكاية الحضري دا. < اعملوا لجنة تحقيق مع عصام الحضري. < وانا من عندي بقترح يكون رئيس اللجنة دي بدرالدين قلق ..وضفر مقررا وعضوية نجم الدين وليما. < ليما طبعا ما فاهم أي حاجة. < قالوا ليما الي الان مفتكر ان المباراة 1/1...قايلها (تعادل). < حاجات زي ليما فى البرازيل ما عندهم. < دي فوضي دي. < الحضري السنة كلها يكورك في بلة جابر. < يا بلة جابر ..دي فاتتك لو كنت سافرت مع الجماعة كنت اتسديت حقك زي (قلق). < لكن قلق ما قصر. < قلق طبعا ..غايظهو (الدولارات). < الموضوع ما موضوع ملصة. < اطرف شيء في مباراة ليوبار والمريخ امس ..هو ان مدافع المريخ باسكال هو جاري بالكورة قاعد يتكلم ويتنفر في الناس. < لمن قطعوا منو الكورة. < غايتو انا امس لمن شفت ملعب المباراة ..عرفت ليه غارزيتو قال عاوز المريخ في النهائي. < الملعب دا ما ملعب نهائي بطولة يا جماعة. < والله ناس مدثر كاريكا في الملعب دا لا بلعبوا ولا بكضبوا. < دي حاجة ما بجاملو فيها. < عشان كدا ...اخير لينا المريخ. < افضل لينا نجيب لينا (كأس) من العرضة جنوب ..نعدي الشارع بس. < ناس الامين البرير ديل ...ما عندهم ذاتو قروش للسفر للكنغو. < ونحن ولا فاضين للمواضيع الزي دي. < الكونفدرالية دي ...ما عاوزة ليها تعب. < كفاية نقطع شارع الظلط ..ونجيب الكأس. < كأس شنو البنسافر ليه نحن. < معليش يمكن نسافرلي كأس السوبر. < لكن كأس الكونفدرالية (البفكو) فيه الكور دي ..والله ما محتاج للتعب دا ..تذاكر وتأشيرات ..وجواز سفر. < عشان كدا ..احسن في النهائي نواجه (المريخ) زي ما قال غارزيتو. < طبعا نحن الكأس من استاد المريخ بي ناس محمد عبدالرحمن ممكن نجيبو. < نخلي باقى الكلام لي بكرة. < عاجل : وإلا نواصل يا جماعة.[/SIZE]وإن طال السفر - صحيفة قوون