من أجل البلد

– ريسنا ده والله أحسن ريّس.. الرجل المناسب في المكان المناسب.. في الزمان المناسب.
ثم يضيف:
– يا سلام.. يا ريت بس لو ما يتخاسسو عليهو يطفشوهو.. لو طفشوهو ح يكون خسارة للبلد.
كان الجميع يؤمنون على كلامه بعبارت مثل:
– صاح والله.
– يا ريت بس لو يثبت.
– يا سلااام.
كان هذا الرجل يتحدث كثيراً عن الريّس:
– الريس أول أمس قال لو الهواء ما عاكس اللعيبة.. ولو الشمس ما عكست في عيونن.. ولو الحكم ما ظلم.. ح نغلب ونرفع اسم البلد.
ثم يضيف:

– الريّس أمس عطس.. وعطستو ذاتها بتختلف من باقس عطسات الناس.. عطسة الريس بتختلف.!
(2)

وفي أثناء تلك الجلسة قال الريس:

– تعرفو يا جماعة.. كل ما الخريف يجي.. البعوض يكتر.
على الرغم من أن العبارة عادية.. إلا أن المتملق قام من معقده وهو يقول بصوت عال:
– يا سلام .. يا سلااااام.. والله يا ريس لسانك ينقط درر.
ثم يلتفت إلى بقية الضيوف وهو يحرك يديه في الهواء بحركات مسرحية ويقول:
– يا جماعة شوفو الحكمة دي.. صاح والله أنا ملاحظ كل ما الخريف يجي.. البعوض يكتر.. وملاريات.. وبلاوي.
(3)

يسكتون قليلاً ثم يقول المدير:

– الأيام دي ضهري مؤلمني.. و..
هنا يقاطع المتلمق:
– سلامات.. سلامتك.. كفارة ليك يا ريس.. أكيد التعب ده من أجلنا نحنا.. من أجل النادي.. ومن أجل البلد..
ثم أجهش المتلمق بالبكاء.. بكى بكاء حاراً.. وبكى معه الجميع.. حتى أن الريس هدأهم بصعوبة.

– أتمالكو أنفسكم يا جماعة.
ثم يضيف بصوت مؤثر:

– التعب ده واجبنا نحنا.. لازم نتعب من أجلكم.. من أجل النادي.. ومن أجل البلد.
(4)

بعد أن هدأ الجميع تم إحضار الغداء.. وفي أثناء الأكل قال أنزل الريس عمامته الضخمة وإلتفت إلى الجميع وقال:

– شراب الموية أثناء الأكل بعيق عملية الهضم.. الأفضل الواحد يشرب الموية بعد الأكل بساعة.
هنا إلتفت المتملق إلى زملائه وقال بصوت مرتفع:

– سمعتو كلام الريس المُهم ده يا جماعة.. الناس الكبار دائماً كلامهم كبير.. لو الواحد قعد مع الريّس ده ربع ساعة بس.. ح يستفيد كتير.. أي كلمة يقولها عندها معنى عميق.
فجأة تجشأ المدير بصوت عال على هيئة (عااااع).. سمعه هنا المتملق وقال بصوت أعلى:

– الله .. الله.. صحة يا ريس..
الريس قال:

– الحمد لله.. المعدة تعبانة شوية.
المتملق إلتفت إلى زميله وقال:

– الريس ده قدم خدمات كبيرة للنادي وللبلد.. قدم زمنو وصحتو.. ما خلى حاجة لي نفسو.. معدتو زاتها تعبت من أجل البلد.!