العنف ضد الرجل”العيِشة ام دق”

ويسعلوهو من المرا(أها كلتوم كيف؟)..ويرد وايدو فوق قلبو( كلتوم البيشبها منو؟…وحات الله كان ما عرستا كلتوم دي كان المغصة كتلتني…اصلي ما بقدر الوما ..مرتن هدية ورضية)..وتكون كلتوم ساعية ليهو مفراكة للدق…..وما بينضم عشان خايف يقولو عليهو مرتو قاعدة تدقو….او بتمارس عليهو العنف لوكان لفظي او حسي او حتى العنف الصامت وهو اضعف انواع العنف زي الحدريّبة والصرصير…… النسوان ما يشتكن كتير…. العنف على الزمن العلينا دا بقى متبادل….الراجل يجي من السهلة تعبان وقرفان تلاقيهو المرا في خشم الباب صارة بوزا….دا عنف صامت…ولو الراجل اتحرك اي حركة القيامة تقوم ويشيلو ويختو اللوم فوقو ولو طلقها يشتغل الاعلام( عان كمان طلقها؟…غايتو بس، يا قول المقالة: رضينا بالهم والهم ما راضي بينا…. المعولق المبشتن… سوتو زول… ودا جزاها؟… )وتكون هي مورياهو الويل وسهر الليل…..في واحدة من الدول العربية في راجل اتلمن واتعونن عليهو مرتو وبناتو(الشر برا وبعيد) اتلمن عليهو وادنو دقة خلنو علي الموت…وبعد داك مشن اشتكنو( ضربني وبكا وسبقني اشتكا)….وفي المحكمة اصلو ما نضم…والقاضي قرب يحاكمو…علا الشهود قالو للقاضي القصة مو كدي الراجل القدامك دا هو المدقوق…وبعد زرزرة ،الراجل رفع جلابيتو وورا المحكمة بكان الدق…. وقال انا سكتا خفتا يقولو الراجل الدقتو مرتو وبناتو تراهو داااااااك!!!…… في جريدة التيار في رمضان القبل الفات…خبر عن راجل مرتو فلقتو بالكانون لما كانت بتعوس في الابري…. فلقتو وودهو ولادو المستشفى وسو ليهو ستة غرز….يخيطو ليهو وهو يهرج ويهدد في اولادو(والله امكم دي شفتوها ..اصلها عاجبها سُمُنا دا…ونان هي سمنانة بي شنو؟ ما بي قروشي انا..لكن اصبرو لي فيها…ارجع البيت ان ما شنقلتها ورميتا في الواطا وخنقتها ليكم)…..في المانيا سوو اول ملجأ للرجال القاعدين تدقهم نسوانهم….ويعنفنهم..ملجأعديل كدي زي المايقوما….والخواجات مافي شي بيحميهم يمشو ..الواحد يشيل عفشو ويدق باب الملجأ ويقول لهم انا مدقوق من مرتي….وديل قالو كمان يدقنهم ويشلتنهم في بكانات الشلوت فيها ختري على الحرث والنسل……العنف ما ضروري يكون دق…. ممكن يكون ايذاء للمشاعر…. الاستهانة بالزوج عنف والتقليل من شانو وخصوصا قدام الناس والمجتمع دا عنف برضو … التجفيف الاقتصادي للزوج عنف(دايرين ودايرين ودايرين) بلا غرض، دا عنف وارهاق اقتصادي ….منع الزوج من حقوقو الزوجية دا عنف وعدم سوعال كمان بي يودي النار، اها بس!!!…وخصوصا لو المرا سوت الحكاية دي شغلة واعتبرتها نوع من العقاب والضغط….وبعدين نحن كان رجال كان نسوان ،مالنا بي نتعنف علي بعض…. ما نقعد في الواطا دي وكل زول يحترم التاني!!!!!!