كوش نيوز .. أخبار السودان بين يديك

لا كونفدرالية ..لا ممتاز ..ركزوا في (كأس السودان)



شارك الموضوع :

لا كونفدرالية ..لا ممتاز ..ركزوا في (كأس السودان)


< عندما خسر فريق المريخ امام (ليوبار) في الكنغو 1 /2 بهدف (كارثي) من عصام الحضري..انصرف كل المريخاب للدفاع عن الحضري. < شيء مرافعات ..وشيء (تغلطوا انتوا يا حلوين ..نجيكم نحن بالاعذار). < ناس بلة جابر ...واكرم الهادي سليم ..الواحد لو (صرج) ليه كورة ساكت بعاقبوه. < الحضري يعمل أي شيء ...دا (الكبير اوي). < المريخاب ذهبوا جميعا نحو تكريم الحضري ..واستقبلوه استقبال الابطال في مطار الخرطوم. < استقبلوه باناشيد الوطن ..(اليوم نرفع رأية استقلالنا)...وكرري تحدث عن رجال كالاسود الضارية. < نحن قلنا يا ربي الحاصل شنو؟...البلد دي فيها (استقلال) جديد ..نحن ما عارفنو. < الظاهر كدا دا عيد وطني نحن ما جايبين ليه خبر. < جماهير المريخ لم تستقبل (حامد بريمة) يوم ان عاد في عام 1989 من نيجيريا بي كأس الكؤوس الافريقية مثلما استقبلت الحارس العجوز وهو عائدا من الكنغو بهدف تسبب في خروج المريخ من الكونفدرالية قاطعا وصوله للنهائي الذي كان سوف يكون في استاد المريخ بام درمان. < حامد بريمة دا كان بتقطع زي (نمل السكر)..قدام الكورة. < العالم دا كلو ...ما في زول بعرف يجيب قون في حامد بريمة غير (مصطفى النقر). < النقر براهو العندو (الشفرة). < هسع الحضري ..يمسك فيها ..ويفك زي (تحميض الصور). < حسبنا في البدء ..ان عصام الحضري ..(البطل) الذي وقع في خطأ كارثي هو احد شهداء كرري. < قلنا نحضر ساحات الفداء ..نشوف الحاصل شنو؟. < تباعنا عمود اسحاق احمد فضل الله يمكن نلقى فيه (السر). < يمين لا السر ..ولا درمة. < عملوا ليه أي حاجة .. حفة شاي .. غداء عمل ...سمك ...رصيد مجاني ...ما فهمنا أي حاجة. < نكون نحن الغلطانين ...(اقول يمكن انا الما جيت). < الكورة الفكاها الحضري دي ...يمكن في الدوري المصري. < يمكن (فكة) قديمة كدا. < بسبب دفاعات المريخ (الجوية) عن (الملصة).. ظننا ان غلطة الحضري دي كانت في (الكاميرا الخفية) ..وهم يدافعون عن الحضري دفاعا كما يدافع الاشاوس عن الاوطان والعرض والشرف. < ذكروني افلام فريد شوقي وهدي سلطان. < فريد شوقي دا كان وحش الشاشة العربية ..اصلو ما في زول بقدر يقول ليه حاجة. < قلت يمكن دا غسان مطر ..يا جماعة دي شنو (الطربقة) دي. < غسان مطر دا ..اي فيلم بمثل فيه ..بمثل دور الشر. < قالوا ليك لو لقيت غسان مطر في حفلة ..برة الفيلم ..اعرف طوالي ان الحفلة دي (شرانية). < المريخاب كبوا كل معرفتهم ..كل ثقافتهم ..ولياقتهم ..وشجاعتهم في الدفاع عن عصام الحضري. < الطوب الفي ..السيخ المخزن ..الاسمنت ..كلو كبوه في الدفاع عن عصام الحضري. < تحدثت المواقع المصرية عن (فضيحة) الحضري وعن الهدف (الكارثي) الذي ولج في شباكه. < لم يسلم الحضري من سخرية اهله ..ومن ممازحات اهله في (كفر البطيخ)..لكن المريخاب كانوا احن على الحضري من اهله ..وحسبوا ان الدفاع عن عصام الحضري عملا وطنيا نبيلا. < ناس (كفر البطيخ)..قالوا ليه ..انت غلطان يا حضري. < المريخاب هنا كانوا احن على الحضري من ناس (كفر البطيخ). < للمعلومية ..الكهرباء ..والموية ..والزلط في (كفر البطيخ) دخلو عصام الحضري. < الجماعة ديل ..قالوا ليه انت غلطان ..هنا ناس همد عشان جداد على الشغلة ..قعدوا يدافعوا عن عصام الحضري. < لم يعلموا انهم بذلك يهدمون كل القيم ..ويبجلون الذي يغلط ..ويقدمونه على الذي يحسن صنعا. < علقت الصحف المصرية عن ذلك الهدف ..واعتبرت ان عصام الحضري وصل سن المعاش الاجباري بعد ذلك الهدف. < دي فرامي ما بعملها. < زول ما عندو أي علاقة بالكورة ..ما عندو أي فكرة ..ما بعمل العملو الحضري دا. < التلعيق عن الهدف في صحف الخرطوم ...هنا اعتبر (تجاوزا)...وحسبوه مكايدات هلالية. < المريخاب في الخرطوم ..احتفلوا بالهدف ..وبلغت (تجليات) صحف المريخ ان وضعوا (صورة) الحضري في اعمدة الكثير من كتّاب المريخ. < حتى مزمل ابوالقاسم ..وضع صورة الحضري ..ولم يحتجب لظروف فنية. < دي شغلة اخير منها الاحتجاب. < اوعكم الليلة تقعدوا تنظروا للجماهير. < لا غلطان الحضري ..لا ريكاردو لا احمد الباشا ..لا همد. < غلطان اعلام المريخ ..القعد يدافع عن غلط الحضري. < جابوا لينا مقدمة ابن خلدون في الدفاع عن الحضري. < الدفاع ..الدافعتوه عن الحضري ..لو لعبتوا بيها في المباراة ..كان فزتوا. < ما كان في هدف بدخل شباك المريخ. < ليتهم احتجبوا في ذلك اليوم ..وتواروا خلف الظروف الفنية ..بدلا من تمجيد عصام الحضري ووضع صورته على الاعمدة ..بشكل يضر اولا واخيرا بالمريخ. < وقد دفع المريخ ثمن غلطة الحضري الان. < سامر العمرابي ذاتو كان فرحان ..جاب الحكاية دي في قناة الجزيرة. < كأنها حاجة سمحة. < فضحتونا ..وشرطوا عينا. < كل لاعبي المريخ ظهروا بمستوى مخجل ..عجزوا عن تسجيل هدف واحد يكفل لهم التأهل للنهائي ...كأنهم اردوا بذلك ان يردوا على اعلام المريخ. < كأنهم ارادوا ان يقولوا لجماهير المريخ : (خلوا الحضري ينفعكم). < الحضري الذي (هرب) من الاهلي المصري ..و(طرد) من سيون السويسري ولم يتحمله اهله في الاسماعيلي والزمالك ..وجد نفسه (بطلا) في الخرطوم. < الحضري ..الذي يفتقد لكل مقومات الشهامة ..والنبل ..قال عنه مدربه السابق جوزيه ...(الحضري ممكن يبيع ابوه عشان القروش). < هذا الحضري ..بكل هذا السوء ..وبهدف (فضيحة)..عملوا ليه في السودان (اسبوع ثقافي). < ومهرجان ...وكرنفال ..واليوم العالمي للملصة. < عملوا ليه (كرنفال)..شعبي ..ومهرجان رسمي..عشان شنو؟. < عشان فقط ما يعطوا الهلالاب فرصة في الحارس الذي لا يرى بعد الخامسة مساء. < غنوا له ...كما يغني سيد خليفة من كلمات ادريس جماع (في ربيع الحب كنا). < وابني عشك يا قماري ...بنفس (زهو) سيد خليفة ..وهو يتنقل بين الحروف (طروبا)...فيطرب الحجر الاصم. < يخجك خج من الطرب ..ويملأ جيوبك بالترمس والفول السوداني من الفرح. < تجلوا في التغزل في (ألعابه)...كما يتغزل خليل فرح في (عازة). < نسوا ان عصام الحضري الذي تعاقدوا معه بمبلغ خرافي ..مهمته الاولى هى صد الكور ..وانقاذ المريخ من اهداف محققة. < دي شغلتو. < يعني ما ممكن تجيب ليك ..(نقاش)..وقت ينقش ليك ..تقول ليه : والله بالغت عديل كدا ..دي عملتها كيف؟. < لم يتعاقدوا مع عصام الحضري ..ليكون (طبيب اسنان)..او اخصائي المخ والاعصاب ..عشان يكورك في بلة جابر ونجم الدين ويسمعهم مية كلمة فارغة عندما يغلطون غلطة صغيرة كدا. < يا حضري انت ما جابوك في المريخ ..عشان جمال الوالي يفرح يوم يسلم عليك ..وما يصدق نفسو يوم يتصور معاك. < يا حضري انت ما جابوك للحاجات دي. < انت جابوك (حارس مرمي). < لو فعلت نصف ما يفعله جمعة جينايرو ..ما كان في زول بسألك. < بل لو كنت تفعل ما يفعله (يس)..ما كان في زول بلومك ..على الاقل (يس) ما بدخل فيه هدف على هذا النحو. < هدف يتسبب في خروج المريخ من الكونفدرالية. < عشموهم بالحلق ..خرموا الاضانين ..واصبحوا يتحدثون عن الكأس ..والبطولة. < نسوا ان هناك مباراة اياب ...سوف تلعب امام ليوبار. < غنوا للحضري ...(عازة في هواك)...الاغنية التى نغنيها نحن للوطن. < غنوها ...هم للحضري. < هكذا كانوا يتغنون له ..ويتغزلون فيه..ويضعون صورته فوق (اعمدتهم). < يعني يا مزمل ..لو كان جمعة جينايرو بيلعب في المريخ ...كنت علقت صورتو في صدرك. < الحضري بي غلطو ..عملتوا معاه كدا..جمعة تعملوا معاه شنو؟. < ما فاضل ليهم إلا يضعوه في( لوغو) الصحيفة ..يوكتبوا عليه (رئيس مجلس الادارة). < كان كل هذا (الغزل) المريخي في عصام الحضري ..(مكاوة) فقط في الهلالاب ...ظنا منهم ان التغزل في الحضري ..يعوضه عن النقد الذي يجده من الاعلام الهلالي. < شغل ..(مكاوة) بس ..وحركة زي حركات الشفع. < كان دفاعهم عن الحضري ..فقد ردة فعل ..نسوا في خضم دفاعهم هذا ..المريخ ..والمباراة الفاصلة التى تسبق المباراة النهائية في البطولة الكونفدرالية. < نسوا أي حاجة ..وركزوا فقط في الدفاع عن الحضري. < نسوا (الكراسي) ذاتها. < كتب موقع الكاف ..عن غلطة الحضري ..واعتبروا (الهدف)...شيء لا يمكن ان يغتفر من حارس كبير. < لكن اعلام المريخ هنا يحتفي بالهدف ..ويضع صورة الحضري فوق ترويسة الاعمدة. < والله ناس ليوبار ما عملوا العملتوه بعد ملصة الحضري. < انتوا طابور خامس وإلا شنو؟. < استعرضت قناة الجزيرة (ملصة) الحضري واعتبرتها كوميديا الاسبوع ...مع ذلك فان المريخاب هنا يحتلفون بهذه (الملصة). < عملوها زي العيد الوطني ..وقربوا يطلع ليهم تصديق ..يمشوا يعملوا بيه (حفلة) في الساحة الخضراء. < الساحة الخضراء ...طبعا حقتهم. < تجمعت الروابط ..وخرجت النفرات ..كلها تكريما وتبجيلا في عصام الحضري. < نسوا الطابق التاني ..ونسوا البطولات المحمولة جوا ..ونسوا مباراة ليوبار ..وانصرفوا دفاعا عن عصام الحضري. < همهم بس ..عشان ما نعطي ناس الهلال فرصة. < عشان اعلام الهلال دا ما يشمت فيهم. < اعلام الهلال كان اذكي من الجميع ..يوم صرف الناس عن مشاكل الهلال بملصة الحضري ..وهيأ لفريقه ان يلعب مباراة الاياب في اجواء مثالية. < بل ان اعلام الهلال ..جعل كل المريخ في خانة الدفاع ..وهم يتحدثون عن غلطة الحضري. < ونجح اعلام الهلال بذكاء ..ان يجعل (ملصة) الحضري موضوع للمنتديات والمواقع العالمية. < الموضوع دا وصل ايطاليا ..واسبانيا. < العالم بقى قرية. < اقصد العالم بقى (ملصة). < كتبوا عن عصام الحضري في كل صحفهم ..في كل الاعمدة ..ليثبتوا ان هذه الغلطة عادية ..وان أي حارس يمكن ان يقع في مثل هذه الغلطة. < تقول نحن في عيد ميلاد. < جيبوا ليه (تورتة) عليكم الله. < غلطة عادية ..عادية جدا. < زي الطبيب البنسي (الشيش) في بطن المريض. < غلطة عادية جدا. < تحدث عنها الرشيد المهدية في قناة الجزيرة ...وكأنه في خطبة امام الجامع الكبير. < اخر تبريرات ..ان شاءالله يعملوا ليك حافز مع المرتب يا الرشيد. < انت بتتحدث عن (غلطة) تانية ..وإلا بتتكلم عن الغلطة ..الشافوها كل الناس. < يمكن دي (جزيرة) تانية. < خرج معاوية الجاك قبل المباراة في قناة الجزيرة (لابس ليه نضارة) ..ليقول للناس ان الحضري اصبح جزء من تاريخ المريخ. < يا ربي حامد بريمة داك ..من (جغرافيا) المريخ. < بئس التاريخ ..ان كان هذا (الحضري) جزء منه. < يا معاوية الموضوع دا ما عاوز ليه (نضارة) والله. < ما تقعدوا تنظروا ساكت. < لقد خرج المريخ من الكونفدرالية بسبب عصام الحضري ..مع ان عصام الحضري صاحب اعلي مرتب في المريخ. < يسافر ..القاهرة ..ويرجع على كيفو. < تقول : (فاروق الفيشاوي). < ويصرف (حافز) من المريخ حتى على تمارينه مع منتخب بلاده. < ويملص (الكورة). < كتبت الصحف الاسبانية عن هذه الغلطة ..ونزلت (الملصة) في اليوتوب..لكن مع كل ذلك المريخاب اعتبروا تعليقات الهلالاب عن (الملصة)..امر لا يجوز وهو شيء غير وطني. < تبيدي وقفوه. < ناس الهلال ديل ما عندهم موضوع. < الصحف الايطالية نفسها خلت دوري بلادها ..ودوري ابطال اوروبا ..وتناولت (الغلطة)..وتحدثت عن (الملصة)..والمريخاب هنا ذهبوا لمؤسسات الدولة الرسمية ...وبلغوا مجلس الصحافة والمطبوعات ليمنعوا الناس من الحديث عن (الملصة). < اها الليلة الملصة بقت ليكم ميتة وخراب ديار. < اني لا استبعد كما اشرت الي ان هذه الروح التى لعب بها لاعبو المريخ المباراة سببها ذلك التغزل والتمجيد للحضري رغم الخطأ الذي وقع فيه. < لو ان اعلام المريخ ومجلس ادارة نادي المريخ حاسب الحضري ..وشعر لاعبو المريخ ان هناك مبدأ (محاسبة) للمريخ ..لما كانت هذه الروح التى لعب بها لاعبو المريخ. < كان على الاقل لاعبو المريخ شعروا بالمسؤولية. < لكن لاعبو المريخ شافوا ..(الكبير اوي) يلغط ..ويعمل الحاجة العاوزها ..وما في زول بسألو. < طيب خلوا الحضري ينفعكم. < واصلا علاقة لاعبي المريخ بالحضري ..علاقة غير جميلة. < وضح ذلك من (كواريك) قلق في الحضري في مباراة الذهاب بعد الهدف ..وقد استبعد قلق من مباراة الاياب ...ربما عشان هذه الكواريك. < قلق يكوريك ليه ...المريخ دا حق ابوك. < نحن الحضري دا جايبنه بالشيء الفلاني ..ما عشان يكوريك فيه الحضري. < وكانت تصريحات سعيد السعودي عقب المباراة الاولى (متحاملة) على عصام الحضري. < الزول الما بريدك في (الجزيرة) بحدر ليك. < زي حدرة الرشيد المهدية لي هيثم مصطفى. < وظهر باسكال غاضبا على الحضري في مباراة الاياب. < يكون ما عزاه في بكا عمتو. < هذه الروح هى التى افقدت المريخ نتيجة المباراة ..وجعلت فريق المريخ يفشل في حضور الجمهور وهو يلعب في ارضه من تسجيل هدف وحيد ..رغم المخالفات الكثيرة غير المبررة التى احتسبها الحكم للمريخ امام منطق جزاء ليوبار. < الحكم منح المريخ 10 دقائق ..4 دقائق في الشوط الاول و6 دقائق في الشوط التانى ..يعني مائة دقيقة. < مع ذلك المريخ فشل في ان يسجل هدف واحد. < ولا هدف. < عاوزنها (كورنر) شتوها ..ما عاوزنها ..ما تحلموا بي هدف. < المريخ فيه جهاز فني بقيادة ريكاردو ..بكلف المريخ قرابة المائة الف دولار في الشهر. < وفيه عصام الحضري ..وباسكال واديكو وكلتشي وسكواها ووارغو ..وما فاضل ليه حاجة غير كأس السودان. < كأس السودان الكنتوا ما شغالين بيه دا ..هسع ما عندكم حاجة غيرو. < يبرمجوا ليكم مباراة ..تسافروا. < ترجعوا ...تلقوا المباراة مبرجة تقولوا ما بنلعب. < اها هسع الباقي ليكم كأس السودان. < لا كونفدرالية ..لا ممتاز. < لن يصرف لكم غير كأس السودان. < كأس السودان ذاتو الشفوت ديل ما بخلوه ليكم. < ناس محمد عبدالرحمن ..قالوا لي ناس نزار حامد ..خلوا لينا كأس السودان. < بعد كدا مفروض جمال الوالي يفكر طوالي في (سيكافا). < ويجيب (هيثم كابو) مقررا ..عشان يقنع الناس ان بطولة سيكافا دي احسن من الكونفدرالية. < ملحوظة : تكون امس جات مطرة. هوامش < في هلالاب كتار ..ضربوا لي اثناء كتابة هذا العمود ..قالوا لي يا محمد ما تتفاصح ساكت. < خلي مبارتنا تفوت على خير. < عشان كدا ما عاوز اتفاصح شديد. < نكتفى بهذا القدر. < لكن بالجد ..موضوع زي دا ما بتفات. < احسن حار ..حار. < بكرة كمان مجلس الصحافة يقول ما تتكلموا عن خروج المريخ. < الجماعة ديل نحن حفظناهم حظ. < شربناهم شراب. < نسأل الله ان يعوض السودان ..وتعب الحكومة في المريخ ..وتعب المريخ في الجلاكسات بصعو الهلال الي النهائي. < ان شاءالله الهلال لن يخسر. < الهلال غير قابل للخسارة. < نسأل الله لهم التوفيق والسداد. < لكن في كل الاحوال ..نحن ما عندنا غلطة زي دي. < غلطة زول عمرو 44 سنة. < اريكا ..عمياء. < غارزيتو ..من يومو قال ما عاوز ليوبار. < انا بديت اشك. < زي ما قلت ليكم ..الجلاكسي والاب توب ديل الظاهر جابهم الهلال للحكم الزامبي. < المدير الفني لي ليوبار قال اتمنى الهلال في النهائي عشان درس الهلال كويس. < وافتكر دا تحدي جديد لينا. < دا استفزاز عديل كدا للهلال. < عشان كدا ..اذا تأهل الهلال للنهائي ان شاءالله نرجو ان يكون الرد قاسيا على هذا المدرب. < غارزيتو ..ذاتو درس ليوبار. < اظن اننا في مباراة اليوم سوف نفقد هيثم مصطفى حفظه الله ورعاه وعلاءالدين يوسف. < والبرنس وفييرا في النهائي اذا تأهل الهلال بأذن الله وتوفيقه وجودهما مهم. < خاصة ان ليوبار بيلعب كورة منظمة ..وهادية. < ودي بالذات عاوز هيثم مصطفى. < نسأل الله في كل لحظة ان يتأهل الهلال الي النهائي. < همد ..قالوا الليلة ح يمشي للاتحاد العام ..يسأل عن برمجة كأس السودان. < الاتحاد العام لكرة القدم الذي رفض برمجة نهائي كأس السودان ..وتجاهل امرها ..سوف يضع الان برمجة نموذجية لنهائي كأس السودان تخدم المريخ بعد خروجه. < سوف ينسوا امر الهلال نهائي ..وسوف تكون برمجة كأس السودان اهم شيء. < ح تشوفوا كلامي دا. < اكيد اللجنة المنظمة ..تجتمع اليوم او غدا ..وتضع البرمجة. < اصلو المريخ ما عندو حاجة غير البرمجة دي. < فاضل ليه كأس السودان بس. < لكن ان شاءالله المرة دي كأس السودان ما في. < عاوزين تعملوا سيكافا ..اعملوها. < بي طريقتك. < لكن بطولة نشارك فيها نحن ..ما عندك فيها كأس. < امس الباشا ..تقول كان لاعب في بورتسودان ..كان بعيد عن جو المباراة. < وكلتشي ..نسي الكورة. < وسكواها ..ما في زول عارفو ..لاعب او ما لاعب. < ملصة الحضري اطاحت بالمريخ من الكونفدرالية. < مصلة الحضري ..شالت الجهاز الفني. < مصلة الحضري شطبت كل المحترفين في المريخ. < لا كلتشي ..لا سكواها ...لا وراغو ..لا باسكال. < باسكال خلوه يمكن ينفع. < اما كلتشي وسكواها ووارغو ..افتحوا ليكم اكشاك ليمون في سوق الموردة. < ليما ..اعملوا ليه (رشكة). < المباراة كلها بيعتب. < ملصة الحضري ...بقت زي الصالح العام ...ح تنضف المريخ نضافة. < العجب مفروض يفكر في مشروع تاني ..غير كورة القدم. < يا رب انصر الهلال اليوم. < انتصار عديل ..ما تعادل. < عاجل : الحضري دا بعد كدا ..خلوه للهلال ..تكريمو عندنا نحن. [/SIZE]وإن طال السفر - صحيفة قوون

شارك الموضوع :

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.

سودافاكس