أمير الرومانسية
وبعد صراع شديد ومساعدة من بعض المرافقين وناس الهدف تم تثبيت الشاب حتى تم تركيب الفراشة وإعطاؤه حقنة مهدئة ارتخى بعدها جسمه وغرق في نومة عميقة .
بعد الوضع ما راق شوية قمت سألت أبوهو : الود ده مالو ياحاج ؟ قال لي والله يادكتور ماعارفينو اتعشى معانا في أمانة الله وخش الأوضة بعد شوية بقى يكورك : ليه ياخ ؟ إنتو بتعملو فيني كده ليه ؟ أنا عملت ليكم شنو؟ ومسك ليك اللابتوب ده و فنننننن فناهو في الحيطة كسرو حتة حتة ونحنا هسي مافاهمين الحاصل شنو زاتو.
أنا طبعا ً الشمار كاتلني وداير أعرف القصة شنو فقلت ما أمشي البيت إلا أنقش التفاصيل فقمت الصباح مشيت على الشاب ده في العنبر لقيتو ليك هادي ورايق وشكلو ود ناس في نهاية العشرينات كده ,, قلت ليهو : مالك يازول إنت أمبارح كنت في حالة تانية ,, قال لي أنا خضت لي تجربة صعبة وموقف عمري ما مر بي ,, كنت داير أقول ليهو : موقف الحاج يوسف ؟ هيييييييي يكا لكن قلت الزول ده يمكن يركب لي وش الككو تاني ويقوم علي يجاسفني وأنا الليل كلو مساهر مابقدر ألاويهو ما تقول كمان العنبر كان فاضي ,, المهم قلت ليهو موقف شنو ؟ قال لي : أنا لي زمن سامع بي الفيسبوك والشباب كلهم بيقولو لي إلا تخش قمت عملت لي أكاونت ظريييف كده وختيت ليك صورة ميسي باعتبار إنو أي شاب بيريدو وأنا داير أتعرف على أكبر كمية من الشباب على أساس إنو معرفة الرجال كنوز ,,, قمت رسلت زي تلتمية ريكويست كده لي شباب مابعرفهم لكن قلت نوطد العلاقة بالشبكة العنكبوتية ,,( عنكبوتية دي بتبقى للفنان محجوب كبوتية ؟ هيييييي يكا ــ طبعا ً برضو في سري إنتو عارفين الوضع ) ,, هل تصدق يا دكتور القبلوني أربعة بس وقبلوني بعد شهر ونص لكن قلت مامشكلة يمكن عندهم ظروف ولا حاجة قمت كلمت واحد صاحبنا قال لي : يازول إنت عوير ولا شنو ؟ في ولد بيقبل ليهو ريكويست من ولد , هسي لوكنت جكسوية كان كلهم قبلوك ,, قمت قلت بالهظار كده أعمل لي أكاونت في شكل جكس وسميتو ليك ( العشق الممنوع ) وختيت ليك صورة سمر كبيييرة ورسلت لي اربعمية نفر ومرقت مشيت عرس واحد صاحبنا لمن جيت لقيتم ليك الأربعمية قبلوني تصدق ؟ ,, وأكتر من كده كمان لقيت مرسلين لي سبعمية واطناشر ريكويست ,,قمت قلت أشوف منظرهم و أواصل اللعبة قمت كتبت في الأكاونت بتاع العشق الممنوع : واي أنا من الصداع ده حيجنني المتعاطف معاي يعمل لايك ,,, ومشيت حضرت ليك كورة برشلونة وجيت لقيت ليك في ستمية واحد وتمنين لايك و خرتمية كومنت المتذكرهم :
ﺃﺳﻴﺮ ﺍﻟﻌﺸﻖ : سلامتك وكل الفيسبوك كرامتك
آس الهارت : قولي يا بركة الشيخ أب أضنين تشفيني 0919436072 مرة وحتبقي كويسة
وهمي الوهمي : قالو متألم شوية ياخ بعد الشر عليك
أمير الرومانسية : بالله العسل ده بيعيا زينا كده ؟ حقو نطلع مظاهرات والله
سنتر هاف قلبها : يا بخت الباعوضة الشربت من الدم الشربات ده
سادومبا جاااكم : من ماعرفت إنك عيانة وأنا ماضقت طعم النوم
الوليد بن طلال : أشربي ليك كباية لبن ونومي عشان السهر كعب معاك
قمت كتبت في أكاونتي البي اسمي : معليش يا شباب اختفينا منكم اليومين الفاتت لأني كنت كاسر كراعي ,, إصابة ملاعب وكده المتعاطف معاي يعمل لايك .. وعملت ليك لايك لي روحي
بعد عشرة يوم كده لقيت ليك لايكي زااااتو مازاد و ناسي الأربعة رادين لي
الكومنت الأول : تستاهل لأنك السنة كلها تتلفت زي الطيرة
الكومنت التاني : : تلقاك اتزلقت في السيراميك ياأهبل
الكومنت التالت : عقبال التانيه يا فارتي
الكومنت الرابع : هههههههههههه هههههههه هههاااااااااااااااااااااااااااااااااي
أنا والله يا دكتور زعلت زعل شديد لكن أكتر حاجة مغستني وطلعتني من طوري إنو الإسمو أمير الرومانسية ده مشترك بين الأكاونتين وتتخيل بعد كسير التلج لي العشق الممنوع تخيل الضحكة الطويييييلة السخيفة ده هو بالله ده بني آدم ده قمت ما حسيت ليك بي نفسي بعد داك وحصل الحصل ,, قلت ليهو والله فعلا ً ده زول عواليق ويستاهل الشنق .
بعد ماعرفت الشمار وبطني بردت مشيت للأخصائي وقلت ليهو : أنا ماعاوز أمسك الحالة دي ومسكها لي دكتور تاني قال لي : ليه ؟ قلت ليهو : عندي أسبابي الخاصة .
أنا طبعا ً أسبابي محرجة شوية وما حأقدر أقولها ليكم فيس تو فيس كده لكن حأكتبها في حيطتي في الفيسبوك وإنتو أمشو أقروها ,, وأكاونتي تلقوهو مكتوب بي اسم:
..
..
أمير الرومانسية
.
لكن أكتر زول متضايق من حركة الأولاد البيعملو أكاونتات بي أسماء جكس صاحبنا أبو الخلد , مرة من شدة زعلو لقيتو ليك كاتب في بروفايلو :
عزيزي الولد العامل فيها جكسوية , إلهي وإنت جاهي بي بركة الجمعة الجامعة والدعوة السامعة يجيبو لي خبرك يقولو حامل.
