بشرى سارة للمريخاب ..فتح باب التقديم للهلال



شارك الموضوع :

بشرى سارة للمريخاب ..فتح باب التقديم للهلال


لتحاشي اثار (استقالة) الوالي ادمجوا المريخ مع فريق ام بدة

* المريخ ما زي الهلال (هذه من الابجديات التى لا خلاف حولها) ..لذلك فان (استقالة) جمال الوالي من مجلس المريخ سوف تخلق (تصدعا) كبيرا في القلعة الحمراء.

* استقالة الوالي سوف تجعل المريخ (مفككا)…لا يقوى على مقابلة (كدر) الايام ..بعد ان عاش المريخ في رفاهية كبيرة.

* والايام دول.

* الاوضاع في المريخ لا تقوى على ابتعاد جمال الوالي من رئاسة المريخ…ولا تستحمل مثل هذا (الضنك).

* وذلك لسبب بسيط جدا …هو ان جمال الوالي ظل على مدى عشر سنوات يصرف وحده في المريخ صرف من لا يخشى الفقر.

* المريخاب ما عملوا حساب لليوم دا.

* فاكرين الحكاية ح تستمر (باسطة) كدا.

* بلة جابر ..كورتو في المريخ كورة (دافوري)..كورة قاطعها من رأسو…وعيشتو عيشة لاعب برشلونة (أندريس إنييستا).

* الكورة كورة (بلة) ..والعيشة عيشة (انييستا).

* كورة ام بدة ..وعيشة برشلونة.

* بالمناسبة نحن عندما نتمثل بمثل هذه الامثال ..يخرج لنا بعض افراد المنطقة ..محتجون..وهم بقولوا : (كورة ام بدة مالها بس؟).

* كورة ام بدة كلها (كشافات).

* كمان عاوزين تقارنوا كورة برشلونة مع كورة ام بدة.

* الزول وقت يقعد يحضر ليه كورة لي برشلونة ..زي الزول البياكل ليه في (جلي).

* الكورة ماشه براها كدا ..من هنا لي هناك..زي كأنها قراية الحكاية دي قراية.

* كورة برشلونة الايامات دي ..زي الزول البكون قاعد تحت (البطانية) ويجبوا ليه (العشا).

* من سريرو ما بقوم.

* الشيء كدا ..بي كل بساطة …لا عاوزة ليها تعب ..ولا رواب.

* نحن بالله كورتنا ..شوف ساكت تفتر.

* رأس الحربة ..ما عندو فرق من (الباك).

* ونظريات المدرب ..ما عندها أي فرق من نظريات المشجع.

* المدرب ساكت بقبض بالدولار.

* لكن هسع اطلع لينا من الحتة دي.

* خلينا مع جمال الوالي.

* عمل جمال الوالي أي حاجة في فترة قيادته للمريخ ..تعاقد مع اغلى محترفين في القارة.

* نحن قلوبنا طارت.

* واتى جمال الوالي بافضل الاجهزة الفنية على مستوى القارة الافريقية ..وجعل لاعبي المريخ يعيشون بعيدا عن مستوى البلد وعن رهقها ..ومواصلاتها الزحمة.

* زي كأنهم ما هنا.

* مطرة ساكت تجهجهم.

* البرد عادي يتغلبوا فيه سبعة.

* ناس موسى الزومة كانوا بدخلوا الملعب بالناموسيات.

* ما بستحملوا (الناموس).

* لم يحقق جمال الوالي بطولات تذكر في عهد حكمه للمريخ ..حقق بطولة الممتاز مرتين ..ووصل لنهائي الكونفدرالية مرة …وحاز على بعض كاسات السودان ذات الاثر الضعيف.

* هذا كل حصاد جمال الوالي من البطولات.

* لكن مع هذه البطولات المتواضعة رفع جمال الوالي من مستوى لاعبي المريخ المادي وصنع لفريق المريخ سمعة مالية كبيرة في القارة الافريقية.

* حدثت طفرة واضحة في استاد المريخ …ومضى جمال الوالي بعيدا بقدرات المريخ (المالية).

* لم تكن هذه القدرات المالية (حقيقية) لفريق المريخ …هذا شيء يحسب على جمال الوالي الذي صنع اقتصاد (وهمي) لفريق المريخ.

* الجماعة هسع رأسهم مقطوع.

* لا احد ينكر اجتهادات جمال الوالي الشخصية ..والذي صرف في عشر سنوات صرفا كبيرا على المريخ.

* لو رشد جمال الوالي هذا الصرف ..وذهب للاستثمار كان يمكن ان يكون فريق المريخ الان من اغني الاندية في العالم واعظمهم استثمارات…وبنيّة تحتية.

* وكان يمكن ان يقوى فريق المريخ ..استقال جمال الوالي ام استمر؟.

* جمال الوالي اغلب صرفه ذهب لجيوب اللاعبين ….انفق الكثير من الاموال في الصفقات الاجنبية ..وفي ملفات الاجانب والمدربين.

* كل صرف جمال الوالي ذهب سدى ..لا بنيّة تحتية ولا بطولات قارية تحققت.

* قاعدين في الصقيعة.

* ما ادخله جمال الوالي في المريخ بالباب ذهب بالشباك.

* او دعونا نقول ما جاء بالشباك من جمال الوالي للمريخ ..ذهب الان بالباب.

* قد يكون جمال الوالي وجد دعم كبير من الدولة التى اتت به من اجل ان ينفق كل هذه الاموال في المريخ.

* لكن مع هذا يبقى جمال الوالي صاحب تاريخ ..لا يضاهى في المريخ ..فقد اجتهد الرجل ..وصرف..وكانت نواياه سليمة في الذهاب بالمريخ بعيدا.

* لم يوفق جمال الوالي ..هذه حقيقة ..تبقى نوايا الرجل كافية في دعمه اللا محدود للمريخ.

* في الهلال كان هناك رجل اخر ..فتح خزائنه للهلال …ذلك الرجل هو صلاح ادريس الذي يتفوق على جمال الوالي في ان بصمته وضعها في الرياضة السودانية عامة.

* بل ان بصمة صلاح ادريس وصلت حتى للمريخ الذي تأثر به تقليدا ..واتبع خطواته في التجنيس والاعارة ..والاحتراف بصورة عامة.

* واظن ان اخر بصمات صلاح ادريس في المريخ بعد (كلتشي والباشا)…المدرب التونسي محمد عثمان الكوكي.

* صلاح ادريس لم يترك فراغا في الهلال كما ترك جمال الوالي فراغا في المريخ الآن ..لأن الهلال يختلف عن المريخ.

* الهلال بنيته (الذاتية) اقوى ..وهو اكثر حماية بطبيعة العزة والحوار والديقراطية الموجودة فيه ..من التأثر بالوضع الاقتصادي والتحور مع طبيعة الشخص الذي يصرف.

* صلاح ادريس مع صرفه الذي كان على الهلال ..إلا انه كان يقبض ايده في احايين كثيرة ..وهذا شيء لم يكن يحدث من جمال الوالي في المريخ.

* اذ كان جمال الوالي يبسط يده كل البسط ..فاضر ذلك بالمريخ …من حيث قدر ان (البسط) ينفع.

* لذا فان الهلال تجاوز محطة صلاح ادريس ..واحسب ان المريخ سوف يكون صعبا عليه تجاوز محطة جمال الوالي.

* غير اني قبل ان نتجاوز محطة جمال الوالي نشهد له ..انه كان على امتداد عشر سنوات الرجل الاول في المريخ خلقا وسلوكا ..الي جانب صرفه الخرافي.

* حظى جمال الوالي في المريخ بالمساندة والدعم الجماهيري …ولم تجد أي معارضة تعارض مجلسه غير الاستسلام له.

* فقد كانت المعارضة في المريخ تشعر بالخجل امام ما يقدمه جمال الوالي للمريخ.

* كان كل المريخاب بما في ذلك المعارضة …ما علم منها وما خفى (محبا) لجمال الوالي وقد عرف الوالي بكارزيما الروح الرياضية السمحة ..ان يجعل كل الناس يشهدون له بالوقار والاحترام والتقدير ..بما في ذلك الهلالاب.

* الهلالاب الذين نافسهم جمال الوالي …في كثر من المواقع ..انتصروا عليه ..وانتصر عليهم حينا ..ولم يسقط ذلك التقدير والاحترام لرئيس نادي المريخ المستقيل.

* وهذا شيء نحسبه لجمال الوالي ..وان اختلفنا معه كثيرا ..يبقى جمال الوالي الرجل الابرز في مسيرة المريخ ما مضي منها ..وما هو آت.

* كذلك يحفظ لجمال الوالي مع انه الرجل الاوحد في المريخ ..من حيث الدعم والشعبية والمساندة …والاكثر صرفا في تاريخ المريخ .. انه مع كل ذلك لم (يتفرعن) كما تفرعن غيره في الهلال.

* عشر سنوات في المريخ لم تفسده السلطة ..ولم تجعل منه (الديكتاتور) الذي لا يطاق.

* كان جمال الوالي يزداد تواضعا يوما بعد يوم.

* كلما بسط يده …كان يزداد تواضعا ..وكلما تمكن من المريخ ..تراجع ..وناقش وحاور.

* لقد كان جمال الوالي يستمتع بالمريخ ..عندما يصرف ويبزل.

* لم يبخل على المريخ بشيء ..حتى انه عندما شعر ان مصلحة المريخ في ذهابه ..ذهب من الباب الذي دخل منه.

* طوال مسيرة جمال الوالي في المريخ ..لم نجده يحتد مع معارض ..او لاعب ..كان (مرنا) في كل الملفات ..مرونة لم تنقص من هيبته ..ولم تقلل من قوته.

* هذا ما نشهد به لجمال الوالي وهو يغادر المريخ اليوم مستقيلا ..وقد كنا في الهلال اكثر ما نعاني من الصراعات والخلافات الهلالية ..والتجبّر.

* عانينا من ذلك كثيرا في الهلال ..وظل جمال الوالي في المريخ ..معصوما عن تلك (الدنايا)…والشوائب.

* تلك اشياء تحسب من حكمة جمال الوالي ..ومن قدرته العقلية والفكرية التى لا تقل بي أي حال من الاحوال عن قدرته المالية التى كان يبسطها للمريخ.

* كل هذه الاشياء ..لا تمنعنا من السخرية ..والتندر بما وقع فيه المريخ الان.

* وحالة المريخ الان تدعوا الي (السخرية)..والتهكم من غير سوء.

* المريخ بعد جمال الوالي وبعد ان فشل في سداد فاتورة الكهرباء …فشل في سداد اجرة شقة ريكاردو.

* مجلس المريخ الان يبحث عن شقة باجرة اقل ..من الاجرة التى كانت تدفع شهريا لمدرب المريخ السابق ريكاردو.

* الازمة المالية واضحة في المريخ وهم يتعاقدون مع مدرب بمرتب ضعيف ..وامكانيات قليلة.

* حالة المريخ ..بقت صعبة شديدة.

* بل ان المريخ اعاد تسجيل موسي الزومة وبلة جابر ومصعب عمر وسعيد السعودي وراجي عبدالعاطي …حتى يسد تلك الخانات ..لأنه لا يملك ان يسدها بغيرهم.

* ناس بلة جابر ديل ..الواحد فيهم قبض مائة مليون فقط ..تقول جايبنهم من الشباب.

* زمان زي الوقت دا ..طائرات المريخ كانت تتخابط.

* ينزلو محترف ..محترف.

* كان المؤتمرات الصحفية من فندق لي فندق.

* هسع الجماعة مركزين على (سيكافا).

* عليكم الله ناس المريخ ديل لو كانو واعيين ..او كانوا في حالتهم القديمة ..ديك. ..زي سادومبا دا بحوم في الشارع.

* المريخ زمان كان باكبسنا من يونيو.

* من قبل 6 شهور.

* هسع ..الجماعة فرحانين بي ناس بلة جابر.

* ليما ذاتو بقى كتير عليهم.

* نجوم اهلي شندي ما قادرين عليهم.

* غايتو انا ما شايف لي حل لي ناس المريخ ..غير انو يشوفو الامين البرير يفتح ليهم باب التقديم للهلال.

* اصلو الامين البرير الايامات دي قافلها مع الهلالاب.

* عشان كدا ..البرير ذاتو كويسة معاه يشوف المريخاب ديل …عشان يرشحوه في الانتخابات القادمة.

* افتحوا باب التقديم للهلال يا هاشم ملاح.

* طبعا التقديم للهلال زي التقديم للجامعات.

* اول حاجة تجيبوا صورة من الجنسية.

* وتملأوا الاستمارات ..حسب الرغبات.

* التقديم بتم بواسطة وزارة التعليم العالي.

* انتوا فاكرين الموضوع بسيط.

* او يمكن تشوفوا ناس ام بدة ديل يا ناس المريخ وتندمجوا معاهم.

* اصلوا انتوا عندكم قبل كدا سابقة اندماج في منشط الكورة الطائرة.

* هسع اندمجوا مع فريق ام بدة.

* على الاقل ناس ام بدة ديل بضمنوا ليكم حق الكهرباء.

* وناس موسى الزومة وبلة جابر ديل ..ممكن يلعبوا ليكم تاني 10 سنوات.

* اصلو ما في مشكلة.

* ملحوظة : بس خلوا الكلام الكتير.

هوامش

* مجلس المريخ ..اجتمع وناقش استقالات ناس جمال الوالي.

* شفتوا قوة العين.

* انتوا القاعدين ليها شنو؟.

* يا عصام الحاج …الحاجات دي ما بتقدروا عليها ..ما تقعدوا تتفاصحوا فينا ساكت.

* المجلس قالوا اجتمع حسب ما جاء في الخبر : (اطلع المجلس على الاستقالات المقدة من رئيس النادي وبعض الاعضاء ، واكد المجلس على المجهودات الكبيرة التي قام بها السيد جمال الوالي التي ساهمت في الطفرة الكبيرة في الوسط الرياضي واثني المجلس على المجهودات الكبيرة لعضوي المجلس الباشمهندس عبد القادر همد وجمال الكيماوي ، كما قرر المجلس ارجاء النظر في الاستقالات في الوقت الراهن،وكلف الامين العام وعدد من الاخوان بالاتصال بهم واثناءهم عن الاستقالات).

* جمال الوالي بقولوا ليه زي الكلام دا.

* المجلس قال ارجأ النظر في الاستقالات.

* عاوزين رأيّ..والله مفروض تقفلوا النادي 3 ايام.

* على الاقل.

* انتوا بتلعبوا وإلا شنو؟.

* الموضوع دا صعب عليكم يا عصام الحاج.

* انتوا عداد الكهرباء ما قدرتوا عليه.

* الاجتماع ليكم في شنو؟.

* اختصروا الموضوع واقفلوا النادي 3 ايام.

* يمكن الوالي (يحن) عليكم ويرجع.

* الشفت جمال الكيماوي.

* جمال الكيماوي ..قال جمال بقعد ..ان بقعد …جمال بفوت..انا بفوت.

* موش انا اسمي (جمال) زي جمال الوالي.

* اها يا عصام الحاج ..بعد اعادة قيد بلة جابر ..ح تعملوا شنو؟.

* اظنكم ..ح تقيفوا لي في حتة بلة جابر دا.

* اكتر من كدا ..الموضوع صعب عليكم.

* اول مرة ..مجلس الهلال يبقى ليه الشطب ..احر من التسجيل.

* ناس الامين البرير ديل ..(الشطب) غالبهم.

* ما عارفين يعملوا شنو؟.

* بعدين انتوا عاوزين تسجلوا منو؟.

* البلد لاعب ساكت ما فيها.

* ناس المريخ ..قالوا احسن نعيد تسجيل لعيبتنا ..بدل ما نتجهجه ساكت.

* التسجيلات باقى ليها اسبوعين.

* هاشم ملاح ..ما بكون عارف الموضوع دا.

* باقى اسبوعين يا هاشم ملاح.

* ما تقعدوا تقولوا لينا في اخر يوم ..معتز رابح قافل تلفونو.

* الفيلم دا نحن شفناه.

* عيدوا لينا اول تسجيل سادومبا.

* وقبل ذلك اعيدوا لينا تسجيل عمر بخيت.

* تاني الباقى هين.

* راجعوا الدفاع والاطراف.

* السنة دي التسجيلات رخيصة.

* بداية الشتا ..الطماطم بترخص.

* جمال الوالي طلع.

* وسوق اللاعبين دق الواطة.

* قالوا في لاعب سجلوه بي (ركشة).

* حليل زمن العربات البرادو.

* خلاص الموضة دي انتهت.

* الاتسجل ..ايام جمال الوالي حظو …الما اتسجل ايام جمال الوالي حقو راح.

* ناس اهلي شندي ح يفقدوا جمال الوالي.

* اتاريهو الكان رافع القزاز …هو جمال الوالي.

* ناس بلة جابر ..اعدوا تسجيلهم بي مائة مليون جنيه.

* زمن المليارات انتهى.

* تصوروا انا الي الان ما مصدق.

* جمال الوالي ممكن يرجع في أي لحظة.

* عشان كدا ..يا ناس الهلال الحقوا السوق.

* اعيدوا تسجيل عمر بخيت وسادومبا.

* والله جمال الوالي يسحب استقالتو 10 مليار ما تحلكم.

* سجلوا سريع يا البرير …الزول دا ما مضمون.

* نحن جربنا الحكاية دي كتير.

* صلاح ادريس لو دخل بي تلفون ..بسخن ليكم السوق.

* برضو اعملوا حسابكم.

* في الموسم الجديد …تاني ناس عصام الحاج بحرسوا (البوابات).

* تاني بقعدوا يحسبوا (الدخل).

* شكلو كدا ..عصام الحاج ..من (البوابة) الرئيسية ما بزح.

* يزح وين وجمال الوالي استقال؟.

* عاجل : تمارين المريخ تاني بولعوا فيها (كشافة) واحدة.

وإن طال السفر – صحيفة قوون

شارك الموضوع :

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.