يا سلك فريقكم بقوا كلو (معاجين) اسنان

صمتنا في حضرته …طمعا في المزيد من التوضيح ..والتفسير…نعرف ان محجوب شريف يوصل (المعلومة) خدمة ديلفري..لي عند الباب.

يبسط الاشياء ..ويقدمها ليستوعبها كل الناس.

عاد محجوب شريف ..واكد قوله بهذا الشرح الوافي وقال : ( لو دخلت حمام أي اسرة شمالية سوف تجد في (جحور) الحمام وشباكه، وبين الحائط والماسورة ..مجموعة من (فرش الاسنان) …سبعة او عشرة (فرش اسنان)…هذه الفرش هى قراءة طبيعية لزيارات تقوم بها الاسر لبعضها البعض).

فرش اهل البيت تظل تمارس (سواكها) اليوم ..اما فرش الزائرين ..تظل مهجورة ..ومثبتة على الجدران..(مجرد ذكري لزول جاء وفات).

صمتنا …وكان صمتنا يعني ان يزيد محجوب شريف في توضيحه ..وفلسفته اكثر.

اضاف محجوب شريف : (يعني اذا زارك صديقك (عثمان) وبات معاك (خميس وجمعة) في البيت ..سوف يشتري (فرشة اسنان) ويتركها في الحمام عندما يذهب ..وكذا الحال ..تفعل خالتك التى قدمت من البلد ..وقعدت معاكم اسبوع ..ونفس الشيء يحدث من (خالد) الذي جاء ليستخرج (جنسية) ، سيترك (الفرشة) ويغادر…وايمن الذي يريد ان يخرج جواز سفر سوف يفعل نفس الشيء …وهدي التى تأتي من الداخلية لزيارات عمها في كل شهر).

يذهبوا اولئك الزائرين ..وتبقى (فرش اسنانهم) في البت تذكر عن تواصلهم وزياراتهم.

وانت نفسك قد تذهب ..وتبيت برة البيت ..وتشتري ليك (فرشة اسنان) تسوك بيها ..وتخليها قبلها وترجع.

اذن هذه (الفرش) …هى عناوين لزيارات الخميس والجمعة …وهى تباعا قد تكون لخالتك وسلوي وخالد وعثمان وايمن ، صاحبك وقريبك ..وزميلك في العمل او في الدراسة.

الفرشة الحمراء حقت عثمان ..والخضراء حقت خالد ..والبيضاء حقت ايمن ..وهكذا.

قال محجوب شريف ذلك ثم اضاف ..قائلا …انا ما حصل دخلت لي (حمام) اسرة شمالية ..وقالوا لي الفرشة دي فرشة (جون) او فرشة (مايكل)..او (ميري)…هم يقولون دائما ..دي فرشة عمر ود خالتنا ..ودي فرشة تهاني زميلة اماني في الجامعة..الخ.

عندها عرفت ماذا يقصد محجوب شريف بقوله الذكي هذا …والذي يشير فيه ان التداخل بين الشماليين والجنوبيين قد يكون في السوق او في العمل او في النادي ..لكن على النطاق الاسري وداخل البيوت هو غير موجود ..لذا حدث الانفصال..لأن الالفة الاسرية بين الشمال والجنوب (معدومة).

الحديث عن (فرش الاسنان) هذا ..ذهبت اليه ..تذكيرا ..بقول سابق للعزيز بابكر سلك …الذي شبه ذات يوم فيصل العجب بـ ( صباع المعجون) …وقال ان العجب متل ( صباع المعجون) الذي كلما ظننته خلص …عصرته طلع ليك منه (معجون).

قدر ما تقول كمل ..تلقي فيه حاجة ..(دا العجب).

يا سلك العجب …ما خليتو فيه حاجة..ضغطوه ضغط شديد.

أي حاجة ممكن تسفيدوا منها …من فيصل العجب دا عملتوها.

زي الحبشي العندو (ديك) ضبحو ….عمل كرعينو (كوارع)..وشد لحمتو (شوربة)…وعمل رأس الديك (باسم)..والمصارين والكبدة والفشفاش …عملها (ام فتفت)…ريش الديك عملوا (سيوتر) في البرد دا …والدم حق ضبيحة الديك ..(جير) بيه الصالون.

يعني ما في حاجة طلعت (اف) من الديك دا.

دا قبل ما يضبحوا ..عمل صوتو (العوعاي) نغمة في موبايلو.

اقول حاجة مبالغة كدا.

الزول دا …قبل ما يضبح الديك (حلبو).

يعني البقي والما ببقي طلعو من (الديك) دا.

ناس المريخ …هسع (العجب) ما خلوا فيه حاجة.

وبابكر سلك …لسع (ساكي) الحكاية دي …عاوز يطلع ليه شيء من المعجون دا.

يا سلك بعد كدا ..إلا تعمل (المعجون) دا خاتم.

ما فيه شيء تاني.

طبعا نحن في الهلال …ما بنصل للمرحلة دي ..(المعجون) بنجدعو من يصل النص.

المعجون بنجدعو بي حالو.

حكاية عصر المعجون دي ..ما عندنا.

المريخاب ..(قلق) ..ما خلوا فيه حاجة …قلق اعاروه ..ورجعوه ..وشطبوه.

أي فكرة كدا ..تختر ليكم في الباك …عملوها في (قلق).

قلق مشي يلعب في الاهلي عطبرة ..يا ناس عطبرة …(انتوا ناسنا) ..قلق دا تاني والله إلا (يعلق) ليكم على المباريات..او يحلل ليكم (الكورة) في تلفزيون عطبرة.

معجون قلق دا ما فيه الحبة.

عشان الموضوع يبقى ليكم واضح.

الشيشية ذاتها ما خلت ليها حاجة في صباع المعجون دا.

المريخاب ..ما زي الهلالاب …(المعجون) يخلوه بي حالو.

المعجون اذا نشف ..وانتهى …ما تجدعه ..يمكن تحتاج ليه يوم ..ويفك حيرتك.

لا سيما ان الدنيا ..(برد)…وما في زول بقدر يمشي (الدكان) في السقط دا …لذلك (لف واعصر) المعجون ..واشرطه كمان ..بطلع ليك معجون قدر حق السواك.

عندنا زول في الحلة ..زي المريخاب ديل …(المعجون) وقت ينتهي ..بعصرو بالزردية.

ما بخلي فيه شيء.

تلقى قاعد الصباح بصارع ليك في (المعجون) …تقول في حلبة مصراعة.

تشبيه بابكر سلك …جميل ورائع …ويثبت ان (الدهن) فعلا في العتاقي.

نتفق مع بابكر سلك في ان فيصل العجب فعلا زي صباع المعجون ..قدر ما تقول انتهى تلقى فيه حاجة.

وان كنت اقول ان فيصل العجب بعد انتقال هيثم مصطفى الي المريخ سوف ينزل درجة من (المعجون) وسيصبح (مسواك) شجرة حنة او نخيل ساكت ..وهو بذلك ادني من (مسواك) الاراك.

العجب اكتر من كدا يا سلك عاوزين تطلعوا منو شنو؟.

اخر حاجة فيه …عملها في تسجيل هيثم مصطفى وعلاءالدين يوسف …وصل معاه الاتحاد حضر التسجيل ورجع.

العجب تاني إلا تخلوه للحاجات دي.

كابتن تشريفي ساكت.

المريخ الان …وعلى نسق تشبيه الاخ بابكر سلك بقى كله (معاجين).

بقى دكان بتاع جميلة لمعاجين الاسنان.

الوصيف بقى كل معاجين.

المريخ بقى فيه اكتر من معجون.

بداية من فيصل العجب المعجون (ابومرجيحة)…مرورا بمعجون عصام الحضري (44) سنة معجون ابوالهول….نهاية بمعجون (فييرا)…نهاية بمعجون (البرنس).

معجون فيصل العجب (ابومرجيحة) على ما يبدو كدا ..بقى ما فيه حاجة ..خلاص انتهى ..عشان كدا ..المعجون دا ح يقعد في (الكنبة).

المسألة دي بالنسبة ليكم واضحة طبعا.

واحتمال كمان يستغنوا عن هذا المعجون دا نهائي في يونيو القادم ..عشان صلاحيته انتهت …(أي ان يونيو القادم هو التاريخ الذي سيصبح فيه فيصل العجب في حل من تعاقده مع المريخ).

يعني يا سلك ..معجون (ابومرجيحة) دا …لو عصرتوه تاني …يمكن (يسممكم) عديل كدا …لأن صلاحيته انتهت.

وضحت النقطة دي.

معجون (ابوالهول)…الشهير تجاريا باسم عصام الحضري …العصر ما بطلع منو حاجة.

لكن (الدولار)..ممكن يجيب منو شيء.

المعجون دا ..بجي منو بالدولار.

بعيدين الحضري دا لو العصر ..بجيب منو شيء …كان ناس الاهلي المصري ما فكوه.

المصريون …(المعجون) بفكوه بعد ما ينشف.

فييرا …طبعا 3 سنوات مع المريخ و6 سنوات مع الهلال …يعني برضو بقى (معجون).

هيثم مصطفى …ما عاوزين نتكلم عنو.

لكن يا سلك …كلام ليك كدا …(باسكال) ذاتو بقى (معجون).

فريقكم دا يا بابكر …الاتسوك في الشوط الاول …اتسوك ..والما اتسوك ..يقنع ساكت.

ملحوظة : غايتو…اطمئنوا …ما في (تسوس) بصيب المريخ.

هوامش

تاني الواحد وقت يدخل مباراة للمريخ ..يقول للزول الجنبو ..الاطول منو ..اسمع عليك الله شوف لي (كنبة) المريخ دي فيها كم (معجون).

ولمن يقوم لاعب يسخن ….الزول القصير يقول للزول الطويل : اسمع (المعجون) البسخن دا منو؟.

ولمن المريخ يسجل هدف…عليك الله شوف لي الهدف دا جابو ياتو (معجون).

المنافسة بين (المعاجين) في الموسم الجديد في المريخ ح تكون شديدة.

من هو اكثر معجون مقاوم للتسوس؟.

وما هو المعجون الذي يمكن ان يجعل اسنانك اكثر (بياضا)….بياض وإلا بلطي.

خلاص ما تزعلوا …عشان انتوا مريخاب …ما هو المعجون الذي سوف يجعل اسنانك اكثر (صفارا).

في البيت …جني وجن (المعجون) البروح.

وجني وجن الشافع البيلعب بالمعجون.

قالوا ناس الهلال امس سجلوا ليهم (معجون) جديد.

ان شاءالله خير.

معجون عنده (غضروف) كمان.

منو الكان بصدق …هيثم مصطفى يمشي المريخ …والشغيل يجي الهلال.

البرير ..يكون عاوز يثبت الموقف شوية …عارف هيثم مصطفى دا ما بتمسك إلا بالشغيل.

عشان كدا جابوا ليه (معجون) اصلي كدا.

معجون مجرب قبل كدا.

معقولة ..ناس البرير ديل يفاوضوا سيدي بيه ..ويسجلوا (الشغيل).

دا زي الفلهمة العورة ..والحوامة بالبطارية في ليلة كمال القمر.

اخر السوق …الهلال عنده خانات فاضية ..في اوقات الشدة دي ..البرير لو لقى (عمك تنقو) ذاتو بسجلو.

الحافلة وقت تكون قايمة ..بتموها بي أي زول.

ان شاءالله زول ما يكون ماشي.

على العموم ..نتمنى لنصر الدين الشغيل النجاح في الهلال ..والشفاء من (الغضروف).

الحاجة التى يتميز بها ىالشغيل …هي الروح القتالية ..والحماس الذي يلعب به.

يعني ممكن (يفور) النص شوية.

تاني ما عاوزين أي زول يحوم بي هناك.

ما عاوزين نشوف أي (معجون).

في الموسم الجديد …الواحد لو قعد يتابع ليه مباراة قمة بين الهلال والمريخ …إلا يكون ذاكرتو قوية.

لو دقس ..او سرح ساكت في المباراة ..بلخبط الكيمان.

الباشا وهيثم مصطفى وعلاءالدين يوسف وكلتشي في المريخ ..وبهاءالدين والشغيل في الهلال.

مباريات القمة في الموسم القادم عاوزات ذاكرة قوية..وبديهة حاضرة.

اقل حاجة ..بتطلع برة الشبكة.

يا ناس المريخ في الموسم الجديد الاحمر حقكم دا ..دبلوه ..عشان الواحد ..ما يلخبط.

ناس المريخ عاملين فيها عندهم (وفاء)…اللاعب يصاب في كشوفاتهم ..يشطبوه ..لا يعالجوه ..لا يكلموه …لا يزوره ساكت.

هسع عليكم الله الشغيل دا ما اتقطع معاكم قطيع.

الزول دا ضربو كم (لغم) في سبيل المريخ.

في النهاية تشطبوه بالشكل دا ..وفي المستشفي …ما تمشوا تزروه.

هسع يا ربي البرير فاكر نفسو ..رد الصاع صاعين لي ناس المريخ.

شكلو فاكر كدا.

اقول ليكم حاجة …موضوع (المعاجين) دا انا ما بخلي ..برجع ليه تاني.

بكرة ان شاءالله ح اكتب ليكم عن (سيدا) الجديد ..نصرالدين الشغيل!!.

عاجل : تاني ما اشوف لي مريخابي بشكي من (التسوس).