محمد عبد الماجد

الشغيل يحتاج لـ (120) كورس لمحو آثار (الامرخة) والدخول في (سيستم) الهلال


الشغيل يحتاج لـ (120) كورس لمحو آثار (الامرخة) والدخول في (سيستم) الهلال
قبل بداية الموسم …الشغيل محتاج يسمع (وردي) ويشوف (صديق منزول) ويقرأ لـ (ابوامنة حامد)
< طبعا انا ما زي ناس معاوية الجاك ..وهيثم كابو ...بتحول 180 درجة في ليلة وضحاها...الموضوع يحتاج الي (مرحلة انتقالية)..ما معقولة (نتلب) جنبلق كدا.. من الشمال الي الجنوب او العكس. < هيثم مصطفى ...نحترم تاريخه ..ونؤكد على موهبته وقيادته وان ذهب الي المريخ ...لكن نختلف معه جملة وتفصيلا في انتقاله الي المريخ. < اذا كنا نقول سابقا ان الامين البرير لم (يحترم) تاريخ هيثم مصطفى ..فاننا نقول الان ان هيثم مصطفى نفسه لم يحترم تاريخه...لذا فان خطأ البرير اقل من خطأ هيثم مصطفى. < كما اثبت في الوقت نفسه اختلافنا الي الان مع رئيس نادي الهلال في شطبه لهيثم مصطفى وعلاءالدين يوسف...واختلافنا مع هيثم مصطفى فى ذهابه الي المريخ. < ارجع واقول البرير لم يضعف الهلال فقط بهذا القرار ..بل قوى المريخ في نفس الوقت ..وان كنا نراهن ان (معاناة) هيثم مصطفى في المريخ سوف تكون اكبر واعظم ...وان ما وجده هيثم مصطفى في الهلال في عهد الامين البرير سوف يجد اسوأ منه الف مرة في المريخ. < سوف يظل هيثم مصطفى (غريبا) في المريخ وان ارتدي شعاره. < الشغيل ...كنا الاكثر انتقادا له وسخرية منه ...لن نشيد به الان ..ولن نتغزل فيه إلا اذا اثبت العكس وهو في حضرة الهلال بالتجربة والدلائل والوقائع ...مع تمنياتنا الصادقة له بالنجاح والتوفيق في الهلال. < كابو وود الجاك تحولا من التهجم والاستخفاف بهيثم مصطفى الي المدح والتغزل فيه ...واخرجوا في فترة وجيزة (4 دواوين شعر) تحت الطبع ، كلها تتحدث عن موهبة هيثم وتمريراته (الجهنبية)..وقيادته (الحكيمة). < هي (عرفة) من متين يا ود الجاك؟. < الزول (الخفيف) طبعا (كباية ليمون) بتجهجهوا ليك. < اتقلوا شوية ...الزول دا لعب معانا (17) سنة. < الغريب في الامر ..ان معاوية الجاك كان الاكثر اعتراضا حينما كان يختار هيثم مصطفى للمنتخب الوطني ...وجاء وهلل معاوية الجاك لهيثم مصطفى الان بكل هذا (الضجيج) عندما وقع الاخير في كشوفات المريخ. < اما عن اعتراضي على وجود الشغيل في التشكيلة الاساسية للمنتخب ...فاني مازلت متمسكا بوجهة نظري تلك ...اذ ارى ان عمر بخيت وعلاءالدين يوسف احق بالارتكاز في المنتخب. < وان كنت احسب اننا سوف نشاهد (نسخة) جديدة ..ومعدلة من (الشغيل) في الهلال. < وقد ثبت ان الهلال عبر كل العصور والسنوات قادر على (التعديل والاصلاح والتطوير) في أي لاعب يرتدي شعاره ..ويلبس فانلته. < نعود الي الحالات الاحتفالية التى (اجتاشت) العرضة جنوب بعد ان وقع هيثم مصطفى في المريخ. < هيثم كابو شوهد بعد توقيع هيثم مصطفى في المريخ شايل ليه (كمان)..(الكلام دا ما يطلع من العمود دا)...وحايم في شارع النيل بعزف في مقطوعات برعي محمد دفع الله وبشير عباس...اما معاوية الجاك ...اسكتوا خلوه ساكت قالوا دخل ليه (معهد لغات) ..وبقى ما بسلم على زول..يفوت فيك زي الما بعرفك. < معاوية الجاك بتاع الجلاكسات واللاب توب ..(تذكروه) حمادة مدغشغر..الزول دا هسع بقى ما سائل في (راشد دياب). < معاوية الجاك باختصار كدا ..بقى بتاع (فنون تشكيلية). < عشان اختصر ليكم الموضوع...واريحكم في عضمكم. < نحن والله ..لقينا لهم عذر (كابو وود الجاك) ...الجماعة ديل من (تمهيدي) بلة جابر وموسي الزومة الي (جامعة) هيثم مصطفى. < الموضوع دا ..كبير عليهم ..وما بستوعبوا لينا بالساهل. < والله مفروض الولاية تدفعكم (رسوم)..وجباية فرح. < مفروض يقعدوكم لامتحانات عديل كدا...واي مريخابي ما عندو رخصة (قيادة) مفروض ناس المرور يمنحوها له بعد توقيع هيثم مصطفى في المريخ. < عصام الحاج ذاتو بعد 24 ساعة من توقيع هيثم مصطفى في المريخ طلع في قناة الشروق وقال هيثم مصطفى دا بنفع يكون (رئيس) لنادي المريخ. < شفتوا (الخلعة). < رئيس مرة واحدة. < انا اول مرة اشوف لي (امين عام) مخلوع كدا. < دي هاشم ملاح ما بعملها. < نحن بعد 17 سنة ..شطبناه عشان مشكلة مع (رئيس) نادي الهلال. < ناس المريخ شافوا (التمريرة)...عاوزين يبقوه (رئيس) في 24 ساعة. < دي عرفة من متين يا كابو؟. < قلنا ليكم (الصدمة) دي ..انتوا ما قدرها. < المريخاب الايامات دي عندهم ازمة حادة في (الرئاسة). < والظاهر كدا بعد جمال الوالي (الهلالابي) الاستقال.. اصلح زول يكون رئيس لنادي المريخ (الهلالابي) هيثم مصطفى. < اول انتوا متين بحكمكم رئيس من (عنديكم). < رئيسكم دائما يا مريخاب من (عندينا). < انتوا اتعودتوا على الحكاية دي ..وشكلكم كدا ..لقيتوها (ساقطة). < بعدين هيثم مصطفى ...دا بمشّي ليكم المريخ بدون ما تصرفو (قرش واحد). < في (التقشف) دا ...انتوا محتاجين لي منطق هيثم مصطفى وحجتو ..وقدرته على الاقناع. < الحكاية دي ذكرتني ليك واحد ظروفو صعبة شديد ...ولدو الصغير ..قال ليه يا ابوي ...عليك الله جيب لينا (بطاطين) للبرد دا. < الاب عاين لي ولدو من فوق لي تحت تقول في ملجة ..وقال ليه : يا ولد هوي ...دا ما (برد) يجيبوا ليه (بطاطين)...يا ود ..ارعي بي قيدك ساكت...نحن (البرد) الزي دا زمان بنقعد ليه بـ (فانلة) الحمالات في الحيشان. < الغرف ما بندخل ليه فيها. < هو وينو البرد؟. < ولاد اخر زمن!!. < حليل (برد) زمان ...الواحد كان وقت يطلع من البيت ...يطلع (يتلبد) زي الجايب ليه خبر وفاة. < انتوا يا مريخاب ...(مع ظروفكم الصعبة دي) احسن تشتغلوا بالاقناع دا. < منطق الزول دا كويس معاكم. < بلة جابر ..دا افضل ..تقعدوا معاه من بدري ..وتشيلوا من رأسو فكرة (البوفيه المفتوح). < اعملوا ليه (غسيل) بوفيه. < هيثم مصطفى ...بقدر يشيل ليه (الفكرة) دي من راسو. < ندخل على (الشغيل). < اصلو العمود دا انا من البداية ..مخصصو كدا لي (الشغيل). < ما تقعدوا تتلفتوا لي كدا زي الزول البدخل ليه (صالون) غريب عليه ، ويفتش ليه (شماعة) او مسمار يعلق فيها جلابيتو. < الشغيل دا بعد ما اتسجل في الهلال عاوزين نعمل ليه (120) كورس ..عشان يتصلح ..وكورتو تتعدل معانا. < الجوطة دي نحن ما بتنفع معانا. < الشغيل فيه خامة (ارتكاز) قاطع ...120 كورس كدا ..بتخلي ليك احسن ارتكاز في افريقيا. < امس كلمتكم (سريعا) في خبر عاجل عن (الكورس الاول) لنصرالدين الشغيل في الهلال. < عاوزين ...نعمل ليه تصفية كاملة ...ونشيل منه تسربات فى الدم ..ونمحو ليه اثار (الامرخة) بشكل نهائي. < الامرخة دي عاوزة ليها (كينين) عديل كدا. < عاوزة ليها (غسيل) كلي ..وغسيل معدة ..وغسيل امعاء ...غليظة ودقيقة ..عشان نشيل اى (وصفنة) فيه. < الشغيل دا جانا من المريخ زي (المسمم). < بيني وبينكم ..(والكلام دا ما يطلع من العمود دا)...الوصافة شيء كعبة ..اخطر من (الصبغة). < انتوا فاكرنها حاجة ساهلة. < بعد كورس (التصفية)...والغسيل الشفتوها دا ..بندخل الشغيل كورس (التنقية). < التنقية دي كيف كمان؟. < التنقية دي زي التقنية ...حاجة علمية كدا. < التنقية دي ..ادخل (c-d) جديد في برنامج الشغيل ..عشان نصرالدين دا يخلي (الشليت)..والضرب ..ويلعب كورة (صافية). < انتوا فاكرين الهلال دا لعب ساكت. < الهلال دا فريق عظيم ...ما في زول بيلعب فيه ساكت. < قايلنها (هملة). < بعد كدا ...الشغيل ...بخش في الكورس الثالث ..طبعا دا بعد ما يجتاز الكورس الاول والكورس الثاني بنجاح ..اقل شيء يجيب (مقبول). < نحن ما عندنا مجاملة في الحتة دي. < اسألوا علاءالدين يوسف وقت جانا من المريخ ..عملنا ليه شنو؟. < عشان كدا ..ما تفتكروا ..نحن عندنا قصد مع نصرالدين الشغيل دا. < بس نحن ..اي حاجة عندنا بي نظام. < نحن ما عندنا حاجة ساكت. < الكورس الثالث ...ح نشيل من رأس الشغيل بشكل نهائي ..(قطع كلي) ثقافة (البوفيه المفتوح) الجانا بيها من المريخ دي. < الكورس دا طبعا يمكن يستمر 45 يوم ..حسب استجابة الشغيل ..للانظمة الجديدة. < الكورس الرابع ..هو كورس استماع. < ح نسمع الشغيل ...غنا نضيف. < يعني ..نجيبو نقعدو كدا ..ونسمعو ليك (محمد وردي)..عثمان حسين ...حاجات كدا. < عشان نقضي على (الامرخة) بشكل نهائي. < اذا استجاب الشغيل لعملية (الحزن القديم)...وشجن ..يمكن بعد كدا يمنح (مبدئيا) الاقامة في الهلال. < الاقامة دي طبعا بتأهلو للمشاركة اساسيا في الهلال. < وممكن نمنحوا في الوقت دا لقب (ولدنا). < طبعا اللقب دا نحن ما بنمنحه ساكت ...الزول لمن يدخل تجارب وتنقيات وتصفيات واختبارات ..من ثم يمنح لقب (ولدنا). < نحن في الحتة دي ما زي المريخ ...اللاعب لو صرج ليه كورة ساكت بكرة كلهم يقولوا عليه (ولدنا). < نحن حاجات بالشكل دي ما عندنا. < بعد الاقامة في كورسات تانية في جامعة الخرطوم (عديل كدا). < بس (الكلام دا ما يطلع من العمود دا)...ما تكشفوا خططنا للمريخاب. < بعد جامعة الخرطوم ..في كورس (انتماء ومباديء وقيم) في استاد الهلال. < الكورس دا بدرّسو شوقي عبدالعزيز والفاتح النقر ..عشان تكونوا عارفين. < نحن أي حاجة عندنا بي نظام. < أي حاجة مقسمنها بالورقة والقلم. < بعد كدا ...ممكن تأخذ (الجنسية) الهلالية ...وممكن تكون (مواطن) هلالي ..ستمتع بكل مزايا الهلال وفضائله. < الشيء المهم يا الشغيل بعد الترجيب بك في الهلال ...هو ان تغير لينا موبايلك ..وشريحتك ...وعربيتك. < مشيتك ذاتها غيرها. < أي حاجة قديمة ..(من الوصيف) ما بتلزمنا. < خليك عارف انك في الهلال ...تديهم (عرق)..بدوك (دم)...الناس هنا في الهلال سوف يقدرونك ..ويحبونك بقدر العطاء الذي سوف تقدمه للهلال. < ح يقدموا ليك الهلالاب كل ما يمكن ان يطورك ..ويسعدك ..ويجعل الهلال هو بيتك الثاني بعد اسرتك. < الهلال اروع ...مما تتخيل ...عالم فيه كل التسامح ..والقيم ...والمباديء. < خليك عارف ...نحن وضعنا ليك (120) كورس ..تأكد انك بعد الكورس الرابع ..يمكنك ان تلعب في (برشلونة). < هذا هو الهلال ..كل الروعة..والجمال. < شد حيلك ..والله يوفقك. < يبقى ان تدعم الجماهير الهلالية (الشغيل)...عشان سامي عبدالله والشغيل ديل يفرتكوا ليكم (الموسم) القادم فرتيك ..بحرة القلب ..والروح الفدائية. < ملحوظة : ضرب النار بدأ. هوامش < الكوكي في المريخ ..سوف يكون امام ازمة جديدة. < الكوكي سوف يصرح اليوم..وسينفي التصريح في الغد. < على الكوكي ان يعرف ان هذا هو الفرق بين الاهلي شندي ....والمريخ. < يعني يا كوتش ..الحاجات دي عادية ...ما تقعد تفور دمك ساكت. < بعدين انت ما تشتغل بالحاجات الصغيرة دي ....وما تتعامل مع المريخ بنفس (الماكينة) التى كنت تتعامل بيها في الاهلي شندي. < لكن بيني وبينكم بعد (التقشف) والحجز ...المريخ حالتو المالية بقت اسوأ من الاهلي شندي. < هسع سمعتوا بالغلط ساكت في زول حجز ليه على (كشافة) في استاد شندي. < يمين ..ناس شندي ديل لو حجزوا ليهم على (لمبة) نارهم تولع. < كمان نحن بنلعب. < هسع استاد المريخ ..بقى للمريخ زي استاد ود نوباوي ...ما عندهم فيه أي حاجة. < الاستاد (طابق كامل) محجوز عليه. < دا استاد وإلا (فصل). < قالوا ليك في (سيخة) مرمية قدام الاستاد ...حجزوا عليها. < بقى عليكم (استقالة) جمال الوالي وحجز (طابق شاخور). < الدورة الاولي للممتاز إلا يلعبها المريخ في دار الرياضة ام درمان. < ما في مشجع واعي كدا..بدخل ليكم الاستاد وطابق كامل (محجوز) عليه. < يمكن الحجز يتمدد ويشمل حتى (الموبايلات) المشجعين. < قالوا عاوزين يعملوا مهرجان لهيثم مصطفى. < اوعكم تعملوا لي هيثم مصطفى مهرجان في استاد (محجوز) عليه. < يعني هسع لو في كورة طارت ..ووقعت في طابق شاخور ...حكمها القانوني شنو؟. < هل تعتبر الكورة (محجوز) عليها؟. < انتوا عارفين المريخ ..لو كان فاز بالممتاز السنة دي ..كان المحكمة حجزت على (الكاس). < الكوكي قالوا زار (القلعة الحمراء) امس. < نحن بنسأل ساكت كدا ...هل طلع الكوكي (اذن) من المحكمة لهذه الزيارة؟. < لو ما طلع (اذن) للزيارة ...فريق النسور ممكن يشتكي المريخ في اول مواجهة تجمعه بالمريخ. < سمعت لي خبر. < كلتشي قال ما برجع في ظل هذه الظروف التى تم فيها (الحجز) على طابق كامل. < يا ربي الحضري ..سمع بالكلام دا. < الحضري لو سمع بالحجز دا ..بمشي يلعب في (الجونة). < ما في لاعب محترف ..ممكن يلعب ليه في نادي (محجوز) على طابق كامل في استاده. < انا ما عارف لو جات (مطرة) في ظل هذا (الحجز) بحصل شنو؟. < يا زول ...عليك الله هسع (المطرة) دخلها شنو؟. < ما تدخل لينا (الامطار) في المواضيع القانونية دي. < كمان ..ناس الولاية ما برضو. < يا عصام الحاج ...انت ما ملاحظ حاجة. < يا عصام ..انت ما ملاحظ ...ان تصريحاتك اختفت بعد (الحجز). < ديل بعد جمال الوالي (فاتورة) كهرباء ..جهجهتم. < غايتو مهرجان هيثم مصطفى ..ممكن يجيب ليكم نثريات الاسبوع الاول في الاعداد. < معسكر تونس ..قالوا اتجهجه. < الظاهر كدا ..ح يكتفوا بي (مروي). < من مروي ..اتوقع بلة جابر ..يجينا حافظ ...(الزول الوسيم)..وموسي الزومة يجينا حافظ (حبي ليك كان زادي). < ناس الشمالية ديل ما بقصروا. < والله تمتعوا فن وادب وثقافة. < كمان ناس مروي بيلعبوا. < عليك الله يا عصام الحاج ..جيب ليك معاك (كهرباء) من سد مروي. < بتنفعكم في (ضلمتكم) دي. < يا جماعة (التقشف) اصلو كدا. < ولسه. < في ايام سوداء ماشة عليكم. < عشان تاني تقعدوا تسخروا من ناس جزيرة الفيل. < اها بقى ما عندكم أي فرق من جزيرة الفيل. < اقول ليكم حاجة. < فكوا موسي الزومة لي اهلي عطبرة بجيب ليكم (20) مليون. < عاجل : جمال الوالي يرجع ليكم الكهرباء ..ويسجل ليكم ويشطب ويدفع ليكم قروش المعسكر..ويفك ليكم (الحجز)..وقت بعمل ليكم الحاجات دي كلها طيب (مستقيل) ليه؟...يا عصام الحاج (اتصرف).[/SIZE]وإن طال السفر - صحيفة قوون