النيلين
حوارات ولقاءات

صانع الطنابير الشهير (صلاح طنابير) في اول حوار صحفي في حياته


[SIZE=5]بمثلما ما ان هناك خلف كل عظيمٍ إمراه “كما يقولون” فعندنا وبالحسابات الشعبية العاديه فخلف كل ابداعٍ يظهر للعلن ذو مهنةٍ يقبع في الخلف ، وفي فننا الشعبي الطنبور المعروف فخلف كل فنان يصدح بجميل الالحان يكون هذا الرجل “صلاح طنابير” ، وخلف كل فنٍ راقٍ يكون ضارب عروقه في الارض التريانة يكون هذا الصلاح نبع ماءه ومكان وروده العامر بالماء والخضرة والوجه الحسن .
صلاح طنابير هذا الاسم الاشهر وصاحب التخصص الابرز في فن وغناء الطنبور .. نصطاده اليوم لنجلسه في هذه الاستراحة الرمضانية العامره علي بساط الوفاق الاحمدي .. فمرحباً به .

اول طنبور صنعته في العام 76 واحترفت هذه الصنعة في 2005 واول طنبور صنعته للراحل محمد كرم الله
لي علاقات واسعه مع كل الفنانين والنصري اكثرهم وتمنين الراحل عثمان اليمني
الكلنكيت هو احدث انواع الطنابير وهذا رايي في تعصب جمهور الطنبور وهذه نصيحتي لهؤلاء

ـ اسم الشهره (صلاح طنابير) ما هو الاسم الحقيقي ؟
الاسم صلاح محمد عبد الرحيم وطبعاً سارت علي صلاح طنابير دي منذ سنين وحتي اقرب الناس لي صاروا يعرفونني بهذا الاسم فقط .
ـ البدايات ؟
أول طنبور قمت بصناعته كان في العام 1976 م .. لكن الإحترافيه كانت منذ العام 2005 / .
ـ اول طنبور صنعته تذكر كان لي منو ؟
(سريعاً) ايوه بتذكر ، يا ألله ياخي .. الف رحمه ونور تنزل عليك الفنان الجميل محمد كرم الله .. وقد كان ذلك في العام 76 .
ـ الفنانين الذين تعاملت معهم ؟
كل فناني الطنبور .. اكثر من 150 فنان .. فنانين كبار ومبتدئين وبعضهم غير فنانين وهاوين ومعجبين فقط بالطنبور .
ـ مافي فنان تمنيت انك تتعامل معاه ؟
ابداً والله كلهم اتعاملت معاهم الا الراحل عثمان اليمني .. هو الوحيد الذي لم اعمل له طنبور ، وقد كانت تربطني معه صلة صداقه حميمه جداً .
ـ صناعه نري انها متعبه جداً ، بتقدر تراعي مواصفات كل فنان لوحده والا كيف ؟
لازم ، لكل فنان مواصفاتو الخاصه ، وهي علي حسب الالحان والاغنيه وعلي حسب طول والقصر للاغنيه وكده .
ـ كم تستغرق مدة صناعة الطنبور ؟
شغل مزاجات وشغل بتاع هوايه اكثر ، والهوايه جاري في دمي منذ الصغر .
ـ الطنابير دي ليها انواع ؟
نعم .. لها عدد من الانواع مثلاً رخيمه كبيره ـ وسط ـ كلنكيت ـ جلدي ـ خشب والخشب هو ماخد مواصفات الجلد عشان نفس الشكل بس هو يتعمل بالخشب ، وحاولتا اغير من جلد لي خشب عشان الجلد بيتاثر بالمناخ والرطوبه والمطر .
ـ ما تخوفت انو الناس ترفض طنبور الخشب ده لانو بيغير شكل طنبورنا القديم وهذا ما رفضه اغلب الناس في طنبور جماعة الدليب ؟
لا لا ، كونو اخذنا مواصفات الجلد فده عشان ما دايرين شكل طنبورنا يتاثر بي شئ ، ولو شفتو ما بتفرزو ـ واول من نتغني بطنبور الخشب هو الفنان محمد النصري ، وواجهتني في الاول صعوبات عده منها اختيار نوع الخشب المناسب وكده لكن الحمد لله اتوفقت في التغيير .
ـ بتعزف طنبور ياعمو صلاح ؟
اي .. ايوه بعزف ياخي .
ـ ما حاولتا تغني ؟
ابدا ما حاولتا اغني لكن بدندن براي مرات .
ـ اذاوق الطنابير بين الجيل الاول “السابق” والجيل الحالي ما هو الفرق بينهم ؟
الرعيل الاول ديل كانت الطنابير حقتم كبيره (محمد كرم الله ، يوسف كرم الله ومحمد جباره) .
اما الجيل الحالي ف في اختلاف في اذواقهم منهم من يستخدم الطنابير الكبيره واغلهم يستخدم الطنابير الصغيره ، ومنهم من يستخدممهما الاتنين سوياً .
ـ انتشارالفنانين الشباب في الفترة الاخيره زاد كثيراً كيف تراهم ؟
الشباب هم درجات وفيهم الذي سيقدم لاغنية الطنبور وفي البخصم ، وايي زول بقي داير يغني ولكن اكترهم اثبتوا انفسهم وعندي ليهم نصيحه : (الحكايه ما انو انا بعرف اعزف طنبور اقوم اغني ، ما كدا ياخي ، وهناك امثال الاستاذ بلاص ما كان بعزف طنبور لكن صوته حلو وكان فنان متميز .. عشان كده خلو الحاجه دي لي اهلها .. مافي داعي تخربوا الطنبور) ز
ـ كم عدد الطنابير التي قمت بصناعتها حتي الان ؟
ما يقارب ال 3 الف طنبور .. امسك عندك (النصري 77 ـ عبد القيوم الشريف 30 ـ طارق العوض 44 ـ جعفر السقيد 35 ـ صديق احمد 14 ومحمد كرم الله 6 طنابير وغيرهم الكثير) .
ـ هل هناك اسعار ثابته للطنابير ؟
لا ليست ثابته .. متفاوته …
ـ “مقاطعاً” البخليها متفاوته شنو ؟
بتتفاوت لانو هناك صعوبات تواجهني وهي من تحدد اسعار الطنابير مثلاً وجود القدح “صعب شديد” عشان كده بضطر امشي اشتري أقداح زاجي اعمل الطنبور وبالتالي يزيد السعر .
ـ العلاقة المتوتره احايين ثيره بين جمهوري عبد القيوم والنصري هل تنعكس علي طنابيرهم بأي شكل من الاشكال ؟
لا لا . وطنابيرهم لا فرق بينا كثير .. عبد القيوم المشدود عالي والمرخي البقيف مع صوته وادائه ، اما النصري فهو عنده كل انواع الطنابير .
ـ رايك في التعصب بين الجماهير ؟
انا لست من انصار التعصب ولا من رواده ، لكل فنان نكهه وطعم خاص ولابد من ترك هذه الظاهره لانها لا تشبهنا .
ـ لاحظنا الفترة الاخيره انتشار نوع صغير من الطنابير ؟
ايوه .. ده اسمو الكلنكيت واول من تغني به هو النصري في (الشوق للبلد) وهناك طنبور ايضاً يسمي (كربة الرمله) وهو ملك النصري ايضاً وقد تغني به اغنية (عابره 24) والنصري في بداية استعمال الطنبور الصغير لم يكن متعود عليه، وجاني كم مره راجع وانا اصريت علي انو يغني به ومن الزمن داك اصبح يطلبه دائماً .
ـ هل تعاملت مع الفنانين الشباب ؟
نعم تعاملت (خالد جبريل ، محمد مضوي ـ عمر النافعاب ـ حافظ الباسا ـ محمد مصطفي والتاج وداعه وغيرهم) .
ـ تهافت الناس واقبالهم في الفترة الاخيرة علي اغنية الطنبور ما السر في ذلك في رايك ؟
تم تطوير الطنبور في الشكل ليتلاءم مع حداثة القنوات الفضائيه شكلاً في هذه الجماليات ، اي السبب في اقبال الناس كثرة الاعلام ليس الا .
ـ اغاني تعجبك وتدندن بها في لحظات الصفاء ؟
عابره 24 ، ام الحسن وياريا لجعفر السقيد .
ـ ادخال الالات الموسيقيه علي اغنية الطنبور ؟
لا احبز هذه الالات وادخالها ، الطنبور عندو حنيه وحاجات وجدانيه ، والطنبور علاج لي كل مرض عصبي ، وصوت الطنبور له نغمه وحلاوه براها وانا برتاح لي صوت الطنبور من غير غناء .
ـ تصميم الطنابير ؟
انا من صوت الفنان بعرف نوع الطنبور البنفع معاهو ، لكن طبعاً ايي واحد بيديني مواصفاتو وبناقش البعض فيها .
ـ عندك ختم او علامه معينه تعرف بها طنابيرك ؟
ايي .. عندي شعار (النجمه) .
ـ نصيحه ؟
في كلمات :
ـ الرمز عثمان اليمني ؟
كما سبق وذكرت لم اتعامل معه في صناعة الطنابير وانما كانت بيننا علاقة صداقه وكنت استمع لكل اغانيه “له الرحمة والمغفره”
ـ الراحل النعام ادم ؟
تعاملت معه من زمان وكنت استمع له “له الرحمة ونسال الله انو يوسع مرقدهم ويدخلهم الجنه” .
ـ عبد القيوم الشريف ؟
كنت لا اسمع غيره في فتره من الفترات .
ـ جعفر السقيد ؟
استمع اليه بشراهه واكاد احفظ كل اغانيه .
ـ الفنان محمد النصري ؟
اول تعامل لي معه كان في العام 2007 وقمت بعمل 77 طنبور له .. العلاقه بيني وبينه اسريه وليست علاقة طنابير فقط .. وانا بالمناسبه كنت لا اسمعه وانا من عشاق عبد القيوم الشريفي وجعفر السقيد لكن النصري اجبرني ان استمع له واكتشفت فيهو عذابة صوت واختيار في الكلمات والالحان واصبحت مهووس بالنصري .
هو ساهم في نشر اغنية الطنبور في الفترة الاخيره وهو اجتهد من اجل الغناء واعطي كل وقته للغناء .
ـ الكلمة الاخيرة لك ؟
اشكركم جزيل الشكر ، كل اسرة صحيفة الوفاق .. شكر خاص وتقدير .. وقبل الختام نصيحه او هي رساله عبركم لابد ان ارسلها : انصح كل رواد الطنبور وهذا لمصلحة اغنية الطنبور والدليب .. لازم المناكفات والخلافات التي تحصل بينهم دي يخلوها ، وكل الاغاني تبع منحني النيل وهي من تراثنا ، وليست هناك ما يسمي باغنية الشايقيه انما تسمي اغنية منحني النيل وهي تشمل كل هذه المناطق .

عبد العزيز الننقة[/SIZE]

تعليقات فيسبوك
شارك الموضوع :


اترك تعليقا