رأي ومقالات
تهاني عوض تكتب…حكايات سودانية: غويشات قناوة بت صديق !!
ـ يا منى ..تعالي يا بت صوتى لى فى العصيدة دى ..داب ما أفرك ملاح الشرموط دة ..
ـ حاضر يمة …لكن إنتى مالك الليلة سويتيهم بدرى ؟
ـ أجى يا بتى ..ما قلت ليكم نصرة أختى بتها بتتوجع ؟
ـ آى والله ..أها تانى فى شنو ؟
ـ تعالى بعد تخلصى ..حشى لى العجور دة لى سلطة الروب .. أنا أمشى أرمى الطعمية دى …
ـ سمح يمة ..بس أدينى المفتاح حق الفضية ..عشان أمرق الصحون الغراق والباشرى ..
ـ الله يديك العافية يا بتى …بعدين جهزى الصينية لأبوك يمرق بيها برة مع الرجال ….وبعد الفطور ..طلعى ليهو عنقريبو فى الراكوبة بى غادى ..وأفرشى ليهو مرتبتو ..سامعة ؟..وختى بالليل كورية الرقاق باللبن فوق التربيزة حنب السرير وجك الحلو مر ..عشان تتسحرو ..وأبوك دة نوام ..النوبة حقت المسحراتى دى ما بتصحيهو ..صحيهو إنتى للسحور يا بتي ..وأنا إن شاء الله الدغش بدرى بجيكم ..
ـ هييييى يمة أول أمس مشيتى شلتى ختتك ؟ عشان حوة رسلت بتها ..ونسيت ما أقول ليك
..كيفن عاد ؟ شلتها طبعا صريتا مع الفاتت ولميتن ..
ـ دايرة تجيبى بيها شنو يمة ؟
ـ أسكتى ساى يا منى يا بتى …الأسبوع الفات ..فى صفاح ناس إسماعيل ود رضوان ..جات (قناوة بت صديق) ..أولا بالتبادى ..مدخنة حنس دخان ..خلا لونا متل الدهب ..والحنة السادة دى تخليها ليها سوووودا زى الليل ..ولابسة فى إيدا غوايش يلصفن متل الكهربا ..عجبنى بالحيييل ..قلت بعد أصلح التيلة أشترى لى أربعة أكتر بيهن غويشاتى ..عاد كما عملت كدى ..أبوك الفقر دة بجيبن لى ؟
ـ ليه يا يمة ما بجيبن ليك ؟ بس هو ما عندو ؟
ـ منو القال ليك ؟ سمح دفع قروش الجرورة حقة عمتك للدكان من شنو ؟
ـ منو القال ليك يمة ؟
ـ كلمنى الخير زاتو …سيد الدكان …لكن أنا ما بتبشتن ليهو ..والله أوفر من المصاريف ..وإن لقيت لى قريشات مطرفات فى جيوبو بشيلن ..
ـوانا يمة تدينى شنو عشان سرك يكون فى البير ؟
ـ هى الغتاتة دى إنتى جايباها من برة ..ما من أبوك ..خلاس .بجيب ليك الحلق العاجبك …
خرجت حاجة فردوس وقضت الليل مع أختها وبنتها ..ولما جاءت فى الصباح وجدت حركة غريبة فى البيت فأسرعت تنادى بنتها ..
ـ منى …سجمى مالكم فى شنو ؟
ـ مافى حاجة يمة …أبوى كان شايل سيجارتو ..ونام ..وقعت منو حرقت المرتبة ..بس هو شديد ..
ـ الحمد لله ..عاد الليمشى يجيب ليهو مرتبة تانية ..ولا يشيل حقتى
…يمة حقتو إتكشح فيها الحلو مر ..قمت طلعت ليهو حقتك ..
ـ سجمى الحرقت دى مرتبتى ؟
ـ آى يمة
ـ ووب على وا سجمى وا رمادى خلاص قمحتونى
ـ فى شنو يمة ؟
قريشاتى هيلات الختة انا كنت داسهين في كيس المرتبة !!!!
تهاني عوض
