فتح باب التسجيل لمدرسة (بشة) للباكات والجلحات الكبيرة

كل ورقة من بلد.

فجأة كدا …جاك (الجوكر)…ما تعرف تختو وين؟. تتخيلوا (الجوكر) ذاتو ما عاوز يجاوز.

ورق كعب!!.

مرات الجوكر بتأمر عليك …عشان يقبضوه في يدك.

المهم مشيت الحفلة.

الحكاية دي كانت (بدري)…ما عارف بالظبط ..لكن الكلام وقت كانت الساعة ستة مساء ..بتجيك في (العصر).

هسع (العصر) ما بتشوفو.

ستة صباح ..بتجيك زي اربعة صباح بالوقت الحالي.

يتخيّل لي زمان (الخروف) كان عندو (مبدأ).

ما في خروف بصل المليون.

عليكم الله ما تسألوني علاقة (المبدأ)..بي سعر الخروف شنو؟.

يتخيّل كدا ..وزي ما عاوز اشرع في الحتة دي اننا هسع بنعاني من ازمة (مباديء).

عليكم الله لو ما بنعاني من ازمة مباديء….سعر الخروف زمان هسع (ديك) ما بجيبو.

دا الزمن (الخرافي) ذاتو ..الاتكلم عنو صلاح حاج سعيد.

راجل ..مرتو زارهو في (الخروف).

خلتو ليك زي (السلبه).

قال ليها : يا ولية ..يا انا يا الخروف في البيت دا.

قالت ليه (الخروف).

الراجل طلع من البيت زعلان ..(ما عارف يعمل شنو؟)….مشى على بتاع خرفان …قال ليه : اسمع : (عندك تحويل رصيد).

بتاع الخرفان ظريف …قال ليه سوداني وإلا زين؟.

قال ليه : (ضان).

في الحتة دي ..(زي عاوز اقول حاجة).

زمان عندنا واحد عامل لينا فيها (شاعر).

كرهنا العيشة …ما يشوف ليه (اتنين)…إلا يقرأ ليهم (قصيدة).

وقصايدو يا ريت لو كانت سمحة ..قصيدتو زي (كورة بلة جابر).

عليك الله بلة جابر هسع الدخلو هنا شنو؟…طلعو لينا لو سمحت من القصة دي.

ما تعمل لينا مشاكل ساكت…ما تخرب لينا قصتنا.

يا جماعة …انا لو بلة جابر …ما دخلتو في القصة دي …الموضوع دا ما ببقى رياضي.

ببقى اي حاجة …غير انو يكون رياضي.

المهم …(نهايتو) كدا …الزول العامل لينا فيها (شاعر)..دا مشى (يخطب).

اهل البنت …طبعا زي اهل اي بنت يمشوا يخطبوها…بطلعوا (الكراسي في الحوش)..وبعملوا شاي المغرب.

انا ما عارف السر في (طليّع الكراسي) في الحوش شنو؟.

اي بنت يمشو يخطبوها ..اهلها بطلعو الكراسي في الحوش.

الغريبة اهل البنت ..بفتكروا انهم عملوا (جدعة) بتطليع الكراسي في الحوش …كأنهم عملوا ليهم حاجة كبيرة.

صاحبكم العامل فيها (شاعر)…ابو البنت قال ليه : شغال شنو؟.

قال ليه في الحقيقة انا…!!.

ابو البنت قال ليه : خلاص اسكت …من قلت في الحقيقة انا …معناتها انك ما شغال …(حقيقتك) انا عارفها.

طيب يا ابني عندك بيت او شقة …او (راكوبة) صغيرة ظريفة كدا …(البيت الكبير ما شرط).

صاحبكم قال ليه : في الحقيقة انا…!!.

ابو البنت قال ليه : خلاص اسكت …من قلت في الحقيقة انا …يعني ما عندك بيت.

طيب ان شاءالله …عندك تلاجة وتلفزيون …انت عارف التلاجة والتلفزيون اهم شيء في الوقت دا …وكمان يا ريت يكون عندك كرت الجزيرة …والله بنتي القدامك دي (كورة) ما بتفوتها لبرشلونة….تحرس ليك الدوري الاسباني لانصاص الليالي.

الولد قال ليه : في الحقيقة انا…!!.

ابو البنت قال ليه خلاص اسكت …من قلت في الحقيقة انا ..معناتها ما عندك (كرت الجزيرة)….كرت شنو كمان …(نحن ما عندنا بت بتابع الدوري الاسباني)…الدوري السوداني مالو ..عيبو لي…قناة النيلين يا حلاتها …عليك الله في احسن منها.

يمين لو جات بت (كوتشينة) بين الشوطين ساكت في الدوري الاسباني …نقطع رأسها…(بلا كلام فارغ معاكن).

الولد قال ليه : في الحقيقة انا….!!.

ابو البنت قال ليه : اسكت يا ابني من قلت في الحقيقة انا ..معناتها ما عندك (تلاجة)..ما مشكلة …موية الزير مالها.

الولد قال ليه : في الحقيقة انا….!!.

ابو البنت قال ليه : اسكت من قلت في الحقيقة انا …معناتها ما عندك تلفزيون ..يمين (104) دي ما في احسن منها…(نحن ما عندنا بنت بتقعد ليها في تلفزيون).

هو التلفزيون شن طعمو.

الولد قال ليه : في الحقيقة انا..!!.

ابو البنت قال ليه : اسكت …من قلت في الحقيقة انا ..معناتها (راديو) ذاتو ما عندك …احسن ارتحت من (104)…عليك الله هسع (اقوال الصحف) في (104) ما بتجيب الفقر.

الولد قال ليه : في الحقيقة انا…!!.

ابو البنت قال ليه : في الحقيقة شنو تاني ..لا شغال ..لا عندك بيت …لا عندك تلاجة..لا عندك تلفزيون …لا عندك راديو …انت (بنتي) ماشي تقيف بيها في (استوب) شارع البلدية مع تقاطع شارع المك نمر.

الولد قال ليه في الحقيقة انا…!!.

ابو البنت …قال ليه اسكت …من قلت في الحقيقة ..معناتها ما عندك اي حاجة…نحن مقدرين ظروف البلد …ما عاوزين منك اي حاجة…الخميس القادم …تعال سوق (عروستك) دس وامشي الله يفتحها عليك.

الولد قال ليه في الحقيقة انا…!!.

في الحقيقة شنو تاني يا ولدي؟.

في الحقيقة انا صرفت نظر من موضوع العرس دا..كأس العالم ذاتو قرب. يا ولد كأس العالم الدخلو شنو في الموضوع دا …انت (عريس) وإلا (وكيل لاعبين).

لملموا (الكراسي)…وصرفوا نظر من موضوع العرس دا.

قلت ليكم في بداية العمود ..مرة مشيت لي حفلة …(تطيروأ الكلام من الرأس). الكلام دا زمان.

زمن (عداد) الفنان بتموه ليه بـ (طبق بيض).

الفنان تلقاهو طالع من الحفلة بي (طبق بيض) زي (ناظر المدرسة).

وناظر المدرسة طبعا ما عندو اي علاقة بالموضوع دا ..(انا ساكت مرات بلخبط).

ف مشيت الحفلة زي اي زول …(وعشان ما تتلخبطو …انا كتير بمشي حفلات).

الشيء العاوز ألفت ليكم فيه (نظركم)..اني حفلتي المشيت ليها المرة دي ..غير المرات السابقة التى حكيت ليكم عنها.

مشيت الحفلة …لقيت (العريس) طالع في رأس البيت …بربط ليه في (لمبة).

قلت ليه انت (عريس) شنو؟….في عريس في الدنيا بربط ليه (لمبة) يوم عرسو.

ف والله عمليتك دي (بلة جابر) ما يعملها…فاتح لي خشمك كدا زي المدرسة الما فيها (غفير).

العريس …كلامى ما عجبو ..نطط لي عيونو زي الزول الما تامي النزول …قال لي انا عاوز اربط لي (لمبة)…وإلا (بقرة)…يعني شنو ما (لمبة) بربطها …وبنزل اتم عرسي.

قلت ليه عرس شنو البتمو …هو (زواج) وإلا (كوتشينة)..عشان ننتظرك تنزل تتمو لينا. بعدين انت وقت تربط (اللمبة)…وزير العريس يعمل شنو؟…يمشى الاستديو يتصور مع العروس!!.

العريس كلامي دا اصلو ما وقع ليه …ما قبلو.

الحكاية دي بدون مناسبة كدا (انتهت) …(موش على كيفي)..ذكرتني واحد الايامات دي …مشى (الطابونة)…وقال لصاحب الفرن ..اديني رغيف بـ (جنيه)…يعني الف جنيه.

بتاع الفرن مد ليه (3) رغيفات …زي (الختم)….(الرغيفة) بتعرفها بالخبرة.

الرغيفة لو ما حريف …ما بتعرفها.

فاضل يعبوها ليك في (فتيل).

الرغيفة زي (الزلابية).

ما فاضل ليهم إلا يدوك ليها في صورة اشعة.

يمين الرغيفة لو نظرك ما ستة على ستة ما تشوفها.

الرغيفة زي (الشبشة).

حاجة كدا.

صاحبكم قال ليه بعد ما استلم الثلاث رغيفات : ايوا كويس ..اديني عليك من البلدي دي ….(لكن رغيفك دا مالو صغار كدا زي (جنة الاطفال)…هسع (رغفيك) دا نشوفو كيف؟.

طبعا (جنة الاطفال) ما عندها اي دخل بالموضوع دا …لكن الزول قصدو يقول انو (الرغيف) زي (الشفع) الكانو بجيوبهم زمان في برنامج (جنة الاطفال).

بتاع الفرن …ما اشتغل بيه.

بعد ساعة لقى ليك الزول واقف في الشباك …(تقول منتظر الصراف)..بتاع الفرن قال ليه : نعم …عاوز شنو؟…ما تقيف لي في الشباك كدا زي (رجل الراية).

زولكم قال ليه : عاوز شنو كيف؟ …. تفتكر عاوز افحص الدم..وإلا حايب الولية اعمل ليها (موجات صوتية)..وإلا تكون فاكرني عاوز لي (فيزا) …ما عاوز لي (رغيف)…لي ساعة اديتك (جنيه)…اديتني (3) رغيفات …وتاني ما رجعت.

مسكلت لي …وما رجعت لي تاني.

بتاع الفرن …قال ليه …ارجع ليك شنو؟ …(3) رغيفات بـ (جنيه)…اتخارج عليك الله من هنا سديت مننا الهوا …شطفتو مننا عديل كدا.

زولكم كان عاوز تجيّه (سكتة قلبية)…قال ليه …(3) رغيفات بي جنيه ….انت قايلني قادم من (الهند) على التو كدا…وإلا تكون فاكرني (استرالي)…ما تشوف الشعر (السبيبي) دا …انا ما (استرالي) …انا سوداني (قاطع)…يمين (الرغيف) دا بنكاتل فيه عديل كدا…اوعك!!.

بتاع الفرن …قال ليه عليك الله ما عاوز كلام كتير …وقدم ليه (منشور) …مكتوب فيه (3) رغيفات بـ (جنيه).

قال ليه …دي كمان عملتوا ليها (منشور).

منشور شنو؟.

المنشورات دي خلوها للحاجات الكبيرة …عاوزين تعملوها لينا للرغيف.

(3) رغيفات بي جنيه …عليكم الله الكلام دا هسع في فندق 5 نجوم بحصل …معقولة.

(3) رغيفات بي جنيه …انتوا الرغيف دا بتعجنو بي (بنزين).

(3) رغيفات بي جنيه ..طيب خليتو شنو للاراضي.

خليتو شنو للسمك!!.

كلامك دا تاني ما تقولو…والله رغيفاتك التلاتة ديل تمدهم لي زول كبير في السن …يروح فيها …(انت ما تشوف الشعر السبيبي دا وتفتكرني استرالي).

يا زول هو وينو الشعر السبيبي؟ ….عامل جلحاتك ديل …زي ميدان الخليفة عبدالله التعايشي.

بالله جلحاتك فاتحة من الجهات الاربعة زي الكتاب الما فيه (غلاف).

زمان الجنيه دا كان بجيب (البلابل) التلاتة في حفلة للصباح …ما يخلن (رجعنا لك)..وعشة صغيرة …وقطار الشوق …هسع عليكم الله قلبتوا الحكاية بقيتوا التلاتة عيشات بـ (جنيه).

بقيتوا الرغيف (البلابل).

يعني الواحد لو عاوز ليه (عقد الجلاد) رغيف ..إلا يبيع ليه قطعة ارض.

غايتو كيس الرغيف بقى اصعب من (الشيلة).

ملحوظة : والله بقيت تلخبط الزول في (جلحاتو).

هوامش

امس انتصر الهلال على هلال كادوقلي بعد ان اضاع ليه (ملوة) اقوان.

معقولة… الشوط الاول براهو اضاع الهلال فيه (5) اهداف.

البشوف الهلال بضيّع في الاقوان …بقول ان الهلال سوف يخسر المباراة.

لولا هدف كاريكا التاني كان ادلغنا من التعادل الف مرة.

تاني فارق الهدف دا اوعكم تقيفوا عليه.

لولا ان هدف هلال كادوقلي جاء في الزمن البدل الضايع …كان يمكن ان يفقد الهلال نقاط المباراة كاملة.

لكن الحمدلله …الهلال استطاع ان يعود بالنقاط الثلاث.

الهلال عاوز ليه مراجعات فورية في اضاعة الفرص السهلة التى تتاح له في المباراة.

اهلي عطبرة افضل اندية الممتاز بعد الهلال في الدورة الثانية من غير شك.

تتصوروا (اللوردات)…بعد الجوطة دي كلها باقين ليهم (24) ساعة.

طلعتوا لوردات اي كلام.

شبكتونا ليك مدينة طبية …ومول ونادي عائلي …وتحويل المريخ الي شركة مساهمة.

ما شفنا اي حاجة.

لورداتكم ديل اخير منهم (ولاد حلتنا).

على الاقل ولاد حلتنا ديل ولعوا الشارع القدام.

عاملين لينا فيها (لوردات) في الفاضي.

لوردات قاعدين ساكت.

والله لو كان عارفنكم كدا …كان وديناكم النسور.

قال (17) لورد قال.

مفروض يعملوا ليكم (مظلة) مواصلات ..ويكتبوا فيها مظلة لوردات المريخ.

هو قالوا ليكم (اللوردنة) كدا.

جهجهتوا الجرايد ساكت.

بكرة ان شاءالله نحاول نكتب عن اخر لحظات اللوردات في المريخ. اودعكم.

لا لا ..ما بقدر.

دموع بتغطي عينيا.

ولكن اه.

اه.

اه.

افارقكم.

والله انا ما في حاجة غايظني قدر ..(المول).

شوفوا (الكضب).

طيب كان تعملوا ليكم (بقالة).

ما كان تمشوا ساكت كدا.

بالمناسبة دي.

بشه عاوز يفتح ليه مدرسة للباكات واصحاب الجلحات الكبيرة.

يا ناس موسى الزومة …وبلة جابر …والطاهر سادومبا …لو عاوزين تسجلوا …سجلوا من بدري …الفرص محدودة.

عليكم الله من الله خلقكم …في (باك) اسمو (سادومبا).

بوظت لينا اللقب.

نجيب سادومبا. يجيبوا ليهم زول يحلقوا ليه (صلعة)..ويعملوا ليه جلحات (4 ضلف)..ويقولوا عليه دا سادومبا.

الما بقدروا عليه.

بشوفوا ليه (شبيه).

يا موسي الزومة كلم الباكات كلهن يسجلوا في مدرسة (بشة) دي.

اي باك …يجيب ليه (4) صور …مع رسوم التسجيل وشهادة من اللجنة الشعبية.

شهادة اللجنة الشعبية اهم شيء.

ما في تسجيل بدون شهادة اللجنة الشعبية.

عشان الباكات ديل يمكن يحصل ليهم (تسمم) في الدرس التاني.

خوفي ..على الموردة.

العام الماضي ودع هلال الساحل …وهذا العام نخشى على الموردة.

الموردة احدى علامات الممتاز.

إلا الموردة.

نتمنى ان تعود الموردة ..وتبقى في الممتاز.

…….

عاجل : الحضري دا قايل نفسو صغيَر ..يجي ويرجع تاني يوم!!.