محمد عبد الماجد

اللوردات مول تجاري ونادي عائلي ومدينة طبية وشركة مساهمة!!!


اللوردات مول تجاري ونادي عائلي ومدينة طبية وشركة مساهمة!!!
< قاعدين (نتسامر) في قون (بشه) الثالث ، طلعنا من عروقنا ..في واحد (سنونو) متل (حلة اللبن) المكدبة، سنونو بي (قنانتهن) ...قال لينا : (والله هدف بشه دا لو جاء في الدوري الايطالي) كان طلاب الصف الرابع الابتدائي (الايطالي) اجزوا ليهم. < بدون اي مناسبة قال لينا الكلام دا. < قلنا ليه هسع هدف بشه الدخلو شنو؟...مالك عاوز تقوّم على الجماعة (المصران). < الناس هنا ما بشعروا ...ما بقدروا ...ما بحسوا...هدف بشه (اللوحة) في الحضري فات فيهم ساكت. < قلنا ليه ...يأجزوا ليهم ليه؟...هدف هو وإلا رأس سنة ، وإلا (عيد)..وإلا مطر؟....انتوا بتحبوا (الاجازة) زي ام فتفت. < مطر شنو؟...والله هدف بشه دا لو جاء في ايطاليا ..كان نزلوا لوحة (الموناليزا) ورفعوا لوحة بشه. < الحضري من الهدف دا بقى زي (الرز) القالبين فيه كمشة (ملوخية)...اتجربن في الدنيا دي جنس (جربنة). < زي الشافع البمشي العرس ...ينزل ليك في (صينية) الغداء ...يسوطها ليك سواطة شديدة. < وامو تعاين ليه ..ما تقول ليه اي حاجة ..هسع لو عمل حركاتو دي في البيت كان جلدتو. < لكن في العرس...تعاين ليه وتضحك. < خليه يلخبط....ما شافع. < الشافع يبقى زي (الكمشة) ...اي صحن يدخل ليك فيه للنص. < يا ابوالشباب. < يا ابوالشباب. < انت عاوز تفك (الحضري) ...وتمسك (الشافع). < الحضري والشافع انا عندي واحد. < رجعنا للهدف. < العجب (الباشا). < العجب اعتزل..فضل الباشا. < الباشا ..كاريكا عملو ليك زي صحن الكوكتيل في الفاصل الاخير من الحفلة ..مقسم حتة ...حتة...تلقى قاعد تحت الكرسي..كأنو ما في زول اكلو. < كل قطعة في حتة. < الباشا بعد العملية العملها فيه كاريكا ..قالوا ليك قاعد في الحلة في (لستك) بغني في (قالوا قالوا علي شقى مجنون...ان شاءالله اجن وازيد في الجن). < عليكم الله في (جن) اكتر من البعمل فيه (باسكال). < باسكال بشبه سيد البيت العندو (غرفة) بتكب موية من السقف في المطر. < المطر كلها ...تلقاهو بشتم في (المحلية). < المحلية تعمل ليك شنو انت كمان؟. < المحلية تبقى ليك (دروة). < انتوا ما لاحظتو من العملية العملها (كاريكا) في الباشا ..الباشا (اختفى). < اختفى نهائي. < ناس قالوا اصيب بـ (تقرحات) في المعدة ...نتيجة للتحركات اللا ارادية التى قام بها مع بشه. < وناس قالوا دي ما تقرحات في المعدة ..دا (التواء) تجوفي في القولون عديل كدا...عشان (التشظف) الذي حدث ليه قرابة المنطقة المحرمة. < اتشظف الباشا دا جنس تشوظيف. < وناس قالوا دي لا تقرحات ...ولا التواء ...دي (تموسحات) في القصبة الهوائية. < قلنا ليهن التموسحات دي كمان البجيبها شنو؟. < قالوا لينا دي بجيبها البعمل فيه كاريكا دا. < كاريكا جمع ليك وطرح ليك (الباشا) في عملية واحدة ...الباشا بقى زي الزول البنوم في المسلسل...ما فاهم اي حاجة. < يصحى في الدعايات وينوم تاني. < الباشا بقوا يقعدوه في (الكنبة) يمسكوه (الشنكارات). < والله قادر (كروجر) يلقى (شنكار) ناقص. < يا الباشا ...مسك (الشنكارات) دي ...لا عاوز ليه (باشا) ولا حاجة. < الحكاية دي (بلة جابر) ممكن يقوم بيها. < انتوا وين الكابتن سعيد السعودي؟ ...الزول دا عندو مشكلة (نسابة) مع كروجر. < سعيد السعودي بقى يلبس شارة الكابتنية ويقعد في الكنبة. < يا سعيد بقيت كابتن بالكنبة. < يا سعيد. < يا سعيد. < قربت تبقى (كوتش) من كنبتك القاعد فيها دي ...ألحق نفسك...قبل ما تبقى (مدير كورة). < مرة عندنا زول ....دخل فيه (قندران). < زولكم بقى زي (الخروف) رابع يوم في العيد...ما فاضل فيه شيء غير (الكمونية). < الكمونية رابع يوم في العيد ...الجنبك ما بتدي. < لكن اول يوم زول بمشي عليها مافي...تقعد في التلاجة زيها وزي (الفول). < زولنا الدخل فيه قندران بعد (41) يوم ...قام يتنفض ...زي اللاعب لمن تدخل عليه النقالة. < قلنا ليه يا زول خير ...الحاصل شنو؟....مالك؟...القندران دا لقاك وين؟. < الزول قال لينا : والله انا ما غايظني (القندران)...غايظني التلاتة رغيفات بقن بجنيه. < اخير القندران. < يعني (21) رغيفة يعمّرن للزول. < يعرسن ليه عديل كدا. < انتوا ما لاحظتو حاجة. < الكهربة مرات بتقطع وتجي. < طيب ما تقطع وما تجي ...(العبقرية) في دي وين؟. < انت مالك عاوز (تتعبقر) في اي حتة ...الموضوع دا عادي ...ما تفلسفو لينا. < ما فيها عبقرية لكن قطعة الكهربة دي ما ساكت...ما طبيعية. < تفتكر من شنو؟. < من قون بشه. < حدث (التماس) بين ضفر وباسكال في القون ...عشان كدا ...باسكال قدموه للنص (قالوا ليه انت تلعب جوار هيثم مصطفى شوية)...وضفر طلعوه من التشكيلة. < بالمناسبة (ضفر) في الكنبة قالوا ماسك (البارد). < والباشا (الشنكارات)...الكلام دا تاني ما بكرروا ليكم. < وسعيد السعودي بحول رصيد في الكنبة ...شغال (اسكراتشات) ساكت. < انتوا الحضري بكورك كدا ليه في (باسكال)؟. < باسكال دا يتيم. < باسكال مسكين من الكواريك بقى زي (نجم الدين)...زي الموظف اخر الشهر. < البسوى باسكال في (نجم الدين) يلقى من الحضري. < زمان ...جابوا لينا (ناظر مدرسة). < ناظر مدرسة ...النوع البحوم بين الفصول في (فسحة الفطور). < اليوم كلو واقف في باب المدرسة. < ناظر صعب. < ناظر المدرسة دا ...اول حصة دخل لينا في الفصل ...قال لينا شوفوا يا اولاد ..انا اهم شيء عندي في الطالب (شاي المغرب). < قلنا ليه يا استاذ الدخل (شاي المغرب) في المقرر شنو؟. < دي مدرسة وإلا حفلة شاي. < قال لينا ...بس بقول ليكم كدا ..عشان تبقوا عارفين ...انا ما بحب اللخبطة ..حاجاتي واضحة ..ومن اول حصة بوريكم نظامي. < اهم شيء عندي (شاي المغرب). < قلنا في سرنا ...والله (نظامك) دا زي النظام (الفرنكوسي). < عارفين النظام (الفرنكوسي) دا شنو؟. < انا ما عارفو...لكن يتخيّل لي كدا ...النظام دا زي فيصل العجب لمن يقوم يسخن ...ويدخل ضفر. < ضفر في الكنبة ماسك (الشاي). < هسع في علاقة بين دي ...ودي. < زي واحد كدا..مشى ليه على (جزار) ما شاءالله عليه...بخش جزارتو دفعة ..دفعة. < النوع البدخل الجزارة بالضرا. < الجزار واقف ليك قدام العجل المعلق ...زي (الاستوبر) لمن يكون عاوز يشوت ضربة المرمي. < زمن الحارس بجهز للاستوبر (الكورة) وبجري يقيف تحت العراضة. < زمان ما كان في حارس مرمي بشوت ليه كورة...بس بصلحها. < هسع حراس الزمن دا جابوا ليهم (فلهمة). < حاجة روعة ...تشروح الروح...جزار ...جزار ..ما في اي كلام. < ما حصل يوم دخل ليه جك فول في بيتو. < جزار يعني جزار. < زولكم مشى للجزار (الضخم) دا...وقال ليه عليك الله نزل لي (الفخدة) دي. < الجزار اتكيّف ...سنونو ...نزلن قدامو في التربيزة ..جبد ليك (الفخدة) من فوق ..فيها على الاقل (21) كيلو. < صاحبكم قال ليه ...عليك الله اوزن لي منها ربع كيلو ...وصلحو. < الجزار عاين ليه كدا ..وقال ليه ...عليك الله (ربع الكيلو) حقك دا ...ما كان ممكن تطلبو بدون ما تقول لي نزل (الفخدة) دي. < عاوز ليك (ربع كيلو) وما بتخجل كمان ...منزل ليك (فخدة). < انت مالك يا ود الناس عاوز تبقى لي زي (العريس) القال بجيب الشيلة 12 ..12....قطعة ..قطعة قبل (العرس)...والـ (11) قطعة التانية بجيبها بالاقساط بعد الزواج بعد عمر طويل ان شاءالله. < احكي ليكم حاجة ...(انتوا بس ما تضايقو). < اصبروا ...العمود دا موش عمودي ...اكتب فيه الحاجة البتريحني. < مالكم انتوا؟. < لو ما عاجبكم الكلام دا اقلبوا الصفحة ...ما تقعدوا تنظروا لي ساكت. < قالوا ليك (مريخابي) ...بدخل مباريات المريخ. < بدخل اول زول للاستاد (مع ستات الشاي). < زولكم يقعد ...واول ما تجي الدقيقة (41) من الشوط التاني بسأل الزول القاعد جنبو ..ويقول ليه : اسمع كلتشي لابس رقم كم؟. < بقول ليه لابس رقم (9)...الزول النعسان داك ...شفتو ...دا كلتشي. < من يقولوا ليه كدا ...نفسو يبرد. < كل مباراة للمريخ ينتظر الدقيقة (41) من الشوط التاني عشان يسأل الزول القاعد جنبو عن (كلتشي). < ناس الاستاد حفظوه حفظ. < يوم في واحد كان قافلة معاه ...قال ليه اسمع انت يا ابوالشباب ..من عام 2010 بتسأل عن كلتشي ..انت عاوز بيه شنو؟. < قال ليه : ابدا ...عاوز منو اجار الشقة. < طيب ليه بتنتظر الدقيقة (41) من الشوط التاني وبتسأل منو؟...ليه بتسأل منو في الدقيقة (41) من الشوط التاني بالذات. < قال ليه : ابدا ...اصلى الدقائق السابقة من عمر المباراة بكون بفتش ليه براي ...لمن ما القاه للدقيقة (86) من عمر المباراة بسأل منو الزول القاعد جنبي....بقول ألحق نفسي قبل المباراة ما تنتهي. < ودا دلالة يا جماعة على انو كلتشي بكون المباراة كلها بكون (مختفى). < تقول مطلوب (شيكات). < غايتو يا جماعة مباراة القمة ...عملت جنس عمائل في المريخ. < اول حاجة الحضري صرفو النظر عنو ...وعمل فيها عندو (جيوب انفية). < يا الحضري جيوب انفية بعد العمر دا. < انت قايل نفسك صغير. < اذا انت بتجيك (جيوب انفية)...اكرم الهادي سليم بتجيه شنو؟. < الباشا ..طلع طلوع نهائي من تشكيلة المريخ. < شفتوا البشتنة الحصلت في المريخ دي كيف؟. < ضفر ابعد ...وبقى يظهر من حين الي حين في الكنبة. < اما سعيد السعودي ...في الكنبة بقى ما بظهر. < باسكال ...شالوه من الدفاع ...وقدموه الي الوسط. < امير كمال ...رجعوه من الوسط الي الدفاع. < عليكم الله دا فريق وإلا بيت عزابة الملخبط دا. < لخبطة شديدة. < يعني الهلال لمن يقابل المريخ في كأس السودان ...ممكن محمد كمال يرجع للمريخ ...وكلتشي يلعب (استوبر)...وضفر يبقى رأس حربة. < عندي احساس بعد مباراة القمة في كأس السودان ...ترجعوا عبدالاله بشرى وعبدالمجيد جعفر وعاطف القوز ذاتو. < شكلكم كدا ...ح تعملوها. < ملحوظة : عاوزين الحضري لنهائي الكأس. هوامش < اللوردات خلاص بيح. < يا غريب يلا لي بلدك. < بلا لوردات بلا لخمة معاكم. < شابكننا اللوردات ...اللوردات ...ما شفنا ليهم اي حاجة غير (كلام الجرايد). < الغريبة مع كلام جرايدهم دا ...قالوا ما بقرأوا جرايد. < انتوا ما بتقرأوا جرايد ...لكن بتكتبوها. < قال شنو؟. < قالوا مول تجاري (ضخم). < على طريقة اغنية عقد الجلاد حاجة آمنة ...بنقول ليهم وينو البصل وينو اللحم. < قالوا شنو؟. < قالوا ح يحولوا نادي المريخ الي (شركة مساهمة). < دل. < دللل. < عليك امان الله (سهم) في الشركة دي ما شفناهو. < اتصبري ..اتصبري. جاهلك شكى وجاهلك بكى وفى بيتك المرق اتكى والشيء البحير ومابحير مابيه يا حاجة الزكاة ... < قالوا شنو ح يعملوا ليهم نادي عائلي. يا حاجة ناس المويه جوك أصلو الشهر روح جرى يا حاجة آمنة اصبرى < قالوا شنو؟. < قالوا ح يعملوا مدينة طبيه. < مدينة طبية ...والسيد عصام الحضري ...عملية (الجيوب الانفيه) بعملها في القاهرة. < وينو البصل وينو اللحم؟. < غايتو انا عمري ما شفت لي (لوردات) بكضبوا زي الكضب دا. < والله يا حليل ازهري وداعة الله ...وعصام الحاج ...كانوا ناس واضحين..ودغريين. < دكان ما قالوا بعملوه. هبشتى جاى فتشتى جاى كان تلقى سكر بس محال باقى الرطيل الفى الكرت يا حاجة سفوهوا العيال يا حليل زمان وسنين زمان يا حاجة لو تذكرى ... يمه < الشيء المحيرني ...اللوردات ديل فشلوا في كأس الظفرة. < الكاس البعملوه من شوية وشويات داك ما قدروا عليه. < اللوردات في مباراة القمة اتذلوا جنس مذلة. < انضربوا بثلاثية بويّه خطيرة. < طيب انتوا (لوردات) على شنو؟. < في اي حاجة (فشل كبير). < لوردات شنو انتوا؟. حبة عدس ما بسوى شيء وينو البصل وينو اللحم حبة عجين ما بسوى شيء وينو الدقيق وينو الفحم من جاى لجاى هبشتى جاى فتشتى جاى كان تلقى شيء لازمك كتير شان تقدرى < يا ناس المريخ ...نحن بنقول ليكم زي ما قال عبدالوهاب هلاوي في (حاجة امنة). < اتصبري. < اتصبري. < قطيعة في (اللوردات). < يلا تاني ما عاوزين نشوف لينا اي (لورد) هنا. < ولا لورد. < غشيتوا الناس. < ما شفنا منكم غير قروش الكهربة الدفعتوها لنادي المريخ المقطوعة كهربتو. < تاني ما شفنا ليكم اي شيء. < الحضري الي الان بسوي في الحاجة الفي رأسو. < في لوردات بعمل فيها (الحضري) كدا. < بكرة ان شاءالله نحدثكم عن قصة الـ (DHL ). < خلوا باقى الكلام الي بكرة ان شاءالله. < .......... < عاجل : بلة جابر الـ (DHL) فيه زي الجواب البي اليد.[/SIZE]وإن طال السفر - محمد عبد الماجد صحيفة قوون


تعليق واحد