الشكوى في (بويا) احسن ليكم منها يا ناس الاهلي والمريخ التركيز في (الكيبل)



شارك الموضوع :

الشكوى في (بويا) احسن ليكم منها يا ناس الاهلي والمريخ التركيز في (الكيبل)

< اخر الزمن يا ناس. < اقصد اخر الدوري بقت تجيب ليها (اهداف عكسية). < ناس كلتشي مروتهم انتهت. < الفيهم اتعرفت. < الخدمة ..بقت خدمة (اهداف عكسية). < الهدف يجيك ساكت كدا ..بدون أي تعب. < الظاهر كدا من هدف (نادر خليفة) ان المريخاب قنعوا من ناس اوليفيه ومحمد موسى ..عشان كدا اقوان المريخ بقوا يجبوها ناس نادر خليفة. < هسع دا هجومكم مع الناس ..اوليفيه ومحمد موسى ..عليكم الله ديل في (بنطون) بوقفهم. < ديل زي الشباب البقولوا ليهم ..انتوا امشوا قدامنا ..بنجي لاحقنكم. < يتخيّل لي ...ما عندهم أي فكرة عن الكورة ..وبتوقع ..(اوليفيه) دا ..يكون بدخل الملعب بـ (بخرة). < لو فتشوه ..بكون شايل ليه (بخرة). < بخرة مكتوب فيها ...يتصرف كيف لمن تصلو كورة معكوسة...ويعمل شنو لمن يكون في خط 6. < كورة (اوليفيه) دي في (المدرجات) ما بتقعدو. < يمين تجونا بالناس القصار ديل في الدمازين ...راجي وامير واوليفيه وبلة وباسكال وغاندي (6) اهداف ما تمرقكم مننا. < بعدين محمد موسى دا القال ليه انت مهاجم منو؟. < منو ...الغشاهو. < عارفين محمد موسى دا لو كان في الهلال ..كان عملنا منو شنو؟. < كنا حاولنا معاه ..يبقى (مدلك الفريق). < غير كدا ..ما شايف ليه حاجة. < أما (ضفر)..فقد ثبت لنا في مباراة الامس امام الاهلي عطبرة ...انو في الكنبة لو قعد مفروض ..يقعد رافع ايديه ..ومقبل عكس الملعب. < ضفر دا شنو هو؟. < دا بعمل في الدقيقة (390) مخالفة ..الحكم بحسب فيهن (14)...وبطارش الباقيات. < علاءالدين يوسف كورتو الكانت في الهلال ..دفنها قبلها ..ورجع للمريخ. < يمين لو ما هيثم مصطفى يا علاء الدين يوسف ..ما كنت عرفتك. < دي كورة شنو البتعملوا فيها دي. < عشان كدا ..فريق زي دا ...ما اظن يسجل ليه قون. < القون ذاتو إلا يسجلوه ليه. < ناس باسكال ..وضفر ...وبلة جابر. < ديل. < ديل بقوا ولا بتعبوا نفسهم...(القون بجي ليهم عكسي). < عليكم الله في (كسل) اكتر من كدا. < طيب تعبانين لي شنو؟. < شايلين (هيثمنا) ليه؟. < الاهداف العكسية دي ما عاوزة ليها (هيثم)...الموضوع دا ناس (ضفر) ممكن يقوموا بيه. < جايبين جهاز فني بالشي الفلاني ..عشان شنو؟. < والهدف بتجيبوا (عكسي). < الالماني دا ..مع اهدافكم العكسية دي ..لا محتاجين ليه ولا حاجة. < خسارة (برمودة) ساكت. < بتتمرنوا في (الاساس) ليه؟. < ما في داعي للتعب دا. < اقعدوا في مكاتبكم ...الموضوع بتحسم ..والاهداف بتجي. < ما في داعي للمحترفين والاجانب. < ما في داعي تجنسوا. < ناس نادر ديل ..لا عاوزين تجنيس ..لا عاوزين تدريب اجنبي. < براهم بقوموا بالواجب واكتر. < طريقتكم دي لو لقاها (النسور)..بشيل بيها الدوري الممتاز. < انتوا ما شفتوا (الخبط) كيف في مدني. < قون ..ينطح قون. < اقوان لا فيها قون عكسي ..لا فيها قون جاء من مخالفة وهمية ..لا فيها قون صدفة. < كلها اقوان ملعوبة ..ومدروسة...وجميلة. < اقوان (الكيبل) ما ثبتها. < قدر ما وضعوا ليها (عراقيل) قدامها ..ما وقفت. < ختوا ليها (17) لورد و(3) مساعدين للرئيس ..ما وقفت. < الهلال يا هو الهلال. < بي البرير ..بي صلاح ادريس ..بي طه علي البشير. < الهلال هو الهلال. < ما بنقص سنتمتر. < لكن دا كلو كوم ..والشكوى (المفبركة) التى تقدم بها اهلي مدني في بويا كوم تاني. < انتوا يا ناس الاهلي بتشتكوا بالوكالة عن المريخ. < خلاص غلبتكم الحكاية دي. < بويا ..ما قدرتوا تثبتوه إلا بي شكوى. < الحضري يشكي من بويا ..قال عندو (جيوب انفية). < والاهلي يشكي من بويا ..قال كسر زكريا. < والمريخاب ..لو شافوا (بويا) من بعيد ..بخلوا ليه الشارع. < بسيبوا ليه (الدرب). < بويا دا (الكيبل) ما قدر عليه. < الشيء مضحك..وبقطع المصارين في (الشكوى) التى تقدم بها فريق الاهلي مدنى في لاعب الهلال عبداللطيف بويا حجتهم عدم ايقافه (4) مباريات بسبب مخالفة ارتكبها (بويا) ضد لاعب الاهلي شندي زكريا الذي اصيب بسبب هذه المخالفة بكسر في ساقه. < والله يا ناس الاهلي مدني مفروض يبدأوا معاكم من (أ) (ب) (ت) (ث). < ديل عندهم (امية) رياضية عديل كدا. < معقولة في تخلف (اداري) لهذا الحد. < في توابع لهذه الدرجة. < يعطلوا (الكيبل)..وقت ما يجيب حاجة ..يقوموا يشتكوا. < قابلتكم قوة عين اكتر من كدا. < خلاص قنعتوا من (الكيبل) يعني. < يا ربي (بويا) دا عاوزين يعاقبوا الهلال بسببه بي ياتو قانون؟. < إلا تشوفوا ليكم لائحة صالون حلاقة ...أو قائمة (كاشير)..وتخصموا عن طريقها (3) نقاط من الهلال. < اللورد الحرشكم دا يا ناس الاهلي مدني ...الظاهر كدا إلى الان في مرحلة الاساس (ادارة). < دا طلع ما فاهم يا حاجة. < لكن المشكلة ما فيكم ..المشكلة في اتحادنا (العائم) دا. < اتحادنا العام لكرة القدم السوداني ..بشعرني في كثير من الاحيان انو (المكتب التنفيذي لنادي المريخ). < ناس معتصم جعفر ومجدي واسامة ديل ..بشعر أن المدورهم صديق على صالح ومصطفى توفيق. < كأنهم شغالين في النادي..بسافروا بي طايرة واحدة ..وبرجعوا بي طيارة واحدة. < وبعدين يجوا يحاسبوا الشعب السوداني على التذاكر التى كانت عبر شركة النقل التى يمتلكونها. < يعني المنتخب السوداني ..ممكن يسافر ..ويشارك في تصفيات الامم الافريقية وتصفيات كأس العالم ..ونخسر ..ونتهزم ..ويستفيد فقط مجدي واسامة بقروش الحجز ...وحق التذاكر. < قلبوه (وكالة سفر). < وكالة البلح دي ..نحن قنعنا من خير فيها. < منتخبنا ..وانديتنا ما في زول بستفيد من مشاركاتهم الافريقية غير مجدي شمس الدين واسامة عطا المنان. < المنتخب (بطير)...ومجدي واسامة بحاسبونا على هذا (الطيران). < فهمتوا حاجة. < يا جماعة الفهم ..فهم ..والما فهم بي طريقتو. < المال السائب ..بعلمك تعمل ليك (وكالة سفر). < هي بقت على الاتحاد العام يعني. < البلد كلها شغالة بالنظرية دي. < البلد كلها تخسر ..إلا مجدي واسامة. < يا حليل كمال شداد ..ناس الاتحاد العام ..قلبوا الاكاديمية ..(مول)..واصبحوا يديروا اعمالهم التجارية والخاصة من الخرطوم 2. < بي كهربة الحكومة. < كمال شداد ...امور الكورة والشئون الرياضية كان بديرها من مكتب (مروحة) ما شغالة فيه. < تعال هسع شوف ..مكاتب فخمة ..ومكيفات عجيبة ...والنشاط الذي يتم فيها نشاط تجاري. < نشاط خاص...ما عندو أي علاقة بالكورة. < عشان كدا ..ممكن مساوي يشارك مع المنتخب وهو موقوف ونفقد فرصة المنافسة في تصفيات الوصول إلى كأس العالم ..لأن اتحادنا (العام)..شغال شغل (خاص). < وممكن تقرير علاءالدين يوسف ...الذي نال كرت احمر ..بعد مخالفة خطيرة ..يمر مرار الكرام في الاتحاد العام. < والسبب في ذلك أن الاتحاد (العام) ..مشغول بـ (الخاص)...والسفر في طائرة واحدة وخاصة مع رئيس نادي المريخ. < عادي مباراة المريخ مع هلال كادوقلي في كادوقلي العام الماضي تحول إلى (كوستي). < وعادي جدًا ..الهلال يلعب عصرًا في مدنى. < ويقولوا (الكيبل) ضرب. < عادي ..يعاقبوا الامل ويلعب (6) مباريات خارج ارضه..عشان عصام الحضري جاتوا (جيوب انفيه). < ويغرموا الهلال وهو منتصر ...عشان خاطر المريخ. < عادي يا ابوالشباب. < عادي من الاول ..الحضري (الاجنبي) يشارك مع المريخ كـ (سوداني). < موش بيلعب في بطولة (سوداني). < ورمزي صالح (الفلسطيني)...يشارك بحجة جامعة الدول العربية التى ما شفنا منها حاجة غير الشجب والادانة والاستنكار. < عادي. < نرجع للشكوى ...ونشوف. < المضحك في شكوى الاهلي مدنى بعد فضيحة (الكيبل)...إن اللاعب بويا لم يتوقف بعد تلك المباراة موضع الشكوى مباراة واحدة ..ولم ينل في الاساس (كرت احمر) مع ذلك قالت الشكوى انه كان يفترض أن يتوقف (4) مباريات. < لاعب مباراة واحدة ما اتوقف ....يشتكوه في عدم التوقف (4) مباريات..عليكم الله (الشكوى) دي ما بتضحك. < المادة المادة (89) الفقرة (4) التى استند عليها فريق الاهلي مدنى في شكواه ..مادة تتعلق قبل خشونة المخالفة وخطورتها على أن يكون اللاعب الذي قام بالمخالفة نال (كرت احمر). < بويا في الاساس لم ينل (كرت احمر)..فكيف توقع عليه عقوبة اضافية ..وهو في الاساس ..عقوبة اساسية لم يتعرض لها. < عليكم الله (الشكوى) دي ما زي (الكبيل). < أو كما قال احد اعضاء الهلال كما جاء في موقع (الزاوية) امس (فى أول رد فعل على ما يثار عن تقديم نادى اهلى مدنى بشكوى ضد مشاركة لاعب الهلال عبداللطيف بوى قال مصدر مسؤول بنادى الهلال للزاوية« لم نتلق معلومات بشكل رسمى عن الشكوى ولكن تقديرنا للموقف أنها محاولة ذكية لخلق موازنات فقط« وفسر المصدر بأن هناك مخطط بين الإتحاد المحلى فى مدنى وبعض الشخصيات فى إتحاد الكرة لإثارة بلبلة بهذه الشكوى حتى تكون موازية لشكوى أهلى شندى ضد المريخ ومصيرها الرفض طبعاً..وأكد المصدر الهلالى الذى فضل حجب اسمه أن المخطط مكشوف لديهم رغم قناعتنا بأن شكوى أهلى شندى صحيحة وحيثياتها قوية). < لا مقارنة بين شكوى الاهلي شندي في مشاركة اللاعب علاءالدين يوسف الذي نال (الكرت الاحمر)..وشكوى الاهلي مدني في اللاعب عبداللطيف بويا الذي لم ينل كرت احمر. < وهو كما قال المصدر الهلالي شكوى فقط من اجل الموازنات ومن اجل تجميل وجه الاتحاد العام لكرة القدم السوداني ..الذي سمح لاتحاد مدني بتحويل المباراة لتلعب عصرًا..فرد الاتحاد مدني عبر الاهلي مدنى التحية بأحسن منها عندما قدم شكوى في مشاركة عبداللطيف بويا. < اجزم أن رسوم الشكوى دفعها (لورد)..زي (الكيبل) تماماً. < شكوى الاهلي مدنى لو كانت في مشجع هلالي (شرب الشاي بي معلقة سكر واحدة) في مباراة الهلال والاهلي مدنى والتى خسرها بسادسية لكانت الشكوى (منطقية) اكثر من هذه الشكوى التى رسم وخطط لها. < ولو أن الشكوى كانت في (معلق المباراة) الذي علق على المباراة في قناة النيلين ..كان تكون هذه الشكوى (مقبولة). < لكن الشكوى كانت في (بويا) الذي لم يوقف اصلاً. < بويا ..الطفش عصام الحضري. < إن شكوى الاهلي مدنى في بويا ..اشبه بالتيمم في حضور الماء الطيب والصالح للوضوء. < شكوتكم دي بتذكرني بالزول البحجز في بص (الدقوني)..ويمشي عشان يستغل خطوط الطيران القطرية. < بص (الدقوني) دا بص في (بقروسي) بنقل الركاب من بقروسي إلى شندي والمتمة. < بتعرفوا (بقروسي). < الما بعرف (بقروسي) نص عمرو ضايع. < شكوتكم دي زي الزول البمشي مطعم ..يطلب ليه طلب فول ..ويقعد ينتظر طبق (البيتزا). < يا ناس الاهلي مدني انتوا لو دا حالكم ...(النزول) شوية عليكم ..مفروض ينزلوكم درجة رابعة. < معطلين (الكيبل) ...وكمان بتشتكوا. < يلا ..بلا لخمة معاكم. < تعطلوا (الكيبل)...وكمان تشتكوا. < ملحوظة : عشنا وشفنا. هوامش < نجم المباراة (نادر خليفة) وليس رمضان عجب. < رمضان عجب عمل شنو؟. < عينكم للفيل ...وتكرموا في ضلو. < تحبوا اللف والدوران ساكت. < الامور واضحة ..وظاهرة. < محمد موسى ...دا تفتكروا بقعد لي ديسمبر. < معقولة تستحملوه تاني (30) يوم. < والله أنا صبر زي صبركم دا يا مريخاب اصلو ما شفتو. < ديل صبروا على جمال الوالي (12) سنة. < ما يصبروا على محمد موسى. < ضفر بي حالتو دي لو مشى الدمازين ..تاني ما برجع ليكم يا مريخاب. < بقعد قبلو. < الزول دا عبارة عن علبة مخالفات مقفولة. < دا هدية من السما. < انصحكم تتخلصو منو قبل الدمازين. < غايتو (6) الدمازين ..ضمناها. < فريقكم دا مفروض يكون مهدد مع الموردة والنسور والنيل والاهلي مدني. < لكن نحن نعمل شنو مع الاهداف العكسية دي. < فريقك ..لو كان عسل ..بجيب ليك قون عكسي. < ...... < عاجل : (3) رغيفات بي جنيه ..الهدف العكسي بي كم؟.[/SIZE]وإن طال السفر - محمد عبد الماجد صحيفة قوون

شارك الموضوع :

1 التعليقات

      1. 1

        [SIZE=7]تقصد الهدف العكسى بكم . هدف الشغيل ام هدف نادر خليفة[/SIZE]

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *

    This site uses Akismet to reduce spam. Learn how your comment data is processed.