بابكر سلك
ﺻﻌﻠﻮﻙ ﺍﻟﻤﺤﻄﺔ
* المحطات المليانة قطاطى قطاطى ناس السكة حديد المميزة.
* قطاطى الطوب والأسمنت.
* عندهم ثقافة عالية جداً فى امور القطر.
* وبعرفو المحولجى…وبعرفوا الصنفور وبعرفوا جرس المحطة.
* وده عندهم ليهو احترام خاص ومحبة خاصة.
* حتى ساعة السكة حديد الكانت معلقة فى اى محطة.
* بحبوها جداً..وبثقوا فيها شديد.
* وللترولى عندهم قصص كتيرة.
* الترولى دة عبارة عن عربة سكة حديد صغيرة.
* ما فيها مكنة.
* بسوقوها زى المركب..بالتجديف.
* وبستعملوها فى صيانة خط السكة حديد البكون بايظ قريب للمحطة.
* ولما يصلوا محل العطل بقلبوها بالجمبة.
* طبعاً بكونوا شايلين فيها كل مايحتاجون اليه من ادوات الصيانة.
* فلنكات وخوابير وشواكيش ومفاتيح ومسامير.
* ما بشيلوا فيها مواسير.
* البلد الوكت داك ما بتعرف المواسير.
* لكن عند اهل القطر.
* أشهر حاجة صعلوك المحطة.
* قاطرة بخارية صغيرة.
* تلف داخل المحطة لتجمع عربات القطار.
* ترصها كلها خلف بعضها البعض.
* وبعد ما يتأكد صعلوك المحطة من اكتمال عربات القطر.
* ولثقته فى انه لن يستطيع ان يقود القطر.
* يتنحى للقاطرة الكبيرة من القيادة.
* ويذهب بعيداً فى طرف المحطة.
* يتفرج فى القاطرة تجر القطار.
* يتفرج فى القاطرة تتحرك والعربات من خلفها تجرجر اذيال الطاعة.
* وتوووت القاطرة تطلق صافرة الرحيل.
* والعربات خلفها.
* يرموا التابلت..ويفتحوا الصنفور.
* وكك كرك..كك كرك..كك كرك.
* وصعلوك المحطة فى المحطة يتفرج.
* القصة دى كلها تذكرتها عقب مباراة الأمس وأنا اجتر عناويين الصحف الهلالية.
* تلك الصحف التى كتبت بالعريض.
* الهلال يعتلى الصدارة.
* لم يفتح عليها الله بعبارة مؤقتاً.
* وأصبح ابو الهل بفوزه على اهلى مدنى زى صعلوك المحطة.
* لملم لينا العربات وزاغ.
* وجات القاطرة الكبيرة لتواصل السفر.
* والعربات خلفها مطيعة منقادة دون ادنى احتجاج.
* ويظل روشا يقذف فى الصنفور.
* ويظل المريخ بطلاً.
* ويظل صعلوك المحطة أسماً فى عالم السكك الحديدية وفى دنيا محطات القطار الكبيرة.
* أسم لايستطيع انسان ان يغفله.
* ويميو صعلوك المحطة بوق(بورى كبيييييييير).
* أذا سمعتوا تقول ده قاطرة تستطيع ان تجر عربات الى جوهانسبيرج.
* ولما تشوفوا قاعد فى مكانو ويصفر بصوت عالى.
* وصوت ماكيناته يدوى تحتار.
* ضجيج بدون سفر.
* حكايتك حكاية يا صعلوك المحطة وقصتك قصة يا صعلوك المحطة.
* المهم.
* مباراة تكتيكية رائعة أداها أولادنا أمس.
* مستوى تحكيمى متواضع.
* وأشك فى ان احد رجال الخطوط نظره عال العال.
* ولكن سؤال يطرح نفسه.
* هل حرمت جائزة سودانى على هيثم مصطفى بقرار اعلام الهلال الذى أحتج على منح هيثم تلك الجائزة؟؟؟
* وهل سيتدنى مستوى سيدا لو لم يمنح الجائزة؟؟؟
* وهل سيفوز الهلال بالممتاز أذا حرموا هيثم من الجائزة؟؟؟
* وهل سيعود هيثم للهلال اذا حاربوه؟
* أيها الناس.
* حرب هيثم لن تجدى.
* لأن الحرب لو بتجدى.
* كان استطاعت تلك الحرب ان تبعد جمال عن المريخ.
* وكان استطاعت تلك الحرب ان تأتى بجوية ولو من دولة جارة للهلال.
* وكان استطاعت تلك الحرب ان تكلل صبر الأهلة تمنين سنة بالتسجيل فى لوح الشرف الأفريقى.
* أرمى التابلت يا روشا يا اخوى وافتح الصنفور.
* نحنا شفوت.
* بنعرف كيف نحمى نادينا.
* وكيف نحمى مجلسنا.
* وكيف نحمى لاعبنا.
* والأهم من ذلك.
* بنعرف كيف نشجع.
* زى ما حصل امس.
* ونجومية الأمس استحقتها الجماهير.
* الأولتراس ورابطة الثورات وتجمع الروابط والفريق الموسيقية ولجنة التعبئة.
* وبقية الجماهير التى لا تنتمى ألا لعبارة جماهير.
* فهل تتجرأ سودانى بأعلان فوز جماهير المريخ بها؟
* ولا الجائزة بتهاف لومة لائم.
* يا ناس الجائزة.
* ماتخافوا لومة لائم حتى تحقق الجائزة اهدافها.
* ماتخافوا من لومة لائم.
* لائم جعجاع سااااااااى.
* زى صعلوك المحطة.
* يكورك ويضرب فى البورى.
* وحدو يرص العربات.
* ويزح بعيد للقطر البعرف السفر.
* أيها الناس.
* أى مباراة متبقية هى مباراة بطولة.
* وأقل تقاعس مع أخطاء التحكيم الغير مقصودة حسب وصفهم لها.
* بودينا فى داهية.
* لأن نفس التحكيم يمكن ان يخطئ اخطاء غير مقصودة تصب فى صالح الطرف الآخر.
* عشان كدة.
* حتى الحصاحيصا.
* نمشى كلنا.
* بالبصات والحافلات والمواصلات.
* بالعربات الخاصة.
* بالركشات نتشارك امجاد.
* بالقطر لو شغال.
* روشا برمى التابلت وبفتح الصنفور المهم نمشى.
* وما أجمل الحصاحيصا.
* وما اجملها اذا تزينت بالشفوت.
* لأن شفوت الحصاحيصا والكاملين والمسيد والبشاقرة عن بكرة ابيها.
* كلهم فى انتظار وصولنا.
* ولنبدأ الأحتفال من الحصاحيصا.
* لنعلن الناس ..منو القطار.
* ومنو صعلوك المحطة.
* وأرمى التابلت.
* أها.
* نجى لى شمارات والى الخرتوم.
* أكان شفت يا والينا.
* طلب الفول بقى زى طلب أيد بت زول.
* لما نجى نطلب واحد فول.
* نرجف من راسنا لى كرعينا يا والينا.
* ونتلعثم فى الكلام.
* وطبعاً ما تفوتك القشرة.
* معقولة زول ماشى يطلب فول يمشى مبشتن؟ [B]سلك كهربا[/B]
*ننساك كيف وطلب الفول بقى أغلى من واحد زول.
واللللللللللللللللللى لقاء
سللللللللللللللللللللللك
[/SIZE]
في السلك – بابكر سلك
