رأي ومقالات
زاهر بخيت الفكي : اتمرد علينا الفول لما الشعب حباهو
كم نادينا صحنا بس صوتنا ما مسموع
محروقاتنا زادوها والدعم صار مرفوع
واطاتنا صبحت بور وادّمر المشروع
*****
الراتب ما بكفينا حاجاتنا طارت فوق
حالتنا بائسة صعيبة سيطرعلينا السوق
تخش جيبك ملان تمرق تقول مسروق
تتم شهرك ديون كاسات من مذلة تضوق
*****
شوف المواطن والجمرة كيف واطيها
سارح ديمة شارد من ورطة واقع فيها
يصبح جاري يلهث والحبة ما لاقيها
نار السوق فيه تحرق ما لاقي البطفيها
*****
دولار السجم مالو لعبك معانا خطير
دمرت التجارة خليت جنيهنا صغير
كان وزنوا الدهب مقامو فينا كبير
بكبر تاني زي أول إن شاء الله إنت تطير
*****
أبوالأفوال حبيبنا وين يا اخوانا نلقاهو
نسأل عليهو الغالي أصلاً ما نسيناهو
اتمرد علينا الفول لما الشعب حباهو
يا ربي كان مدعوم ومنو الدعم شلناهو؟
جايز يكون مدعوم ضمن محروقاتنا
وجبة أصيلة أصبح تكمل بيهو وجباتنا
بقينا الليلة ندفع فيهو آلاف من جنيهاتنا
مولاي يا كريم ارحمنا خفف من معاناتنا
******
لوكوهو الصبر أهلي وعشيرتي وناسي
الرأس ديمة مشغول مليان هموم ومآسي
صعبت علينا حياتنا حالنا أصبح قاسي
ضلت مراكبنا عديل ما لقينا ليها مراسي
******
ما توطيهو رأسك خليهو يوت مرفوع
ما تخاف من فقر يا خويا أو من جوع
عارفين برانا العيشة الباقية لحسة كوع
عند الوالي بُشرانا نصبر كمان أُسبوع
صحيفة الجريدة
ت.إ[/JUSTIFY]
