العجب اتنين ونص في الاتحاد يعني وارغو الساعة اتنين في المطار

< في اول ايام التسجيلات ناس المريخ استعجلوا (سجلوا من طرف) ..نحن ذاتو مسكتنا الشفقة زي (ابوالشهيق). < العريس البنزل في اول اغنية في حفلتو...اعرفو طوالي دا عريس فرحان ساكت. < العريس التقيل بنزل في اخر فاصل...يبشر ويرجع. < ناس المريخ زي (العريس) الاول البنزل في عرسو من اول اغنية. < يا ربي البلد دي حاصل فيها شنو؟. < كوبري شمبات مقفول ..قالوا فيه حادث. < الغريبة لو حصل حادث في كوبري المنشية ...بقوم كوبري شمبات يقفل. < العلاقة وطيدة بين (كبارينا) دي. < حادث في كوبري الفتيحاب ..عادي جدا يقفل ليك كوبري المك نمر. < قدر ما تسأل وتقول انتوا الليلة البلد فيها شنو؟..يقولوا ليك كوبري شمبات فيه حادث. < مشاكل البلد دي وقضاياها كلها بختصروها ليك في كوبري شمبات. < يمكن عشان فصاحة الناس كلها في (الكباري). < فلاحتهم بس في كوبري شمبات. < اي واحد تلقى طالع الصباح ..يشتم ليك ويلعن في (كوبري شمبات). < البشاكلو سيد البيت ..بشتم كوبري شمبات. < البخصمو من مرتبو يوم ..بشتم كوبري شمبات. < الزعلان من زوجتو ..بشتم كوبري شمبات. < العندو رأي في الحكومة ...بقولوا في (كوبري شمبات). < طبعا الكلام دا ما عندو علاقة بالتسجيلات ...ولا عندو علاقة بـ (ابو الشهيق). < ولا عندو اي علاقة بي اي موضوع تاني ..(ما تقعدوا تشرعوا من رأسكم). < الموضوع صدفة ساكت. < ناس المريخ دائما مستعجلين. الضيق كاتلهم ...جابوا (مالك وباسيرو) سجلوهم ليك من الاسبوع الاول في التسجيلات. < قلبنا طار. < وإلا نحن عملنا فيها قلبنا طار ..عشان ناس المريخ يطمئنوا ..وناس الهلال يتحركوا شوية...(السيستم هسع بقفل). < لجنة تسيير الهلال ما اشتغلوا بالموضوع كتير ...اتاريهم عندهم رأي تاني...نحن كنا فاكرينهم عدم خبرة منهم. < قلنا الحركات البعملوا فيها ناس الهلال دي (عدم خبرة) ساكت. < وإلا يمكن قلة قروش...(قلنا خلاص جيبوا لينا العجب الباقى بنتموا غلاط). < سجّلوا لينا العجب وابعدوا بعيد. < صباع المعجون دا يا سلك كنا قلبناه (مصنع حديد وصلب). < سجّلوه وزحوا بس. < رمينا للمريخاب (تراوري) وشغلناهم بيه. < الفرحة عاوزة تشقهم. < ديل ناس بسيطين شديد ..تراوري فرحوا بيه. < باسيرو ومالك ديل (فائض محترفين في الاهلي شندي). < الاهلي شندي البلعب في الكونفدرالية ..قنع منهم. < صلاح ادريس عرف ليك الفائدة في الدعيع ...باسيرو ومالك ديل (خدعة) ساكت. < قالوا مالك عندو عيب واحد ..بجلي الكورة وبصرج وبسرح وما بتمرن ومشغول بي اهلو في نيجيريا..وبعمل مخالفات في المنقطة المحرمة ..ونفسو قصير وكروتو كتيرة ..وتقيل شوية. < قلنا ليهم لكن دا ما عيب واحد ...دي كمية من العيوب...دا قطر عيوب عديل كدا. < العيوب دي لو نصها في (ضفر) بتقعدو في البيت ..وبشيل فكرة الكورة نهائي من رأسو. < عيوب مالك دا لو في لاعب سوداني ..طوالي كنا بنقلبو (صهريج). < والله يا ناس الهلال طلعتوا شفوت ...(في لجنة التسيير) طلعتوا ما ساهلين. < طلعوا مفتحين. < انا اول مرة اشوف لي (لجنة تسيير) مفتحة كدا. < شركوا ليكم بي (مالك). < المريخاب (الضايقين) ديل ..خطفوا مالك وسجلوه. < الغريبة فرحانين بالموضوع دا. < اعلام الهلال قال (مالك) دا احسن مدافع في الدوري السوداني...دا احسن لاعب ..افضل زول. < والمريخاب صدقوا. < دردقنا ليهم (باسيرو). < قلنا ليهم باسيرو دا احسن محترف في البلد...ما فيه اي كلمة. < باسيرو لاعب كويس ..بس عندو مشكلة واحدة ..تقيل شديد ورأسو قوي..وما بقطع كورة ...وما بلتحم...وبلعب مباراة ويقيف مبارتين. < لكن يا ود الناس دي كمية من المشاكل ...دي ما مشكلة واحدة. < الحاجات دي لو ربعها في علاءالدين يوسف كان اعتزل قبل (5) سنوات...وعمل ليه (بقالة). < المريخ جاب محترفين من الاهلي شندي...والهلال بجيب في المحترفين من السويد ومن اسبانيا والنرويج. < غايتو السنة القادمة ...تمهيدي الكونفدرالية جاهو زول. < الموسم الجديد ..بطولة الاندية الافريقية ما عندكم ليها (رقبة). < المريخاب بعد ما اتورطوا في مالك وباسيرو..وكشفهم اتملأ بالاجانب ..ما عرفوا يصرفوا كيف؟. < بقوا يفاوضوا ساي. < رجعوا فاوضوا سكواها..وفاوضوا سادمبا ..وجابوا الاثيوبي شيمليسي...وفتحوا خط مع كلاتشي. < ديل عاوزين تسجلوهم وين؟. < إلا تسلفوا كشف (مريخ الفاشر)...وتتموا تسجيلاتكم في كشوفات (السلاطين). < الهلالاب (الشفوت)..بتاعين لجنة التسيير ديل طلعوا ما ساهلين ..فتحوا ليك في اخر (5) ايام من التسجيلات. < وارغو وصل ودخل البلد من صالة كبار الزوار. < ناس المريخ افتكروه وزير الشباب والرياضة النيجيري. < وارغو عمرو كلو في المريخ ..ما شاف صالة كبار الزوار ...وارغو جاء لابس شعار الهلال طوالي فتحوا ليه صالة كبار الزوار. < صاحبكم (اتخلع). < ما صدق. < وارغو وصل (فجرا)... والمدافع السيراليوني ديفيد سيمبو وصل نص النهار. < وقبل كم يوم وصل سيسه...وينتظر اللاعب الغاني رانسفورد اوزية. < وقبل ديل كان الهلال قد سجل سيدي بيه ..واللاعب المالي كوليبالي عمل ابداء رغبة. < مع الحاجات دي ..المريخاب شافوا ليك مالك وباسيرو ..بلة جابر بلة جابر. < ندموا على تسجيل ناس تراوري. < ترواري الكانوا فرحانين بيه ..بقوا يشفوه سبعة ...سبعة. < هسع احتمال يتم اعارة (تراوري) الي الاهلي عطبرة. < ويمكن باسيرو ذاتو يعيروه للخرطوم الوطني ...(الجماعة عاوزين ليهم خانات). < سجلوا في الايام الاولى من غير دراسة ..وبدون رؤية. < اي لاعب يكونوا عاوزين يسجلوه يقولوا ليك اوصى به كروجر. < معقولة كروجر دا اوصاكم تسجلوا (21) لاعب. < والله ناس المريخ لو عارفين الحاجات دي كلها بتحصل من (لجنة التسيير) كانوا اتريثوا ..ما كانوا اتمقلبوا المقلب دا كلو. < كانوا صبروا شوية. < ديل اشتغلوا (تسجيلات) على نار هادية ..شغلوا ليك المريخاب بي موضوع فيصل العجب. < العجب اتراجع عن الاعتزال. < ناس سلك فتحوا بيت البكا. < العجب دخل غرفة تسجيلات الهلال. < اسماعيل حسن القعدة غلبتو. < الكاردينال يتفق مع فيصل العجب ويدفع حافز تسجيله في الهلال. < مزمل ابوالقاسم ما عرف يعمل شنو؟. < رئيس الهلال يقول اعطينا الضوء الاخضر لاشرف الكاردينال. < مامون ابوشيبة نفسو مرقت من التسجيلات. < الهلال سيسجل فيصل العجب في زفة كبرى نهار الاحد. < طقوا الكواريك ..ودقوا الجرسة. < انقسامات في مجلس الهلال بسبب تسجيل فيصل العجب في الهلال. < استقالة علي قاقارين. < المريخاب انشغلوا بالمواضيع دي ...لمن ناس المريخ قاموا يوم الصباح لقوا ليك وارغو لابس شعار الهلال ودخل البلد من صالة كبار الزوار. < شغلوهم بي (العجب) بي جاي ...وجابوا (وارغو) بي غادي. < انتوا قايلين ناس المريخ ما اتهجموا ..ديل تسجيلاتهم بقوا يشفوه زي تسجيلات اذاعة وادي النيل في الستينات. < انتوا إلا يستغلوا معاكم بالنظرية دي. < هسع الخطة حقت التسجيلات القادمة ..تسجيلات يونيو طلعت من هسع. < قالوا ناس الهلال خطتهم في تسجيلات عاوزين يسجلوا (نجم الدين ابوحشيش). < يقولوا نجم الدين ابوحشيش ..ويتحركوا على احمد الباشا. < يا ناس المريخ ...لجنة تسييرنا دا ما لجنة تسيير نصاح..من هسع احسن عيدوا تسجيل احمد الباشا. < الزول دا لو جاءت تسجيلات يونيو القادمة ...ما برضى ليكم بي اقل من (5) مليارات. < ناس الهلال دفعوا فيه (5) مليارات. < احسن ليكم عيدوا تسجيلوا بي 2 مليار الان. < واضح انو المريخ السنة دي ما عنده قروش. < ظاهر في تسجيلاتهم. < سجلوا مالك وباسيرو وتراوري (انتقال حر). < ودا كلو عشان ما عندهم قدرة على مفاوضة الاندية. < اللاعب الاثيوبي قالوا اطلق سراحك براك من ناديك..وتعال بعد كدا بنسجلك. < عدم القرش ظاهر. < واضح ..ما عاوز ليه غلاط. < ملحوظة : موضوع الحضري دا شنو كمان؟. هوامش < تسجيلات الهلال الى الان ماشه مية ...المية. < نتمنى كل التوفيق للاعب فيصل العجب في مريخ الفاشر ..ونتوقع له نجاحا كبيرا. < الدوري الممتاز في الموسم الجديد سوف يكون دوري ممتع ومنافسة قوية. < يا هلالاب ما تخافوا ..وارغو ح نعمل ليه (940) جلسة ..قبل ما يقسّم مع ناس الهلال. < بي حالتو دي ما بقسم معانا. < لكن الفرحة التى ظهرت على وارغو في مطار الخرطوم وهو بشعار الهلال اختصرت ليه نص الجلسات. < المريخ بالمناسبة يفكر بصورة جادة في اعارة باسيرو ومالك وتراوري. < الكلام دا ما لعب. < الهلال مفروض يكمل تسجيلات الاجانب اليوم. < يوم الخميس يوم قصير. < والسيستم دا يوم الجمعة ما مضمون. < ناس المريخ بعد نجاحات الهلال دي ..بسستموا مع السيستم. < الغاني رانسفورد نتمنى ان يكون وصل فجرا. < الهلال السنة دي تسجيلاته من الدوريات الاوربية. < مازلنا في انتظار مفاجأة الكردينال. < لو الكردينال جاد في عرضه ..فليحول حافز تسجيل العجب والمحترف الاثيوبي الي الخرطوم الوطني من اجل اطلاق سراح صلاح الجزولي. < الهلال يمكن ان يعير فداسي ووليد الفاشر ومحمد احمد ومروان الحرية. < اتخيلوا وارغو وسيدي بيه في وسط الهلال ..تاني اي مشجع إلا يدخل مباريات الهلال بي مترجم. < وبدون مترجم ما بتفهموا حاجة. < عشان تختصروا الوقت لي وارغو ..ألعبوا لينا مباراة سريعة كدا مع الشجرة. < ناس المريخ مصدقين انهم ح يلعبوا مع بايرن ميونخ. < نحيا ونشوف. < قال شنو؟. < قال بايرن ميونخ يرد على المريخ. < يرد ليكم وين؟. < ويرد ليكم على شنو؟. < نذكركم ان يوم 9 يناير باقى ليه 21 يوم. < ولاعبو المريخ الي الان اي لاعب في بلد. < قول اتلموا بعد اسبوع. < هل (14) يوم كافية للاستعداد لمواجهة بايرن ميونخ. < يا جماعة انتوا بتلعبوا على منو؟. < 14 يوم ...الكورة ما بتكونوا لامستوها..وتلعبوا مع بطل اوروبا. < والله تلعبوا بي حالتكم دي تنضربوا (21) صفر. < المريخاب قالوا زعلانين من وراغو. < قالوا وارغو زي العجب طلع ما عندو وفاء. < انتوا يا جماعة تراوري دا سجلتوه من الاذاعة. < هيثم ..وكلتشي ..واكرم ..ومجاهد ..و..و... < ناس المريخ فهموا حاجة. < الهلال صنف في قرعة البطولة الافريقية ضمن افضل 5 اندية في افريقيا. < ناس المريخ طلعوا زي كمبالا سيتي. < هم وكمبالا سيتي واحد. < بلعبوا تمهيدي وعاوزين يلعبوا مع بايرن ميونخ. < الموضوع دا بدخل ليه في رأس زول. < ان شاءالله مباراة القمة في الاسبوع القادم ..تقع في الاسبوع الاول. < عاوزينها في اول اسبوع. < ولو عاوزين ليكم قمة سريعة كدا في الدمازين قبل بداية الموسم ..موافقين. < بالمناسبة كلمة السر في تسجيل وارغو في الهلال كانت على هذا النحو. < العجب الساعة اثنين ونص في الاتحاد ..بتعني ان وارغو الساعة اتنين في المطار. < ناس الهلال كانوا شغالين بي هذا التمويه. < وجماعتنا ديل ما فهموا اي حاجة. < انكسروا في الاتحاد العام ...والجماعة في المطار...وكمان في صالة كبار الزوار. < ...... < عاجل : انتوا وارغو الجابوه ناس الهلال دا يا هو وارغو الكان بيلعب في المريخ.[/SIZE]وإن طال السفر - محمد عبد الماجد صحيفة قوون