خد نفس

“في تقديري ما زلت مصراً أن هناك من يصر على الإبقاء على (سودانير) جاثمة على أرض الإحباط.. فلا يعقل أن يكون في أيدينا ألف باب للخلاص ونصر على الطرق على الباب الوحيد المفضي إلى الكارثة..”

اتفق معك تماما؛ ويمكنك بالرجوع الي ارشيف الاخبار والبحث العثور علي شركات طيران خاصةفي السوان لم يتجاوز عمرها 10(تم تاسيسهافي 2004) سنوات قامت بشراء طائرات جديدةوتدشينها في العام الماضي2013 في الوقت الذي تغتصب وتنهب فيه سودانير.
اذادخلت علي موقع احدي هذه الشركات علي الانترنت تكتشف انه لاتوجد اية معلومات عن من هم ملاك الشركة او مؤسسوها( بل فقط انهامثلا تم تسجيلها في السودان عام 2004) منتهي التمويه والتضليل؛ لماذا؟؟ وما صلة مثل هذه الشركة(( حتي ولو من اسم الشركة فقط مثلا)) بالادارة السابقة لسودانير المنكوبة؟؟ وكذلك الادارة التنفيذية وعلاقات القربي التي بين قمة الادارة التنفيذية فيها وبين احد الوزراء في السلطة؟؟ كل هذه الاسئلة تحتاج الي اجابات صادقة للرد علي تساؤلك الوارد في مقال اليوم من اجل تمليك الحقائق كاملة لاصحاب الحق أهل السودان.

علي الرغم من أن المعركةفي فضح الفسادوسرقة أموال أهل السودان بالباطل تبدوا كبيرة لكنها باذن الله سيكون الغلبة فيها للحق الذي لن يضيع طالمت كان ورائه مطالبا. وأنا من هنا اصالة عن نفسي وانابة عن كل الغيورين والصادقين والنزيهين من ابناء السودان الذين لم ينتبهوا ولم تحدثهم انفسهم بالاستماع والعمل بدروس الفسادوالنهب والانتهازية التي ظلت تدرسهاالدولة لاهل السودان علنا بمكافئةالسارق والانتهازي بالترقيةوالمزيد من المناصب والسلطة؛ حتي اصبح نفر لايستهان به من الناس في السودان يتحين الفرصة او ينتظر دوره لياخذ نصيبه ممما تبقي من لحم الثور؛ من هنا اعلن وادعو الشرفاء والمستعفين بتكوين/الانضمام الي جسم للدفاع عن واسترداد اموال السودان المنهوبة.

فكم اتمني من الاخ عثمان ميرغني من المساهمة في نشر الفكرة والعمل به.
مع تحياتي لكل الشرفاء من اهلي في السودان.

إهداء: الي روح صديقي كابتن سر الختم مالك الجزولي. فقد كنته معلما للاخلاق النبيله في سودانير.
بمناسبه وفد سودانير الي دوله الامارات العربيه برئاسه المديرالعام الجديد وعضويه عثمان يوسف وعبد الرحمن فضل اسال نفسي: انتو ياعثمان وعبدالرحمن لسع قاعدين في سودانير؟ الرشيد ومعتز ومحمد خلف الله و70 في الميه من مؤسسي سودانير هجرو وانتو لسه قاعدين؟ وكل الحصل لي سودانير دا ماهزاكم ولسع قاعدين؟ لا خط هيثرو لا بيع الطيارات لا اعلانات اشانه السمعه في دبي ولا الديون ماهزت فيكم شعره؟ وكمان بتسافرو؟ السفر دا لسع ماشبعتو منو؟ بيوتكم ماكملت ولا اولادكم ما اتعلمو؟ والله حرام عليكم. انتو الاتنين بالذات حرام عليك. زي النبت الشيطاني. انا لمن سمعته الخبر دا افتكرتكم مسافرين عشان موضوع محكمه دبي. ماتخيلته انكم كمان بتخططو لي مجزره تانيه. ياخ هي سودانير دي فضل فيها حاجه؟ والله حرام عليكم. بلاي مافيكم واحد يقول لينا (نحنا بنضحي من اجل السودان) دا والله السودان البضحي من اجلكم. سودانير دي تقول خلقوها ليكم انتو بس.
عندي احساس قوي انو انتو وامثالكم السبب الرئيسي في تدهور سودانير. لا بتهشو ولا بتنشو. سفر بس. لو الليله الحكومه دي جابت نتنياهو زاتو وبقي المدير طوالي حاتقترحو ليو سفريه وتنطو معاهو. لكن زي ماقال احد الزملاء الحمد لله مامشيتو لندن وسكنتو هنالك عشان تحلو موضوع خط هيثرو.
في راي ان مشكله سودانير تتمثل في (عثمان يوسف وعبد الرحمن فضل). البدعم كلامي دا انو الاتنين ديل لمن سودانير كانت في قمتها, الاول كان موظف عادي في مكتب الحجز والتاني كان موظف في قسم الكمبيوتر لمن الكمبيوتر كان (مين فريم). كل الناس الجهابزه اتساقطو وفضلو هم متشعلقين ورجال كل اداره. يتنقلو من التخطيط لي التسويق لي المحطات الخارجيه وكانو الصالح العام مابعرفهم. الكلام دا بتفسر بي طريقه واحد مافي تاني ليها. انو انتو الطابور الخامس البي سببو الناس المؤهله بتطلع. وانته بالذات ياعثمان يوسف مؤهلاتك الوحيده انو (اخلاقك عاليه). ماقلنا حاجه بنحترمك عشان اخلاقك العاليه دي, بس الموضوع اكبر من كده بي كتير. الموضوع سودانير اتدفنت خلاص واخلاقك العاليه ماقدرت توقف دا. تجي والناس في بيت العزاء تسافر عشان حفنه دولارات؟ ياخ علي الاقل قول للسيد المدير الجديد انو الناس البتعرف سودانير مافي شئ بجننها غير سفر المسؤولين. نلغي الموضوع دا وننادي ناس دبي ديل هنا. طوالي مستف شنطتك ومسافر؟ شوف ياعثمان يوسف وياعبد الرحمن فضل نحنا هسع بقينا نفرز في الكيمان. وانتو في وش المدفع وحكومتنا دي بعد نافع وعلي عثمان بقي ماعندها كبير, اذا حصل اي تغير انتو الاتنين (مع ناس اخرين طبعا في الادارات التانيه)حاتكونو مسؤولين امام القضاء. وحانجي نقيف ضدكم في المحاكم وحانرفع محامين اتهام عشان ندفعكم اي مليم اخدتوها بدون وجهه حق. حاجه تانيه. الاتفاقيه الجديده الدايرين تعملوها دي نحنا حنكون ليها بالمرصاد واي حاجه نشم فيها ريحه ذفره (ونحنا بقينا متخصصين في الريحه الذفره) , طوالي حانكتبها عشان نوري الراي العام انو في حصان طرواده في سودانير بالداخل, وانكم (القرقرينه) البتاكل في جسدها السنين دي كلها.
اما انته يالسيد المدير العام نرجوك بطل حكايه السفر بتاعتك دي لانو بترفع ضغطنا والاتفاقيات البتتعمل بره السودان ممكن تتعمل جوه السودان. وماتقول لينا انا قريت وين ولا كنته مدير شنو وهي لله هي لله. سودانير دايره زول يعرف انو سفر مافي والشغل كلو في (عبيد ختم) بس. داير تعمل كده ونديك فرصه مرحب بيك, داير تعملا سفر امشي في ستين داهيه كفانا المرض العملو لينا المدرا القبلك.
اخيرا رساله الي الحكومه. ياخ والله نحنا زعلانين منك شديد. الناس دي بتجيبوها لينا من وين؟ المدير دا قالو كان عندواقفاص بيض وصيوانات للايجار بقريه فداسي. الكلام دا علاقتو شنو بالطيران. ياجماعه الطيران دا مازي اي حاجه تانيه. بي هدوء كده قلنا ليكم جيبو لينا د شمبول ماعبرتونا. هسع ممكن نقترح زول تاني. كابتن وداعه مدير نوفا للطيران مالو عيبو لي. اول حاجه ماعجوز. اسس نوفا للطيران دي من الزيرو وتعتبر من انجح شركات الطيران الخاصه في السودان لانها بتشتغل بي كل مهنيه. واذا جينا للتهذيب افتكر كابتن وداعه بفوت الناس في التهذيب. وتهذيبو كمان ليس وراهو مصالح. اضف الي ذالك, انو زول بعرف خبايا الطيران اكتر من كل المدراء الجبتوهم. واها دي فرصه تثبتو للناس انو موضوع التمكين دا انتهي والشلليات دي اصبحت من الماضي. مع انو اشك في ذالك فكابتن وداعه لا بعرف جمال الوالي ولا اي راس كبيره في الحكومه.

د.الرازي الطيب أبوقنايه
elrazi@hotmail.com