محمد عبد الماجد

لو اتغلبتوا تسعة بنعتبرها ليكم تعادل


لو اتغلبتوا تسعة بنعتبرها ليكم تعادل
< زمان وقت يكون عندنا (تسميع) في المدرسة ...الطلبة الما حافظين بغيبوا من المدرسة. < في طلبة شفوت...جنهم وجن التسميع. < من تجيب ليهم سيرة التسميع ..الواحد فيهم يمسك (بطنو)..ويكتل حيلو...تقول من بقايا حملة (هكس باشا). < الاستاذ من يجي لابس لينا قميصو الزيتي ...بنعرف ليك طوالي الاستاذ دا الليلة قاصد التسميع. < الاساتذة ديل بتعرفوا من قمصانهم ...اسألوني منهم انا. < بجينا (مكفرن). < يسمع لينا من طرف. < الاحرف من الطلبة ديل ..كانوا بشيلوا (دفتر العيادة) ..وبتغيبوا عن حصة التسميع بصورة رسمية. < ما في زول بقدر يسألهم. < هسع على ما اعتقد ما في حاجة اسمها (دفتر العيادة). < ضفر حاول يستغل البند الاول من شغل طلبة زمان. < قام عمل شنو؟. < قال (تأشيرتو) فيها مشكلة. < التأشيرة بتحلك من بايرن ميونخ. < المشكلة فيك انت ...ما في التأشيرة. < التأشيرة لو بتحل من بايرن ميونخ ..كان حلت علاءالدين يوسف. < واحد تاني من غير اي مناسبة...قال لي تعرف الساعة اربعة هنا في الصين يعني كم؟. < قلت ليه كم؟. < قال لي اربعة هنا يعني تسعة في الصين. < قلت ليه ...الصينيون ديل لاعبين مع بايرن ميونخ وإلّا شنو؟. < صاحبكم اضايق في الدنيا دي جنس ضيق ..شعرت ليكم بي الضيقة في عيونو. < مريخابي سألوه تلاتة في تلاتة بي كم؟. < عاوز يقول (تسعة)...اتذكر بايرن ميونخ ..قال ليهم تمانية زايد واحد. < التسعة بضايقهم. < مريخابي قام الصباح بدري ..عيونو في نص طرفو..قال والله امس حلمت حلم ما كويس. < كابوس مخيف. < قالوا ليه حلمت بي شنو ؟، متلخبط كدا زي شارة المرور المعلقة؟. < قال ليهم حلمت (ضفر) من الدقيقة التانية في الشوط الاول رفع ايدو وطالب بالغيار. < مريخابي تاني ...قام هاج ...وقال ليه : هو المدرب ذاتو بخليه يلعب للدقيقة التانية ليه ..مفروض يطلعو من الدقيقة الاولى. < دا (برد) يلعب فيه (ضفر). < والله (كروجر) بي طريقتو دي ح يضيعنا...هو كروجر دا قايل (بايرن ميونخ) النيل الحصاحيصا. < غالب ...غالب. < قول ليه هناك ما في حاجة اسمها (النيل الحصاحيصا). < مريخابي ..شاف ليه (ارنب)...جرى ليك وراه. < جري شديد. < الارنب يطلع من شارع ويدخل في شارع...والمريخابي جاري وراه. < المريخابي نفسو اتقطع ..ولهاتو اتكبت قدامو زي (الكمونية). < في بداية الشارع الفوق ...لاقهو ليك هلالابي وهو في حالة (السك) دي. < الهلالابي قال ليه...عليك الله (ارنب) يعمل فيكم كدا ....طيب (بارين ميونخ) تعمل فيكم شنو؟. < والله الالمان ديل كمان عندهم جنس (ارانب). < مريخابي مختلف...طقتو (عقرب). < شلناه وجرى على الحوادث. < طبيعي يا ناس نمشي بيه على الحوادث ..يعني ح نمشي بيه على (منتزه المقرن). < مية مرة يقولوا ليكم الكلام دا. < رغم ان الحوادث في المستشفيات الايامات دي ...بقت زي (محلات الغاز)..ما فيها اي حاجة. < انتوا ازمة الغاز دي جات عليكم. < الدكتور مسك ليك ايد صاحبنا الطقتو ملاريا..لقى ليك (السم) منتشر في الجسم..قال ليه انت شعرت متين بـ (لدغة) العقرب دي. < قال ليه شعرت بيها من الهدف الثالث يا دكتور. < الدكتور فك ايدو وعاين لينا ..وقال لينا العقرب تلدغه في الهدف الثالث ..تجيبوه لي في الهدف (التاسع). < انا هسع اعمل ليه شنو؟..السم وصل ضروسو. < نحن مع الاحراج دا ...ما عرفنا نمشي وين. < طبعا الاحراج مع (البرد) ...حاجة فظيعة. < فظيعة ..فظيعة ..فظيعة ...موش في ناس بقولوا كدا. < دخلنا في (جفونا). < خليناها (الضفور). < مريخابي ...جوه جارين في الدقيقة (9) من عمر المباراة ..وقالوا ليه (المرا) بطنها وجعتها. < المريخابي ..ما عرف يتصرف كيف ؟...الكلام دا قالوه ليه في النادي...(الناس كلها سمعت). < المريخابي ..قال للمرسال ..امشوا قول ليهم بجيكم بي (ركشة) بين الشوطين معاي (الطبيب). < نسيبتو جاتو بعد (9) دقائق من الكلام دا ، في النادي ..وقالت ليه تجينا بين الشوطين ليه؟..انت ح تجيب لينا (طبيب الفريق). < قوم يا راجل ..الكورة لاحقة. < دا كلو خلوه. < قالوا ليك كروجر ...اجتمع (9) ساعات مع بلة جابر..يشرح ليه في الخطة. < قال ليه اوعك تتقدم...ما تطلع من خط ستة...خليك مع اكرم الهادي سليم ...ما تمشي بعيد. < بلة جابر حاول يشارك في الموضوع ..قال لي كروجر ...اسمع الجماعة ديل (نسرقهم). < كروجر ..رمي الدفتر والقلم ..قال ليه (تسرق) منو؟...انت لاعب ضد النيل الحصاحيصا. < كروجر انفعل ..وقال لي بلة جابر ...انت (تسريقك) لي المهاجمين في الدوري السوداني تامنوه ليك الحكام. < اوعك تسرق ليك لاعب من بايرن ميونخ. < بلة جابر حاول تاني يتفاعل مع الكوتش كروجر. < قام قال ليه شنو؟. < بلة جابر قال ليه : يا كوتش شاعر لي بـ (شد عضلي). < كروجر سحب ليك بلة جابر طوالي من التشكيلة ..وقال ليه انت الكلام ساكت جاب ليك (شد عضلي)..طيب لو لعبت يحصل عليك شنو؟. < ح تتفرتك متل علبة الحلاوة. < كروجر مشى على موسى الزومة ...لقاهو مركب السماعات في اضنينو. < الالماني قال لي موسى الزومة طبعا انت العاقل فيهم ...وخبرتك كبيرة اكتر من (9) سنوات في الميادين في الطرف الشمال تحديدا. < موسى الزومة الظرافة كاتله ..قال ليه ما في مشكلة يا كوتش. < كروجر قال لي موسى الزومة عاوزك تقفل لي آربين روبن. < موسى الزومة السماعات وقعن من اضنينو ...وانفعل في الدنيا دي جنس انفعال ...وقال لي كروجر ...عليك الله اعفيني من المهمة دي. < المهمة دي المخابرات ما بتقدر عليها ...روبن منو البقفلو ليك. < انت يا كوتش عاوز تشطبني في بقية يناير دا...انا يا الله مرقت من (ديسمبر). < لا ..لا الموضوع دا ما بقدر عليه ..شوف باسكال. < كروجر مشى علي (باسكال)...وساق معاه صديق علي صالح. < لقوا باسكال قاعد يأكل ليه في (زلابية). < قالوا بس ...الزول دا اعصابو باردة ..وبيأكل في زلابية كمان. < رغم ان الزلابية ما عندها اي علاقة ببرودة الاعصاب. < صديق علي صالح ..قال لي باسكال ...اسمع يا كابتن عاوزنك تقفل لينا روبن. < باسكال (الزلابية) خنقتو ...وقال لي صديق علي صالح ..والله عمليتكم دي ما كريمة. < حركاتكم دي ما بتنفع معاي...انتوا مجنسني ومنحتوني الجنسية السودانية عشان اقفل ليكم (روبن). < شوفوا ليكم وطني قنعان من روحو. < انا لاعب محترف ...لا بقفل روبن ...لا عندي معاه قضية...انتوا مالكم عاوزين تحرجوني مع جمال الوالي. < كروجر الحكاية غلبتو...ما عرف يتصرف كيف؟. < كروجر قال نادوا لي ابراهومة. < جابوا ليه ابراهومة. < قال ليه : اها يا ابراهومة نحن نتصرف كيف ؟...الوضع خطر شديد ...وجماعتنا ديل دفعوا ليهم (12) مليار جنيه. < ابراهومة قعد يفكر. < بعد شوية ..ابراهومة قال لي كروجر ...انت يا كوتش ما تقنع اهلك ديل ..بدل كورة القدم نقلبها (ليدو). < والله اولادنا ديل ...ناس الباشا وسعيد السعودي ..حريفين في (الليدو). < ما في زول بلحقهم. < كروجر قال ليه : لكن يا ابراهومة (12) مليار ما كتيرة على (الليدو). < ابراهومة ..قال ليه : لكن يا كوتش ...نحن ما عندنا حل تاني. < بعدين ناس (ضفر) ديل في (الليدو) ح يجهجهوني. < غايتو انا لو سألتوني من رأيّي. < بقول ليكم الجماعة الالمان ديل ادفعوا ليهم تاني (12) مليار ...وقولوا ليهم انسوا المباراة....وتعالوا راجعين. < مالكم ومال التلتلة...الموضوع في (البرد) دا لا بتقدر ولا حاجة. < ملحوظة : لو جات (مطرة) ح تتم الناقصة. هوامش < اقول ليكم حاجة. < لو اتغلبتوا (تسعة) بس ..بنعتبرها ليكم (تعادل) مع البرد دا. < تسعة في البرد ...بتعادل (التعادل) في الصيف. < ح نعمل ليكم تخفيضات. < برضو نحن ما كعبين. < بعدين حساب (الجملة) فيه تخفيضات اكبر ...ما زي القطاعي. < فرانك ريبيري ...قالوا حذروه من (بلة جابر) ..قالوا ليه الزول دا عندو (جوز)...ممكن ينهي مسيرتك الرياضية في الدوحة قبلها. < مريخ الدوحة ..موقفو صعب شديد. < ناس ولاية الخرطوم ..قالوا استعدوا كويس للخريف. < الخريف السنة دي ح يبدأ من يوم الخميس. < مباراة بايرن ميونخ خطفت الاضواء ..وهذا شيء في صالح الهلال. < اشتغلوا بعيدا عن الاعلام احسن ليكم. < رغم ان مجلس الهلال امس اجتمع باعلام الهلال. < الذي اعجبنا في هذا الاجتماع الاحتفاء بصورة الزعيم الراحل اسماعيل الازهري ..ووضع صورته على منصة الحديث. < هذا شعور جميل ..وامر اكثر من رائع. < مثل هذه المبادرات فيها رسائل عظيمة. < عاوزين معسكر الهلال يكون خالي من الاضواء وبعيد عن الاعلام. < الاعداد الجيّد يجب ان يكون بعيدا عن مسرح الاحداث. < المريخ وضع نفسه وهو في اسبوعه الاعدادي الاول على فوهة البندقية. < ناس اتلقطوا قبل اسبوع ح يلاقوا بايرن ميونخ بكرة. < نحن مالنا. < لكن (تسعتنا) بنجيبها. < نحن بنسمي (تسعة)..وبنجيبها تسعة. < لكن بنعمل ليكم (تخفيضات). < مشكلة ما في. < عندي احساس ناس المريخ ينسحبوا في الشوط التاني ..ويقولوا للشركة الراعية رجعوا لينا (6) مليار جنيه ..نص المبلغ الذي منح للشركة الراعية من قبل المريخ. < ما عارف ليه شاعر انو الخميس الماشي علينا دا فيه (اقالة) مدرب ..وشطب (17) لاعب. < ...... < عاجل : يا حليل العجب. [/SIZE]وإن طال السفر - محمد عبد الماجد صحيفة قوون


تعليق واحد

  1. [SIZE=6]خلينا من الفصاحة والكلام الخارم بارم دا، تاريخيا الفريق الوحيد اللي أتغلب 9 في أرضه وبين جماهيره هو الهلال، عندما أنهزم 9/1 من الهونفيذ المجري… كلامك دا كلام زول مجكلب ساكت وما عنده موضوع زي (بوابة عبد القيوم) هسي الجاب بوابة عبد القيوم وشية لحم سوق الثلاثاء شنو !!![/SIZE]

  2. [COLOR=#FF2600][SIZE=5]بلد هملة ووطنية صفر مقال تخذيلى زى ده أأأأخ لو كان بيدى السلطة كنت حلقت ليهوا و”ليهم” زيروا صلعة ووديتهم الخدمة الالزمية 3 شهور ووزعتهم على مناطق العمليات[/SIZE][/COLOR]