محمد عبد الماجد

نزار الصاقعة لاعب بمواصفات (Premier League)


نزار الصاقعة لاعب بمواصفات (Premier League)
< يخيّل لي ان الفرصة لو كانت متاحة للهلال ...ولو انه هو الذي لعب امام (بايرن ميونخ) بدلا عن المريخ ..يخيّل لي ان الهلال كان سوف يتجاوز حكاية (الفرح الطفولي) الذي انتاب الديار الحمراء ..وقعد لينا متل (القمري) في رائعة حمد الريح التى كتبها سليمان عبدالجليل (الرحيل). < الهلال لم يكن يكتفي ..بما خرج به المريخ ...اذا لم يتجاوز طموح المريخاب كلهم الخسارة من بايرن ميونخ 0 / 2. < اعتبروا هذه النتيجة ..(انجاز)...واعتمدوها (بطولة). < لم نكن نرضى بما رضى به امير كمال ...عندما صرّح في وسائط اعلامية مشهودة (ان ربيبري مذهول بالمستوى الذي قدمه امامه). < خلاص يا جون تيري. < اما موسى الزومة ...فقد خرج باشارة ...جعلته الخاسر الاكبر من لقاء بارين ميونخ. < الزول دا ما تخلوه براهو. < وادعي اكرم الهادي سليم الاصابة حسب تصريح مدربه ..وطلع بسيارة وهدفين فقط. < وقال جمال الوالي ان المريخ لم يدفع (قرش) لبايرن ميونخ من اجل التباري معه. < لا بالله اكيد بايرن ميونخ لعب امام المريخ من اجل دعم المجهود الحربي. < او كما قالوا ان المباراة جاءت في صالح سلام دارفور. < طبعا المريخاب ديل الحكاية لمن تغلبهم بدخلوا (دارفور) في الموضوع. < الهلال لو لعب امام بايرن ميونخ ...كان نصيبه من النجاح سوف يكون اكبر ..وكان سوف يخرج بنتائج ملموسة من المباراة. < ولعل اول استفادة السودان من ذلك اللقاء لو قدر ان يجمع بين الهلال وبارين ميونخ ...هو ان (7) لاعبين على الاقل من الهلال سوف يحترفوا في الدوريات الاوروبية. < الحكاية ما (انشاء) ساكت. < كان الموضوع سوف ينكعس (احترافا) على السودان. < معظم لاعبي الهلال صغار في السن ...وهذا امر لا يتوفر للمريخ ..وربما (العمر) يباعد بين المريخ وبين ان يحترف منه لاعب في الدوريات الاوروبيات. < اقصى ما يمكن ان يخرجوا به (ذهلة) والسلام. < حكاية ريبيري (مذهول) بامير كمال ...نحن ما بتقسم معانا ...لأن ريبيري لو مبهور (حقا) بامير كمال ومذهول ...كان يشوف ليه فريق ان شاءالله في الدرجة الرابعة في فرنسا او المانيا ليلعب فيه امير كمال...(ما بتغلبو لو كان مذهولا حقا). < السماسرة ذاتو بضعوا اعتبار لذهلة ريبيري. < لاعب الهلال (الصاقعاوي) نزار حامد ..يمتلك من الموهبة ما تجعله يلعب في الدوري الانجيلزي (Premier League) فكل مواصفات نزار الصاقعة مواصفات دوري انجليزي. < ربما ينقص نزار حامد فقط (العرض)..وربما هي علة التسويق ..وثقافة الاحتراف التى يفتقدها كل اللاعبين في السودان. < نزار الصاقعة ..لاعب صغير في السن ...ويمتلك موهبة (غلابة) قادرة على ان تفرض الفارق في اي لحظة. < كذلك نزار الصاقعة لاعب صاحب قوام رياضي مثالي ..يفتقده عباقرة الدوري الانجليزي. < فوق هذا فان نزار الصاقعة لاعب ذو خلق ..قليل جدا ما يخرج من طوره ...وهو ملتزم بتوجيهات مدربه ..وهذا يعني انه مع موهبته هو لاعب تكتيكي من الطراز الاول. < وفي ظني ان نزار حامد الي وقتنا هذا لم يسوّق نفسه ..ولم يجد بعد المدرب القادر على اكتشاف المخزون الفني والابداعي الكبير الذي يتمتع به الصاقعة. < نزار حامد لو لعب امام بايرن ميونخ بنصف لياقته البدنية كان غوارديولا مسك فيه بي اصابعه العشرة. < ناس سعيد السعودي قدامو شنو كمان؟. < هذا اذا لم يخطفه سماسرة الدوري الانجليزي بين الشوطين. < نزار الصاقعة ...لاعب ما عادي ...ونحن على موعد ينتظر منه الكثير .. لاعب اجبر جمال الوالي على الصيام ثلاثة ايام. < كمان بتنسوا. < طبعا اذا كان الحديث عن نزار الصاقعة ..فانه لا بد لنا ان نذكر (ورشة العمل) التى قام بها نزار حامد وطبقها (بتربيعتها) في لاعب المريخ علاءالدين يوسف. < قالوا ليك علاءالدين يوسف قبل (الجمع والطرح) الذي قام به نزار الصاقعة ...علاءالدين يوسف شعره قالوا كان (ملولو). < تصوروا بعد الحركة دي شعر علاءالدين اتسرح. < اتسرح براهو. < شعرو وقف شعرة ..شعرة. < علاءالدين يوسف طبعا الي الان ما فاهم حاجة. < قالوا علاءالدين يوسف بسبب هذه الحركة وزنه نقص (17) كيلو...ونظرو ذاتو ضعف. < وقالوا ليك كمان ..فيرا في الدوحة بقى ما بفرق بين سعيد السعودي واكرم الهادي سليم. < المسكين عملية نزار الصاقعة دخلت فيه. < زمان علاءالدين يوسف دا كان كدا؟. < ابدا. < في الهلال ايضا ...اللاعب الخلوق ...والمهاجم المحترم مدثر كاريكا ...اللاعب الانسان ..صاحب الموهبة والخلق ..والذي عرف ان يجمع بين المهارات والدبلوماسية فانعكس ذلك حتى على اهدافه. < فى كل اهداف مدثر كاريكا كانت هناك (رسالة). < ايضا هناك اللاعب (المفكر) محمد بشير بشه ...صاحب اسرع خطوة في القارة الافريقية. < شيء تشوف ..وشيء ما تشوف. < اها بالمناسبة دي. < انتوا ما سألتو موسى الزومة قلتوا ليه لاعب بارين ميونخ قاصد شنو بالحركة العملها. < اكيد لاعب بايرين ميونخ شاف هدف بشه في المريخ ..ويكون شاهد (سرحة) موسى الزومة كمان. < الزول دا سرح في الدنيا دي جنس سرحة. < تقول عمر بن ابي ربيعة. < يا موسى ما تشيل هم. < ان ننسى لا ننسي مخترع (الهوبة) في كرة القدم السوداني اللاعب مهند الطاهر. < مهند الطاهر لو لقى بارين ميونخ (الحمام الميت) دا...كان طبق ليكم فيه (4) هوبات. < وهوبة واحدة كانت كفيلة ان تنقل مهند الطاهر الي الدوري الايطالي. < الدوري الايطالي طبعا ...بتاع (هوبات) عشان كدا ح يمشي ليه مهند الطاهر. < هنالك ايضا المهاجم البصدع بالجن الاحمر ذاتو محمد عبدالرحمن (جكسا). < عليكم الله هسع (جكسا) دا ما شكلو ...الدوري الاسباني. < دي حاجة ولا عاوزة ليها كلام. < ما تقاطعوني عليكم الله. < السنة دي ح تشبعوا (مهارات). < الدوري الانجليزي ايضا كان سوف يفتح شباكه للفتى الطائر وليد علاءالدين. < وليد علاءالدين طبعا لاعب هوائي..ما في ارصاد برصدو. < اقول ليكم حاجة ...(الشغيل) ذاتو كان شفنا ليه طريقة في الدوري الفرنسي. < الدوري الفرنسي لعب فيه (موسى الزومة وبلة جابر) ما يلعب فيه نصرالدين الشغيل. < في الهلال ايضا مواهب اجنبية ...وملف المحترفين هذا الموسم محشود بالمهارات. < سيدي بيه ...قبل الهلال كان مرصود من كثير من الاندية الاوروبية. < وارغو ذاتو قبل ما (يتموسر) في المريخ كان مرصود من الدوري الانجليزي. < ان شاءالله الهلال هذا الموسم يعيد اكتشافه ويقدمه بصورة حديثة ...ويعيد له سيرته الاولى عندما كان هدافا للبطولة الافريقية للاندية. < نسيت زول. < نسيت صلاح الجزولي ...الزول البثبت ليك الكورة في (كباية) وبكشحها ليك زي الشاي الحب في الموية السخنة. < ولا بتلفت. < يا جماعة الله ...الموسم دا ان شاءالله ح تتمتعوا بالهلال ...وح ترجع السبعات ...والسلم السباعي والمربعات والصفوف من جديد. < تسجيلات صاح. < قطاع رياضي زي الطلقة. < جهاز فني شغال (دبل) تمارين. < معسكر يسير بصورة نموذجية ...واعداد يوحي ان هذا الموسم ان شاءالله سوف يكون خالصا للهلال. < وعندما نقول ان الموسم سوف يكون خالصا للهلال فاننا لا نقصد فقط البطولات المحلية...نقصد كذلك البطولات القارية. < الموسم دا ان شاءاالله ناويين نلقط اي حاجة ...جوة وبرة. < انتوا اكتفوا لينا بـ (بارين ميونخ)..والغلاط في شاي المغرب ..وخلوا لينا الموسم مقفول. < السنة دي لو في (درع بتاع سد)..ما بنخليه. < وشاح (خور) السنة دي ما بنفرط فيه. < عشان كدا يا مريخاب كملوا فرحتكم في الاعداد ...الموسم لو بدأ ما عندكم اي (فرحة). < فريقكم الكلو موسي الزومات دا ...ما بنستر. < بالله انا وقت شفت المريخ امام بايرن ميونخ ..ولقيت ليك موسى الزومة وبلة جابر وسعيد السعودي ..قلت طيب الجماعة ديل سجلوا منو؟. < الجديد شنو؟. < انا ما شايف اي تطور حاصل. < ما في اي جديد. < الجديد بس قلبو اللسان. < يعني بدل بلة جابر ..بقوا يقولوا جابر بلة. < ملحوظة : الدوحة يا دوب نورت. هوامش < قرأت هذا الخبر : (نشر الاتحاد الدولى لكرة القدم فيفا صورة عبر الصفحة الرسمية للاتحاد بموقع التواصل الاجتماعى تويتر يظهر فيها كلاً من ليونيل ميسى واللاعب كريسيانو رونالدو بحفل الكرة الذهبية بدون الفرنسى ريبيرى، وتشير الصورة إلى خروج الفرنسى ريبيرى من المنافسة على الكرة الذهبية هذا الموسم، لتقتصر المنافسة على قطبى الكرة بالعالم ميسى ورونالدو، ويذكر أن الأرجنتينى ليونيل ميسى، مهاجم برشلونة الإسبانى قد فاز بالكرة الذهبية أربع مرات متتالية). < والله انا ريبيري من شفتوا (بطاّير) قدام المريخ ومذهول من امير كمال عرفتو ليك جائزة من جوائز سوداني ما بطلع بيها. < قلت ليكم الزول دا (ماسورة) ما صدقتوا ..قعدتوا تغالطوا. < هجوم المريخ السنة دي زي البطيخ. < تتخيلوا هجوم المريخ امام بايرن ميونخ (كورنر) ما طلع بيه. < عنكبة دا قدر ما جرى ما لقى ليه كورنر ساكت يطعم بيه خشمو. < يا حليل محمد موسي. < تراوري ..يشيل ويرفع ايدو ...ولا كورنر. < يا حليل كلتشي. < اما اوليفيه واضح انه الموسم دا الكبر دخل على عيونو. < بقوا ما بشوف. < وعدم الشوف كمان معاه (انانية). < الكلام دا حسب كلام كروجر. < الهلال اليوم ان شاءالله في الدوحة. < اسياد البلد في الدوحة. < خلاص ..تاني ما عاوزين اي بلة جابر. < ركزوا مع الهلال. < النيلين في مباراة بايرن ميونخ والمريخ تفوقت على الشروق. < الشروق تأثير جمال الوالي عليها سلبيا. < لذا كان اختيار موقف ان تحتكر النيلين مباريات الهلال الافريقية وتجاربه الاعدادية. < الشروق قدمت في مباراة المريخ ترويج للنادي الاول في السودان. < القال ليكم المريخ النادي الاول في السودان منو؟. < في وصيف ببقى الاول. < .... < عاجل : عنكبة دا مالو شكلو كدا سيكافا سيكافا. [/SIZE]وإن طال السفر - محمد عبد الماجد صحيفة قوون


تعليق واحد

  1. يا سلام على قلمك الجميل وخصوصا تشبيهاتك الرائعة المتفردة إقرأوا معي ( الزول البثبت ليك الكورة في (كباية) وبكشحها ليك زي الشاي الحب في الموية السخنة) يا ألله ياهذا الابداع مفروض أنت تنال جائزة نوبل للآداب والفنون أربع سنوات متتالية :lool: :lool: :lool: