كوش نيوز .. أخبار السودان بين يديك

د.عادل الصادق المكي : الفكي كورو جيـبو



شارك الموضوع :

وحات الله وان شاء الله اتقلب..نفسانة وأمشي في نص شارع الجمهورية نصة نهار ..

وتعفصني عربية عربية

النضم دا صح..

كرت صغير زي البي يشيلوهن الناس المتفلهمين ديل.. تلقى فيهو اسمو وتلفونو وشغلو…

كرت “من أجود الأنواع” وقع في يدي يوم 26-2-2013.. كرت بتاع فكي.. قاعد يوزع فيهو في سوق بحري.. وللنسوان خاصة مكتوب فيهو:–

شيخ الرشيد

(كورو جيبو)

*عرق الزواج وتمليك الرجال %100

*عرق الشغل والمحبة خاصة وعامة

*حبل بندا وعرق الطلاق حار حار

*علاج جميع الأمراض

*عرق النجاح في جميع المواد التعليمية

البيان بالعمل

تـ” 0000000000 تـ: 00000000

انتهى مضمون الكرت ونقلتو بكل أمانة وبي ضبانتو حفظا للحقوق الأدبية.

الشيخ دا لقبو “كورو جيبو”.. يعني كُر لي الزول دا وجيبو لي.. واعتقد والله أعلم يقصد الراجل.. يكروهو يجبوهو للمرا.. غايتو وزع كروت كتيرة.. إن صحينا يوم من الصباح ولقينا شوارع الخرتوم دي كل مرا.. ماسكة راجل من طرف جلابيتو واللا قميصو.. وكاراهو.. يكون كرو جيبو أصلي.. يا أصلي!

عرق الزواج وتمليك الرجل 100%..100% دي نسبة التمليك.. يعني أمو وأخواتو تاني يشمنو قدحة…

عرق الشغل.. والمحبة خاصة وعامة.. تلبسو وتدخل بكان داير تشتغل.. تدخل على المدير.. أول ما يشوفك يقوم من كرسيه ويجري عليك ويكابسك ويشعبط فيك ويبوس راسك.. ويحلف طلاق علا تقعد بكانو وتشتغل مدير من يوم الليلة وهو يمرق يمشي يكوس ليهو شغل تاني.. ويقول ليك بلداً ما تشغلك انت شن فايدتا؟!

حبل بندا.. دا والله ما عرفتو.. ولا هو شارحو في الكرت.. عرق الطلاق واااااااضح.. حار حار.. مافي أي تأخير.. المرا الدايرة واحدة يطلقوها تربط العرق في طرف توبا.. وتدخل بيت الهدف.. تلقاهم هي والراجل يتونسو في امااااااانتي الله ويضحكو ويهظرو.. أول ما تدخل الراجل يقبل على مرتو يشخر فيها.. وبلا بسم الله يقول لها يلا.. بيت ابوكي بي وين؟.. امشي يا شينة يا بت الشين.. انتي طلقانة..

علاج كل الأمراض.. دا من نطلع من البيت لمن نرجع كل خطوتين نلقى عربية وفيها مكرفون.. ويبيعو في نصيبة ويقولو ليك علاج كل الأمراض.. لا يخلو وجع ضهرنا ولا يخلو عدم ولادتنا.. ولا يخلو بواسيرنا.. ولا سجمنا ولا رمادنا.. ومافي زول بيسعلهم!!.

عرق النجاح في جميع المواد التعليمية.. في السلك يا فرد.. لاقراية ولا مذاكرة ولا كورسات.. والمدرسة زااااااااتا مافي داعي ليها.. بس تمشي تجيب رقم جلوسك.. وتقعد في نتك وفيس بوكك.. وتدخل الامتحان.. تسمع اسمك في العشرة الأوائل.. الأول: عماد حسين علي.. مدرسة (كورو جيبو) الثانوية..

التاني برضو: عماد حسين علي.. مدرسة (كورو جيبو) الثانوبة

التالت برضو.. عماد حسين علي.. مدرسة (كورو جيبو) الثانوية..

الرابع برضو :- عماد حسين علي.. مدرسة (كورو جيبو) الثانوية.

لحدي العاشر.. انت براااااااااااك.. تجي من الأول لحدي العاشر.. والباقين ان شاء الله ما يجو كلوكلو!!!!

كادوك ياباني

اكتشاف دواء جديد يعطى للرجال لمنع الخيانة الزوجية

باحثون يابانيون.. اكتشفو انو عقار ماينوسايلكين

..(Minocycline)

قاعد يخلي الراجل ما ينجذب لاي مرا سمحة.. الدواء ح يطورهو اكتر

عشان يكون فعّال…

المصيبة الدواء دا يخلي الراجل ما يعاين في النسوان

السمحات.. وينشبك في الشينات.. تبقى يسدوها بي جاي

تتنقدا بي جاي

غايتو نحن نحمد الله الكواديك فعااااااالة وشغااااالة كويس اصلو ما

بنحتاج ليهو

اليوم التالي

شارك الموضوع :

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.

سودافاكس