بابكر سلك
نحن الرواد
* فالأشادة أيضاً وسيلة تعبر عن أعجابنا.
* وتثبت أن العمل الجميل يعجب الزراع والكتاب وكل الناس.
* وقفت أمام شعار بنك فيصل.
* طبعاً الشعار تلاتة هلالات.
* لكن ما فيهم ولا شعار يملكه عصمت.
* التلاتة هلالات بتاعت بنك فيصل.
* بنك فيصل يتخذ من عبارة جميلة ذات معنى ومضمون شعار.
* نحن الرواد.
* هو شعار.
* وكلو زول حر فى شعارو.
* ولكن بالأمس وقفت متأملاً معنى الشعار بتاع بنك فيصل.
* مقارناً ذلك بواقع نعيشه.
* أبتسامة وأهتمام وسرعة فى أجراء المعاملات.
* قول ده شأن خاص بالموظفين.
* الفخامة والأناقة دى بتاعت البنك.
* المهم ما دفعهى للأعجاب هو قيام بعض أفرع البنك بالعمل فى
الفترة المسائية.
* من خمسة لى تمانية.
* يومياً.
* يقدم جميع الخدمات ويجرى جميع المعاملات.
* ويديك كمان شاى باللبن.
* التحية لبنك فيصل.
* وأخص بالتحية فرع شارع الموردة بقيادة القبطان الطيب عبدالكريم.
* ومزيداً من التقدم ننشده فى الخدمة المدنية وكل المؤسسات
والهيئات والشركات التى تقدم خدماتها للمواطن.
* المهم.
* أخوتنا بتوع تمرأبونا لسة مبسوطين بى مباراة الشوت شوت مع
الروس.
* وأحد ظرفاء الشفوت سماهم التابع.
* لأنهم بيتبعونا فى أى شى.
* فى الممتاز تابعننا وفى السودان برغم الزوغان تابعننا.
* مشينا الدوحة تابعننا.
* بس الغلبهم يتبعونا فيهو.
* مانديلا.
* زمان قالوا لينا المانجلك يعنى ما نجل ألا أياك.
* أسى منديلا نحنا سميناهو ماندلك.
* يعنى ما ندل ألا أياك.
* وفى هذه المحطة يقف التابع.
* فى محطة مانديلا التابع يقف وما بتابع.
* حدو هنا.
* محلى.
* زى الكديس لما تربيهو.
* تجى ماشى يتابعك لى خشم الباب.
* ولما يصل خشم الباب يقيف.
* وينجو نجو.
* حدو هنا.
* كديستنا.
* أسى الزول موش بقول فلان ده عامل لى كديسة فى راسى؟
* يعنى تابعنى ومتابعنى وتاعبنى.
* بس.
* أيها الناس.
* بصات الوالى.
* طبعاً طوالى جريتو لبصات الوالى الخضر(بضم الخاء) بتاعت الخضر
(بكسر الخاء).
* أنا قاصد بصات الوالى الأحمر والأصفر.
* لازم نسير بيهم أول عريس مريخى.
* تكريم للعريس والبصات.
* والسنة الجاية جيمى قال من معسكر المانيا بيغشى فرنسا.
* جايب لينا طيارتين.
* واحدة للممتاز تسافر محلى.
* والتانية لأفريقيا تسافر دولى.
* روشا.
* ظبتوا كورتكم بتاعت الولايات معانا.
* الملح ده ما تفوتوهوا.
* ما بجيب الضغط.
* كفاية الضغط الجايبو ليكم فريقكم أبو من غير شعار ده.
* أيها الناس.
* كورة الهلال التجريبية التانية متين؟؟؟
* ما لاقين فريق يوافق ولا شنو؟؟؟
* أن شاء الله ألعبوها قيم واحد.
* ما تقعدوا كدة ساى.
* معسكرين ولا مغتربين أنتوا قاعدين بدون مباريات؟؟
* أقول ليكم.
* غرب شرطة الريان فى قطر فى ميدان.
* زمان القطريين كانوا بعملوا فيهو المولد.
* أمشوا ألعبوا فيهو.
* بس أولاد حلة الريان بجوا بدرى.
* رسلوا خليفة من الساعة أتنين يحجز ليكم الميدان.
* أحتمال تلقوا ناس القسم بدفروا.
* ألعبوا ضدهم وأكتبوا بالخط العريض.
* الهلال يقابل فريق شرطة قطر فرع الأنتربول.
* مدرب فريق الشرطة يشيد بالهلال ويقول خليفة لفت نظرى.
* الخوف خليفة يصدق ويشتغل وكيل عريف فى قطر ويفتح ليكم.
* لكن بس يوم كورة شرطة قطر خارجوا القون بتاع الرقم الوطنى.
* الناس ديل أنتربولهم قوى.
* يقوموا يخمشوهوا ويجيبوهوا راجع للقسم الجنوبى أمدرمان.
* أها.
* نجى لى شمارات والى الخرطوم.
* أكان شفت يا والينا.
* فى شلة بتاعين بحر قاعدين جمب البحر(النشف ده) بتونسوا.
* قاعدين تحت الكوبرى القديم.
* وبعاينوا لى فرع النيل الأبيض النشف من جهة الغرب حتى
البرلمان.
* واحد قال سبحان الله الناس تقول كلام وربك رب الخير يقول كلام.
* الناس قطعوا الجنوب من السودان ربك رب الخير لصق الخرطوم فى
أمدرمان.
* نطة واحد تانى قال لى واحد تالت.
* أن شاء الله يبقوك وزير.
* التالت قال ليهو ما داير.
* الأول سألوا ليه؟؟
* قال ليهو لما تجى داخل مطعم مثلاً وتلقى الناس بتاكل ليها ساعتين تلاتة.
* ماخلوا فراخ ولا ضلعة ولا مندى ولا أرنب ذاتو.
* تقعد معاهم دقيقتين يشبعوا ويتخارجوا.
* وتبقى براك مجبور تدفع الحساب.
* ياكلوا الأكل ده كلو وأدفع الحساب أنا!!!!!
* ليييييييه؟؟لقلقلك.
* ماداير ماداير ماداير. سلك كهربا
* ننساك كيف وكلنا ما دايرين ما دايرين.
والى لقاء**********سلك
لن ننساااااااااااااااااااااااااااااااااااااك
في السلك – بابكر سلك
