لو عارفين الراجيكم كنتوا قلتوا يا ريت (التمساح) لوأكلنا

العرضة جنوب ..الشارع الاول خليه ..الشارع الثاني خليه ..الشارع الثالث بتلقى ليك صيوان قافل الشارع
علي جعفر دا في مباراة الترجي لو قعد ليكم في (الكنبة) بعمل ليكم ازمة..بعمل ليكم مشكلة
بكري المدينة (غتاتة) الهلالاب ما عاوز يخليها ..وضعكم وجه لوجه امام الترجي التونسي
بقت عليكم حكاية الزول البطلع ليه من (ركشة) بي كرامة البليلة يقوم يخش ليه في (قلاب)
• هسع دي (حالة) يفرحوا ليها.

• لو عارفين الراجيكم كان من الآن دقيتوا (الصيوان).

• وتقبلتوا العزاء.

• العرضة جنوب ..الشارع الاول خليه ..الشارع الثاني خليه ..الشارع الثالث بتلقى ليك صيوان قافل الشارع.

• ليه دائما (الصيوان) بتاع (البكا) بكون قافل الشارع الثالث؟.

• حكمة عجيبة.

• البلد دي فيها حاجات غريبة بتحصل.

• ما لاقي ليها تفسير الى الان.

• نقوم نفسرها ليكم ..تقوموا تكوركوا.

• احسن نخليها بدون تفسير.

• الترجي دا لا بتقابل ولا حاجة.

• لو عارفنو.

• ولو شاعرين بي قدرو ..ما بتفرحوا.

• ولا بتغشوا نفسكم ساكت.

• كان شفتوا ليكم بلد.

• ناس (ضفر) ديل شن قدرهم بي (الترجي)؟.

• ضفر قدام ناس الترجي ببقى ليك زي (الطالب) الما حافظ.

• ما عارف اي شيء.

• وعلي جعفر؟.

• علي جعفر دا في مباراة الترجي لو قعد ليكم في (الكنبة) بعمل ليكم ازمة.

• بعمل ليكم مشكلة.

• في كنبتو ممكن يتسبب ليه في اربعة اقوان.

• هسع تلقوا علي جعفر بشكي ليه من (13) ضرس.

• باقى الشكية بكملها في ضروس (الريح علي).

• جنو شكية.

• جنو هرجة.

• السنة كلها بيهرج.

• كمان انتوا ما بتعرفوا (علي جعفر).

• مالكم علي جعفر غريب عليكم؟.

• علي جعفر دا لو نفيتوه في جزيرة (سانت هيلينا) بعمل ليكم مشكلة.

• الزول دا اصلو ما مضمون.

• ولا بثبت ليكم.

• ولا بنستر.

• احسن ليكم من الآن تحولوه مريخ الفاشر.

• لكن علي جعفر البنعرفو دا في مريخ الفاشر بعمل ليكم كارثة…اذا كان في جزيرة (سانت هيلينا) بعمل مشكلة..ما يعمل ليكم مشكلة في مريخ الفاشر.

• ناس الترجي التونسي ديل لا بعرفوا مريخ الفاشر لا بعرفوا مريخ ام درمان لا بعرفوا مريخ كوستي.

• اي مريخ عندهم واحد.

• ما بفرزوا ..ولا بفرقوا.

• بضربوا من طرف.

• مريخ ام درمان عندهم زي مريخ الحصاحيصا.

• عشان كدا مفروض ما تفرحوا.

• مفروض تتضاريوا لينا من بدري.

• انتوا لو عارفين الراجيكم ما كان بتفرحوا.

• جهزوا الاباريق ..لغسيل الايادي.

• واملأوا الجركانات موية.

• ورشوا الفسحة.

• الظروف ما معروفة.

• بقت عليكم حكاية الزول البطلع ليه من (ركشة) بي كرامة البليلة يقوم يقابلوا (قلاب).

• ما بعرف يمشي وين؟.

• زي الزول البقول ليه الدكتور نتيجة الملاريا نضيفة.

• ما في حمى.

• اريقان ما في.

• سكر ما في.

• ضغط ..عادي.

• بس عندك مشكلة في القلب…وفي زي ورم كدا في المخ.

• في زول بقولوا ليه كدا ..بقوم يفرح ويقول ..كويس ما طلعت ملاريا.

• مرقتوا من (الملاريا).

• البمقركم من القلب شنو؟.

• البمرقكم من المخ شنو؟.

• بكري المدينة عملها فيكم.

• بكري المدينة قصدكم.

• عاوز يتلتلكم.

• بكري المدينة (غتاتة) الهلالاب ما عاوز يخليها ..وضعكم وجه لوجه امام الترجي التونسي.

• عشان كدا الكاردينال معطل الورق.

• عشان كدا اللجنة التحكيمية بتجرجر لينا.

• نحن عاوزين بكري المدينة يقوم بالواجب دا.

• يضعكم امام الترجي التونسي ..ويتخارج لينا على كدا.

• يا جماعة الشغل دا كبير.

• الشغل دا عاوز ليه (مخمخة).

• الشغل دا ما بتقدروا عليه.

• الشغل دا نحن صارفين عليه.

• الشغل دا نحن شاربين ليه (موية باردة).

• موية باردة ساكت ..ما لكم قعدتوا تنططوا لينا في عيونكم متل (شبابيك) الصف الخامس.

• خلاص تاني عاوز تجيب لينا شبابيك الصف الخامس.

• انت مالك عاوز تفور لينا دمنا؟.

• مالك عاوز تطلع لينا من النص؟.

• بكري المدينة عارف نفسو ما ح يعمر معاكم.

• عارف نسفو موقوف – موقوف.

• قام قال احسن اتفرج في الجماعة.

• قصدكم.

• قال اشوفهم بتصرفوا كيف؟.

• اشوفهم بعملوا شنو؟.

• قام جاب ليه قون ..ختاكم في حتة صعبة خالص.

• ختاكم قصاد (القطر).

• في زول بقيف في سكة القطر.

• انتوا جنيتوا؟.

• انتوا مالكم..الحاصل عليكم شنو؟.

• بكري المدينة احرجكم جنس احراج.

• وضعكم في مطب صعب.

• لو فيكم زول عاقل واحد ..كان اداكم رأسكم.

• وكان قال ليكم البتعملوا فيه دا غلط.

• لكن العاوز يفكر ليكم منو يعني؟.

• متوكل أحمد علي؟؟.

• متوكل أحمد علي دا اكتر حاجة ممكن يعملها للمريخ – يقوم ينتف سلك عربة التلفزة.

• اكتر من كدا ما بعمل حاجة.

• انتوا يا ناس المريخ بتعملوا ليكم في حاجات ما قدرها.

• ولا عندكم ليها قدرة.

• كان افضل ليكم تطلعوا من هذه المرحلة لا من شاف ولا من درى.

• لا ترجي ولا يحزنون.

• الترجي دا احسن تشوفوه بس في (be in).

• تتفرجوا فيه بس.

• عاوزين تلعبوا معاه.

• بي منو؟.

• بس ناس ضفر وعنكبة.

• انتوا جنيتوا.

• لو درستوها صاح كان اتخارجتوا.

• ما في زول بدخل كلية الطب بالجغرافيا.

• ما في زول بمشي طب ..وهو (ادبي).

• يعني لا احياء ولا كيمياء ولا فيزياء ..وعاوزين تقرأوا طب.

• بتعملوا في حاجات غريبة.

• كلو من بكري المدينة.

• لو بكري المدينة عمل فيكم خير ..ما كان جاب القون.

• كان تطلعوا الآن…وتقوموا تشوفوا ليكم (سيكافا) ظريفة كدا.

• احسن ليكم (سيكافا).

• سيكافا تقزقزوا بيها شوية كدا.

• على قدر حالكم.

• لكن فد مرة كدا ..تلاقوا (الترجي).

• هسع روابطكم بتكون كلها صادمة.

• كلها بتكون داخلة في حالة اللا وعي.

• كمان الترجي بيلعب.

• كمان الزول ما يقول ليكم النصحية.

• احسن نقول ليكم الحقيقة ..عشان تعملوا حسابكم.

• بدل ما نغشكم ساكت.

• بعدين انتوا مفروض تشكرونا على النصائح البنقدمها ليكم دي.

• بنفتح ليكم اضانكم.

• عشان تعرفوا تتعاملوا كويس مع الظروف.

• الحياة من الموت ما معروفة.

• والترجي صعب.

• انا عارف ..ح يكون فيكم جماعة بغشوا فيكم ..وبصبروكم ..بقولوا حتى لو اتهزمنا سبعة امام الترجي ح ننزل نلعب في الكونفدرالية.

• يا جماعة السترة والفضيحة متباريات.

• ما تشرطوا لينا عينا ساكت.

• ما تفضحونا في القنوات.

• ناس شمال افريقيا ديل لسانهم طويل.

• اقول ليكم حاجة ..ديل كورتهم (لسان).

• كورة القدم عندهم كورة اللسان.

• عشان الامور تبقى ليكم واضحة.

• وما تقعدوا تتغالطوا فينا ساكت.

• الايامات دي (التلج) طار السنة.

• وبرّد يا.

• لو نزلتوا الكونفدرالية ..برضو ما ح نستروا.

• ولا بتقدروا على الثبات.

• ولا بتعرفوا تصرفوا كيف؟.

• اول انتوا قالوا ليكم الكونفدرالية ساهلة؟.

• انتوا عارفين الكونفدرالية فيها منو؟.

• الكونفدرالية فيها الزمالك المصري والافريقي.

• يعني احسن ليكم المخارجة الآن قبل ما تصلوا مرحلة الكبار.

• الكونفدرالية ذاتها صعبة.

• ناس عزام وكابوسكورب ديل كان زمان.

• ديل ناس الحمام ذاتهم.

• ناس قريعتي راحت.

• لا عندهم ضهر ..ولا عندهم مجدي شمس الدين.

• انا قلت في السطر الفوق مجدي شمس الدين.

• كمان مجدي شمس الدين الدخلو شنو؟.

• مجدي شمس الدين دخلو البرلمان.

• يا حليل ناس عزام وكابو سكورب …ناس اللعب ديك.

• ناس الحمام.

• ناس المراحلة (التمهيدية).

• خلاص يا مريخاب دخلتوا للجد.

• دخلتوا مرحلة الكبار.

• وانتوا الكبار ما من ناسهم.

• ……..

• ملحوظة : غايتو الهلالاب ديل عندهم جنس فصاحة.
هوامش

• قدر ما نقول خلاص انسترنا مع الهلالاب.

• يقوم الهلالاب يطلعوا لينا بي حاجة تانية.

• انتوا عارفين يا مريخاب ..الهلالاب ديل لو ما خليتوا ليهم البلد ما بترتاحوا.

• الهلالاب ديل انتوا ما بتقدروا عليهم.

• في اي شارع ..بتلقاهم واقفين.

• وبتشمروا كمان.

• هسع الليلة اللـه يشوف الهلال.

• ناس المريخ ..طلعوا.

• الكلام الهلال.

• انتوا قايلين (الاربعة) كتار على حكام افريقيا ديل.

• ديل ممكن يعملوا اي حاجة.

• والظروف ما معروفة.

• قالوا ليك الحكاية جابت ليها (سواطير).

• اها عليكم اللـه يا جماعة (السواطير) دي يلعبوا معاها كيف؟.

• لكن ان شاء اللـه الهلال قادر على الانتصار عديل.

• نحن ناس انتصار.

• بنفوز عديل كدا.

• وبنكرر الفوز بي اربعتو.

• كمان نحن بنلعب.

• الحاجات دي ما فيها لعب يا جماعة.

• انتوا يا ناس المريخ ركزوا مع (الترجي).

• من الليلة ..ما عاوزين نشوف لينا واحد فيكم نايم.

• النايمين ليها شنو كمان؟.

• ……….
• عاجل : لو عارفين الراجيكم ..كنتوا قلتوا يا ريت كابو سكورب لو غلبنا خمسة زي الاهلي شندي.