مجنون (ليلى) ومجنون (ضربات جزاء)

· مجدي شمس الدين قاعد يبالغ معانا عديل كدا…شايلها معانا من (اللجنة المنظمة).

· مجدي من (الغتاتة) العليه ..عيّن لينا حكم من (صينية القندول).

· حكم مجنون رسمي.

· بقى يعزل لينا في (المجانين).

· عليكم اللـه – لو ما ساي نحن ناقصين مجانين.

· نحن ناس (وديدي) النصاح ..وما عندهم اي مشكلة عرفنا ليهم شنو؟..عشان تجيبوا لينا حكام (مجانين).

· ناس الفاضل ابوشنب ..(العاقلين).. اللـه ما كفانا شرهم ..كمان بقيتوا تجيبوا لينا في حكام (فكت منو).

· يا ربي فيكتور مانيويل جوميز (فكت منو) ليه؟.

· الحياة في جنوب افريقيا برضو بقت صعبة زينا كدا.

· لمن الحكام فكت منهم.

· نحن سمعنا بي مجنون ليلي.

· لكن مجنون (ضربات جزاء) دي اول مرة نسمع بيها.

· ضربات الجزاء بقى عندها (مجنون).

· الحكم المجنون (فيكتور مانيويل جوميز) في مباراة واحدة في دوري جنوب افريقيا احتسب ليه خمس ضربات جزاء.

· تقول وارث.

· هسع دي مباراة وإلا ضربات ترجيحية.

· اذا كان جوميز عند اهلو وفي جنوب افريقيا المعروفة بالارهاب والتسلح والخبط من الساعة خمسة ..بيحسب ليه خمس ضربات جزاء في ملاوي بعمل شنو؟.

· برة بعمل شنو؟.

· غايتو اللـه يستر على الهلال.

· فيكتور مانيويل جوميز بعد المباراة ما انتهت ..خلانا نشك في النتيجة كل مرة ندخل المواقع ..نقول الحكم المجنون دا يمكن بعد نهاية المباراة يقوم يحتسب ليه ضربة جزاء.

· مجنون – ما بعيدة عليه.

· امس نحن قعدنا في مباراة الهلال والرصاصات ..قلوبنا في ايدنا ..عليكم اللـه في اغرب من الهلالاب ديل.

· يغلبوا اربعة ..وبرضو خايفين.

· الهلالاب عارفين الحكام ما مضمونين.

· عشان كدا مع (الاربعة) حقتنا ديك ..دخلنا المباراة ..خايفين.

· قلنا الحكم المجنون دا ..ممكن يعمل اي تصرف.

· وهو بالتأكيد ليس عليه حرج.

· ولا بنقدر نشتكيه.

· نقول شنو عاد؟.

· نشتكي لينا (حكم مجنون).

· مجنون وبعملها.

· الامر غير المنطقي ..ان الاتحاد الافريقي وضع (الرصاصات) في يد (مجنون).

· يعني ممكن في اي لحظة يكتل ليه زول.

· رصاصات في يد مجنون.

· عليكم امان اللـه ..قعدت ليك في المباراة ..وخايف في لحظة من لحظات المباراة يقوم يجيني صحن طاير.

· تجيني رصاصة حايمة.

· يقوموا يفكوا فينا كباية شاي.

· كرسي.

· الحكم (مجنون)..ممكن تحصل منو اي حاجة.

· ولا بنقدر نقول شيء.

· مجنون.

· جوميز..لم يترك عادته ..احتسب ليه (ضربة جزاء)..لو جابوا ليها (90) سيحة ما بحسبها.

· موش سيحة قاصدنا ..ضربة الجزاء التى احتسبها جوميز (سيحة) ما كان بحسبها.

· الحكم المجنون دا مع ضربة الجزاء .. نقض للهلال هدف صحيح …لو جبتوا (120) سيحة.. ما في سيحة منهم ساكت بقول الهدف دا ما صحيح.

· في واحد قاعد بيحضر معاي المباراة ..قال لي غريبة لاعبو الهلال لم يحتجوا في ضربة الجزاء ولا احتجوا في الهدف الصحيح الذي سجلوه..يعني ضربة الجزاء صحيحة والهدف الذي سجله الهلال غير صحيح.

· قلت ليه يحتجوا شنو؟..لاعبو الهلال عارفين الحكم (مجنون) يقوموا يحتجوا عليه ..يقوم يطعن ليه واحد بي سكين.

· زول مجنون ..غير مسؤول.

· عشان كدا ما قالوا اي حاجة.

· انتوا ما شفتوا (بشه) بعد نهاية المباراة مشى على حكم المباراة.

· بشه مشى يسأل الحكم عن الهدف الذي نقضه له.

· هدف لا تسلل.

· ولا فيه مخالفة.

· انا ما عارف نقضو ليه؟.

· لكن عاد نقول شنو؟..حكم (مجنون) غير مؤاخذ.

· بعدين جوميز دا ذاتو ما غلطان.

· غلطان مجدي شمس الدين ..البجيب لينا في حكام (مجانين).

· الغريبة ..والحاجة الما قادر القى ليها فهم الى الان ..ناس المريخ ديل برة بمنحوهم ضربات جزاء وبطردوا ليهم لاعب من الفريق الخصم..ونحن يا كافي البلاء ..في بلدنا نقضوا لينا ثلاثة اهداف.

· مشينا برة نقضوا لينا (هدف) ..واحتسبوا علينا (ضربة جزاء) وهمية.

· الحكام ديل قاصدننا كدا ليه؟.

· حتى (المجانين) منهم ..ما عاوزين يريحونا.

· نحن نلقاها من منو وإلّا من منو؟.

· لكن نحن ما قاصدننا الحكام براهم.

· نحن قاصدنا مجدي شمس الدين.

· عشان كدا ما بسأل لينا حكم (مجنون)..بنسأل مجدي.

· عليك اللـه يا مجدي ..هدف بشه دا مالو نقضوه.

· المضحك ان اعلام المريخ كان بطالب ان يكون رئيس بعثة المريخ مجدي شمس الدين.

· كمان.

· قالوا ليكم الموضوع محتاج.

· تلفون من مجدي ساكت ..بوقف ليكم الحكام ديل على فد رجل.

· ……..

· ملحوظة : ناس الترجي ديل عندهم اعلام ..اي ضربة جزاء بتحتسب عليهم ..بقيفوا ليك في رأس مجدي.

هوامش
· تتخيلوا (كيبي) هداف البطولة الافريقية للاندية.

· حالتو مصاب.

· وما بلعب من بداية المباراة.

· تقولوا لي بكري المدينة.

· نحن لو لقينا حكامكم ديل يا ناس المريخ ..(معاوية فداسي) يطلع هداف البطولة.

· لكن نحن نعمل شنو مع الحكام البنقضوا لينا في الاهداف الصحيحة.

· وبحسبوا علينا كمان ضربات جزاء.

· سانغا بولوندي ابعد (القطن) الكاميروني من طريق الهلال.

· سانغا بولوندي ما ساهل ..حقق نتائج جيدة في البطولة ..وهذا يعني ان الفريق قوي.

· كان لفتة رائعة من مجلس ادارة الهلال والجهاز الفني عندما بعث فوزي المرضي الى جمهورية الكونغو لمشاهدة المباراة.

· اكيد الشريط حاضر مع فوزي المرضي.

· سموحة صعد في البطولة الكبري.

· والزمالك حقق انتصارا كبيرا خارج ارضه.

· بالمناسبة (الكونفدرالية) السنة دي اخطر من الابطال.

· كفى ان الزمالك وفيتا كلوب والنجم التونسي والافريقي التونسي والفتح الرباطي بيلعبوا في الكونفدرالية.

· واللبيب بالاشارة بفهم.

· ……..

· عاجل : غايتو بكري المدينة مقلبكم جنس مقلب.