فتح باب التبرعات والجرسة من الترجي

• ما عارف العبقرية وين في (البوستات) البفتحوها دي ؟…الواحد فيهم وقت يقول ليك فتحت لي (بوست) كأنوا فتح ليه مدرسة
• الترجي دا لو قابلتوه بي (همد)..الخريف السنة دي ما بخلي لينا (حيطة) واقفة في ولاية الخرطوم
• لو عاوزين نفطر ..لو ما كوَّنا لينا (لجنة) للفطور ما قاعدين نفطر..شفتوا (غسيل الأيادي) بنكوِّن ليه (لجنة)
• يلا ورينا شطارتك يا همد…أوعك تقول لينا اتفاجأنا بـ (الترجي) زي ما بتقولوا لينا اتفاجأنا بـ (الخريف)
• مرة قلنا نعمل لينا أسبوع ثقافي…(نضبح لينا ليمونة).
• طلعنا الكراسي بره ..وفتحنا ليك (بوست) جديد.
• أنا ما عارف العبقرية وين في (البوستات) البفتحوها دي ؟.
• الواحد فيهم وقت يقول ليك فتحت لي (بوست) كأنوا فتح ليه مدرسة.
• العلم تطور.
• والدنيا اتغيَّرت.

• والساعة أربعة (شوكة) بقت تجي إلّا ربع.
• والكوارع بقت يجيبوها ليك في القائمة.
• وقت تطلبها ..يجيبوا ليك (سليقة) على انقاض (كوارع) من سنة 1906م.
• نحن أصلاً كدا.
• ما قاعدين (نتلفت).
• التلفت ذاتو ممكن يمنعوه كلياً..عشان فيه إزعاج سلطات.
• تتلفت ليه؟.
• امشي عديل.
• وقت يكون ما عندنا موضوع ..بنفكر في الأسابيع الثقافية.
• الأسابيع الثقافية عندنا زي (البطيخ).
• رغم أنو البطيخ ما عندو علاقة بالأسابيع الثقافية.
• لكن نقول شنو؟.
• ما بنقدر نقول اكتر من كدا.
• نسكت.
• وبرّد يا.
• أنتوا اقعدوا طيّروا لي في عيونكم دي ..لمن (الترجي) يضربكم سبعة.
• قلنا نعمل لينا أسبوع ثقافي.
• أهو موضوع ..على الأقل نخفف بيه على الجماعة شوية.
• نجيب ليك (الموية الباردة) ونقعد نتناقش في المواضيع الثقافية.
• الثقافة في البلد دي كلها بقت أسمنت وسيخ وطوب.
• أنا ما عارف علاقة الأسمنت والسيخ والطوب بالثقافة شنو؟.
• غايتو حاجات برصرصوها لينا كدا من الصباح ..ما قاعدين نفهم فيها أي شيء.
• قدر ما شربنا ليها (قهوة) ما فهمنا حاجة.
• كوَّنا لينا (لجنة).
• عاوزين تغالطونا في (لجانا) القاعدين نكوِّنها.
• نحن فاضيين وما عندنا أي شغلة.
• لو عاوزين نفطر ..لو ما كوَّنا لينا (لجنة) للفطور ما قاعدين نفطر.
• شفتوا (غسيل الأيادي) بنكوِّن ليه (لجنة).
• قاعدين ..وما عندنا أي شغلة غير تكوين اللجان.
• على كيفنا.
• إن شاء اللـه نعمل لينا (لجنة) للضل.
• لجنة خلع الضرس.
• لجنة كتل الجذور.
• لجنة الحشوة.
• لجنة متابعة مسلسل (الخطيئة).
• لجنة الاستعداد للخريف.
• لجنة مرقة العصرية.
• لجنة كبابي الشاي.
• لجنة الكوبري.
• لجان حقيقية – ولجان وهمية.
• وقت يكون ما عندنا موضوع بنعمل لينا (لجنة).
• على كيفنا.
• ولا في زول بقدر يسألنا.
• ولا في زول بقدر يقول لينا حاجة.
• لجنة الترجي.
• لجنة ترجي الترجي.
• لجنة الترجي (أ).
• لجنة الترجي (ب).
• لجنة أبو الترجي.
• لجنة عم الترجي.
• لجنة الترجي غير الترجي دا.
• شفتوا الترجي دا براهو عاوز ليه (920) لجنة.
• لجنة الصهريج.
• لجنة البوش.
• نختار الرئيس ونائب الرئيس والمقرر والأعضاء.
• وننوم على كدا.
• قفلنا على كدا.
• كدا خلاص ..عملنا العلينا.
• نحن قلنا أسبوعنا الثقافي دا عاوزنو يكون في (البكا) في الأغنية السودانية.
• تاريخ البكاء في الأغنية السودانية.
• جبنا لينا علماء جيولوجيا دموع ..وقلنا ليهم حدثونا عن (البكا) في الأغنية السودانية.
• شوفوا لينا (الفهم) دا نهايتو وين؟.
• ناس الجيولوجيا ..مسكوا لينا (الدموع) من (الأسكلا وحلا) إلى أن وصلنا إلى ( يا الماشي لي باريس جيب لي معاك عريس).
• وألم الفراق ببكي.
• وابكي واشكي لي مين؟.
• وعينيا ما تبكي.
• وبعد دا كلو كمان بتشكي ما كفاية الشفتو منك واللـه اكتر من ببكي.
• ويا نجوم الليل اشهدي على بكاي وتسهدي.
• والبكا ما بجيبو لي.
• والدموع السائلة مني لما سألت حرقتني.
• والدمعة لو بتعين كان بدري عانتني.
• ما خلوا لينا أصلو حاجة.
• ونحن بي صراحة كدا (البكا) الموجود في الأغنية السودانية كنا قاصدين بيه حاجة تانية.
• عندنا فهم تاني.
• عندنا قصد برانا.
• عاوزين نشوف موضوع (البكا) من أغنية الحقيبة إلى (الجرسة) البعملوا فيها المريخاب الآن من مواجهة (الترجي) التونسي في مرحلة دور الـ (16).
• بعد البكا ..تجاوباً مع الجماعة ..فتحنا ليك موضوع (الجروح).
• يا المصيرك تنجرح.
• والجرح جرحي براي منو البداوي معاي.
• وأصلي مجروح مرتين.
• والجرح الأبيض.
• وتجرحني ليه وأنا كلي جراح.
• ولحظك الجرّاح.
• غايتو يا جماعة الكورة دي ..أي زول بتديه قدر نيتو.
• شيلوا (جروحكم) دي عليكم ..واتخارجوا لينا من هنا ..نحن فترنا من (البكا) البتعملوا لينا فيه دا.
• شوفوا ليكم حل.
• شوفوا ليكم علاج.
• اعملوا مقصورة.
• نظموا سيكافا.
• رجعوا الحضري تاني.
• اتصرفوا ..ما تقعدوا لينا كدا.
• اعملوا ليكم حاجة.
• دورنا ليك في الأسبوع الثقافي كدا زي الحلاوة.
• لا خلينا همد.
• لا متوكل أحمد علي.
• مسكنا ليك (سرور) أغنية ..أغنية.
• كرومة.
• ود الفكي.
• زنقار.
• ما خلينا حاجة.
• وكل دا عشان شنو؟.
• عشان نشوف هل موضوع (الجرسة) دي متجذرة في المريخاب من بدري ..وإلّا كمان الحاجات دي جات مع السلم التعليمي الجديد.
• قادر اللـه.
• علم واللـه.
• السلم التعليمي لخبط الحكاية .. للمريخاب فوق تحت.
• والفول المصلح ذاتو ..بقى (زيت) ما فيه.
• المقررات غيَّروها.
• الضرب بقى ما في (الجداول) براها ..زي ما كان زمان.
• والقسمة كمان .
• ونحن ما فاهمين أي حاجة.
• قلنا ليكم ..(المقرر الدراسي) غيَّروه.
• جابوا ليهم مقررات جديدة.
• زمان كان عندنا (دجاجي يلقط الحب ويجري وهو فرحان).
• هسع الدجاج بقى لا بلقط ليه (حب) ..ولا بفرح.
• دا كان زمان.
• يقولوا ليكم الكلام ألف مرة.
• الحاجات دي (الجداد) اتجاوزها زمان.
• حب شنو ؟..البخلي ليك (الجداد) يفرح.
• حكاية (لي قطة صغيرة سميتها سميرة)..بقت ما بتقسم مع شفع الزمن ديل.
• كديسة شنو؟.
• يمين شفع الزمن ديل ..الواحد فيهم لو جاب ليه (عفريت)..يقنع ليك العفريت عشان يطلع يلعب معاهو بره.
• تلقى العفريت قاعد يشكي من (زمزغة) الشافع البيلعب معاه بلاستشن.
• شفع شفوت.
• لذلك ..نحن بنعتقد ختاماً لأسبوعنا الثقافي هذا ..تفتحوا باب التبرعات.
• أصلوا الجماعة ديل ..لو عملوا ليك أي حاجة ..بقولوا ليك (نفتح باب التبرعات).
• يا خالد الوزير ..دا (الباب) الوحيد الفاتح.
• فالحين لي بس للتبرعات.
• الواحد فيهم لو عاوز يقلع ليه ضرس ..بقول ليك نفتح باب التبرعات.
• دا البتعرفوا ليه.
• يا جماعة نحن مع فتح باب التبرعات ..عاوزين نفتح باب الجرسة من (الترجي).
• ما تقعدوا تتجرسوا لينا.
• لو ما قادرين على الشغلة دي ..شوفوا ليكم (سيكافا) مستعجلة.
• يقولوا ليكم الكلام مية مرة.
• الترجي دا لو قابلتوه بي (همد)..الخريف السنة دي ما بخلي لينا (حيطة) واقفة في ولاية الخرطوم.
• أنا ما عارف همد يلقاها من منو ولّا من منو؟.
• من الخريف ولّا من الترجي؟.
• الترجي والخريف ..السنة دي ح يجوا في فصل واحد.
• يلا ورينا شطارتك يا همد.
• أوعك تقول لينا اتفاجأنا بـ (الترجي) زي ما بتقولوا لينا اتفاجأنا بـ (الخريف).
• …….
• ملحوظة : الخريف بنقدر عليه ..الكلام الترجي.
هوامش
• ناس الهلال كلموهم يركزوا لينا في الممتاز.
• عندهم مباراة مع مريخ كوستي في أم درمان.
• ومباراة مع الرابطة في كوستي.
• نحن ما بنقبل تفريط.
• لا في البطولة الأفريقية ..ولا في الدوري المحلي.
• كلو عندنا مهم.
• افتحوا باب الاستحقاقات المحلية.
• وانسوا لينا موضوع البطولة الأفريقية الآن.
• جماعتكم ملخومين بالترجي.
• قالوا وفد المقدمة الترجاوي وصل.
• الجماعة ديل مالهم ضايقين كدا.
• كمان ناس الترجي بيلعبوا.
• بحسموها من أول ربع ساعة.
• عشان كدا ..ركزوا لينا شوية يا جمال سالم.
• فتحوا عيونكم.
• نحن تاني ما فاضيين نوصيكم.
• ولا عدنا وقت.
• ما تقعدوا ترجفوا لينا قبل 15 يوم من المواجهة.
• …….
• عاجل : ناس الترجي ديل قالوا المريخ وجزيرة الفيل عندهم واحد ..نوع ديل بتفاهموا معاهم كيف يا بشاشة ؟.