(الطيران) لتونس بيستغرق (7) ساعات لكن انتوا (طيرانكم) في (7) دقائق

· يوم التلاتاء العصر ..الزول ديمة بيكون مفلس وما عندو قروش ..وماشي براهو في الشارع

· ابوترقوة نطط عيونو متل (السيوتر)..وقال ليه (مجموعات) شنو؟..إلّا مجموعة (اي دمعة حزن لا لا) في الواتساب

· عندهم (استاذ) متل يوم التلاتاء العصر.

· ينفخ ليك في (حروف الجر) متل (الزلابية).

· ينفض ليك في الحروف – حرف حرف ..بي طرف لسانو.

· ويتفتف.

· الواطة سخنة.

· والكهربة قاطعة.

· لكن (المراوح) شغالة احساس منها بس.

· مراوح احساسها عالي.

· والشفع حايمين في الشوارع متل باقى السلطة.

· يوم التلاتاء العصر ..الزول ديمة بيكون مفلس وما عندو قروش ..وماشي براهو في الشارع.

· وشايل هم الاربعاء.

· وكيس الرغيف.

· الاستاذ دخل الفصل ..(زي آخر الشهر).

· كافح ليك الطلبة بي سؤال قاطع.

· قال ليهم انتوا (الفيل) بيطير؟.

· واحد من الطلبة .. ظاهر عليه (مفتح)..وعيونا في نص ضهرو…تلفونو (جلاكسي).

· رفع ايدو.

· الاستاذ قال ليه قوم…تقوم قيامتك.

· الطالب قال ليه يا استاذ (الفيل) بيطيّر لو قابل (الترجي).

· امانة ما بطير طيران.

· الفصل كلو قعد يصفق.

· ما فاضل ليهم إلّا يجيبوا (انصاف مدني).

· قالوا ليك (مريخابي) شفقان.

· النوع البكون واقف في شارع الزلط بكورك للركشات بدون ما يكون عندو مشوار.

· زولكم (الشفقة) كاتلاهو..مشى ليه لي (فكي).

· قال ليه يا الفكي (ابوترقوة) ..المريخ ما بصعد للمجموعات؟.

· ابوترقوة نطط عيونو متل (السيوتر)..وقال ليه (مجموعات) شنو؟..إلّا مجموعة (اي دمعة حزن لا لا) في الواتساب.

· يصعد!!.

· طيب (الكونفدرالية) دي عاملنها للقمح المحور الوراثي؟.

· المريخابي ..قال ليه ..ما تشوف لينا طريقة يا ابوترقوة.

· ان شاءالـلـه (ضربة جزاء).

· اي حاجة.

· ابوترقوة عاد يبقى ليك (البتسواني).

· نحن لو نزلنا (الكونفدرالية) بي (بكري المدينة) دا..الهلالاب ما بقعدونا في الواطة.

· يمسخوا لينا حياتنا.

· بكرهونا الحلة.

· نوم ما بنومو معاهم.

· يمين تاني (بطاطس) ما نقدر ناكلها.

· الفكي قال ليه ..اوعك تدخل (البطاطس) في مواضعكم دي.

· البطاطس ذنبها شنو؟.

· كل حاجة ولا البطاطس.

· الشيخ كان بحب (البطاطس).

· المريخابي قال ليه ..اشمعنا (البطاطس) زعلتك كدا ..كانت من بقية اهلك.

· الشيخ اتبرم.

· المريخابي قال ليه ..شوف لينا طريقة ..اي حاجة ..نحن (الكونفدرالية) دي مع الهلالاب بتجيب لينا (نفسيات).

· ابوترقوة قال ليه ممكن تتأهلو ..بي شرط واحد بس.

· المريخابي قال ليه شنو؟…اصلو ما في مشكلة.

· اشرط يا شيخنا.

· اصلو ما بنقصر معاك.

· ابوترقوة قال ليه بتتأهلو لو (الترجي) انسحب.

· المريخابي قال ليه ..لكن ما صعبتها شوية!!.

· شوف لينا حاجة تانية.

· شوف لينا حاجة اسهل من كدا.

· ابوترقوة قال للمريخابي ..خلاص انا ح اعمل ليكم (عمل) لو نجح معاكم ..بتصعدوا المجموعات قبل الهلالاب.

· المريخابي قال ليه بس..دي العاوزة انا ذاتها..ريحتني في قلبي.

· ابوترقوة قال ليه جيبوا ليكم (بطيخة).

· المريخابي قال ليه بطيخة (جوية).

· ابوترقوة ضرب ليك الواطة ..وقال ليه ..شوف انا عشان حركاتكم دي ما قاعد اريدكم.

· انتوا لو نزلتوا (الكونفدرالية) بتنزلوا عشان حاجتين.

· عشان فصاحتكم دي..ومصطفى الاغا.

· المريخابي قال ليه مصطفى الاغا ذنبو شنو؟.

· ابوترقوة قال ليه (مصطفى الاغا) يضحك البرنامج كلو تقول بيقلي ليه في بن.

· الزول دا مالو عامل كدا زي دولاب الهدوم الفاتح؟.

· وبتراشق كمان.

· فاكر (الرشاقة) ضحك.

· مصطفى الاغا دا ..السوريون فنانهم جوروج سوف ..هو فنانو (جمال الوالي).

· اول مرة اشوف لي زول بيخلعو (الجنيه السوداني).

· المريخابي لقي ليك ابوترقوة علق ليك في مصطفى الاغا ..قال يثبتو.

· قال ليه : اها بعد ما نجيب البطيخة؟.

· ابوترقوة ..قال ليه تقطعو البطيخة…يعني ح تصوروا معاها.

· المريخابي ضايق ..قال ليه لو طلعت (حمراء) بنصعد؟.

· ابوترقوة قال ليه : ابدا.

· المريخابي قال ليه : لو طلعت (بيضاء)؟.

· ابوترقوة قال ليه : ابدا.

· المريخابي قال ليه طيب بنصعد لو طلعت شنو؟.

· ابوترقوة قال ليه بتصعدو لو طلعت (الوان الطيف).

· المريخابي قال ليه لكن ما صعبتها علينا يا مولانا.

· ابوترقوة قال ليه ..انت ما تقول الحمدلله …ما قلت ليك لو طلعت (حمار الوادي).

· المريخابي عرف ليك موضوع (الوان الطيف) في (البطيخ) صعب.

· مستحيل عديل كدا.

· قال ليه لو بقت على (الوان الطيف) ..احسن لينا الكونفدرالية.

· نجيب ليك (بطيخة) الوان الطيف من وين؟.

· نحن كان عندنا بطيخ الوان الطيف ..كان بنغلب 1 / صفر بس.

· وبي ضربة جزاء.

· وما صحيحة كمان.

· كدا يا ابوترقوة شوف لينا حاجة اخف من حكاية البطيخ دا.

· شوف لينا حاجة كدا بسيطة.

· ابوترقوة ..قال للمريخابي ..جيبوا ليكم (سحلية).

· المريخابي قلب ليك عيونو..وقال ليه اوعك تقول لينا احلبوا (السحلية)..او طلعوا ليها اربعة صور بسبورت ..وكبروا ليها صورة في مدخل كوبري شمبات.

· ابوترقوة ..قال ليه ابدا والـلـه ..ما ح اقول ليك كدا..ح اقول ليك حاجة صغيرة خالص.

· المريخابي قال ليه : اها بعد ما نجيب (السحلية) نعمل ليها شنو؟.

· ابوترقوة قال ليه تبخروها.

· المريخابي قال ليه البخور ساهل…بعد ما نبخرها.

· ابوترقوة قال ليه ..تجيبوا ليكم نجمة خشبية كبيرة ..وتضعوها قدام السحلية.

· المريخابي قال ليه لو مشت على النجمة المريخ ح يصعد لمرحلة المجموعات.

· ابو ترقوة قال ليه ابدا..لو (النجمة) مشت على (السحلية) ح تلعبوا (ضربات ترجيحية).

· المريخابي وشو اتكرفس ..وقعد يطنطن براهو.

· قال لي ابوترقوة ..يا شيخنا شوف لينا حاجة تانية ….نحن (السحالي) دي ذاتو ما ناسها.

· ولا عندنا ليها صبر.

· ولا فايقين للمواضيع دي.

· ابوترقوة ..قال للمريخابي خلاص ح اشوف ليك حاجة بسيطة.

· ابوترقوة قال للمريخابي انت عندك كم شافع؟.

· المريخابي قال ليه عندي (12) شافع غير ولاد خالتهم.

· ابوترقوة قال ليه تجيب ليك كيلو باسطة.

· المريخابي قال ليه ..ايوا كدا ..أهو دا الشغل.

· من قبيل كان تقول لينا (الباسطة) دي.

· ابوترقوة ..قال ليه تجيب ليك كيلو باسطة الساعة السادسة مساء.

· المريخابي قال ليه وبعد كدا.

· باسطة دي وإلّا نشرة.

· السادسة مساء اوعك تقول لي جيب معاها منى الشاذلي.

· ابوترقوة قال ليه اصبر يا زول.

· الباسطة تدخلها في التلاجة..وتعمل حسابك واحد من شفعك ما يشوفك.

· المريخابي قال ليه وبعدين؟.

· ابوترقوة قال ليه تقوم الصباح ..لو لقيت (الباسطة) في تلاجتها ..ما في شافع هبشها ..ح تصعدوا.

· ولو كمان لقيت الباسطة انضربت زي (الكوبري)..اقنع من مسألة التأهل ..وابقوا على (الكونفدرالية) ساكت.

· المريخابي قال لي ابوترقوة ..يا مولانا ..انت قلت لي (السحلية) بعد ما نبخرها ..نعمل ليها شنو؟.

· ما قلتوا بتتأهلو.

· إلّا يعملوا ليكم كدا.

· إلّا يجيبوها ليكم كدا بالسحالي عشان تقع ليكم.

· عالم ما بتجى إلّا بالسحالي.

· لكن يا مريخاب عجبنا ليكم.

· بقيتوا تفتشوا في (السحالي).

· حالتكم صعبة شديد.

· حالة اخير منها (ملاح القرع).

· والـلـه (ملاح القرع) لو عارف حالتكم دي …كان حمد الـلـه على (قرعتو) دي.

· ………..

· ملحوظة : نحن لو عارفين الموضوع صعب كدا ..كنا جبنا ليكم معانا (سحالي) من كينشاسا.

· هوامش

· كمان كينشاسا فيها جنس سحالي.

· شفتوا الفريق من يقعد يفتش في (السحالي) اقنعو منو.

· الروح حلوة.

· خراج الروح صعب.

· الكونفدرالية ما تعسكروا ليها اكتر من كينيا.

· هسع جمال الوالي يقول قفلنا ملف البطولة الافريقية.

· وفتحنا ملف الكونفدرالية.

· غارزيتو ..في الكونفدرالية ..شكلو ببقى عجيب.

· غارزيتو اصلو بتاع كونفدرالية.

· غارزيتو الهلال طيروا من الكونفدرالية.

· غلب هنا 2 / صفر.

· ومشى اتغلب برة.

· وطار.

· ابقوا طايرين.

· في واحد من الهلالاب الشفوت.

· قعد يحسب فيها.

· قالوا ليها رحلة الطيران من هنا لي تونس (7) ساعات.

· قال ليهم ..لكن جماعتنا ديل (طيرانهم) في (7) دقائق بس.

· ما بصمدوا اكتر من كدا.

· يا ناس النسور – الجماعة ديل جاينكم وقلبهم واقف.

· حالتهم صعبة.

· وما قادرين يفكروا.

· الكونفدرالية اول اسبوع ما بتنقعد.

· جمال سالم ما يعملها في المعز.

· يا المعز اوعك.

· غدا ان شاءالـلـه نلتقي في (من الغلاف للغلاف).

· ……………..

· عاجل : لو ما عاوزين تطيروا امشوا تونس بي (مركب)..اوعكم من الطيارة.