محمد عبد الماجد

ما فاضل ليهم إلّا يلعبوا مع (احلام مستغانمي)


اوعكم تقدسوا الجزائريين ديل ممكن يبيعوكم …احسن حل تشيلوا (الصرفة الاولى) وتطلعوا منها
الجزائريون ديل من (الرد كسل) اتأهلوا لكاس العالم ..غالبهم يعني يتأهلوا الى المربع الذهبي في البطولة الافريقية

· عملة الجزائر (الدينار).

· جنيهاتكم دي …حدها شارع بانت.

· اشهر الاكلات الشعبية في الجزائر (الكلاج الني).

· يعني عصيدة (الباكمبا) ما بتنفع في الجزائر يا بكري المدينة.

· اشهر شوارع الجزائر (شارع ديدوش مراد).

· ما تمشوا تضهبوا لينا ساكت في الجزائر.

· خليكم عارفين.

· بقى في ملح وملاح ومباريات معاكم.

· الزول (الجديد) في المجموعات ظاهر.

· تلقاه شايل (فرشة المعجون) حقتو في جيبو الخلفي.

· الشلاقة اصلو ما عاوزة ليها اتنين يتغالطوا فيها ..تفتحوا في عيونكم متل (كيس الخضار).

· وتاكلوا في (قصب السكر).

· وتكدوا في (الدوم).

· وتصنقعوا في المروحة.

· يا اللـه – اللـه.

· زي الزول الجديد الفي (الواتساب)..لو جاتو (رسالة) يقوم جاري على التلفون.

· وبدون ما يشعر كدا يمشي يقيف قدام التلاجة.

· زي البعمل ليه في حاجة غلط.

· يحس ليك ان الناس ديل كلهم بتابعوا فيه.

· وانو مراقب من الجميع.

· وعليه ان يقوم بالرد على (الرسالة).

· يتلبد في الرد …تقول في (مطرة).

· الزول (الجديد) في المجموعات ظاهر – بدون سبب تلقاه قاعد (يتشهق).

· ويحك في نخرتو.

· ويلوك في ضفورو.

· ويضحك ليك في النكتة البايخة.

· برلمة (المجموعات) شينة.

· خاصة في (الكبر).

· الزول الكبير ..وما بحترم سنو.

· تلقاه بيلبس في (التي شيرتات).

· وقاعد في الحدايق.

· وبحضر في الافلام الاجنبية.

· وداخل واتس واب.

· وبرسل في الرسائل كمان.

· عايش ليه (قصة حب).

· عامل عيونك (الشتر) ديل.

· عيونك زي ربطة الحطب.

· عليكم اللـه لو ما شلاقة منكم ..في زول بقع ليه مع تلاتة اندية جزائرية.

· دي شلاقة اصلو ما شفناها.

· وقعتوا في شر اعمالكم.

· كان اخير ليكم الكونفدرالية من الحالة دي.

· التلتلة دي لا بتقدروا عليها ولا حاجة.

· عندنا واحد قريبنا ..سافر الجزائر يقرأ في جامعة جزائرية ..تصوروا وقع في جامعة فيها كل العرب.

· الجامعة ما طلعت للجزائرين فقط.

· جاء راجع من الجزائر (فرنسي) عديل كدا.

· كلمة عربية واحدة ما قاعد يقولها.

· اوعكم تدقسوا الجزائريين ديل ممكن يبيعوكم …احسن حل تشيلوا (الصرفة الاولى) وتطلعوا منها.

· الجزائريون ديل من (الرد كسل) اتأهلوا لكاس العالم ..غالبهم يعني يتأهلوا الى المربع الذهبي في البطولة الافريقية.

· ام درمان ضربوا فيها المصريين.

· الواحد فيهم وقت يقول ليك ام درمان زي الولدوه فيها.

· عندو زي مسقط الرأس.

· عندهم معزة كبيرة لام درمان.

· انتوا جنيتوا عاوزين تبيعوا الموية في حارة السقايين.

· ديل عندهم مليون شهيد…غير الجرحى.

· مليون شهيد.

· ما بلعبوا في الحاجات دي.

· بيخبطوا طوالي.

· ولا بتلفتوا.

· غايتو محتاجين قبل ما تلعبوا في مرحلة المجموعات تثقفوا.

· ما تمشوا ليهم بي ثقافتكم المحدودة دي.

· المباريات دي ما بقت كورة بس.

· المباريات بقت ثقافة وعلم وفنون.

· يعني الحركات البتعملوها لينا في (سيكافا) …في (المجموعات) ما تعملوها لينا.

· المجموعات دي ما لعب.

· دي مسؤولية كبيرة.

· اول حاجة لازم تعرفوا ان (وردة الجزائرية) اسمها الحقيقي ما وردة الجزائرية.

· وردة الجزائرية اسمها الحقيقي (وردة فتوكي).

· لو سألوا بكري المدينة من اسمها الحقيقي وما عرفو ..طوالي الحكم بمنحو (الكرت الاحمر).

· ما بجاملوا في الحاجات الزي دي.

· غلطة زي دي (كرت احمر) طوالي.

· خلوا بكري المدينة الايامات دي يحفظ اغنيات وردة الجزائرية.

· انصاف مدني دي يا بكري المدينة في الجزائر (سيكافا) ما بتدخلكم.

· انصاف مدني لا.

· كلموا علاءالدين يوسف ..قولوا ليه وردة الجزائرية دي كانت متزوجة الموسيقار المصري بليغ حمدي.

· امير كمال حفظوه الاغنية دي (بتونس بيك وانتى معايا بتونس بيك وبلاقي بقربك دنيايا).

· امير كمال لو ما حفظ الاغنية دي ولا يفكر يدخل (الجزائر).

· انتوا الجزائر ح تسافروا ليها تلات مرات.

· اقرأوا.

· اتعلموا.

· ما تمشوا تعملوا لينا (حركات) سيكافا في الجزائر.

· احلام مستغانمي بتقول – ما تفتحوا خشمكم ساكت.

· في الجزائر ما في (رمية تماس) بيجدعوها من غير ما تقول ليك حاجة لاحلام مستغانمي.

· ابقوا عارفين.

· تقول احلام : ( لا تسألوني لماذا لا أحبّ بوش الأب ، لا بوش الابن ، ولا بوش الأمّ . واذا كان لا بدّ لي ان اختار واحدا من آل بوش ، فساختار الكلبة بوش ، تلك التى اثناء اقامتها في البيت الابيض ، وبصفتها الكلبة الاولى ، اختارت ان تضع مواليدها في غرفة نوم الرئيس ممّا جعل السيّدة باربارة تخرج للملأ فرحة ومرتبكة كأمّ العروس ، لتعلن للصحافة أنها اصبحت جدّة لستّة كلاب صغار يتمتّعون جميعهم بصحّة جيّدة ، وأنّها ، حفاظأ على راحتهم ، وضعت زوجها خارج غرفة النوم الرئاسية!).

· الكلام دا حفّظوه بله جابر.

· بتحتاجوا ليه في الجزائر.

· بله جابر لو بحفظ كلام زي دا كان فتح ليه عيادة.

· كان ساق ليه طيارة.

· ح تلعبوا ثلاث مباريات في الجزائر ..لازم تكونوا عارفين اي حاجة عن (احلام مستغانمي)..عشان ما تمشوا تفضحونا هناك.

· ما فاضل ليكم إلّا تلعبوا مع احلام مستغانمي.

· الموضوع بقى ما كورة بس.

· واحلام مستغانمي بتقول : ( اكبر لغزين في الحياة هما قطعا الموت والحبّ.

· كلاهما ضربة قدر صاقعة لا تفسير لها خارج (المكتوب) . لذا تتغذي الاعمال الابداعية الكبرى من الاسئلة الوجودية المحيرة التى تدور حولهما.

· ذلك أن أحد لا يدري لماذا يأتي الموت في هذا المكان دون غيره ، ليأخذ هذا الشخص دون سواه ، بهذه الطريقة لا بأخرى ، ولا لماذا نقع في حب شخص بالذات؟ . لماذا هو؟ لماذا نحن؟ لماذا هنا. لماذا الآن؟).

· الكلام دا بتقولو احلام مستغانمي.

· الفرق الجزائرية بتلعب بالخطة دي.

· انتوا قايلنها بتلعب بي الخطط الكروية المعروفة بالعالم.

· من هسع ناس (ضفر) الكلام بتاع احلام مستغانمي لو ما وقع ليكم … احسن تنزلوا للكونفدرالية.

· البقعدكم مع الجماعة ديل شنو؟.

· ديل لا بتصاقعوا ولا حاجة.

· ولا بتقابلوا.

· في زول عاقل كدا بسافر الجزائر في رمضان.

· انتوا قنعانين من نفسكم.

· غايتوا نسبة المليون شهيد ح تزيد في الايام القادمة.

· لو بعثتكم سافرت بقوام يتكون من (42) شخص …الجزائر ح تبقى بلد المليون شهيد و(42) شخص.

· لو سافرتو بـ (37) – الجزائر ح تبقى بلد المليون شهيد و(37) شخص.

· النسبة ح تزيد ح تزيد.

· اصلو ما في ذلك شك.

· ……..

· ملحوظة : انتوا قايلين المجموعات دي حلوة.

هوامش

· المجموعات دي حاجة صعبة.

· فيها سفر.

· وفيها جزائر.

· المريخ مع الاندية الجزائرية دي بقى ليك زي النسور مع الهلال والمريخ والاهلي شندي.

· مفروض تقرأوا فرنسي.

· اتعلموا اللغة الفرنسية.

· الظروف ما معروفة.

· ناس المريخ ح يسافروا الفاشر مرتين.

· والجزائر ثلاث مرات.

· المريخ ح يسافر عطبرة مرة واحدة.

· والجزائر ثلاث مرات.

· الاندية الجزائرية قالت السنة دي لقينا (الهابط).

· يعني ممكن عادي المريخ يهبط من الدوري الانجليزي.

· وفد المقدمة بتاعكم ..خلوه (يستقر) في الجزائر.

· وفد المقدمة (وعلاءالدين يوسف).

· علاءالدين يوسف ما بقدر على السفر الكتير دا.

· قرعة الهلال مناسبة جدا.

· الهلال يمكن ان ينتصر على مازمبي ذهابا وايابا.

· بس سجلوا لينا صاح.

· سموحة فريق بدون جماهير وهذا امر يسهل للهلال مباراة مصر.

· ربما الخطر الحقيقي في مجموعة الهلال يتمثل في فريق المغرب التطواني.

· علينا الانتباه ان المغرب التطواني ومازمبي ايضا يمكن ان يحققوا نتيجة ايجابية في مصر امام سموحة.

· لذلك يجب ان نعطل مازمبي والمغرب التطواني في ملاعبهم.

· الموسم الماضي خرجنا لأن الزمالك كان الحلقة الاضعف في فقدان نتائج مبارياته في ارضه.

· اضافة الى تفريط الهلال في بعض النقاط داخل وخارج ملعبه.

· ………….

· عاجل : اقرأوا روايات احلام مستغانمي كلها …عشان تكونوا عارفين.


‫3 تعليقات

  1. عذراً لأنني أضعت من وقتي الثمين و قرأت بعض مما كتبت يا سيدي ، أنت بحاجة الى علاج نفسي مكثف ، و إعادة تأهيل .
    يبدو أن الحرب في السودان أضابتك بالعمى حتى تجرأ بالحديث عن الجزائر و أحلام مستغانمي ..

  2. لا ادرى لماذا تذكرنى مقالاتك بأبى دلامة .. اظنك ممن ينطبق عليهم قول الشاعر .. :كأنك صعوة فى أصل حش *** اصاب الحش طش بعد رش !!!!!

  3. يا ايمن كلامك بديته بيا سيدى ونهيته اخر بهدلة علاقة الحرب بالعمى بالجزائر شنو خليك فى حالك وريح نفسك ويا د الشريف مقالات ابو دلامة دا انت بتقراها ليه مجبور فى مسدس فى راسك ويا محمد عبد الماجد من ابداع لابداع واستمتاع شديد والما عاجبو يمشى سواكن ينط فى البحر وشكرا