بكري المدينة طلع (معاكم الكاميرا الخفية) الـلـه يستر على (الجوهرة)

· الكاردينال بي (عضمة لسانو) قال القروش العندنا الحكومة ما عندها – الحكومة ما عندها اتعاب المحامي

· لو (محامي) بجهجهكم – ح تعملوا شنو مع (الاسمنت)؟..الـلـه يستر على (الجوهرة)..ما يتموها لينا (جالوص)

· الاتحاد العام حبس القضية عندو زي قضية مباراة المريخ والامل اربعة شهور لمن الموضوع انتهى

· يقولوا ليك قضية بكري المدينة وصلت (لوزان) وهي من كبري النيل الازرق ما فاتتو

· سبعة شهور – عماد الطيب ينزل ويطلع.

· بدلة وكرفتة.

· وتصريحات.

· واحمد مطر.

· ما كان يقوله عماد الطيب ..(احمد مطر) ما كان بقولو.

· ومحمود درويش.

· ومظفر النواب.

· كلام كبير ..وثقة مبالغ فيها – ونحن واقفين متل (الجواكر) في نص اللعب.

· زي استعدادات الولاية للخريف.

· متل الناس العندها مناسبة.

· غسل يا ولد.

· يا ولد اجري جيب ليك صينية.

· اقعدوا يا جماعة.

· شكلوا ليكم مجموعة.

· الموية يا ولد.

· ما خلينا حاجة.

· الحجاج بن يوسف لو كان موجود كلام زي دا ما بقبل بيه.

· الحجاج شغل زي دا ما بنفع معاهو.

· ولا بقبل بيه.

· والكاردينال مرة في النيل الازرق.

· ومرة في حفل استقبال اللاعبين.

· ومرة في الامارات.

· ومرة في لندن.

· ومرة في تصريح صحفي يؤكد ان قضية بكري المدينة قضية شخصية له.

· وان حدهم (لوزان).

· والسماء قريب.

· وما في قطوعات كهربة.

· والموية قوية.

· الكلام دا كان بسمعّوا لينا زي (محفوظات سنة تالتة).

· ونحن نشيل (ونلحن).

· مرة برعي محمد دفع الـلـه.

· ومرة بشير عباس.

· ومرة ود الحاوي.

· قربنا نبقى (عوض الكريم عبدالـلـه) ونغني (اسمعني يا شادي).

· الغريبة في الوقت داك – لا بجيبوا سيرة للتكلفة – ولا بشيلوا هم (الاتعاب).

· الجرسة دي ظهرت الآن.

· الموضوع دا كان مافي.

· رسوم الشكوى عرفتوها يا دوب.

· حسبوتها الآن يا عمدة.

· سبعة شهور كنتوا قاعدين وين؟.

· عماد الطيب كان كل (48) ساعة بكلمنا عن القضية المضمونة.

· وكانت (لوزان) اقرب ليهم من (الكلاكلة اللفة).

· معقولة دي كانت (لفة) ساكت.

· بعد الغش دا كلو – بتجوا تتكلموا الآن عن اتعاب المحامي.

· بتتكلموا عن (رسوم) الشكوى.

· يعني ممكن (الكاردينال) يطلع هسع دي ويقول لينا (الاسمنت) قطع.

· والسيخ طار السما.

· لو (محامي) بجهجهكم – ح تعملوا شنو مع (الاسمنت)؟.

· الـلـه يستر على (الجوهرة).

· ما يتموها لينا (جالوص).

· يا جماعة الكلام دا ما تقولوه انتوا.

· ولا نحن بنقبلوا منكم.

· ما خليتوا محامي سويسري.

· وصلتوا الحد.

· ما خليتوا شيء للاتحاد العام.

· الاتحاد العام حبس القضية عندو زي قضية مباراة المريخ والامل اربعة شهور لمن الموضوع انتهى.

· والقضية بردت.

· والكاردينال بقى يحسبها.

· لو دي طريقتكم – الـلـه يستر على (الجوهرة الزرقاء).

· نحن تاني ما بنصدق اي شيء.

· لا جوهرة ولا ميسي.

· يقولوا ليك قضية بكري المدينة وصلت (لوزان) وهي من كبري النيل الازرق ما فاتتو.

· على كدا (الجوهرة الزرقاء) يمكن في النهاية تطلع (غرفة).

· او بالكتير كدا برندة وغرفتين.

· يقولوا ليك (ميسي) ييجبوا ليك (جوليام).

· يقولوا ليك (جيان) يجيبوا ليك (كيبي).

· انتوا فاكرننا نحن (اعلام المريخ)…البعملو مجلسهم كلو بقولوا عليه (دا احسن شيء).

· يستقيل جمال الوالي ..يقولوا ليك الاستقالة دي من اجل استقرار المريخ.

· والمريخ في مهمة وطنية.

· يزعل جمال الوالي..يقولوا ليك ما يزعل ان زعل ما في وزول بدفع مع جمال الوالي…فهي زعلة من اجل المريخ.

· والمريخ في مهمة وطنية يا داؤود مصطفى!!.

· يرجع جمال الوالي ويسحب استقالته – يقولوا ليك جمال الوالي سحب استقالته يا جمال الوالي.

· والمريخ وين؟.

· المريخ في مهمة وطنية.

· نحن (الحركات) دي ما بتنفع معانا.

· ما فلاحة مننا – لكن عشان الهلال كدا – وجمهور الهلال ما بقبل اللف والدوران.

· وكلام الجرايد.

· كلام الجرايد ما قاعدين نعملوا في الجرايد.

· اعملوه انتوا يا مريخاب.

· يا كاردينال البتعمل فيه دا غلط.

· ما غلط عشان سحبتوا القضية او شطبتوها.

· غلط عشان سبعة شهور بتتكلموا عن القضية المضمونة وعن (لوزان) والمحامي السويسري.

· غلط يا كاردينال.

· لو دفعت (40) مليار غلط.

· لو فعت (140) مليار ..برضو غلط.

· لو عملت استاد الهلال (15) طابق ..غلط.

· لو جبت ميسي ذاتو – غلط.

· القروش ما بتغير الحاجات.

· ولا بتعصمك من النقد.

· اعمل حاجاتك دي كلها – وقت تغلط – بنقول ليك (غلط).

· كان ترضى او تزعل.

· تدفع ..او تقدم استقالتك زي جمال الوالي.

· الكاردينال بي عضمة لسانو قال القروش العندنا – الحكومة ما عندها.

· الحكومة ما عندها اتعاب المحامي.

· الحكومة طلع ما عندها اي قروش.

· قروشها قطعت.

· بقت على اتعاب المحامي.

· طيب الجوهرة دي ح تموها لينا (بيانات).

· المجموعات دي بتشاركوا فيها (تحويل رصيد).

· اذا تعامل مجلس الهلال مع الاعلام ومع الجماهير بهذه الصورة – يبقى من حق الناس ألا تثق في المجلس.

· مرة قالوا لينا في قناة للهلال.

· فضائية الهلال.

· الفضائية طلعت في (النت).

· طيب بتقولوا فضائية ليه؟.

· في (النت) ذاتها ما شفناها.

· وقت (قوون) جابت الكلام دا – قلتوا قوون بستهدف الهلال.

· نحن بنحسب يا الكاردنيال.

· ما تفتكر الموضوع بمشي كدا.

· قالوا لينا (الثريا).

· وعقد الثريا.

· ومعسكر (الثريا).

· الكاردينال تاني براهو طلع وقال الموضوع ما اكتمل.

· يعني يا هلالاب.

· لا قناة.

· ولا ثريا.

· ولا لوزان.

· موضوع بكري المدينة ذاتو طلع ما عندهم ليه حق اتعاب المحامي.

· طيب بتتفاصحوا في شنو؟.

· 7 شهور بتتكلموا.

· وعماد الطيب بصرح.

· وبتحدي.

· والكاردينال بطلع في قناة النيل الازرق – وبقول لو عاوزين (ميسي) بنجيبو.

· انتوا حق اتعاب المحامي في قضية بكري المدينة ما عندكم – عاوزين تجيبوا (ميسي).

· سيدي بيه ذاتو فرطو فيه.

· ووليد الشعلة سجلوه – وسجلوا (الصيني) في الكشف الافريقي.

· في حاجات غلط كتيرة في الهلال.

· اعلام الهلال ما بسكت.

· اعلام الهلال بتكلم.

· عشان كدا الهلال بمشي لي قدام.

· نحن ما بنحلم بي مجلس يكون ما بغلط.

· لكن كمان انتوا يا ناس المجلس ما تحلموا بي انكم تعملوا حاجاتكم دي ..ونسكت عليكم.

· نحن لو سكتنا – جمهور الهلال ما بسكت.

· جمهور الهلال واعي ..وراقي وعارف اي شيء.

· وهو اقدر على التقويم.

· شوفوا الحاصل براكم.

· وقيموا الموضوع.

· يا الكاردينال باقى ليك (الجوهرة).

· ابقى عليها عشرة.

· وشد حيلك مع الهلال عشان يفوز باللقب الافريقي وتسجل اسمك في تاريخ العظماء.

· ح تبقى اخطر رئيس.

· وح تحقق اعظم انجاز.

· اربط الحزام.

· وابقى عشرة على فريق الكورة.

· يبدو ان السيف الوحيد الذي سوف تقاتل به – ولن يخذلك هو فريق الكورة.

· ابقى عشرة على الفريق.

· وكمّل (جوهرتك).

· لكن مع كل هذه الاشياء.

· مع كل الانجازات – وقت تغلط ..بنقول ليك غلطان.

· وح نكتب عنك زي ما بنكتب عن (عبدالصمد).

· الحجاج لو كان قاعد – الكلام دا ما بفوت ساكت.

· ولا بغشكم.

· …………….

· ملحوظة : بيانكم دا يا عماد الطيب …مفروض يكون بيان (سري).

هوامش

· دا بيان ليكم.

· تاني البصدقكم منو؟.

· اعملوا ساكت.

· ما تتكلموا.

· ما في زول بيصدقكم بعد كدا.

· سيدي بيه فات.

· ونيلسون مصاب.

· وكيبي سافر فرنسا.

· في فوضى في الهلال.

· الشغل دا ما شغل بطولة.

· مرقتونا من (لوزان)…ما تمرقونا من (اليابان).

· اليابان دي ما بنقبل فيها.

· ولا بنجامل.

· مباريات خارج الارض – اصبحت اقل ضغط من مباريات داخل الارض.

· على الاقل مباريات خارج الارض بتلعبها بدون ضغط اعلامي وجماهيري.

· الهلال امام مازيمبي قدم مباراة اجمل من مباراة سموحة.

· سموحة بس فيها هدف نزار حامد.

· مباراة التطواني نتوقع ان يقدم الهلال ان شاءالـلـه مباراة رائعة.

· ونسأل الـلـه ان ينتصر الهلال عديل.

· التعادل ما كفاية.

· نحن بنبحث عن (الصدارة).

· التعادل ممكن يأهلك.

· لكن الانتصار بيجعلك تتصدر المجموعة.

· خلوا هدفكم كبير.

· ما ترضوا بي نقطة.

· عاوزين النقاط التلاتة.

· ………..

· عاجل : قضية بكري شطبوها في الجزائر وشطبوها في لوزان.