اهداف الهلال في النسور على طريقة (التعليم من بعد)

يبدو ان لاعبي الهلال علموا ان (ابوعشرين)…عندو (عشرة) من اسمو بخليها برة (القون)
ما عاوز اغالط لي زول ولا عاوز اقول شيء – لكن ابوعشرين ناس (الثعلب) ديل فكوه عشرتين

بس تاني ابوعشرين دا – عشان المصلحة العامة ما تجيبوه لينا (كاش) جيبوه لينا (شيك)

واحد من الهلالاب (الشفوت) شايو ملعقة سكر واحدة قال لو (زيكو) كان بلعب في (النسور) كان فيصل موسى ما نفذ ضربة الجزاء

· مباراة الهلال والنسور يمكن ان نلخصها في عبارة (مباراة الاهداف من بعد) على طريقة (التعليم من بعد).

· دا شغل بتاع (جامعات).

· ودراسات عليّا.

· واهداف ملعوبة.

· نفس الطريقة والفهم – والملايات الجديدة.

· معليش (الملايات الجديدة) ما في داعي ليها مع العبارة دي.

· ولا لايقة في الكلام.

· متل شبابيك الصف الخامس في آخر اليوم الدراسي (يقولوا ليكم الكلام مية مرة).

· في ناس الى يومنا هذا بسددوا في (اقساط) ملايات العيد.

· لو لقيتوا ليكم (طحنية) ما كعبة معاكم.

· لكن الاهداف كانت كدا على طريقة (التعليم من بعد).

· مرفق مع العمود هدف الثعلب التاني وهدف وليد الشعلة وكيلو طحنية.

· قاعد اجيب ليكم حاجة من برة.

· بقطع ليكم من رأسي.

· بتخيل لي في حاجات.

· دا الحاصل.

· يبدو ان لاعبي الهلال علموا ان (ابوعشرين)…عندو (عشرة) من اسمو بخليها برة القون.

· بقيف على دفعتين.

· غايتو ما عاوز اغالط لي زول ، ولا عاوز اقول شيء – لكن ابوعشرين ناس (الثعلب) ديل فكوه عشرتين.

· واحد من الهلالاب الشفوت ..قال لي حارس النسور اسمو (ابوعشرين) جابو فيه اربعة اهداف.

· قسموا العشرين على اربعة.

· يعني حارس النسور دا لو كان اسمو (ابوخمسين) كان جابوا فيه (عشرة) اهداف…الـلـه شافكم.

· مفروض يا ناس النسور تحمدوا الـلـه.

· بس تاني ابوعشرين دا – عشان المصلحة العامة ما تجيبوه لينا (كاش) جيبوه لينا (شيك).

· اعملوا حسابكم.

· واتعظوا من عصام الحضري.

· عصام الحضري عبداللطيف بويا جاب فيه قون ..عمكم الحضري الى وقتنا هذا مفتكر نفسو مشارك في حرب اكتوبر.

· زولكم رجع مصر تاني يوم – قال ليهم بلا حوض سباحة بلا لخمة معاكم.

· والـلـه لو جبتوا لي مزرعة بتاعة احواض سباحة تاني ما بقعد ليكم.

· ناس بويا ديل ما في حارس عاقل بيقعد معاهم.

· الحارس لو طلعوا ليه جنسية سودانية عشان يركز ما بقعد.

· برجع تاني.

· مهند الطاهر كان كل ما يشوف عصام الحضري بجيب فيه قون.

· لو شافوا في (طيارة) مهند الطاهر كان بجيب قونو.

· لاعبو الهلال ذاكروا (ابوعشرين) كويس – عشان كدا دخلوا المباراة زي كأنهم كاشفين (الامتحان).

· السؤال الاجباري ما عندهم فيه ولا غلطة.

· الكوكي بصصهم لورقة الاسئلة ..فنجحوا نجاحا كبيرا – رغم ان خبراتهم قليلة وهم يلعبون المباراة الاولى لهم في الدوري الممتاز وامام حضور جماهيري ..يوقع (اللقمة) من الخشم.

· النوم يطير من عينك.

· ولاد صغار في السن.

· اتخيلوا كدا – ونحن قاعدين في شارع النيل نشرب في القهوة – اتخيلوا كدا ناس الثعلب والشعلة يلعبوا امام كبار السن في المريخ.

· ما عاوزين نقول (عواجيز).

· لكن من حقنا كدا نسأل من الموهبة ابراهومة.

· من حقنا ان نسأل من شمس الفلاح.

· في المريخ المواهب بتضيّع ساكت.

· اذا ضيعوا موهبة في حجم أحمد الباشا القائد واللاعب صاحب الخبرات الكبيرة ما يضيعوا ناس ابراهومة.

· غارزيتو يحول في (ضفر) متل (مروحة التربيزة)…من خانة لي خانة.

· زي المروحة الواحدة في البيت.

· وقت الاب يكون عاوز ينوم يفتحوها ليه.

· وقت الام يكون عندها حلة ..بتشغلها في المطبخ.

· وقت الولد يكون عندو مذاكرة ..بيجيبو ليه المروحة الواحدة دي ويشغلوها قدامو.

· مروحة واحدة.

· غارزيتو هسع شغال بي نفس النظرية.

· يحول في ضفر من خانة – خانة.

· وعشان الموضوع ما يبقى ظاهر – غارزيتو مرة يشرك ضفر في الشوط الاول – ومرة يجيبو في الشوط التاني.

· جماعتكم ديل تحليتهم بي (ضفر).

· طبعا اللاعب الذي يدخلوه في الشوط التاني مفروض يكون لاعب كبير بقدر يغيّر النتيجة.

· زي مهند الطاهر زمان.

· او زي بشه لمن كان بدخل في الشوط التاني.

· بشه كان بدخل يغيّر النتيجة.

· ولا بنتلفت.

· بشه بشوف النتيجة كم..بعاين اول حاجة في لوحة الاستاد يشوف النتيجة ويدخل.

· دخلتو الملعب بغيّر ليك النتيجة.

· ناس المريخ شغالين بي (ضفر).

· واحد من الهلالاب (الشفوت) شايو ملعقة سكر واحدة قال لو (زيكو) كان بلعب في (النسور) كان فيصل موسى ما نفذ ضربة الجزاء.

· قلت ليه : ليه؟.

· قال لي عشان (زيكو) بشيل الكورة ويطلع.

· شفت يا زيكو انت بتدخل نفسك في حتات بايخة.

· بتختوا نفسكم في حتات بايخة.

· براك بتجيب السيرة يا زيكو …وانت السيرة دي بضايقك.

· يمين نفك (بلة جابر) ونمسك في (زيكو) – لمن ترجع (الكورة) المفقودة من سنة 1996م.

· بلة جابر ذاتو قطعها معانا.

· بقينا ما بنشوفه في الكنبة.

· سألنا عن علي جعفر.

· قالوا لينا علي جعفر دا تاني في حصة التربية الريفية ما ح تشوفوه.

· راجي ما عليه تكل.

· ضفر ما اساسي.

· بكري المدينة …وجودو زي عدمو.

· زمان يا ابراهومة قلنا ليك لو عاوز تلعب ..لو عاوز تمتع نفسك ..تعال الهلال.

· في المريخ ما ح تلعب.

· لو بتنقطها ما بتلعب.

· الفرق بين جمهور الهلال وجمهور المريخ ان جمهور الهلال بحمي المواهب.

· جمهور الهلال بحب اللعب الجميل.

· عشان كدا لو عاوز تطرب جمهور الهلال وتسعدو جيب ليه هدف جميل.

· والحمدلله الايامات دي (ماكينة) الاهداف الجميلة شغالة.

· يمكن الموضوع بدأ من هدف نزار حامد في سموحة.

· المصريون قالوا الهدف دا في (الاهرامات) ما شافو متلو.

· اكتمل الجميل بي هدف اندرزينهو في التطواني.

· هدف خلى ليك المغاربة ينومو من مغربهم.

· وجاء شباب الهلال في مباراة النسور وطبقوا (التعليم من بعد).

· صهيب الثعلب جاب ليه هدف في ابوعشرين ..خلانا نقول طيب الزول دا اسمو ابوعشرين ليه؟.

· ابوعشرين ويجيبو فيك هدف من جبل اولياء.

· هدف الثعلب فيه (ثعلبة) كورة (مقوسة).

· شفتوا يا مريخاب انتوا بتتكلموا عن الكورة المقوسة.

· الكورة المقوسة زي كورة الثعلب التى سجل منها هدفه الاول.

· الكورة التانية والتى جاءت ايضا على طريقة (التعليم من بعد) هدف الشعلة.

· هدف وليد الشعلة فيه السرعة والخفة وحسن التصرف والقوة.

· وليد الشعلة …المدافع الاول ابعدو من غير ما يشعر والمدافع التاني ابعدو لكن شعر بذلك.

· الحارس الشفقان اتقدم شوية – الشعلة كشحو ليك.

· هدف جميل ذكرنا بي صفوف استاد الهلال ..ودخول الجماهير للمباراة من الساعة اتنين.

· هدف زي دا بخلى الجمهور يدخل وبجيب الناس.

· مباراة النسور ايضا كانت فيها لقطة ما بتنقص روعة عن هذه الاهداف.

· تصويبة صلاح الجزولي الذكية ايضا كانت على طريقة (التعليم من بعد).

· قلت ليكم مباراة الهلال والنسور طبقنا فيها نظرية (التعليم من بعد).

· قعدتوا تغالطوا.

· انتوا ما عارفين – نحن اي حاجة عندنا بي نظام.

· يا جماعة نحن ما بنتكلم ساكت.

· واحد تالت من الهلالاب قال لي انت ما شفت الثعلب اتألق كيف؟.

· قلت ليه كيف ما يتألق وقاعد ليه في الاحتياطي مدثر كاريكا.

· قام واحد رابع قال لي طيب الصيني اتألق ليه؟.

· قلت ليه عشان الشغيل.

· اتخيل الشغيل قاعد ليك في الكنبة ..يمين لو ما بتعرف تلعب تجضمها.

· بشه الصغير – قاعد ليه في الكنبة بشه الكبير ..وعاوزنو ما يقطعها.

· يا جماعة انتوا بتتكلموا ساكت.

· …………

· ملحوظة : بعد كدا الواحد لو لقى ليه قطعة طحنية بكون ما قصر.

هوامش

· جميل ان يضاعف الكاردينال الحافز لشباب الهلال.

· والاجمل من هذا ان يتم تحفيز الفريق الاساسي برضو.

· لولا مساوي وكاريكا وبشه والشغيل ونزار حامد ومكسيم ما كان ح يكون عندنا شباب زي ديل.

· شفتوا احتفال بشه الكبير مع الثعلب عندما سجل من (الثعلبة) الاولى.

· حفزوا مساوي وكاريكا وبشه والشغيل ونزار حامد ومكسيم – ديل الناس البجيبو لينا البطولة الافريقية.

· راحة مساوي وكاريكا وبشه والشغيل ونزار حامد ومكسيم اهم من تألق الشباب.

· يوم الجمعة تعالوا لابسين الابيض والازرق.

· عاوزين الاستاد كلو ابيض وازرق.

· اللون الابيض يوم مباراة النسور كان لايق على الهلال هيبة وجمال وروعة.

· الهلال لا بد ان يلبس الزي الابيض في بعض المباريات.

· ما تعصروا على (الازرق) كتير.

· ……..

· عاجل : جمال الثعلب قالوا في امريكا قام من النوم فجأة – سبحان الـلـه – القلوب (ثعالب).