البقت بقت يا اللـه عفوك ورضاك والموضوع داك

الريح علي وعلي جعفر زي (الدعوة) لو ما مفكر تجيب ليك قون وقت تشوفهم بتخابطو بتجيب قونك
صاحبكم رزاق نفض ليك ناس الريح علي وعلي جعفر زي طلبة الأساس وقت يقولوا ليهم (بيوت)

· البقت شنو؟.

· مباراة التطواني.

· مباراة هلال كادوقلي.

· والبقت بقت.

· طبعا تعادل هلال كادوقلي بعد الخسارة امام التطواني بقى لينا زي (الغرامة) بعد (الجلد).

· الموضوع ما اتبلع لينا.

· نعترف ليكم بعد خسارة المريخ في عطبرة.

· نقول ليكم الحقيقة ..نحن ولا بنغشكم..بنقول ليكم الحاصل.

· نحن طبعا الدوري الممتاز عندنا مهم ..وما بنحب نلعب فيه …اي خسارة فيه او تعادل ما بتبلع لينا فيه.

· ولا بنقبل.

· ولا بنسامح فيه.

· الممتاز بطولة خاصة للهلال ..حققنا فيه ارقام (قياسية)..واصبحنا في الغالب لا نقبل فيه اي خسارة.

· ولا بنخسر.

· في اسوأ الاحوال ممكن نتعادل.

· خسارة لا.

· بنلعب في الممتاز زي ما بنلعب في البطولة الافريقية.

· ولا عندنا فرق.

· عشان كدا التعادل امام هلال كادوقلي في اخر دقائق المباراة (مرارته) لم تكن تقل بي اي حال من الاحوال عن الخسارة امام التطواني.

· ما عرفنا نعمل شنو؟.

· لكن في النهاية قلنا البقت بقت.

· نعمل شنو عاد؟.

· يا اللـه عفوك.

· يا اللـه رضاك.

· خسارة في المقبرة وتعادل في كادوقلي.

· بلعناها ..الى ان جات مباراة (رزاق)..صاحبكم دا نفض ليك ناس الريح علي وعلي جعفر زي طلبة الاساس وقت يقولوا ليهم (بيوت).

· علي جعفر والريح علي (الزهور والورد) …لو اتلموا في مباراة واحدة ..اي (مشجع) ممكن يطلع (هدّاف).

· الريح علي وعلي جعفر زي (الدعوة) لو ما مفكر تجيب ليك قون وقت تشوفهم بتخابطو بتجيب قونك.

· المهم البقت بقت …(التطواني وهلال كادوقلي)..تعالوا شوفوا (الموضوع داك).

· واصلا انتوا بتكونوا خليتوا اي حاجة ومسكتوا لي في (الموضوع داك).

· ح تقعدوا تشرعوا لي.

· ناس ح يقولوا (العلمة).

· وناس ح يقولوا الموضوع داك (اتحاد العاصمة) الجزائري.

· وناس ح يقعدوا يتمتموا لي في الموضوع.

· كل واحد ح يطلع ليه (علبة هندسة) ويقعد يشرع ليك في (الموضوع داك).

· وانا لا قاصد الموية.

· ولا قاصد الكهربة.

· الموية والكهربة الجابها هنا شنو؟.

· يا جماعة نحن بنتكلم في (الموضوع داك) – من حق اي زول يتخيله زي ما هو ما عاوز.

· المواضيع ديك كتيرة ..من حق اي زول يتخيلها بي طريقتو.

· انا لو عاوز اقولها ليكم ..ما كان قلت ليكم (الموضوع داك).

· لو عاوز احدد ليكم الموضوع كان قلتوا ليكم ..ما كان علقتكم كدا.

· بس ان شاءاللـه اللـه يحقق لينا (الموضوع داك).

· ربنا يحقق لينا امانينا كلنا…وخاصة (الموضوع داك).

· نحن متفقين عليه ..وما في اختلاف حول (الموضوع داك).

· الموضوع داك لو اتحقق …واللـه (البطيخ) في السوق يرخص.

· والشوارع تبقى (نضيفة).

· والمطر تصب.

· ونفك (الشفع) في الحوش ..يا اولاد ادخلو جوة ..المطرة دي بتجيب ليكم (إلتهابات).

· نقطع السلطة.

· نغسل (الطماطم).

· ونخت الشاي في النار.

· بس اللـه يحقق لينا (الموضوع داك).

· ناس بابكر سلك ..ح يقعدوا يقولوا لينا (الارضية).

· ونحن بنلعب بالصف الاول.

· وبنفكر في حاجات تانية.

· وعندنا ضربة جزاء ما احتسبوها لينا.

· ويرجعوا تاني يقولوا ليك دا الصف التاني.

· انتوا عندكم صف اول – عشان يكون عندكم صف تاني.

· صفكم الاول وصفكم التاني ..صفوفكم العشرة كلها ..ما فيها غير (بكري المدينة).

· صفهم الاول بكري المدينة.

· صفهم التاني بكري المدينة.

· صفهم الثالث بكري المدينة.

· المضحك ناس المريخ ..احرجهم ليك موضوع (رديف) الهلال.

· شعروا ليك بالاحراج.

· جمال الوالي في الرياضية قال اصدر تعليماته بالاهتمام بالرديف ..ونادي بالتسجيلات السنية.

· يا راجل.

· بقيتوا تعرفوا (الرديف) الآن.

· جمال الوالي طبعا ما يشوف ليه حاجة في الهلال – إلا يقول عاوزها.

· اتلح ليك هيثم مصطفى دا لمن جابو المريخ.

· انتظروا (17) سنة.

· اصلو ما قنع.

· عمر بخيت دا ..انتظروا (12) سنة.

· عمر بخيت مشى الاهلي الخرطوم – برضو ما قنعو منو.

· اي حاجة في الهلال هم عاوزنها.

· شارقهم.

· عاجباهم.

· بكري المدينة.

· غارزيتو.

· هسع الجماعة شارقهم (رديف الهلال).

· ناس جمال الوالي شافوا ليك ناس بشه الصغير والثعلب ومحمود ام بدة والصيني ..قالوا عاوزين غارزيتو يعمل نفس الحاجات دي.

· اتخلعوا.

· غارزيتو جاب ليهم شيبوب وابراهومة ..وبقى في كل مرة يتحدث عن ابراهومة وشيبوب.

· شيبوب بلعب من زمن الموردة في الممتاز…ويقولوا ليك صغير.

· اجبرنا ليك غارزيتو يشرك ابراهومة في عطبرة.

· عارفين دا كلو ليه؟.

· عشان الهلال عندو (رديف) ما شاءاللـه عليه.

· اتغلبوا طوالي.

· ابراهومة شنو؟.

· وجماعتكم ديل اي حاجة يشوفها في الهلال عاوزين يعملوا زيها.

· شوفوا المريخاب الموسم القادم بعملوا شنو في (الرديف).

· احرجناهم بي رديفنا.

· وهم ما عندهم مواهب زي مواهب الهلال.

· ما عندهم امكانيات قدر امكانياتنا دي.

· بلافحو ساكت.

· جمال الوالي دا مرة قال لي مدرب المريخ عاوزك تلعب بي نفس الطريقة التى يلعب بيها الهلال.

· تفتكروا جمال الوالي هسع ما يقول لي غارزيتو لعب لينا (الرديف).

· وقت يتغلبوا ..يقعدوا يهاجموا في غارزيتو.

· بس يا اللـه ربنا يدينا (الموضوع داك).

· ان شاءاللـه الموضوع يتحقق.

· عشان ارجع ليكم بكرة واحدثكم باذن اللـه في نفس الموضوع.

· اللـه يشوفنا من ضربات الجزاء البدون سبب.

· اللـه يحفظنا من (الكروت الحمراء).

· والهدايا الما في ليها داعي من (الحكام).

· ناس عطبرة صعبين ..ما بعرفوا الخرمجة دي ..(ما في اي ضربة جزاء).

· ناس الفاشر ..ولا بكضبوا ..(المريخ في النقعة خسران – خسران).

· ناس شندي ما عندهم حكم بيلعب.

· عشان كدا المريخ ما بقدر يحقق انتصارات في شندي او عطبرة او الفاشر.

· عارفين ليه؟.

· عشان (الحكام) هناك ما بقدروا يحسبوا (ضربات جزاء) ساكت.

· ما بقدروا يتكرموا ليك بي الكروت الحمراء.

· ناس المريخ ديل مرة كانوا لاعبين في استادهم ..بعد الحكم ما طرد ليهم لاعب من مريخ الفاشر وبعد ان منحهم (ضربة جزاء)..قالوا ليه طلع لينا (الشرطة) برة الاستاد.

· شفتوا الناس ديل بتحكموا كيف في استادهم.

· الحكم بنفذ ليهم طلباتهم كلها.

· لكن مع ذلك ..بنقول ان شاءاللـه ربنا يحقق لينا (الموضوع داك).

· عشان تفهموا حاجة.

· عشان تعرفوا شيء.

· ونحن في الانتظار.

· (املنا) كبير.

· (املنا) خطير.

· قالوا ليك (رزاق) قال لو لقي (المعز محجوب) تاني في مباراة ببقى هداف للممتاز.

· ………..

· ملحوظة : يا اللـه ..يا رب (الموضوع داك).

· هوامش

· غارزيتو شكلو قرب.

· مغادرته حانت.

· شوفوا الكلام دا.

· المريخاب الذين طلعوا اشاعة عن الاستغناء عن الكوكي سوف يطالبوا براهم بي رحيل غارزيتو.

· رحيل غارزيتو سوف يكون حقيقة.

· ما اشاعة زي رحيل الكوكي.

· أحمد آدم من الشخصيات القوية ..والبتعرف شغل الكورة والعندها شخصية مؤثرة.

· احمد آدم قريب من لاعبي الرديف.

· وبعرف قدراتهم.

· مباراة مازيمبي ..مباراة مصيرية في تاريخ الهلال.

· مباراة تحدد ان كان الهلال قادر على اثبات حقه ام لا؟.

· مباراة العمل فيها يجب ان يكون جماعي.

· من اللاعبين ومن الجهاز الفني وقبل ذلك من الجماهير.

· حكاية الضغط على اللاعبين ورمي القارورات في ارض الملعب ..امر يمكن ان يخرج الهلال لا قدر اللـه من البطولة كلها.

· الهلال فقد مباراة التطواني بسبب الضغوط.

· التطواني والحكم عرف ان يخرجوا الجمهور من اجواء المباراة.

· فريق مازيمبي عندو نفس الخبرة.

· عشان كدا ما تستجيبوا لاستفزازات لاعبي مازيمبي.

· ما تدوهم اي فرصة.

· الهلال امام التطواني لعب في ارضه لكنه فقد عنصر الزمن.

· والجماهير بدل ما تكون للمساندة بقت للضغط.

· الاعلام ايضا ساعد في ذلك الضغط ..وفي التضخيم.

· نحن نعترف بذلك.

· كلنا شركاء في الاخطاء.

· لذلك يجب ان نعمل جميعا من اجل التعويض.

· ويا رب الموضوع داك.

· ………

· عاجل : الموضوع داك ان شاءاللـه عاوز ليه (من الغلاف للغلاف).