محمد عبد الماجد

(المريخ) شارك أفريقياً بفضل (الهلال) وصعد لنصف النهائي بفضل (الاتحاد)


· الهلال بقى يمثل في بطولة الأندية الأفريقية هو و(وصيفه)…الهلال بقى يجيب (وصيفه) معاه…المشكلة وصيفنا بقى يقلب السمكة
· الأهلي شندي والخرطوم الوطني – مفروض السنة دي يشدوا حيلهم عشان يطلعوا من الكونفدرالية ويمثلوا في الأبطال
· مازيمبي بعد فصاحتكم دي ووصولكم للمربع الذهبي بيرجعكم تاني لي (عدسكم)

· أنا أول مرة أشوف لي حكم بفرح وقت المريخ يجيب ليه قون (أكتر) من أحمد عبداللـه ضفر
**************

· مية و(20) مرة – قصدت واحدة أعملها ليكم بالعربي وواحدة بالأرقام (عشان ناس المريخ ما يفهموا حاجة)…مية و(20) مرة غير (البطيخ) الحايم ساكت – مية و(20) مرة قلت ليك ناس المريخ ديل زي زول كمال ترباس القطعها معه ترباس.

· الزول البكون معزوم وما دافع ليه قرش للسمك في (المطرة) دي ..يقوم يتبرع من عندو كدا …ويقلب (السمكة).

· يقلب لونك أنت.

· الحاجة البتغيظ ..في ناس بيستعجلوا ذاتهم للموضوع دا.

· الواحد من (اللقمة) التانية يقوم يقلب ليك (السمكة).

· شناة طبع بس – عاد نقول شنو؟.

· بفتكروا الموضوع دا فيه (ثقافة).

· أو هو نوع من (الرشاقة) المستحبة و(الظرافة) الجميلة – والجرأة في الحتات دي.

· يا جماعة الشغل دا ما كدا.

· الاستعجال في الأحوال الزي دي ما كويس.

· ناس المريخ – زي زول كمال ترباس تماماً.

· معزومين – وما دافعين قرش – وبيقلبوا (السمكة) كمان.

· ح تقول لي كيف؟.

· ح أقول ليكم.

· ح أوريكم.

· يعني ح تفتكروا أفتح ليكم الموضوع وما أقول ليكم (النظرية).

· موضوع قلبة السمكة دي – أصلو ما بخليه يفوت ساكت.

· ولا قاعد أجامل فيه.

· معروف – ومعلوم لي أي زول في الدنيا – أي زول عارف الكلام دا ..معروف أن المريخ يشارك في بطولة الأندية الأفريقية للأبطال بفضل الهلال.

· الموضوع ولا عاوز ليه (قرن شطة).

· لا قرن شطة ولا مصطفى توفيق.

· أي زول عارف الحكاية دي.

· تقدم الهلال المستمر ووجوده الدائم في مرحلة المجموعات هو الذي جعل الاتحاد الأفريقي يمنح السودان فرصة التمثيل في البطولة الأفريقية للأبطال بأربعة أندية.

· اتنين في الأبطال.

· واتنين في الكونفدرالية.

· لولا الهلال – كان هسع لا بي ان سبورت – ولا أقوال الصحف ذاتها.

· نحن مفروض يحفزونا.

· مفروض يكرمونا – رفعنا حصة السودان في التمثيل الأفريقي إلى أربعة أندية.

· حقنا دا يا جماعة احفظوه لينا.

· ما تمرقونا ساكت.

· الموضوع دا كلو من ناس هيثم مصطفى ومدثر كاريكا وبشه (كتر خيرهم) ..هم الذين أجبروا الاتحاد الأفريقي على رفع تمثيل السودان في البطولات الأفريقية إلى أربعة أندية.

· لولا الهلال كان المريخ ما عندو أي فرصة يمثل في (الأبطال) – البطولة المحتكرة للهلال وصاحب الرصيد والأرقام القياسية فيها.

· كمان نحن بنلعب.

· سيادة طوالي وسيطرة مستمرة.

· الهلال بفضل تقدمه والنتائج التى حققها في السنوات العشر الأخيرة – حيث تواجد في مرحلة المجموعات في كبرى البطولات الأفريقية أكثر من سبع مرات خلال عقد من الزمان.

· الهلال بقى يمثل في بطولة الأندية الأفريقية هو ووصيفه.

· الهلال بقى يجيب (وصيفه) معاه.

· المشكلة وصيفنا بقى يقلب السمكة.

· قابلتكم قوة عين زي دي.

· واللـه أنتوا (العدس) كتير عليكم – بقيتوا تقلبو في (السمكة).

· أيامكم واللـه.

· زي الشافع الشوبير ..تسوقو معاك زيارة ..يقوم يفضحك فضيحة.

· أول حاجة يقيف ليك قدام (علبة الحلاوة) لمن عدادها يصفر.

· وقت يجيبوا ليك (العصير) – قبل ما ينزلوا الكبابي ..الشافع بيستلم كبايتو.

· وغير دا تلقاهو معلق الزيارة كلها في (الستائر).

· ويفتح الدرج.

· ويشيل الريموت كنترول.

· شفع الزمن دا صعبين – أنا ما عارفهم جايبنهم من وين؟.

· الفضائيات الكتيرة دي تكون أثرت في تربيتهم.

· عينهم بقت قوية.

· ولا بخافوا ليك من زول.

· المريخ هسع دخل (دوري أبطال أفريقيا) ضيف – بي (صحبة راكب) برضو ..وعاوز يستلم الموضوع.

· واللـه هانت الزلابية.

· مازيمبي بعد فصاحتكم دي ووصولكم للمربع الذهبي بيرجعكم تاني لي (عدسكم).

· العدس أصلو ما بفوتكم.

· أوعكم تتعودوا لينا على (السمك).

· ومثلما دخل المريخ للبطولة الأفريقية وشارك فيها بفضل الهلال – المريخ تأهل لنصف النهائي بفضل الاتحاد.

· يعني فريق أشركهم في البطولة.

· وفريق صعدهم للمربع الذهبي.

· هم ما عملوا أي حاجة.

· واللـه بعد الكلام دا – ليهم حق يقلبوا ليك (السمكة).

· أصلو ما غلطانين.

· لاقين (الهمريب) دا.

· ناس يشاركوا في البطولة الأفريقية (صحبة راكب) ويتأهلوا للمربع الذهبي (صحبة راكب) برضو – ما ليهم حق يقلبوا (السمكة).

· أنتوا عملتو شنو عليكم اللـه؟.

· شوية (التشطيبات) الأخيرة قام بيها (لامبيتي).

· أنا أول مرة أشوف لي حكم بفرح وقت المريخ يجيب ليه قون (أكتر) من أحمد عبداللـه ضفر.

· دي قابلتكم.

· سمعتوا بيها.

· لامبيتي القون بجيبو (أكرا) بدل ما يجري على (النص) – بجري على (المقصورة).

· عاوز شنو في المقصورة؟.

· زولكم زي الكمساري الشفقان شديد.

· عاوز يخلصها قبل العربية ما تقوم!!.

· (ضربتين) جزاء في مباراة واحدة – أنتوا لاعبين ضد (داعش).

· الكورة دي كانت في (الفلوجة).

· (ضربتين) جزاء.

· وكمان معاهن حالة طرد.

· كرم مبالغ فيه.

· منظمة خيرية عديل كدا.

· مباراة المريخ أمام مازيمبي في الخرطوم سوف يحكمها الجزائري الحمودي.

· يعني ما في أي ضربة جزاء.

· كلموا غارزيتو يوقف التدريبات على ضربات الجزاء.

· خلاص انسوا الموضوع دا.

· ركزوا على حاجات تانية.

· لن تصرف ليكم ضربة جزاء واحدة في نصف النهائي.

· خلاص.

· دا قرار نهائي.

· الأهلي شندي والخرطوم الوطني – مفروض السنة دي يشدوا حيلهم عشان يطلعوا من الكونفدرالية ويمثلوا في الأبطال.

· اطلعوا من الكونفدرالية دي.

· التنافس والطموح يجب أن يكون من أجل اللعب في دوري أبطال أفريقيا.

· والطريق ممهد للأهلي شندي والخرطوم الوطني.

· دي فرصتكم.

· المريخ الممتاز السنة دي تاميه (شكاوي).

· شكاوي ساكت.

· لا الأهلي شندي ولا الخرطوم الوطني – ما فيهم زول قدم ليه (شكوى).

· يعني الأحق بالتمثيل في دوري أبطال أفريقيا الأهلي شندي أو الخرطوم الوطني.

· المريخ مكانو (الكونفدرالية).

· المريخ لقى نفسو في كل موسم بمثل في الأبطال وهو (وصيف).

· عشان كدا بقى ما عندو طموح.

· ولا في اجتهاد.

· الأهلي شندي قادر على الإطاحة بالمريخ من بطولة دوري أبطال أفريقيا.

· المريخ خسر في ملعبه في الممتاز مرتين.

· خسر من مريخ الفاشر.

· وخسر من هلال الأبيض.

· وإن شاء اللـه سوف يخسر من الأهلي شندي.

· انسوا موضوع (سيلا).

· وموضوع صلاح إدريس.

· ألعبوا كورتكم بس.

· جضموا الفكر.

· ح تمثلوا السودان مع الهلال في دوري أبطال أفريقيا.

· أحسن ليكم من (الكونفدرالية) دي.

· حسابات الأهلي شندي والخرطوم الوطني يجب أن تتغير.

· يفترض يكونوا عارفين هم بعملوا في شنو؟.

· ما تبقوا (مساكين) ساكت.

· دافعوا عن حقوقهم.

· أنتوا الأجدر بالتمثيل مع الهلال في بطولة دوري أفريقيا في ظل تواضع المريخ محلياً.

· تاني الكلام دا ما بنقولوا ليكم.

· ولا بنجيب لينا سيرة (بطيخة) في الموضوع.

· فتحوا عيونكم.

· وبراكم أعرفوا.

· ما في حاجة صعبة.

· ………..

· ملحوظة : الليلة غرة ذو الحجة ..كل سنة وأنتم بخير ..دخلنا العشرة المباركات.

هوامش

· المطر السنة دي بقت تجي فجأة.

· تقوم الصباح تلقى الشوارع مطمبجة.

· الحاصل شنو؟.

· الهلال يلعب يوم الخميس أمام الأهلي شندي.

· الهلال لم ينتصر على الأهلي شندي في هذا الموسم.

· تعادل في شندي.

· وتعادل في أم درمان.

· لا بد من الانتصار يوم الخميس.

· ما عاوزين أي حاجة تلخبط علينا (العيد).

· بعد مباراة الأهلي شندي – مباراة للهلال أصعب في الممتاز أمام مريخ كوستي.

· والهلال رافع شعار لا للتفريط.

· ولا نقطة.

· خلاص بقينا على النهايات.

· الجهد يجب أن يتضاعف.

· والجماهير يجب أن تساند وتدعم.

· أيام الحصاد.

· عاوزين نلقط البطولات كلها.

· ولا بنتفاهم في الحاجات دي.

· ولا بنلعب.

· ولا عندنا وقت.

· انتصارات فقط بإذن اللـه وتوفيقه.

· ………..

· عاجل : يا ربي الليلة (الجو) كيف ؟..بكتب قبل جو الليلة طبعاً.


‫8 تعليقات

  1. والله العظيم انت مكانك تبيع موية ولا تشيل مساويك ،عامل ظريف يعني قوم بلا يخمك انت وكتابتك المعفنة ،يعني انت صحفي حسه انت والعوير علي عمر وسلك وهيثم ،والله كرهتونا الكورة ،لكن ماانتو ارزقية لازم تقول الكلام الفطير الماعندو معني ده

  2. يا استحى دى لو فيك ذرة دم غير إعلامكم المأجور هذا هو ما هبط بالكوره فى السودان وبعدين تعال هنا عاوز تقارن المريخ بالهلال ابسط شىء المريخ جاب كاس مانيلا ، كاس دبى ، كاس الصداقة (الشيخ زايد) انظر للتاريخ ماسك لى فى الدورى الحلى بالله بربك أية درى محلى عندك لا تشوف الدورى مثلا فى الخليج ؟ مثال عندما يلتقى النصر والهلال فى السعوديه أية فن وجمال وكوره حقيقيه دائماً صحافه دون المستوى يا اخى ترفعوا شويا وانظروا من حولكم واتركوا هذه الصحافة الماجوره ولا الظروف صعبه لابد منها ؟

  3. ياخي اختشي .. بالله انت صحفي .. بدل تتكلم في الصعوبات والمشاكل البتواجه الهلال…و الخطط المستقبلية ليهو.
    تتكلم فلان ده قال وده سوي ونحن عملنا وتاريخنا كدا….ياخي السودان زاتو اول من نال بطولة امم افريقيا وكنا من المؤسسيين…اها البعدنا ديل الشالوا امم افريقيا صحبة راكب…
    ياخي اختشوا انت والرشيد عمر ورمضان السيد ومزمل ابوالقاسم وسلك….هدفكم الربح.. وكأنوا انتوا الوحيدين البتدافعوا عن الناديين.
    شاحد الله ربي الكريم يقوم النائب الاول يوقفكم سنة من الكتابة وكمان صحفكم… عشان نشوف حقوق الهلال والمريخ دي البتتكلموا بيها بتروح ولا لا…
    ياخي اكتب وانقد طريقة اللعب واللاعب في الميدان فقط بدون ما تستهزوء بزول ولا نادي …بالطريقة بتاعتكم دي…قريبا سوف تكون معارك وبيكون فيها قتلي وجرحي… انظروا الي ماّذا سوف تؤدي كتاباتكم

  4. اذا افترضنا جدلا أنو المريخ قابل الهلال في النهائي و فاز بالكأس .. ح يكون أحرز البطولة بفضل الهلال برضو !! ..
    أنا خايف تقول المريخ فاز بالبطولة بفضل سائق البص الذي نقلهم من الفندق للأستاد، لأنو ما كانوا ح يصلوا الاستاد لو ما السواق دا .
    يعني بنفس المنطق ممكن سواق البنطون يطالبك ب 20% من دخلك، لأنو لو ما هو ما كان قطعت البحر وجيت الخرتوم .. دي سقطة كبيرة يا أستاذ !!!

  5. الناس تتكلم عن الانجازات و علاج الاخفاقات و لما تتكلم عن التاريخ تذكر الانجازات الكبيرة …. انت انجازاتك صحبة راكب … كلامك دا ذي كلام ( و كانت الزيارة ناجحة بكل المقاييس و مقياس (انجاز ) واحد يقولو عليهو مافي ) خليك في وصافتك و صفرك العالميين ديل و قرط علي كدا … الجمل ماش …. شوف ليك سكة غير دي

  6. كتب الصحفي الجهلول محمد عبدالماجد: ( لولا الهلال كان المريخ ما عندو أي فرصة يمثل في (الأبطال) – البطولة المحتكرة للهلال وصاحب الرصيد والأرقام القياسية فيها)

    البسمع المحتكرة دي…يقول الهلال أحرز البطولة (المحتكرة دي) بالميت كده للمواسم العشرة المنصرمة..

    والله كان (محتكرة) ما عارف..

    على أساس إنه دمك خفيف؟؟

    إنت صحفي ولا مشجع متكل في لستك ولا حجر في ناصية ميدان في الحلة؟؟

    قوم لف

  7. · الموضوع دا كلو من ناس هيثم مصطفى ومدثر كاريكا وبشه (كتر خيرهم) ..هم الذين أجبروا الاتحاد الأفريقي على رفع تمثيل السودان في البطولات الأفريقية إلى أربعة أندية.

    · لولا الهلال كان المريخ ما عندو أي فرصة يمثل في (الأبطال) – البطولة المحتكرة للهلال وصاحب الرصيد والأرقام القياسية فيها.

    · كمان نحن بنلعب.

    · سيادة طوالي وسيطرة مستمرة.
    فعلا نتائج الهلال ليها القدح المعلي في تمثيل السودان بي اربعة فرق ولكن لا يمكن تجاهل المريخ في الكونفدرالية والابطال ومشاركة المنتخب الوطني في الامم الافريقية
    لكن قلت لي الهلال محتكر البطولة كدي حدد محتكر البطولة ولا المشاركة في البطولة
    عليك الله بطل الهضربة يوم واحد واتكلم عن الهلال الذي سيواجه بطل مجموعة الحمام