ريحة المطار مالها جابت ليها (استقالات)؟

جمال الوالي لو فات ..غارزيتو ح يطلعوه ليك من شقتو ويمشي يسكن في عنابر السكة الحديد في الخرطوم
طبعا السودانيين عندهم طيارات بتقوم متين ما معروفة ..بتصل متين ما معروفة..الاحتمالات كلها مفتوحة
ناس امير كمال تاني المدرب وقت يقول ليهم مالكم متأخرين ..بقولوا ليه واللـه الليلة المواصلات صعبة شديد
في واحد قال لي زمان في المريخ كان بطير (الشيك) – في عهد جمال الوالي الشيك ما بطير ..بطير المريخ

الجماعة منتظرين يمشوا (المطار).
وينتظروا الشنط.
ويقولوا ليهم : تعالوا بالبوابة التانية.
يسألوا من موعد الطيارة.
الطيارة بتصل متين؟.
طبعا السودانيين عندهم طيارات بتقوم متين ما معروفة ..بتصل متين ما معروفة.
الاحتمالات كلها مفتوحة.
الطيارة عندهم زي (الظروف) اتوقع منها اي شيء.
ظروف شنو؟.
الطيارة عندهم زي (ود ابرق) ..اي حاجة ممكنة منها.
يمكن تجي.
ويمكن لا.
يمكن يلغوها.
ويمكن يشيلوها من الجدول.
اتلتلتوا ليكم بي (ريحة) ساكت يا سلك.
هو عليكم اللـه نحن عندنا مطار – عندنا طيارات ..عشان تشبكوا لينا في (ريحتو).
المطار في عضمو ما في ..تقعدوا تشموا لينا في ريحتو.
دي قابلتكم قبل كدا.
معاوية الجاك ح يعمل ليه (شمطة) للصباح مع حارس البوابة الالكترونية.
يا معاوية الموضوع ما بيستاهل.
الموضوع طلع ريحة ساكت.
وريحة ضاربها كمان.
الطيارة يا شباب قالوا ح تتأخر شوية.
بعد ما اقلعت رجعت للبنشر تاني.
جماعتكم قاعدين من مارس الماضي يشمشموا في (الريحة).
عارفين ريحة المطار ودتهم وين؟.
ودتهم (المفوضية).
اصلها (الاستقالات) وقت يجمدوها كدا بتعمل ليها (ريحة).
بتجيب ليها (ريحة).
ريحة زي ريحة المطار.
الموضوع بعد فحوصات …وشمشمات طلع ما ريحة المطار.
عارفين طلع شنو؟.
طلع (استقالات) ساكت.
كمان يا سلك بتبالغوا عديل كدا.
ريحة المطار – من (الاستقالات) ما بتعرفوها.
واحد قال لي المريخ ح يكون كيف بعد جمال الوالي.
قلت ليه عليك اللـه ما تسألني السؤال دا.
عشان السؤال دا سؤال محرج شديد.
وفي الناس بيضايقوا – وما بيعجبهم الكلام دا.
تاني ناس امير كمال ينزلوا من مواصلات الشعبي للتمرين.
المدرب وقت يقول ليهم مالكم متأخرين ..بقولوا ليه واللـه الليلة المواصلات صعبة شديد.
واقفين في الموقف من الساعة اتناشر…ما في عربية فاضية.
واللـه الموقف (ركشة) ما فيه.
امير كمال – انت البقعدك مع الجماعة ديل شنو؟.
الجابرك شنو على مواصلات السوق الشعبي؟.
يا زول اوعك تتورط.
احسن ليك اتخارج من بدري.
اهلي شندي احسن ليك من الكلام دا؟.
القرع ح يدور ليك في معسكر المريخ.
والبامية المفروكة.
والكسرة الطاعمة.
وقت يتقلبوا الهوبة كدا ..بجيبوا ليهم (باسم).
المعسكر كلو يضرب ليك في (الباسم).
بما في ذلك لجنة التعبئة.
جمال الوالي لو فات ..غارزيتو ح يطلعوه ليك من شقتو ويمشي يسكن في عنابر السكة الحديد في الخرطوم.
ولدو يمشي (داخلية حسيب).
اول داخلية حسيب مالها؟.
داخلية حسيب ما فيها مشكلة ..بس (الشقق) الطول والعرض داك ..تاني انطوانيو ما بلقاها.
ايجار الشقق طار السما.
قالوا ليك غارزيتو في (شقة).
وولدو في (شقة).
دا كلام يا جماعة.
التكية دي بعد ما يفوت جمال الوالي تاني ما بتلقوه.
المدرب في شقة.
ومترجمو في شقة.
وولدو في شقة.
هملة بس.
بكري المدينة ذاتو ..ح يتشغل بالمسكول.
عاوز مدثر كاريكا – بمسكل ليه.
مدثر كاريكا برجع ليه.
عاوز نزار حامد بمسكل ليه.
نزار حامد برجع ليه.
نحن عارفين حالتكم صعبة.
والوضع خطير جدا.
حكاية انو يضرب عديل كدا …تاني ما في.
حليل زمن الضرب.
حليل زمن الشاي باللبن.
شفتوا شاي الصباح تاني ح تشربوه (سادة).
واحتمال (سكر) ذاتو يكون مافي.
تشربوه بالبلح.
حالتكم تاني ح تكون صعبة.
عارفين حافز الانتصار في المباراة ح يكون شنو؟.
كيس حلاوة.
انتوا نسيتوا وقت جمال الوالي استقال ..وجابوا ليكم عصام الحاج.
عصام الحاج اول قرار اصدرو ..قال ما عاوز (مراوح) تشتغل ساكت.
اول شيء عملها عصام الحاج وقف المكيفات.
تتخيلوا بعد الكلام دا قطعوا (الكهربة) من النادي.
النادي عاش في ضلام دامس.
اها انتوا الوضع دا بتقدروا عليه.
6 شهور ابتعد فيها جمال الوالي ..الكهربة من نادي المريخ قطعوها.
اذا الكهربة قطعت…الحاجات التانية كيف؟.
الطيارات الخاصة.
يا حليلهم دوام بطراهم.
حافز الدولار.
عد فات مع الايام.
شفتوا يا ناس المريخ عشان اكون معاكم واضح (ضربات جزاء) تاني اثناء المباراة ما بدوكم ليها.
ولا تحلموا بيها.
الحاجات دي كلها ح يرفعوا (الدعم) منها.
ح يجيبوا ليكم رئيس ..يقفل التمارين.
ويقول التمارين بالقروش.
تسجيلاتكم تاني ح تصبح بـ (الاتوس).
والاقساط.
والشيك الطائر.
في واحد قال لي زمان في المريخ كان بطير (الشيك) – في عهد جمال الوالي الشيك ما بطير ..بطير المريخ.
اكرا ح يعمل ليه (عجلة).
عربية ما تحلم بيها.
ايمن سعيد عشان زول شفت بعمل ليه دراجة نارية.
حكاية العربيات دي ولا تحلموا بيها.
بكري المدينة اصلو كراعو حارة.
جاء الهلال شال صلاح ادريس.
مشى المريخ شال جمال الوالي.
محل ما يقبل ..بنشفها.
بشقبلها.
ح تشوفوا (الشقلبة) على اصولها.
ح ترجعوا للصناديق تاني.
قبل التسجيلات يدخلوا ليهم (صندوق).
قبل المعسكر ح يعملوا ليهم (صندوق).
ح تسيروا المريخ بالصناديق.
شالكة.
بايرن ميونخ …تاني تنتظروهم يوم الجمعة ..إلّا تشوفهم في عالم الرياضة.
في تلفزيون الولاية.
التلفزيون القومي ذاتو ما بتحلموا بيهم فيه.
خلاص الحاجات دي انتهت.
عشان كدا …امير كمال بقى يفكر يمشي اهلي شندي.
راجي ..قال عاوز الخرطوم الوطني.
بلة جابر ..الاهلي الخرطوم.
غارزيتو ذاتو قال بعد جمال الوالي لو عمل ليه (لوري تراب) ما بقعد تاني في المريخ.
البقعدو شنو؟.
معقولة يقعد يحرس ليكم ريحة المطار.
ناس همد كلام زي دا ما بنفع معاهم.
جمال الوالي لو قبل كدا ..بشيلوا ليك غارزيتو.
………..
ملحوظة : حالتكم صعبة واللـه.
هوامش
التسجيلات القادمة – ناس المريخ يمكن يدخلوها باعادة قيد اسامة بريش.
ما عندهم طريقة لي امير كمال.
الموضوع دا ولا بقدروا عليه.
صلاح مشكلة ..مرشح للاشراف الفني على المريخ.
المدير الفني للمريخ صلاح مشكلة.
المريخ يفاوض (خليفة).
تسجلوا قدر قرشوكم.
اوعكم تاني اسمع لي واحد فيكم بتلكم عن ريحة المطار.
لكن نحن كهلالاب ..ح نفقد جمال الوالي.
ح نفقد (الوصيف الدائم).
الزول دا ريح الهلال جنس راحة.
الممتاز في وجود جمال الوالي بقى (هلالي) خالص.
بتذكروا اخر مرة فاز بيها المريخ بالممتاز.
واللـه فقد.
المريخاب ما براهم الذين فقدوا جمال الوالي.
نحن الهلالاب برضو فقدناهو.
وارغو برضو ح يفقد جمال الوالي.
لكن جمال الوالي دا ممكن يقدم الاستقالة الليلة.
بكرة تلقوه رئيس للجنة التسيير.
اتوقعو منو اي حاجة.
ممكن يشيل ناس همد..ومتوكل.
ويرجع ليكم بكرة بي ناس عبدالباسط حمزة.
عملها قبل كدا.
الهلال حسم الممتاز.
حقق الهلال انتصار غال على مريخ كوستي.
مريخ كوستي فريق ما ساهل.
من افضل اندية الممتاز مريخ كوستي.
الليلة نشوف الاهلي شندي ح يعمل شنو؟.
بنشوف ونرجع نعلق.
لجنة الاسئتنافات بكرة ح تقول شنو؟.
ما في اي قيمة لقرارات اللجنة.
كلام جرايد ساكت.
لجنة ما بتقدر تنفذ قرار اصدرته منذ خمس شهور ..شن طعمها.
وشن فايدة قراراتها.
احسن تسكتوا ساي.
…………..
عاجل : الممتاز موضوعو انتهى خلاص.