خلوا (لجنة الاستئنافات) تبقى ليكم مواصلات وسكر وغاز ورغيف

حكاية انك تقلب صحن القرع مع السلطة ..وتعجن الحاجات دي كلها بي (كسرتها) – نحن ما عندنا
حتي اغنية عثمان حسين (شجن) نظمها جكسا في (هدف) على الطائر عندما حول (لمتين يلازمك في هواك مر الشجن) الي قون
الليلة بنكتب ليكم واللـه العظيم بي نفس الفرحة التي نكتب بيها وقت انتصار الهلال – انتصار (المواقف) اعظم
ارتحنا من خمجكم البتعملوا لينا فيه دا ..لجنة الاستئنافات ولجنة البرمجة ..ومريخاب الجنوب
قبل ما نتعلق بي (نظريات) جكسا …عندما كان يضيف (النكهة) للقهوة و (السكر) للشاي…اتعلقنا بي (مواقف) الهلال.
القصة ما (قهوة).
ولا شاي (سادة)….السكر برة.
في ناس بصلوا اقصى غايات ابداعهم لمن يكوركوا (السكر برة).
نحن عملناها الآن بي فهم.
الكاردينال سواها ..شربنا (قهوة) – سكرها برة تتطعمها على كيفك.
على مزاجك.
جكسا جاب علوم الحاسوب.
تنكلوجيا (الطوحال).
وادhرة الاعمال.
الكلام دا كلو بي (الواتساب) ذاتو ظهر في كورة (جكسا) قبل الجامعات الما فيها غير (اللافتات).
العلم دا وصلو من بدري.
انتوا قاعدين وين؟.
جكسا يا.
جكسا عمل اي حاجة في الكورة ..(الدكوة) دي لو فتشتها في (الباك) البقابل جكسا بتلقاها في (ركبتو)…يحلحل ليك في (الباكات) متل الكوتشينة اخر اللعب.
كل (باك) بيمشي ليه على (حلة).
انتوا قايلين الثورات دي ظهرت من وين؟.
من البعمل فيه جكسا.
الثورات الحارات يا جماعة.
ام بدات ذاتها جات كيف؟.
العمائل دي كلها عمائل جكسا.
حتي اغنية عثمان حسين (شجن) نظمها جكسا في (هدف) على الطائر عندما حول (لمتين يلازمك في هواك مر الشجن) الي قون.
طه حمدتو يقعد يكورك ليك في (الهدف) لمن حجارة البطارية بتاعة الراديو تنزل.
تختها تاني يوم تحت (الزير) ..وتعضيّها بي سنونك عشان تسمع (عالم الرياضة).
لا سيحة ولا عبدالرحمن عبدالرسول.
لخبطة زي دي ما في.
جكسا ..زرع في حلتنا الحاجات دي.
كنا بنطلع بعد المباراة نتقالد في (واتلاشت الاحلام وين حسن ظنك بي).
نكسر جنبة.
و51 ضلعة.
اشطر اختصاصي جراحة ما بيفهم حاجة.
نضحك مع (شجنا) من الاضان للاضان.
التوم ود الشامة الدكتور مانعو من (الضحك) ومن مشاهدة اهداف نصرالدين عباس جكسا.
وملافحة الكلام.
قدر يمسك نفسو من اي شيء ..إلّا اهداف جكسا.
الليلة بنكتب ليكم واللـه العظيم بي نفس الفرحة التي نكتب بيها وقت انتصار الهلال – انتصار (المواقف) اعظم.
الغريبة (المطر) شغالة.
وما خايف من شيء ..إلّا من قطوعات الكهربة.
بعد كدا قطوعات الكهربة دي بنقيف فيها.
الليلة نحن مبسوطين.
فرحانين في عمرنا.
شمينا لينا (هوا) نضيف.
طلعنا من حالة اللا وعي بتاعة الاتحاد (طلب فحص).
قالوا ليكم نحن في المنطقة الصناعية.
عنبر ولادة.
شنو (المسخرة) الفارغة البتعلو فيها دي.
انتوا عاوزين تكبروا متين؟.
انتوا قايلين الدنيا دي كلها (تذاكر سفر).
فاكرنها كلها (اصحاب – اصحاب).
يا جماعة الناس بتكبر.
الليلة ارتحنا من خمجكم البتعملوا لينا فيه دا ..لجنة الاستئنافات ولجنة البرمجة ..ومريخاب الجنوب.
قوموا لفوا عليكم اللـه.
خلوا مريخاب الجنوب ينفعوكم.
انتوا مريخاب الجنوب طلعتوهم من البلد ..عاوزين تقولوا لينا بعد (الانفصال) مريخاب الجنوب قالوا.
مريخاب الجنوب بتعرفوا ليهم شنو؟.
قالوا ليكم نحن ناقصين (حوار وطني).
وطلب فحص.
والتوالي.
والنظام الخالف.
الحاجات دي نحن خلاص شبعنا منها.
عرفناها.
بقت ما بتمشي علينا.
ولا بتمشي على زول.
الهلال انسحب.
ابقوا اركزوا يا مجدي (نثريات).
اركزوا يا اسامة (وكلات).
ويا معتصم (فحص مراجعة).
وسمير (ما بتذكر).
من (المواقف) بطلعوا الرجال ..وبيظهر الهلال.
ناس الهلال ديل كلهم كدا.
ممكن تختلف معاهم.
ممكن تشاكلهم ..ويكون عندك فيهم رأي..لكن ساعة الجد وساعة المواقف ..كلهم بتلقاهم قدام.
كلهم ناس حارة.
ما بعرفوا (الدسدسة) والكلام من تحت النخرة.
الخمج ما عندهم.
كلهم واحد.
في النهاية هم عندهم اعظم بطاقة واجمل رقم …..(هلالاب).
بتلقاهم قدام ..بدافروا على الحارة.
ما في زول بموت قبل يومو – لكن في زول لو مسكتو (نزلة) ساكت تلقاه بخاف يسمع نشرة تلاتة عشان ما يزعوه ضمن المتوفيين.
ما بتخوفنا نزلة.
ولا لجنة استئنافات.
نشرة تلاتة زمان كانت خطيرة.
بي نزلة ساكت بتلحقها.
هسع نشرة تلاتة ما فيها غير (قالوا وقلنا).
ووضع حجر الاساس.
نحن هلالاب ..ولدونا في شمس (تفقع).
من الحرارة دي طلعنا بي (طوريتنا).
العراقي فوقنا …يهبهب من الفرح.
ملامحنا غبشاء …ولونو اسود ..وما بنقبل الحقارة.
الخمج في (صينية الغداء) ما بنقبلو.
حكاية انك تقلب صحن القرع مع السلطة ..وتعجن الحاجات دي كلها بي (كسرتها) في الصينية– نحن ما عندنا.
ولا بنقبل بالحاجات دي.
ولا بنقبل بيها.
هلالاب مواقف ..ما ضربات جزاء.
ولا لجنة استئنافات.
ما كانت (التمريرات) البرنسية هي براها البرقص فيها العريس ويهز ويرز في حنتو.
هيثم مصطفى …مشى المريخ ..فضل القعاد في بيتو.
ديل الهلالاب.
الدحيش ..من تاني يوم طلع الفانلة الحمراء.
ديل الهلالاب.
القضية عندنا اكبر من (انتصار) – وضربة مرمي.
ومريخاب الجنوب.
لمن المريخاب كانوا بطلعوا يتكلموا عن (ضربة جزاء) بعد المباراة – نحن (الشفوت) برانا كنا بنتكلم عن (موقف) الطيب عبداللـه زعيم امة الهلال لمن قال الهلال يلعب امام الترجي الساعة اتنين ظهرا.
الاتحاد الافريقي قام وقعد.
والاتحاد السوداني بقى زي (صينية الغداء) في بيت الفراش ..صحانتها مجدعة كل صحن بكورك للتاني.
والداخلية قامت وقعدت.
ووزارة الصحة.
في النهاية المباراة اتلعبت الساعة اتنين.
والي الدين محمد عبداللـه يجيب ليك في الاقوان في (الهجيرة) تقول بالع ليه (مجروس).
ولا بقيف.
النحيف ..الغزال ..وقت يشبح بكون ليك (اخر ظهور) في القون.
ما بتعرف الحصل شنو؟.
الموضوع في الاساس كان شنو؟.
تتلخبط في الدنيا دي جنس لخبطة.
كراعك الشمال تدخلها في اليمين.
وتفتش في (يمينك) وانت شايلها في كراعك.
والي الدين ..اللـه يرحمه ويغفر ليه.
ود الجنيد ..كان وقت تشوفو بلعب في المنتخب القومي بتقول ليه المنتخب السوداني ما بشيل كاس العالم.
بالروح والقتالية ذاتها.
ما في يوم قال فيه ما بسافر مع المنتخب.
ود الجنيد اتصاب مع المنتخب…ورحل من الدنيا دي ..واخر مشهد ليه كان واقف فيه متل الاسد الجسور.
اللـه يرحم ود الجنيد.
الحكاية عندنا ابدا ما كورة.
انسحاب بي موقف عندنا اعظم من الف بطولة.
بطولات (تحويل الرصيد) واي حاجة بي خمسة.
السوق كسر.
ناس سمير فضل ..(النقاط) بوزعوها في آخر الموسم حسب (التوصيات).
شغالين (كسر).
الهلالاب ما كدا.
ديل ما نحن.
حاجاتنا كلها كدا.
سحر صديق منزول ما كان في (كورتو) ولا في تسديداته التى تسدد بـ (155) طريقة وهي متجهة نحو المرمي.
الحارس والاحتياطي بتاعو ومدرب الحراس ..كلهم بتجيهم (فلايت).
صنقيع ساكت – بروحو فيها.
العاجبنا في صديق منزول (مواقفه) – كان زول زي (رئيس الوزراء) في الملعب.
عندو (كلمة) قبل الكورة.
يحترمه زملاؤه ..والجمهور …والفريق الخصم وحكام المباراة.
اولاد صديق منزول في اي موعد بتلقاهم.
ناس فوزي المرضي …لو وضعت (الاسد) امامو …ما بتعرف فوزي من الاسد ..والاسد من فوزي.
الاسد ذاتو بحس بي احراج بقول ليكم يا جماعة انتوا مالكم بتصعبوها كدا.
خلوها حلوة شوية ..فوزي المرضي ..(كتير) علي.
ديل اولادك.
ديل اسيادك.
وردي بغني لينا كدا.
دا الهلال ..الشلناه في (قلوبنا) قبل ما نعلقو في بيوتنا.
ما كانت فارقة كتير عندنا نفطر او ما نفطر.
نلقى مواصلات او نرجع كداري.
نشرب الشاي بي سكر ..او بي (تمر).
نسافر …وإلّا نتقطع.
نبيت القوا.
اصلو ما فارقة.
هدف من والي الدين محمد عبداللـه كان بخلي ليك (الخرطوم) زي العروس ..شوارعها تتواق من (الفرح) وترجع تاني (مبسوطة).
في زول بتشقو (فرحة).
لمن غنينا لي تنقا …الحكاية ما كانت في (العكسة) ولا في هندسة جامعة الخرطوم.
الموضوع كان اكبر من كدا.
اكبر من اكسفورد ذاتها.
مدرجاتنا دي ..(جامعتنا) الاولى.
منها اتعلمنا.
وقبل ما نتعلم الكتابة اتعلمنا منهم (المواقف).
لا بنهادن ..لا بنصالح.
ولا عندنا البين بين.
نحن (مقتولين) في الموقف ..واللون الابيض …والازرق.
شفتوا ليكم يوم في الايام ..السما بقى لونها (احمر).
بقى (اصفر).
سمعتوا جمال الوالي دا قال عاوز (ينسحب).
شن قدرهم بالانسحاب.
جمال الوالي اكتر حاجة بعملها بيستقيل ..ويرجع بعد (4) شهور.
الاستقالة – الاجازة السنوية عند جمال الوالي.
الكاردينال سجل ليه موقف.
لا جوهرة زرقاء.
ولا بطولة الاندية الافريقية ذاتها.
دا الموقف العاوزنو ليك.
دا الهلال الذي نعرفه.
ما عندنا قضية بي زول.
لكن تاني حكاية الغاز قطع ح تكتر.
الكهربة وين ؟…ح تظهر.
الموية مافي ..ح نأزر.
شفتوا تاني المواصلات دي لو (فاضية) ..انت والسواق والكمساري ..ح نشوفها (زحمة).
ما في عديل كدا.
الرغيفة دي ليه صغيرة كدا.
والشاي.
والسكر.
هو نحن عندنا شنو غير (الهلال).
بنتم بيه (الفطور).
بنسدد بيه رسوم الدراسة.
ونطلع نتونس بيه في الشارع.
يا هو (الهلال).
كمان عاوزين تعملوها لينا (طلب فحص).
قوموا عليكم اللـه.
استفيدوا من وقتكم.
كورة بالطريقة دي في (شليل) ما بتنفع معانا.
………..
ملحوظة : قولوا ما شاءاللـه على الهلال.
هوامش
الكاردينال اتخذ موقفا يحسب له.
كفى انه لبي رغبة الشارع الهلالي.
المهمة تستمر الى ان يزول هذا الاتحاد.
الموسم القادم ذاتو مع ناس اسامة عطا المنان ديل ..ما عاوزين كورة.
ما تغشوا الناس ساكت.
ما تملأوا وقتكم بي (طلب فحص) في الفاضي.
في وجود معتصم ومجدي واسامة ولجنة الاستئنافات …(اللحمة) دي في السوق ما عاوزنها.
اصلو ما بنكضب.
ولا بنجامل.
ولا بنهادن.
فترنا من (الطبطبة).
فترنا من (السكوت).
فترنا من (مريخاب الجنوب).
لازم يكون في حد للفوضي دي.
كورة بدون قانون – شن طعمها؟.
خليناها ليكم يا اسامة.
اشبعوا بيها.
وابقوا الصمود يا الكاردينال.
ما تتنازلوا عن حقوقكم.
يا اسود يا ابيض.
اللون (الرمادي) خليناه للتانين.
……..
عاجل : مبروك للهلال…الف مبروك.